Kwambĩĩa Mwei wa 9, Kavuku ka Kwĩmanyĩsya ka Ũmbano kakeethĩawa na kĩlungu kyeũ kyonanĩtye ũndũ tũtonya kũtavany’a. Kyongo kya kĩlungu kĩu nĩ “Manyĩsya Ũla W’o.” Kĩeleelo kitũ kĩkeethĩawa ne kũmanyĩsya ũw’o wa mũsingi ũla wĩ Mbivilianĩ tũtũmĩĩte ĩkũlyo na ĩandĩko.

Twamanya kana mũndũ nĩwendeew’a, no twĩke mũvango wa kũmũsyokea kwa kũmũtiĩa tulakiti, kũmũnenga ĩvuku kana o ĩkaseti, kana kũmwony’a vitio kuma Kĩsesenĩ kya jw.org. Twaĩle kũtata vyũ tũsyoke ĩtina wa mĩthenya mĩvũthũ nĩ kana tũendeee kũneenea maũndũ ala tũneemanyĩasya. Nzĩa ĩsu nzaũ ya kũtavany’a vamwe na maũvoo ma amanyĩw’a makeethĩawa maumĩte ilungunĩ ila syĩ nthĩnĩ wa ĩvuku Mbivilia Yo Ĩmanyĩasya Ata? Tũkeethĩawa tũtonya kũkwata makũlyo na maandĩko angĩ ilungunĩ isu ala makatũtetheeasya kũsyokea mũndũ na kwĩmanyĩsya Mbivilia nake tũtũmĩĩte Mbivilia yĩ yoka.

Nzĩa ĩla ĩelete thayũnĩ no ĩmwe. (Mt 7:13, 14) Nũndũ tũneenaa na andũ ma ndĩni syĩ kĩvathũkany’o na maeetwe kwa nzĩa syĩ kĩvathũkany’o, no nginya tũnyuve kyongo kĩla kĩũtuma mũndũ endeew’a nĩ ũw’o wa Mbivilia. (1Tim 2:4) O ũndũ tũendeee kũmanyĩa kũtũmĩa momanyĩsyo me kĩvathũkany’o kuma Mbivilianĩ ĩla twĩ ũtavany’anĩ, na o ũndũ tũendeee kwĩthĩwa na ũmanyi mwingĩ wa kũtũmĩa ‘ũndũ vaĩle ndeto ya ũla w’o,’ now’o ũtanu witũ ũkongeleka na tũyona mosyao ma kũmanyĩsya ala angĩ ũw’o.—2Tim 2:15.