Mĩisyo ĩendeee kwongeleka mũno ũmũnthĩ. Yĩla mũisyo waumĩla, mũvango wa kũnengane ũtethyo nĩwaĩle kũvangĩthwʼa na ũkaũngamĩwa nesa. Nũndũ wa kĩtumi kĩu, Nzama Ĩla Ĩtongoesye nĩyĩkĩte mũvango nĩ kana Mũvĩa wa Kũnengane Ũtethyo Ĩvinda ya Mũisyo wĩthĩwe vo kĩla ovisinĩ wa ũvonge.

Ana-a-asa ala methĩawa mũvĩanĩ ũsu mamanya ve mũisyo waumĩla, nĩmaneenaa na mĩtũkĩ na atumĩa ma kĩkundi kĩsionĩ kĩu nĩ kana mamanye ũndũ atavanyʼa matonya kũtetheewʼa. Ethĩwa mũisyo ũsu waete wanangĩko mũnene ũkethĩa nĩ vinya kwa atavanyʼa kũũthĩnĩkĩa, ovisi wa ũvonge no ũtũme ana-a-asa ala manyuvĩtwe nĩ kana matongoesye wĩanĩ wa kũnengane ũtethyo. Ana-a-asa asu no makũlye andũ meyumye kũtetheesya kana maumye syĩndũ sya kũtetheesya. O na no mathooe syĩndũ ila syĩkwendeka na mainenga ala me na vata nasyo.

Ve moseo maingĩ mũno ma kwĩka maũndũ kwa nzĩa ĩsu. Kĩu nĩkĩtumaa mũtatethya wĩa mwingĩ wa mana, mũtavĩngĩĩsana, na mũtatũmĩa mĩvothi na syĩndũ ingĩ naĩ. Maũndũ asu nĩmakothaa kwĩkĩka yĩla ana-a-asa moosa ĩtambya matakũlĩtwʼe.

Ana-a-asa ala manyuvĩtwe nĩ ovisi wa ũvonge nĩmo matusaa nĩ mbesa siana ata iũtũmĩwa, na nĩ andũ meana ata mekwendeka kwĩyumya matetheesye ĩvinda ya kũnengane ũtethyo. O na ana-a-asa asu no maneene na anene ma silikalĩ ma kĩsio kĩu, ala mavinda maingĩ methĩawa matonya kũtetheesya nĩ kana wĩa wa kũnengane ũtethyo ũtethwʼe na mĩtũkĩ. Kwoou mũndũ ndaĩle kũmbanyʼa mĩvothi, kũnengane ũtethyo, kana kũthi kĩsionĩ kĩla kĩkwatĩtwe nĩ mũisyo atakũlĩtwʼe eke ũu.

O na vailye ũu, yĩla mũisyo waumĩla, nĩtwendaa kũtetheesya. (Avl 13:16) Nĩtwendete ana-a-asa maitũ! Kwoou tũtonya kwĩka ata tũmatetheesye? Ũndũ ũla wa vata tũtonya kwĩka nĩ kũvoya kwondũ wa asu makwatĩtwe nĩ mũisyo, na kwondũ wa ala meũmatetheesya kwa kũmanenga ũtethyo. O na ĩngĩ, no tumye mĩvothi kwondũ wa wĩa wa nthĩ yonthe. Ovisi sya ũvonge, syĩ ungu wa Nzama Ĩla Ĩtongoesye, nĩsyĩthĩawa syĩsĩ vala mĩvothi ĩtonya kũtetheesya mũno. Ethĩwa no twende kũtetheesya, no twonanyʼe kana nĩtwĩyumĩtye kwa kusũsya vomu yĩtawa Ombi la Kujitolea Katika Kazi ya Usanifu na Ujenzi (DC-50).

ĨLOELEI VITIO YĨ NA KYONGO MBUA YAETIE WANANGĨKO MŨNENE BRAZIL, NA MŨISŨNGĨA ĨKŨLYO YĨĨ YĨATĨĨE:

Nĩ kyaũ kyakwendeesya ĩũlũ wa ũndũ Ngũsĩ sya Yeova syanenganie ũtethyo ĩtina wa mbua ĩla yaetie wanangĩko mũnene nthĩ ya Brazil mwaka wa 2020?