Vulongulamu ya JW Library nĩ vulongulamu ya kombiũta (software application) ĩte ya ũthoosya ĩtonya kũtũmĩwa kumya Mbivilia, mavuku, vitio, na syĩndũ ingĩ simũnĩ, tambuletinĩ, kana kombiũtanĩ.

ŨNDŨ ŨTONYA KUMYA JW LIBRARY INDANETINĨ: Vingũa data nĩ kana wĩthĩe simũ yaku no ĩlike Indanetinĩ, na ĩndĩ ũithi kwa app store simũnĩ yaku, na wavingũa vu, mantha JW Library na ĩndĩ ũyĩkĩa vulongulamu ĩsu simũnĩ. Vulongulamu ĩsu no ĩlike simũnĩ kana tambuletinĩ sya mĩthemba yĩ kĩvathũkany’o. Wavingũa Indaneti kana data, vingũa vulongulamu ya JW Library, na ĩndĩ ũinyuva mavuku, vitio, kana o kĩndũ kĩngĩ kĩla ũkwenda kumya. Ethĩwa simũ yaku ndĩtonya kũlika indanetinĩ wĩ mũsyĩ kwaku, no ũthi vandũ vangĩ ĩtonya kũlika indaneti ta ũtelinĩ, ndukanĩ, kana Nyũmbanĩ yenyu ya Ũsumbĩ. Wamina kumya ĩvuku nthĩnĩ wa JW Library, vaikethĩawa vata wa kũvingũa Indaneti nĩ kana ũyĩsome. Nũndũ mavinda kwa mavinda JW Library nĩyongelawa syĩndũ nzaũ, nĩ ũseo ũkekalaa ũisisya nĩ kana wĩthĩwe na JW Library ĩla ya mĩtũkĩ.

NĨKĨ WAĨLE KWĨTHĨWA NA JW LIBRARY? Yĩthĩawa ne laisi kwĩmanyĩsya Mbivilia ũtũmĩĩte JW Library, na no ĩkũtetheesye kũvingũa kwa mĩtũkĩ ilungu ila iũneenewa maũmbanonĩ. O na ĩngĩ, JW Library no ĩkũtetheesye ũtavany’anĩ, na mũno mũno ĩla ũũtavany’a wĩ maũndũnĩ maku.