MWĨKALĨLE WA AKLĨSTO
Twaĩle Kwĩka Ata Ĩla Tweethĩa Syana Mũsyĩ Tũitavany’a?
Ĩla tweethĩa syana mũsyĩ tũitavany’a, twaĩle kũsyĩa kana twĩenda kũneena na asyai masyo. Kwĩka ũu kwonanasya kana nĩtũũnenga asyai ma syana isu ndaĩa. (Nth 6:20) Ethĩwa syana nĩsyatũthokya tũlike nyũmba, tũyaĩle kwĩtĩkĩla. Na ethĩwa asyai mai kw’o twaĩle kũsyoka ĩvinda yĩngĩ.
Ethĩwa syana isu kana kana kau nĩ kakũangũ, kwa ngelekany’o, ethĩwa ke na myaka ĩkũmi na kĩndũ, wĩthĩwa wĩ ũseo tũkakea kana twĩenda kũneena na asyai mako. Ethĩwa asyai mai kw’o, no tũkakũlye kana nĩmakanengete lũũsa wa kwĩnyuvĩa mavuku ala kekwenda kũsoma. Ethĩwa nĩmaketĩkĩlĩtye, no tũkanenge ĩvuku kana tũkakony’a ũndũ katonya kũlika Kĩsesenĩ kya jw.org.
Ĩla twasyokea kana kau kakũangũ kanendeeiw’e, nĩtwaĩle kũkea kana no twende kũneena na asyai mako. Twaneena na asyai mako no tũmaelesye kĩeleelo kitũ kya kũmathokea, na tũimony’a maũndũ maseo na makwĩkwatw’a ala me Mbivilianĩ matonya kũtetheesya mĩsyĩ. (Sav 119:86, 138) Ĩla twoonany’a kana nĩtũũnenga asyai ndaĩa, twĩthĩawa tũyumya ũkũsĩ mũseo, na ũndũ ũsu no ũtume matũnenga mwanya wa kũmatavya ũvoo mũseo ĩvinda yĩngĩ.—1Vet 2:12.