Vasaka ya mũthya ya Yesũ yaĩ ya mwanya mũno. Nũndũ nĩweesĩ akilyĩ kũkw’a, nĩwavangie kũya Vasaka na atũmwa make na ayambĩĩsya ũndũ mweũ ũla waaĩle kwĩkawa kĩla mwaka, naw’o nĩ Kyaũya kya Wĩoo kya Mwĩaĩi. Kwoou nĩwatũmie Vetelo na Yoana makaseũvye nyũmba ĩla mesaa kũtũmĩa. (Luk 22:7-13; sisya visa ĩthangũnĩ ya mbee vyũ.) Ũndũ ũsu wĩtũlilikany’a kana nĩtwaĩle kwĩyũmbany’a kwondũ wa ũmbano wa kũlilikana kĩkw’ũ kya Yesũ ũla ũkekwa Matukũ 27, Mwei wa 3. Ikundi nitonya kwĩthĩwa syĩkĩte mĩvango ya ũla ũkaumya ũvoo, mũkate na mbinyu ila ikatũmĩwa, na maũndũ angĩ makonetye ũmbano ũsu. Ĩndĩ kĩla ũmwe witũ atonya kwĩka ata nĩ kana eyũmbanĩsye ũmbano ũsu?

Ũmbany’a ngoo yaku. Soma na ũivindĩĩsya ilungu sya kũsoma Mbivilia ĩvinda ya kũlilikana kĩkw’ũ kya Yesũ. Walany’o ũla wonanĩtye ilungu isu wĩ ĩvukunĩ Kũneenea Maandĩko Kĩla Mũthenya. Nako kavuku Mwongozo wa Kujifunza Neno la Mungu, kĩlungu kya 16 ve ũvoo mwingangĩ ũkonetye kĩkw’ũ kya Yesu. (O na ĩngĩ sisya Kavuku ka Ũmbano wa Mwĩkalĩle wa Aklĩsto ka Mwei wa 4, 2020.) Andũ ma mũsyĩ no mamanthe ũvoo matonya kũneenea ũthaithinĩ wa mũsyĩ ũkonetye nĩkĩ wovosyo nĩ wa vata kwa kũsisya Ĩvuku ya Kwĩka Ũkunĩkĩli ya Ngũsĩ sya Yeova.

Thokya angĩ. Ĩyumye vyũ kambeininĩ ya kũthokya andũ. Sũanĩa ĩũlũ wa andũ ala ũtonya kũthokya ta masyokeo maku, ala mweemanyĩasya Mbivilia tene, anyanyau, na andũ ma mũsyĩ. Atumĩa nĩmaĩle kũĩkĩĩthya kana nĩmathokya ala mavoie. Lilikana kana ethĩwa nĩwathokya mũndũ na ndekalaa kĩsionĩ kyenyu, no wone saa na vala ũmbano ũsu ũkekĩwa kĩsionĩ kyoo wavingũa jw.org vala vaandĩkĩtwe ĨŨLŨ WITŨ na ũitina vala vaandĩkĩtwe “Kũlilikana Kĩw’ũ kya Yesũ.”

Nĩ maũndũ angĩ meva tũtonya kwĩka nĩ kana twĩyũmbany’e?