MŨTHENYA wa Wakwambĩlĩlya Ĩtukũ 1, Mwei wa 9, 1919, kwaĩ kaũvyũvu na kasyũla o na kau mĩthenya ĩla yaĩ ĩnavĩta kwaĩ kĩuutani kingĩ na mbua. Saa sya mũthenya iivika kwaĩ aeni ta 1,000, ala moombanĩe vandũ vetawa Cedar Point, vala ve Ohio, Amelika, ĩsũmbanĩ yaĩ na ivĩla 2,500 nĩ kana methukĩĩsye kĩlungu kya kwambĩĩa kya ũmbano mũnene. Syũa yĩkilyĩ kũthũa, angĩ 2,000 nĩmavikie matũmĩĩte masiwa, ngalĩ, na ngalĩ sya mwaki sya mwanya. Ũnĩ ũũngĩ Wakelĩ, ala mookie maingĩvie weethĩa ũmbano ũsu no ũminũkĩlĩĩlaw’a andũ mailyĩ nza vandũ vaĩ mĩtĩ mĩnene na myanake.

Syũa nĩyaathĩte ĩndĩ kwaĩ o kwanake nũndũ syuu sya matũ syeesoleele makotinĩ ma aũme makekala ta me na malesi. Namo maw’ĩa ala maĩ ngovianĩ sya aka meleelaa nzevenĩ mavuvĩtwe nĩ kaseve kaumĩte o vau vakuvĩ Ĩianĩ ya Erie. Mwana-a-asa ũmwe aisye ũũ: “Ũmbano ũsu weekĩwe vandũ vaseo na vauĩtye vaasa na kũla kwĩthĩawa kelele, na kwoou tweew’aa ũu ta twĩ valatiso.”

O na kau vala voombanĩwe vaĩ vanake, wanake ũsu waĩ vathei waelekanw’a na ũtanu ũla woonekaa mothyũnĩ ma ala maĩ ũmbanonĩ ũsu. Ĩkaseti yĩmwe ya kĩsio kĩu yaandĩkie: “Onthe meoneka makwatĩĩe ndĩni mũno, ĩndĩ nĩ atanu vyũ na nĩ athalĩku.” Amanyĩw’a asu ma Mbivilia meew’aa kũmbana kwoo vamwe kwĩ mũyo mũno nũndũ nĩmakwatĩtwe nĩ matatwa maingĩ myaka mĩvũthũ ĩla yaĩ ĩnavĩta. Kwa ngelekany’o, nĩmavĩngiwe ĩvindanĩ yĩla kwaĩ kaũ, kwaĩ mũaanĩko mũthũku ikundinĩ, Mbetheli ya Brooklyn nĩyavingĩtwe, aingĩ nĩmekĩtw’e kolokolonĩ nũndũ wa kũlũmany’a na Ũsumbĩ, o na ala ana-a-asa nyanya matongoesye nĩmekĩtw’e kolokolonĩ na amwe moo makatw’ĩĩwa kwovwa myaka 20. *

Amanyĩw’a amwe ma Mbivilia nĩmakw’ĩte ngoo na makatuanĩwa nũndũ wa mathĩna ala mamakwatĩte myakanĩ ĩsu, na kwoou nĩmaekete kũtavany’a. Ĩndĩ aingĩ matatĩte ũndũ matonya momĩĩsye, o na kau silikalĩ nĩyatatĩte kũmavindĩthya. Kwa ngelekany’o, mũndũ ũmwe aisye o na kũtw’ĩka Amanyĩw’a ma Mbivilia nĩmakanĩtw’e mũno makewa maikatavany’e, ala wathianie maisye kana mo “meendeea kũtavany’a ndeto ya Ngai nginya mwĩso.”

Myaka ĩsu yonthe ya mathĩna, Amanyĩw’a ma Mbivilia ala maĩ aĩkĩĩku mekalĩte “masyaĩtye Mwĩaĩi amatongoesye, . . . maivoya kĩla ĩvinda nĩ kana Asa amony’e nzĩa.” Na yu ĩvinda yĩĩ maĩ na ngwatanĩo na ũtanu mombanĩe Cedar Point kwondũ wa ũla ũmbano mũnene. Mwĩĩtu-a-asa ũmwe nĩwawetie ũndũ we mwene na ala angĩ molanĩalw’a ũndũ matonya kwĩsa “kwambĩĩa kũthyũũkya ĩngĩ ndĩa sya wĩa wa kũtavany’a.” Vai kĩndũ kĩngĩ mendaa mũno kwĩka ta kwambĩĩa ĩngĩ wĩa wa kũtavany’a!

Kyumwa kĩu kyonthe ala mookie ũmbanonĩ ũsu nĩmoonaa nthoo “GA” iandĩkĩtwe tũthangũnĩ twa walany’o wa ũmbano, tũvalũanĩ twa kũthokany’a, na ivwaũnĩ ila syaĩ kĩwanzanĩ kya ũmbano, na kwoou maseng’aa nthoo isu syaũngamĩe kyaũ. Mũthenya wa Wakatano ũla mawĩtie “Co-Laborers’ Day,” Joseph F. Rutherford nĩwesie kũmaumbũka andũ onthe 6,000 ala maĩ ũmbanonĩ ũsu kĩla nthoo isu syaũngamĩe. Nthoo isu “GA” syaũngamĩe ĩkaseti yeũ ya kũtũmĩawa ũtavany’anĩ, yĩla yaumiw’e ũmbanonĩ ũsu. Ĩkaseti yĩu yeetawa The Golden Age. *

Mwana-a-asa Rutherford aisye ũũ ĩũlũ wa Aklĩsto ala angĩ etĩkĩw’a mauta: “O na kau yĩĩ nĩ ĩvinda ya thĩna, mũĩkĩĩo woo ũtumaa mekala mene Ĩvinda Ĩseo [Golden Age] ĩla ũsumbĩki mũseo ki wa Masia ũkasumbĩka. . . . Matalaa kana kũtavya nthĩ yonthe ĩũlũ wa kũka kwa yĩla Ĩvinda Ĩseo nĩkyo kĩanda kyoo kĩla kĩnene maĩle kwĩanĩsya na kana nĩ ndaĩa nene kwoo kũtethya wĩa ũsu. Ũsu nĩ ũmwe katĩ wa mawĩa ala manengetwe nĩ Ngai.”

