MWĨĨTU-A-ASA ũmwe kuma Poland easya: “Navatisiwe nĩ na myaka 15, na ĩndĩ myei thanthatũ kuma vau natw’ĩka vainia mũtetheesya. Ĩtina wa mwaka ũmwe nĩnakũlilye nĩtw’ĩke vainia wa kĩla ĩvinda. Na ĩndĩ ĩla naminie sekondalĩ nĩnakũlilye ngatavany’e kĩsionĩ kĩ na vata mũnene wa atavany’a ma Ũsumbĩ. Ĩvinda yĩu nekalaa na ũsũe wakwa na ndaĩ Ngũsĩ. Na kwoou nĩnendaa mũno ngwate kĩsio kĩ vaasa na mũsyĩ na vaasa na ũsũe wakwa. Ĩndĩ neewie woo mũno ĩla mũsyaĩĩsya witũ wa mũthyũlũlũko wandavisye kana kĩsio kĩla ngũnengwa ndavany’e no kyu kya mũsyĩ! Nĩnatatie mũno ndakamanye ũndũ neewie. Naendie nĩw’ĩte thĩna ngasũanĩe kĩla wandavisye. Nĩvo ĩndĩ natavisye mwĩĩtu-a-asa ũla twanengiwe kĩsio kyu ĩmwe ndeto ii: ‘Nĩona ngĩka maũndũ ta Yona. Ĩndĩ ĩtina Yona nĩwesie kũthi Nineva vala watũmĩtwe. Kwoou o nakwa nĩngwĩtĩkĩla kũtavany’a kĩsionĩ kĩĩ nanengwa.’

“Nĩthĩĩtwe nĩ vainia kĩsionĩ kya mũsyĩ kwa ĩvinda ya myaka ĩna, na nĩnonete kana waĩ ũndũ wa ũĩ mũno kwĩka ũndũ neeiwe nĩnĩke. Woni mũthũku ũla naĩ naw’o nĩw’o waĩ thĩna wakwa mũnene. Yu nĩw’aa nĩ mũtanu mũno. O na ve mwei naĩ na amanyĩw’a 24 ma Mbivilia. Na nĩngũtũngĩa Yeova mũvea nũndũ nĩnambĩĩe kwĩmanyĩsya na ũsũa o na kau tene nĩwambĩngaa.”

Ve ĩvinda mũmanyĩw’a ũmwe wa Mbivilia wa nthĩ ya Fiji waĩ na ũtwi mũmũ wa kwĩka. Aĩ no nginya atw’e ethi ũmbanonĩ mũnene kana ethi na mũũme kũlilikana ĩsyawa ya mũndũ ũmwe wa mũsyĩ. Nĩweew’anie na mũũme kana no athi ũmbanonĩ ũsu. Aithi atiie atha mũũme kana auma ũmbanonĩ nũkwĩsa kũmũatĩĩa. Ĩndĩ ĩla waumie ũmbanonĩ eewie ataĩle kwĩlikya ũndũnĩ ũũtuma ethĩwa e mũisyonĩ kĩ-veva, na kwoou anyuva kũlea kũatĩĩa mũũme.

Nake mũũme avika kyathĩnĩ eeie andũ make ma mũsyĩ kana kĩveti nĩkĩmwĩtisye lũũsa kĩthi ũmbanonĩ wa Ngũsĩ na nĩkĩkwĩsa kũmũatĩĩa ũmbano ũsu wathela. Ĩndĩ namo mamũsũngĩie mamwĩa, “Ndwĩsa kũmwona vaa. Ngũsĩ iililikanaa ĩsyawa ya mũndũ!” *

Mũũme nĩweewie mũyo mũno nũndũ kĩveti kyake kyeekie ũtwi kĩtongoew’e nĩ mũĩkĩĩo wakyo na wasya wakyo wa ngoo. Nũndũ mũmanyĩw’a ũsu wa Mbivilia nĩwaendeeie kwĩthĩwa e mũĩkĩĩku, nĩwesie kũkwata mwanya wa kũtavya mũũme vamwe na andũ angĩ ũvoo mũseo. Kweethĩiwe ata? Mũũme nĩweetĩkĩlile kwĩmanyĩsya Mbivilia na ambĩĩa kũendany’a nake maũmbanonĩ.