Mũnyanya Ũtatethya

Twasye ve mũnyanya mwamanyanie kuma wĩ o mũnini, na mũnyanya ũsu nĩwatumaa wĩw’a ta wĩ mũndũ mũima, na akatuma wĩw’a wĩ mwĩanĩe mũnango wĩ na andũ ala angĩ. O na kĩla ĩvinda wakwata nĩ mesilya, nĩwe weekwatasya aũtetheesye wĩw’e wausya. Na nũndũ wa ũu, nĩ mavinda maingĩ wamwĩkwatasya.

Yu kwavindĩĩsya ĩtina wa ĩvinda wesa kwĩthĩa kaĩ ũmwĩsĩ ũtamwĩsĩ. Na kĩtumi nũndũ nĩwesa kũmanya kana saa syonthe endaa mũtinde mũatĩanĩe, o na mavindanĩ ala ũkwĩw’a ũte mwĩanĩe kũthi nake. Na o na kau ũnoona ta ũkũũtetheesya wĩw’e wĩ mũndũ mũima, ũyĩthĩa kaĩ nzĩa ĩla ũtũmĩaa kũũtetheesya ĩtumaa ũkwatwa nĩ mathĩna ma mwĩĩ. Na kũthũkya ũvoo, ũimanya kana nũkũyĩĩte mbesa mbingĩ.

Kwavindĩĩsya ĩtina wa kũmanya ũu, ũtatĩte ũndũ ũtonya mũtaanĩsye, ĩndĩ ũyĩthĩa mũnyanya ũsu aũkwete akaũlũmya vyũ. Yu o na no wasye nũkũsumbĩkĩte. Vate nzika kĩla ũmwe witũ no elile mũno akesa kwĩthĩa e na mũnyanya ta ũsu.

ANDŨ aingĩ ala manyusaa sikala no metĩkĩle kana yĩthĩawa ĩilye ta mũnyanya wa mũthemba ũsu. Mũndũ mũka ũmwe wĩtawa Earline watũmĩĩte sikala kwa myaka 50 aisye atĩĩ: “Nyie neew’aa sikala ĩindetheesya o na kwĩ ũndũ mũndũ ũngĩ ũtonya kũndetheesya e nakwa. Kwakwa sikala ndyaĩ o ta mũnyanya twamanyanie tene, ĩndĩ o na mavinda amwe neew’aa ta we mũnyanya weka ũla natiiwe nake.” Ĩndĩ ĩtina nĩwesie kũmanya kana sikala nĩ mũnyanya wa ũvũngũ ũtonya kwananga mũndũ vyũ. O na no twasye ndeto ila syĩ mwambĩĩonĩ no ta we ineeneete ĩvinda yĩu watũmĩaa sikala. Ĩndĩ nĩweemanyĩisye kana kũnyw’a sikala nĩ naĩ methonĩ ma Ngai nũndũ nĩkũvukasya mĩĩ yitũ, ĩla tũnengetwe nĩ Ngai ta mũthĩnzĩo, na nũndũ wa ũu aeka kĩmanyĩo kĩu kĩthũku.—2 Akolintho 7:1

O nake mũndũũme wĩtawa Frank nĩwatwie kũeka sikala nĩ kana amwendeesye Ngai. Ĩndĩ o na vatavĩtĩte mĩthenya, esie kwĩyĩthĩa aivulukany’a ku nyũmba kwake nthĩ one kana nũkomana na kalungu ka sikala kavalũkĩte akwatye. Frank aĩtye: “Mũthenya ũsu nĩw’o neekie ũtwi. Nathatie mũno neeyĩthĩa nĩtulĩtye ndu nthĩ aĩ ngwetye kũvekesa kĩla vandũ ndimantha tũlungu twa sikala. Kuma vau ndyaanyw’a sikala ĩngĩ.”

Yo nĩkĩ andũ aingĩ maemawa nĩ kũeka sikala? Andũ ala mekaa ũkunĩkĩli, nĩmanenganĩte itumi ĩtatũ: (1) Kĩlaikũ kĩla kĩthĩawa sikalanĩ no kĩemee mũndũ o tondũ ndawa nthũku sya kũmila siemeeaa andũ. (2) Sikala ĩmilaa mĩtũkĩ nũndũ o na sekendi mũonza iithela mũndũ amina kũkũsya syũki ya sikala oou, yĩthĩawa yambĩĩe kũthũkũma kĩlĩkonĩ. (3) Kaingĩ mũndũ akwatawa nĩ wendi wa kũnyw’a sikala yĩla ũkwĩka maũndũ o ala twĩkaa kĩla mũthenya ta kũya, kũnyw’a, kũea ngewa, kũmya mesilya kĩlĩkonĩ, na maũndũ angĩ.

Ĩndĩ o tondũ twoona ngewanĩ ya Earline na ya Frank, nĩ ũndũ ũtonyeka kũeka kĩmanyĩo kĩu kĩthũku. Ethĩwa nũnyusaa sikala na nũkwenda kũeka, nĩvatonyeka ũkatetheka mũno wasoma ilungu ii ĩatĩĩe.