Ngwatĩlĩlyo: Ĩvuku yĩmwe yĩwetete kana ndeto ya Kĩkiliki ĩla ĩalyũlĩtwe “ngwatĩlĩlyo” ĩvukunĩ ya 2 Akolintho 1:22 nĩ ndeto yatũmĩawa “maũndũnĩ ma silikalĩ na viasala,” na yonanasya “ndĩvi ĩla ya mbee yambaa kũĩvĩwa kĩndũ, kĩla wambaa kũnengane nĩ kana ũkwatĩĩe kĩndũ kĩikese kũthi na ũngĩ na ĩndĩ ũikĩĩvĩa o kavola, [kana] kĩla ũtiĩaa mũndũ nĩ kana ndakethĩwe na nzika ũkamũĩva kĩla ũkũtaĩte. Weeka ũu wĩthĩaa nue waĩlĩte kwĩsa kwosa kĩndũ kĩu, na no wasye nĩweew’ana na mwene wakyo.” Ĩla Mũklĩsto wetĩkĩw’a veva mũtheu ethĩawa akwata ngwatĩlĩlyo ĩndĩ ĩ ndĩvi yonthe, kana kwa ndeto ingĩ, mũthĩnzĩo mwene, nĩ ũla ũwetetwe ĩandĩkonĩ ya 2 Akolintho 5:1-5. Mũthĩnzĩo ũsu ũkonetye kũvw’ĩkwa mwĩĩ ũtakanangĩka. O na nũkonetye kũnengwa thayũ ũtesa kũkw’a.—1 Ako. 15:48-54.

Kĩthyomonĩ kya Kĩkiliki ũmũnthĩ, ve ndeto ĩngĩ ĩvw’anene na ĩsu ya ngwatĩlĩlyo, ĩla yonanasya mbete ĩla yĩkĩawa mũndũ ayĩvaaw’a. Ngelekany’o ĩsu nĩyaĩlĩte etĩkĩw’a mauta nũndũ nĩmevaĩtw’e nĩ Klĩsto.—2 Ako. 11:2; Ũvu. 21:2, 9.

Ũsiĩlo: Tene ũsiĩlo watũmĩawa ta saii ya kũĩkĩĩthya kana kĩndũ kĩna nĩ kya mũndũ mũna, kana nĩ kya w’o, kana o kũĩkĩĩthya andũ nĩmeew’ana ũndũnĩ mũna. Kwoou etĩkĩw’a mauta nĩmekĩĩtwe “ũsiĩlo,” kana makavanwa kwa nzĩa ya ngelekany’o, nĩ veva mũtheu matw’ĩke ma Ngai. (Aev. 1:13, 14) Ĩndĩ ũsu tiw’o ũsiĩlo wa mũthya. Mwĩtĩkĩw’a mauta ekĩawa ũsiĩlo wa mũthya kavinda kanini atanamba kũkw’a ethĩwa nĩ mũĩkĩĩku, kana ethĩwa ti ũu akeekĩwa kavinda kanini mbee wa ũla thĩna mũnene kwambĩĩa.—Aev. 4:30; Ũvu. 7:2-4.