Mweinĩ wa 9, tũkeekĩa kĩthito kwambĩĩa kwĩmanyĩsya Mbivilia na andũ ala tweethĩa mĩsyĩ kwoo tũtũmĩĩte mbulosua Tanĩa Thayũ Tene na Tene! Atavany’a no manyuve kũtw’ĩka mavainia atetheesya kwa kũtavany’a masaa 30. Tũkatavany’a ata kambeininĩ ĩsu ya mwanya?

• Yĩla Ũũtavya Mũndũ ya Mbee: Tũmĩa ũvoo ũla wĩ ĩthangũnĩ ya mũthya ya mbulosua ĩsu nĩ kana ũtetheesye mwene nyũmba endeew’e, na ethĩwa nĩvatonyeka ũimwony’a ũndũ twĩmanyĩasya Mbivilia na andũ. Lilikana ala mendeeaw’a ĩvinda ĩvĩtu, o vamwe na masyokeo. O na ethĩwa nĩmaleile tũyĩmanyĩsya ĩvinda ĩvĩtu, nĩvatonyeka makendeew’a nĩ nzĩa yitũ nzaũ ya kũmanyĩsya na mbulosua ĩno tũũtũmĩa. Tũyaĩle kũtia mbulosua sitũ mĩsyĩ ĩla tũtanethĩa ene, kana tũkekĩa vaasyanĩ tũitũma valũa kwa andũ ala mataaonany’a kana nĩmekwendeew’a ĩvinda ĩvĩtu. Kamitii ya Ũthũkũmi ya Kĩkundi no ĩvange maũmbano angĩ kwondũ wa ũtavany’a mweinĩ ũsu.

• Myanya Ĩngĩ Yaumĩla: Ethĩwa kĩkundinĩ kyenyu nĩmũtũmĩaa tũkalĩ twa mavuku, ĩkĩai mbulosua Tanĩa Thayũ Tene na Tene! vandũ yenekee nesa. Elesya ala moonany’a nĩmekwendeew’a kana, ĩtina wa kũkwata mbulosua ĩsu no memanyĩsye Mbivilia vate ndĩvi. Mony’e o kwa ũkuvĩ ũndũ twĩmanyĩasya, kana ũvange wĩmony’a mũthenya ũngĩ. Mũsyaĩĩsya wa ũthũkũmi no avange atavany’a ala maĩle mathi isionĩ sya viasala, na mayambĩĩa kwĩmanyĩsya Mbivilia na andũ. O na ĩngĩ, no ũkũlye ala mũthũkũmaa ĩmwe mwambĩĩe kwĩmanyĩsya Mbivilia, kana andũ ala mwakomana ũitavany’a wĩ maũndũnĩ maku.

Yesũ atwĩaĩe ‘tũtw’ĩkĩthye andũ amanyĩw’a na tũimamanyĩsya.’ (Mt 28:19, 20) Ekai kambeini ĩno ya mwanya ĩtũtetheesye kwĩanĩsya mwĩao ũsu, tũtũmĩĩte mbulosua Tanĩa Thayũ Tene na Tene!