Ũsu no ũndũ ũmwe katĩ wa maũndũ maingĩ ala amaitha ma Yesũ matũmĩaa kũmũmantha mavĩtyo vamwe na amanyĩw’a make. Ĩla Mĩao ya Mose nĩyawetete maũndũ mana mũndũ waĩle kwĩka ethĩwa nũkumwa nĩ kĩko kũndũnĩ kwake kwa kĩmbithĩ, ethĩwa e na ũwau wa mangũ, na ethĩwa nĩwakwata simba sya andũ kana sya nyamũ. O na nĩyawetete ũndũ mũndũ ũtonya kũthew’a ethĩwa nĩ mũvuku. Aĩ atonya kũthew’a kwa kumya nthembo, kũthamba, kana kũminzangĩw’a kĩw’ũ.—Ali., kĩl. 11-15; Mot., kĩl. 19.

Amanyĩsya ma ndĩni ya Kĩyuti maatĩanĩaa na kĩla kaũndũ mĩaonĩ ĩsu nĩ kana makaelesye kwa ũliku. Ĩvuku yĩmwe yaeleisye kana kĩndũ kyonthe kĩla kyaĩ kĩtonya kũvukya mũndũ “kyaneeneawa mũno nginya makatia maweta nĩ mavinda ta meva kĩtonya kũvukya mũndũ, ũvuku wakyo ũtonya kũkwatw’a andũ angĩ mũno wĩana ata na kwa nzĩa yĩva, mĩio na syĩndũ ila itonya kũkwatwa nĩ ũvuku ũsu, na mũthya, syĩthĩo ila syaaĩle kũatĩĩwa nĩ kana mũndũ athew’e.”

Amaitha ma Yesũ mamũkũlilye atĩĩ: “Nĩkĩ amanyĩw’a maku matikinyaa kwĩanana na mokũũ ma atumĩa, ĩndĩ nĩmaĩsaa lĩu woo na nzaa mbuku?” (Mko. 7:5) Amaitha asu mayendaa kwasya atĩ mũndũ nĩũkwatwa nĩ ũwau anaya na moko mate matheu. Kwosana na kĩthĩo kyoo, amanyĩsya asu ma ndĩni maasyaa kana no nginya mũndũ etĩkĩw’e kĩw’ũ mokonĩ atanambĩĩa kũya. Ĩvuku yĩla yawetwa vau ĩũlũ yasyokie yasya atĩĩ: “O na no kwakũlanaw’a nĩ mĩio yĩva yaaĩlĩte kwĩtĩkĩsya mũndũ kĩw’ũ, nĩ kĩw’ũ kĩva kyaaĩlĩte kũtũmĩwa, nũũ waaĩlĩte kwĩtĩkĩsya ũla ũngĩ kĩw’ũ, na aaĩlĩte kũmwĩtĩkĩsya kuma va nginya va.”

Yesũ o na ndaatinda aatĩanĩe na mĩao ĩsu atongoi asu ma Ayuti maseũvĩtye. Amasũngĩie o kwa ũkuvĩ amea: “Isaia nĩwathanie nesa ũndũ wenyu angangan’ya, o ũndũ kũandĩkĩtwe, Andũ aa nĩmandaĩaa na ilomo syoo, ĩndĩ ngoo syoo syĩ kũasa nakwa [Yeova]. Ĩndĩ manthaithaa ũthaithi wa mana, makĩmanyĩsya momanyĩsyo, nao nĩ mawĩaĩo ma andũ. Nĩmũtiaa mĩao ya Ngai, na kũkwataa mũno mokũũ ma andũ.”—Mko. 7:6-8.