Naaũ twaĩle kũmathokya twĩ atanu? Nĩ onthe ala mooka maũmbanonĩ, methĩwe nĩ aeni kana nĩ andũ twĩsene namo kuma tene. (Alo 15:7; Aevl 13:2) Nĩvatonyeka ũkethĩa nĩ mwana-a-asa kana mwĩĩtu-a-asa ũtembeie aumĩte nthĩ ĩngĩ, kana akethĩwa ne mũndũ wavoie kwa myaka mingĩ na nĩ ĩndĩ wooka ũmbanonĩ. Kwasũanĩa keka nue andũ asu. Wĩw’a ata ũkakethw’a na ũithokw’a nesa? (Mt 7:12) Kwoou we wĩona ata ũmbano ũtanambĩĩa na wathela ũkatataa mũno kũmantha mwanya wa kũkethya ala mooka Nyũmbanĩ ya Ũsumbĩ? Kwĩka ũu kũtumaa onthe ala mooka maũmbanonĩ mekala mendene na me eanĩe, na nĩkũtumaa Yeova ataĩwa. (Mt 5:16) Nĩ w’o, ti laisi kũneena na kĩla mũndũ wooka maũmbano. Ĩndĩ o na vailyĩ ũu, kĩla ũmwe atata a vake, ithyonthe tũkew’aa ta twĩ mũsyĩ. *

Tũyaĩle kũthokasya angĩ nesa o ĩla kwĩ ũndũ wa mwanya, ta ĩla twĩ na ũmbano wa kũlilikana kĩkw’ũ kya Yesũ, ĩndĩ twaĩle kwĩkaa ũu mavinda onthe. Ala eũ meeyonea ũndũ twendanĩte kwa w’o, nĩmatonya kũmũtaĩa Ngai na mayosa ĩtambya ya kũmũthaitha.—Yoa 13:35.