Mbivilia yĩ na ngelekany’o mbingĩ sya mboya syasũngĩiwe nĩ Yeova. Yĩla athũkũmi ma Ngai moonie ũndũ Yeova weethukĩĩisye maielesya mathĩna moo na amatetheesya, vate nzika mũĩkĩĩo woo nĩwalũlũmĩĩile. Kwoou, nũseo o naitũ tũkavoyaa tũteũvithany’a kĩndũ na tũitata twone ũndũ Yeova ũkũsũngĩa mboya sitũ. Manya kana no asũngĩe mboya yaku kwa nzĩa ũte kũsũanĩaa kana akeka maũndũ maingĩ kwĩ ala wĩĩmũvoyete. (2Ko 12:7-9; Aev 3:20) Yeova atonya kũsũngĩa ata mboya sitũ?

• No atũnenge vinya wa kĩ-mwĩĩ, akatuma tũusya, kana akatũnenga vinya wa kĩ-veva na kwoou tũyũmĩanĩsya na mathĩna maitũ.—Avi 4:13

• No atũnenge ũĩ nĩ kana twĩke motwi maseo.—Yak 1:5

• No atũnenge wendi na ũtonyi wa kwĩka maũndũ mana.—Avi 2:13

• No atũtetheesye tũkethĩwa tũuĩtye yĩla twĩ na mawĩmakĩo.—Avi 4:6, 7

• No atũmĩe andũ angĩ makatũtetheesya na syĩndũ sya kĩ-mwĩĩ, kana makatũkiakisya na maitwĩkĩa vinya.—1Yo 3:17, 18

• No atetheesye ala twavoya kwondũ woo.—Mek 12:5, 11

ĨLOELEI VITIO, YEOVA NĨWE “ŨLA WĨW’AA MBOYA,” NA ĨNDĨ MŨISŨNGĨA MAKŨLYO AA MAATĨĨE:

• Ngewa ya mwana-a-asa Shimizu yĩtwĩkĩa vinya ata ethĩwa tũitonya kwĩanĩsya maũndũ maingĩ nũndũ wa kũwaa?

• Tũtonya kũatĩĩa ngelekany’o ya mwana-a-asa Shimizu ata?