Aũme asu meonany’a ita sya ĩtunĩ ila syatũmĩiwe kwananga Yelusaleme, na nosyo ikatũmĩwa kwananga nthĩ ĩno nthũku ya Satani ĩvindanĩ ya Ali–Maketoni. Nĩkĩ tũtonya kwasya kana ũmanyi ũsu mweũ nĩwosanĩte na kĩlĩko?

Ĩvinda yĩmwe Esekieli nĩwooniw’e woninĩ mothũku ala meekawa ndũanĩ ya Yelusaleme ĩtanamba kwanangwa mwakanĩ wa 607 Klĩsto ate mũsyae. Ĩtina wa ũu nĩwasyokie oonw’a maũndũ ala maĩ mekĩke wanangĩko ũsu ũte mũviku. Woninĩ ũsu oonie aũme thanthatũ kĩla ũmwe e na mũio wake wa kũaa. O na nĩwoonie mũndũ ũngĩ katĩ woo, nake “eevw’ĩkĩte ngũa ya katane” na aĩ na “ũvya wa ingi wa mũandĩki.” (Esek. 8:6-12; 9:2, 3) Mũndũ ũsu ataviw’e atĩĩ: “Vĩtĩla katĩ wa ndũa, . . . noiĩkĩa ũvano itulyanĩ sya andũ ala mavevũũkaa na ala maĩaa nũndũ wa mothatyo onthe ala mekawa katĩ wayo.” Ĩtina wa ũu, ala aũme me na mĩio ya kũaa meeiwe moae onthe ala mekwĩthĩa mate na ũvano ũsu. (Esek. 9:4-7) Ĩndĩ w’o woni ũsu wĩtũmanyĩsya kyaũ, na nũũ ũla mũndũ wĩ na ũvya wa ingi wa mũandĩki?

Esekieli athanie wathani ũsu mwakanĩ wa 612 Klĩsto ate mũsyae, na weanĩie ya mbee ĩtina wa myaka o ĩtano, ĩla Yeova waekie ita sya Mbaviloni syanange ndũa ya Yelusaleme. O na kũtw’ĩka Ambaviloni mayamũthũkũmaa Yeova, nĩwamatũmĩie kwananga ndũa ĩsu. (Yel. 25:9, 15-18) Yeova eetĩkĩlilye kĩu kĩkĩke nĩ kana akany’e andũ make nĩkwĩthĩwa maĩ manaeka kũmwĩw’a. Ĩndĩ ũu ti kwasya kana aekie andũ mooawa oou tũ kĩtumbo. Ala alũngalu mayaĩ mesa kwananganĩw’a vamwe na ala athũku. Nũndũ Yeova nĩwendete andũ, nĩweekie mĩvango nĩ kana asũvĩe Ayuti ala matakwatĩanĩaa na mothũku ala maĩ ndũanĩ ĩsu.

Esekieli ndanengetwe wĩa ũsu wa kũvana o na ndaanengwa wĩa wa kũaa. Vandũ va ũu, wĩa ũsu wa kwananga Yelusaleme watongoew’e nĩ alaĩka. Kwoou wathani ũsu ũtũtetheeasya kũmanya kĩla kyaendeee ĩtunĩ. Ĩvindanĩ yĩu Yeova anengie alaĩka mwĩao wa kũvangĩthya ũndũ ala athũku mekwanangwa vamwe na ũndũ ala alũngalu mekũtangĩĩwa. *

Nũndũ woni ũsu waĩ wĩanĩe ya kelĩ, navu ĩtina tũnaeleasya kana etĩkĩw’a mauta ala matialĩte kũũ nthĩ nĩmo maelekanĩtw’e na ũla mũndũ wĩ na ũvya wa ingi wa mũandĩki. Twoonaa kana ala meetĩkĩla ũvoo mũseo meethĩawa meekĩwa ũvano wa kũvonoka. Ĩndĩ myakanĩ ya mĩtũkĩ twonete kana no nginya ũmanyi ũsu wĩkwe moalyũku. Kwosana na ndeto ila syĩ ĩandĩkonĩ ya Mathayo 25:31-33, Yesũ nĩwe wĩ na kĩanda kya kũsilĩla andũ. Ũsilĩlo wa mũthya akawĩka ĩvindanĩ ya ũla thĩna mũnene nũndũ ĩvindanĩ yĩu nĩw’o ũkavathany’a malondu na mbũi. Ala maelekanĩtw’e na malondu makatangĩĩwa, namo ala maelekanĩtw’e na mbũi makaanangwa.