Ĩkaseti ya The Golden Age yaandĩkĩtwe kavanĩ “Ĩkaseti yĩwetaa Ũw’o, yĩnenganae Wĩkwatyo, na yĩwetaa maũndũ Vate Nzika.” Ĩkaseti yĩu yaaĩlĩte kũtũmĩwa kwambĩĩsya nzĩa nzaũ ya kũnyaĩĩkya ũw’o. Nzĩa ĩsu yaĩ kũthi nyũmba na nyũmba ũmanthĩte ala mekwenda kwĩyĩandĩkĩthya nĩ kana mayĩkwatae. Vakililye vaikũlw’a naaũ mekwenda kũtethya wĩa ũsu, onthe ala maĩ ũmbanonĩ ũsu maũngama me atanu. Na ĩndĩ “me na kĩthito na wendi ũtesa kwĩthĩwa na angĩ eka ala maatĩĩaa nyaaĩ sya Yesũ,” nĩmainie wathi wĩ na ndeto: “Ete kyeni kyaku na w’o waku, ame Mwĩaĩi.” Mwana-a-asa J. M. Norris aĩtye: “Ndikolwa nĩ ũndũ noonie mĩtĩ yathingitha.”

Kĩlungu kĩu kya ũmbano kyathela, ala maĩ ũmbanonĩ ũsu mavangie lainĩ masaa maingĩ mayenda methĩwe katĩ wa ala ma mbee kwĩyĩandĩkĩthya makwatae ĩkaseti yĩu. Aingĩ moo meewie o ta Mabel Philbrick. Aisye atĩĩ: “Twatanie mũno kũmanya kana nĩtwakwata ĩngĩ wĩa wa kũtethya!”

Amanyĩw’a ma Mbivilia ta 7,000 nĩmeeyũmbanisye malike wĩanĩ. Kavuku keetawa Organization Method na kala kangĩ To Whom the Work Is Entrusted (Kwondũ wa Ala Manengetwe Ũla Wĩa) nĩtwaeleisye mũvango ũla waĩ vo. Twawetie maũndũ aa: Mbee, ve Mũvĩa wa Ũthũkũmi ũla wambĩĩw’e ovisinĩ ũla mũnene nĩ kana ũũngamĩe wĩa ũũ. Kelĩ, Kamitii ya Ũthũkũmi nĩyaaĩle kwambĩĩw’a kĩla kĩkundinĩ, na mũũngamĩi ainyuvwa nĩ kana akatavasya ala angĩ kĩla weewa kyaĩle kwĩkwa. Katatũ, isio syaaĩle kũaanw’a na kĩla kĩsio kyaaĩle kwĩthĩwa na nyũmba katĩ wa 150 na 200. Na ĩndĩ maaĩle kwĩka Ũmbano wa Ũthũkũmi kĩla Wakana ĩ ya wĩoo nĩ kana ana-a-asa mawete maũndũ ala monie ũtavany’a na mayumya livoti syoo.

Mwana-a-asa Herman Philbrick aisye atĩĩ: “Ĩla twavikie mĩsyĩ kwitũ, ithyonthe twalikile kambeininĩ ya kũmantha andũ ala mekwenda kwĩyĩandĩkĩthya makwatae makaseti.” Kĩla vandũ meethĩaa andũ mekwenda kwĩthukĩĩsya. Beulah Covey aisye kana “veoneka ĩtina wa kaũ na kyeva kingĩ, kĩla mũndũ nĩwendeeiw’e nĩ kũmanya kana ve ĩvinda ĩseo yũkĩte.” Nake Arthur Claus aandĩkie: “Kĩkundi kyonthe kyaseng’iw’e mũno nĩ kwona ũndũ andũ ala meeyĩandĩkĩthisye maingĩvĩte.” Kũithela myei ĩlĩ kuma yambĩĩa kũtumbĩthw’a, vakuvĩ makaseti nusu milioni ma The Golden Age nĩmanenganĩtwe, na andũ 50,000 makeyĩandĩkĩthya.

Mwana-a-asa A. H. Macmillan aisye kana kĩla kĩlungu kyaĩ ĩkasetinĩ ya The Watch Tower ya 01/07/1920 kyaĩ na kyongo, “Ũvoo Mũseo wa Ũsumbĩ,” nĩkyo kyaĩ “kya mbee vyũ kwĩkĩa vinya ana-a-asa matavany’e nthĩ yonthe o tondũ kũtilyĩ ũmũnthĩ.” Kĩlungu kyu nĩkyathangaaisye Aklĩsto etĩkĩw’a mauta “makũsĩĩe nthĩ yonthe kana ũsumbĩ wa ĩtu ndwĩ vaasa.” Ũmũnthĩ, “ala manengetwe ũla wĩa,” namo nĩ ana-a-asa ma Klĩsto, nĩmakwetwe mbau nĩ andũ milioni mbingĩ, ala matavanasya ndeto na kĩthito meteele yĩla ĩvinda ĩseo yĩkaetwe nĩ Masia.