Ana-a-asa nĩmekĩaa kĩthito kingĩ mũno kũseũvya kĩlungu Ũndũ Ũtonya Kwasya, na atavany’a aingĩ nĩmonete ũvoo ũla wĩthĩawa kĩlungunĩ kĩu ũyendeesya andũ kĩsionĩ kyoo. Ĩndĩ, nũndũ maũndũ methĩawa me kĩvathũkany’o ĩũlũ wa nthĩ, atavany’a me na ũthasyo wa kũtũmĩa ũvoo wĩ kĩvathũkany’o yĩla meũtavany’a, kana makaneenea maũndũ ala mekwendeesya andũ kĩsionĩ kyoo. O na ũu wĩ o vo, nĩtwaĩle kũatĩĩa myolooto yonthe ĩla twanengwa yĩla kwĩ kambeini ya mwanya. Kĩeleelo kitũ nĩ kwĩanĩsya mwĩao wa Yesũ wa kũtavany’a ũvoo mũseo wa Ũsumbĩ.—Mt 24:14.

Yĩla atavany’a manengwa ũvoo kĩlungunĩ kya amanyĩw’a, maĩle kũtũmĩa ũvoo ũla wĩ nthĩnĩ wa kĩlungu, Ũndũ Ũtonya Kwasya kĩla kĩ nthĩnĩ wa Kavuku ka Ũmbano wa Mwĩkalĩle wa Aklĩsto. Ĩndĩ, ethĩwa mayĩĩtwe matũmĩe ĩmwe kwa ĩmwe ũvoo ũla wĩ kĩlungunĩ kĩu, me na ũthasyo wa kũtũmĩa ĩkũlyo yĩ kĩvathũkany’o, ĩandĩko, kana kĩla makaneenea masyoka maisũanĩa kĩla kĩkwendeesya andũ kĩsionĩ kyoo. Ĩndĩ meke ũu mateũthi ũtee na kyongo kĩla kĩũneenewa mwei ũsu. Ũu nĩ kwonany’a kana mwolooto ũla twanengetwe nthĩnĩ wa kavuku ka kwĩmanyĩsya ka ũmbano ka Mwei wa 6, 2020, ĩthangũ ya 8 nũũvĩndũka.