No ala atheu mwĩkalĩlenĩ woo matonya kũtanĩa ngwatanĩo nzeo na Yeova. (1Vt 1:14-16) Yĩla amanyĩw’a ma Mbivilia maeka kĩmanyĩo kĩthũku, nĩmatonya kwĩthĩwa na ngwatanĩo nzeo na andũ ma mũsyĩ, mĩĩ yoo ĩkaseũva, na makasũvĩa mbesa syoo.

Maelesye ũteũvitha kĩndũ ĩũlũ wa myolooto ya Yeova ya mwĩkalĩle, nĩkĩ ũtũnengete myolooto ĩsu, na ũndũ tũtonya kũtetheka twamĩatĩĩa. Sũanĩa ũndũ ũtonya kũtetheesya amanyĩw’a maku mavĩndũe nzĩa yoo ya kũsũanĩa, na ĩndĩ makeethĩwa matonya kwĩka kwenda kwa Yeova. (Aev 4:22-24) Maĩkĩĩthye kana Yeova no amatetheesye makasinda kĩmanyĩo kĩthũku kĩla mew’aa kĩ vinya kũeka. (Avi 4:13) Mamanyĩsye kũneena na Yeova kuma ngoonĩ yĩla makwatwa nĩ wendi wa kwĩka naĩ. Matetheesye mamanye maũndũ ala matonya kũmalikya matatwanĩ, na mayĩvathana namo. Mekĩe vinya meke maũndũ matonya kũmatethya vandũ va kwĩka maũndũ matamatethya. Tũkeethĩawa na ũtanu yĩla twoona amanyĩw’a ma Mbivilia matetheew’a nĩ Yeova kwĩka moalyũku.

ĨLOELEI VITIO, TETHEESYA AMANYĨW’A MAKU MA MBIVILIA MASINDE IMANYĨO NTHŨKU, NA ĨNDĨ MŨISŨNGĨA MAKŨLYO AA MAATĨĨE:

• Mo atumĩa na Neeta nĩmamũthatĩa Rose yĩla mamanya ĩũlũ wa kĩmanyĩo kyake kĩthũku?

• Neeta eeka ũndũ ũngĩ wĩva atetheesye Rose?

• Rose amantha ũtethyo kuma kwa Yeova ata?