Wendo nĩ ngamu ĩla ĩkwatanasya andũ nthĩnĩ wa mũsyĩ. Meethĩwa mate na wendo mayĩsa kwĩthĩwa na ngwatanĩo na ũũmwe. Aũme, iveti, na asyai matonya ata kwonany’a wendo nthĩnĩ wa mũsyĩ?

Mũndũũme wendete kĩveti kyake nũthĩnĩkĩaa mavata makyo, akethukĩĩsya mawoni makyo, na aithĩnĩkĩa ũndũ kĩkwĩw’a. (Aev 5:28, 29) Nĩwĩanĩasya mavata ma kĩ-mwĩĩ na ma kĩ-veva ma mũsyĩ wake, o vamwe na kũĩkĩĩthya nĩmeeka Ũthaithi wa Mũsyĩ kĩla kyumwa. (1Ti 5:8) Kĩveti kyendete mũũme wakyo nĩkĩmwĩnyivĩasya na kĩkamũnenga “ndaĩa nene.” (Aev 5:22, 33; 1Vt 3:1-6) Elĩ maĩle kwĩthĩwa meyũmbanĩtye kũekeanĩa kuma ngoonĩ. (Aev 4:32) Asyai me na wendo nĩmathĩnĩkĩaa syana syoo na mayĩimanyĩsya kũmwenda Yeova. (Kũt 6:6, 7; Aev 6:4) Nĩmendaa kũmanya syana syoo ikwatawa nĩ mathĩna meva syĩ sukulu? Syĩkaa ata yĩla syathing’ĩĩw’a syĩke maũndũ mataĩle nĩ syana ila ingĩ? Yĩla kĩla ũmwe nthĩnĩ wa mũsyĩ woonany’a wendo, onthe makeew’aa me eanĩe na me asũvĩĩku.

ĨLOELEI VITIO, ONANY’A WENDO ŨTASINDAWA NTHĨNĨ WA MŨSYĨ, NA ĨNDĨ MŨISŨNGĨA MAKŨLYO AA MAATĨĨE:

• Mũndũũme wendete kĩveti kyake ekaa maũndũ meva onany’e kana nũkĩthĩnĩkĩaa?

• Kĩveti kyendete mũũme kyonanasya ata kana nĩkĩmũnengete ndaĩa nene?

• Asyai mendete syana syoo mekaa ata nĩ kana maimanyĩsye na kĩthing’ĩĩsyo Ndeto ya Ngai?