Ũtavany’a Waku Nũilyĩ ta Ĩmwe?
ŨTAVANY’A witũ nĩ wa vata mũno. Ĩndĩ ti andũ onthe tũmatavasya ũvoo mawonaa wĩ wa vata. O na kau andũ no mendeew’e nĩ kĩla tũũmatavya, ti onthe monaa vata wa kũmanyĩw’a Ndeto ya Ngai.
Ũu nĩw’o Gavin wailyĩ. O na kau nĩwaendaa maũmbanonĩ, nĩwaleile kũmanyĩw’a Mbivilia. Aĩtye ũũ: “Ndyeesĩ Maandĩko mũno, na ndyendaa andũ maimanya ũu. Nĩnakĩaa kũkengwa na ndyendaa kwĩyova.” We wĩsũanĩa ata? We wĩona Gavin ta waĩ mũndũ ũtatetheka? Ũu ti w’o! Kwasũanĩa ũndũ momanyĩsyo ma Mbivilia matonya kũalyũla mwĩkalĩle wa mũndũ. Yeova eeie andũ make ma tene atĩĩ: “Kũneena kwakwa kũkavolotangaa ta ĩmwe, ta ũnyenyeũ nyekinĩ ya vuvĩ.” (Kũt. 31:19, 30; 32:2) Twasũanĩa nesa ũndũ ĩmwe yĩilyĩ no tũelewe ũndũ tũtonya kũtetheesya andũ ma mĩthemba yonthe nesa.—1 Tim. 2:3, 4.
ŨTAVANY’A WITŨ ŨILYĨ ĨMWE ATA?
Ĩmwe yũmbanaa o kavola. Mĩthũmũ ĩla yĩ nzevenĩ yũmbanaa o kavola kavola ĩkesa kũtw’ĩka malovoto ma ĩmwe. Ndeto sya Yeova ‘syavolotangaa ta ĩmwe,’ na ũu nĩ kwasya kana ĩla ũkũneena na andũ make atũmĩaa ndeto nzeo, aneenaa auĩtye, na nĩwasũanĩaa kĩla ũkũweta. Twĩthĩawa twekala take ĩla twanenga ndaĩa mawoni ma ala angĩ. O na nĩtwĩkĩaa andũ vinya masũanĩe nemo, na kwa nzĩa ĩsu methĩawa matonya kwĩtw’ĩĩa maũndũ nemo ene. Ĩla tweeka maũndũ ta asu andũ nĩmatwĩthukĩĩasya mũno, na ũtavany’a witũ nĩwĩthĩawa na mosyao maingangĩ.
Ĩmwe nĩyĩsanzamũkasya syĩndũ. Ĩla twasũanĩa ũndũ tũtonya kũtetheesya andũ mendeew’e mũnango, kĩla tũũmatavya nĩkĩmatethasya. Ũla Gavin wawetwa ndaathing’ĩĩw’a nĩ mũndũ emanyĩsye Mbivilia. Mwana-a-asa ũla wamũkwatisye ya mbee etawa Chris, na vandũ va kũmũthing’ĩĩsya eekie kũmantha nzĩa syĩ kĩvathũkany’o sya kũmũtetheesya Gavin ew’e e mwĩanĩe ĩla meũneenea maũndũ ala me Mbivilianĩ. Chris aeleisye Gavin kana ve ũndũ ũmwe mũnene Mbivilia ĩneenee, na kana kũmanya ũndũ ũsu nĩ wĩva no kũmũtetheesye akwatye kĩla kĩthĩawa kĩendeee maũmbanonĩ ala ũendaa. O na Chris nĩwesie kũmũtavya kana wathani ũla wĩ Mbivilianĩ nĩw’o wamũĩkĩĩthisye kana Mbivilia nĩ ya w’o. Ĩla wamũtavisye ũu, nĩmaneenie mavinda kauta ĩũlũ wa ũndũ mawathani meanĩĩte. Gavin eewie maũndũ asu mamwĩkĩa vinya na mũthya esa kwĩtĩkĩla kũmanyĩw’a Mbivilia.
Ĩmwe nĩyĩtetheeasya syĩndũ iikome. Nthĩ ya Isilaeli nĩyĩthĩawa na thano wĩthĩawa wĩ mũvyũ, na mavinda asu nĩvathelaa myei kũtoneka mbua. Na kwoou mĩtĩ nĩvoovaa na ĩkoma yalea kũkwata kĩmeu kya ĩmwe. Ũmũnthĩ kwĩ mũnyao wa kĩ-veva o tondũ Yeova wathanie. (Amo. 8:11) Ĩndĩ nĩwathanie kana Aklĩsto etĩkĩw’a mauta makethĩwa mailyĩ “ta ĩmwe kuma kwa Yeova,” maitavany’a ũvoo wa Ũsumbĩ makwetwe mbau nĩ “malondu angĩ.” (Mika 5:7; Yoa. 10:16) We nĩwonaa ũvoo mũseo wa Ũsumbĩ ta nzĩa ĩmwe ya Yeova ya kũtetheesya andũ maikakw’e kĩ-veva?
Ĩmwe nĩ ũathimo Yeova ũtũnengete. (Kũt. 33:13) Ũtavany’a witũ no wĩthĩwe ũathimo kwa ala mekwĩthukĩĩsya. Gavin nĩwakwatie ũathimo ta ũsu. Ĩla wambĩĩe kũmanyĩw’a Mbivilia nĩwakwatie mosũngĩo ma makũlyo ala weekũlasya. Eekie maendeeo mĩtũkĩ nginya avatiswa na ũmũnthĩ e na mũka, Joyce, nĩmatanĩaa kũtavany’a vyũ ũvoo mũseo wa Ũsumbĩ.
Ngũsĩ sya Yeova niendeee kũnyaĩĩkya ũvoo mũseo wa Ũsumbĩ nthĩ yonthe
TALA ŨTAVANY’A WAKU TA KĨNDŨ KYA VATA
Kũsũanĩa ĩũlũ wa ĩmwe nĩkũtonya kũũtetheesya we mwene wĩyumye ũtavany’e na kĩthito. Ata? Kalovoto kamwe ka ĩmwe kayĩsa kũkolya nthĩ, ĩndĩ kalovoto kau ke vamwe na tũngĩ twingĩ tũiema kũkolya nthĩ. O ta ũu ũtavany’a wa mũndũ ũmwe no woneke ta kaũndũ kanini. Ĩndĩ ũtavany’a wa athũkũmi onthe ma Yeova nũtumaa tumya ũkũsĩ ‘kwa mbaĩ syonthe.’ (Mt. 24:14) We nũkũeka angĩ mone ũtavany’a waku ta ũathimo kuma kwĩ Yeova? Ũkeethĩwa ũilyĩ ũu ethĩwa tũkaeka ũvoo ũla tũũtavany’a wĩkale ta ũndũ ĩmwe yĩthĩawa yĩilyĩ. Ĩmwe yũmbanaa o kavola, nĩyĩsanzamũkasya syĩndũ, na nĩyĩtetheeasya syĩndũ iikome.