Nĩkĩ twaĩle kũtindanasya na andũ ala mamwendete Yeova? Nũndũ andũ ala tũũtindany’a namo no matume tũendeea nesa kana tũkaendeea naĩ. (Nth 13:20) Kwa ngelekany’o, Mũsumbĩ Yoasi eekaa “ũla Yeova wonaa wĩ ũseo” ĩvinda yĩla watindanasya na Mũthembi Mũnene Yeoiata. (2Mav 24:2) Ĩndĩ yĩla Yeoiata wakwie, Yoasi nĩwamũtiie Yeova nũndũ wa kũtindany’a na andũ athũku.—2Mav 24:17-19.

Ĩvindanĩ ya atũmwa, mũtũmwa Vaulo aelekanilye kĩkundi kya Kĩklĩsto na ‘nyũmba nene’ na ala me kĩkundinĩ kĩu amaelekany’a na “mĩio” ya nyũmba. Tũendeeaa kwĩthĩwa twĩ “mũio ũtonya kũtũmĩwa maũndũnĩ ma ndaĩa” ethĩwa nĩtweevathana na andũ ala matamwendeeasya Yeova, methĩwe nĩ andũ ma mũsyĩ witũ kana ala tũthaithaa ĩmwe. (2Ti 2:20, 21) Kwoou, ekai tũendeee kũtindany’a na ala mamwendete Yeova na ala matwĩkĩaa vinya tũmũthũkũme.

ĨLOELEI VITIO YĨ NA KYONGO, ĨMANYĨSYE KŨLEANA NA KĨTINDO KĨTHŨKU, NA ĨNDĨ MŨISŨNGĨA MAKŨLYO AA MAATĨĨE:

• Nĩ kwa nzĩa syĩva tũtonya kwĩsa kwĩthĩa tũtindanasya na andũ athũku tũtesĩ?

• Nthĩnĩ wa vitio ĩsu twoona, nĩ kyaũ kyatetheeisye Aklĩsto asu atatũ maekane na kĩtindo kĩthũku?

• Nĩ myolooto yĩva ya Mbivilia ĩtonya ũkũtetheesya kũnyuva atindany’a kwa ũĩ?