Kwoou kwosana na ũmanyi ũla mweũ tũkwatĩte, woni ũsu wa Esekieli wĩtũmanyĩsya kyaũ? Ve maũndũ ta atano tũkwĩmanyĩsya:

1. Ndũa ya Yelusaleme ĩtanamba kwanangwa, Esekieli anengetwe wĩa wa kũtw’ĩka mũsyaĩĩsya vamwe na Yelemia. O nake Isaia anengetwe wĩa o ta ũsu. Ĩvindanĩ yĩĩ Yeova anengete kakundi kanini ka athũkũmi make etĩkĩw’a mauta wĩa wa kũĩthya andũ make na kũnengane mokany’o thĩna ũla mũnene ũtanamba kwambĩĩa. Namo onthe ala ma nyũmba ya Klĩsto nĩmatetheeasya kumya mokany’o asu.—Mt. 24:45-47.

2. Esekieli ndaatethya wĩa wa kwĩkĩa andũ  ũvano nĩ kana matangĩĩwe, na o namo andũ ma Ngai ũmũnthĩ maitethasya wĩa ũsu. Kĩla mekaa no kũtavany’a ũtũmane wa Yeova. Ũtũmane ũsu nĩ kĩlungu kĩmwe kya wĩa woo wa kũtavany’a, ũla ũtongoew’e nĩ alaĩka.—Ũvu. 14:6.

3. Ĩvindanĩ ya Esekieli andũ meekĩiwe ũvano wa ngelekany’o. Ũu now’o kũilyĩ ũmũnthĩ. Kwoou andũ maĩlĩte kwĩka ata nĩ kana mekĩwe ũvano ũsu? Maĩlĩte kwĩtĩkĩla ũvoo ũla ũtavanaw’a, methĩwe na mwĩkalĩle wa Kĩklĩsto, meyumye mamũthũkũme Yeova, na mailũmany’a vyũ na ana-a-asa ma Klĩsto. (Mt. 25:35-40) Ala meanĩasya maũndũ asu makeekĩwa ũvano ũsu wa kũvonoka ĩvindanĩ ya ũla thĩna mũnene.

4. Wĩanĩsyo wa ũmũnthĩ wa woni ũsu nĩ kana ũla mũndũ wĩ na ũvya wa ingi wa mũandĩki nĩ Yesũ Klĩsto. O na kau ndenekee, nĩwe ũvanaa ala makatangĩĩwa. Ĩndĩ ala me ĩkomanonĩ ĩnene makakwata ũvano woo ĩla makaiwa ngalĩko ya malondu ĩvindanĩ ya ũla thĩna mũnene. Kwĩkĩwa ũvano ũsu kũkoonany’a nĩmekũnengwa thayũ ũtathela me kũũ ĩũlũ wa nthĩ.—Mt. 25:34, 46. *

5. Wĩanĩsyo wa ũmũnthĩ wa woni ũsu nĩ kana ala aũme thanthatũ me na mĩio ya kaũ ya kũaa nĩ ita sya Yesũ sya ĩtunĩ itongoew’e nĩ ũ Yesũ. O mĩtũkĩ makilyĩ manaananga mbaĩ vamwe na ũthũku w’onthe.—Esek. 9:2, 6, 7; Ũvu. 19:11-21.

Kwĩmanyĩsya maũndũ asu twoona ma vata kũlũlũmĩlasya mũĩkĩĩo witũ ĩũlũ wa ũndũ ũũ: Yeova ndananganĩasya ala alũngalu vamwe na ala athũku. (2 Vet. 2:9; 3:9) O na kwĩtũlilikany’a vata wa kũtethya wĩa wa kũtavany’a ĩvindanĩ yĩĩ tũĩ. Kĩla mũndũ e na vata wa kũkanw’a mũthya ũtanavika!—Mt. 24:14.