Nthĩnĩ wa valũa ũla mũtũmwa Vaulo wamũandĩkĩie Tito, aandĩkie kana andũ ma mũika o vamwe na ũ Tito, maĩle kwĩkĩa kĩthito mũno methĩwe “ngelekany’o nzeo mekonĩ ala maseo.” (Tit 2:6, 7) Kĩlungunĩ o kĩu, Vaulo nĩwoonanisye kana andũ ma Yeova nĩ athesye nĩ kana methĩwe me na “kĩthito mekonĩ maseo.” (Tit 2:14) Meko amwe maseo nĩ kũtavany’a na kũmanyĩsya ĩũlũ wa Ũsumbĩ wa Ngai. Ethĩwa wĩ mũndũ ma mũika, no ũtũmĩe vinya ũla wĩ naw’o yu kũtavany’a wĩ vainia mũtetheesya kana vainia wa kĩla ĩvinda?—Nth 20:29.

Ethĩwa nũenda kũtw’ĩka vainia, sũanĩa na ũivanga maũndũ maku nesa. (Luk 14:28-30) Kwa ngelekany’o, ũkaumasya mbesa va sya kwĩanĩsya mavata maku ũendeee na ũvainia? Ũkatavanasya mĩthenya yĩana ata nĩ kana wĩanĩsye masaa ala waĩle kwĩanĩsya wĩ vainia? Mũtavye Yeova ĩũlũ wa wendi waku wa kũtw’ĩka vainia. (Sav 37:5) Neena na asyai maku vamwe na ana-a-asa ala methĩĩtwe me mavainia ĩũlũ wa mĩvango yaku. Wamina kwĩka maũndũ asu osa matambya ala maĩle nĩ kana ũvikĩĩe mĩvango yaku. Vate nzika Yeova akakũathima mũno!

ĨLOELEI VITIO YĨ NA KYONGO, ANDŨ MA MŨIKA NĨMATONYA KŨMŨTAĨA YEOVA, NA ĨNDĨ MŨISŨNGĨA MAKŨLYO AA MAATĨĨE:

• Amũika amwe masindie mawetu meva nĩ kana methĩwe mavainia, na masindie mawetu asu ata?

• Asyai matonya kũtetheesya syana syoo ata itw’ĩke mavainia wa kĩla ĩvinda?

• Nĩkĩ nĩ ũndũ wa vata kwĩthĩwa na mĩvango mĩseo ya ũndũ ũkeanĩasya masaa ma vainia?

• Ana-a-asa kĩkundinĩ matonya kũtetheesya mavainia ata na kũmekĩa vinya?

• Mavainia makwataa moathimo meva?