1-2. (a) Yeova onaa kyaũ yĩla wasisya andũ milioni mbingĩ mombanĩte kwondũ wa Kyaũya kya Wĩoo kya Mwĩaĩi? (Sisya visa ĩthangũnĩ ya mbee vyũ.) (b) Twĩneenea kyaũ ĩsomonĩ yĩĩ?

KWAVINDĨĨSYA visa ũla Yeova wonaa yĩla andũ milioni mbingĩ ĩũlũ wa nthĩ moombana kwondũ wa Kyaũya kya Wĩoo kya Mwĩaĩi. O na kũtw’ĩka andũ mombanaa me kĩkundi, Yeova nĩwonaa kĩla ũmwe woo. Kwa ngelekany’o, nĩwĩsĩ ala mokaa ũmbanonĩ ũsu kĩla mwaka. Amwe moo nĩmatonya kwĩthĩwa manyamaaw’a mũno. Angĩ nĩmatonya kwĩthĩwa matokaa mũno maũmbanonĩ ma kĩla kyumwa, ĩndĩ mayĩw’a matesa kũtĩa ũmbano wa kũlilikana kĩkw’ũ kya Yesũ. O na Yeova no wĩthĩawa ene ala mooka ya mbee ũmbanonĩ ũsu, o na ethĩwa mooka o mone kĩla kĩendeeaa.

² Vate nzika, Yeova nĩwĩw’aa mũyo mũno oona andũ aingĩ me ũmbanonĩ wa kũlilikana kĩkw’ũ kya Yesũ. (Luka 22:19) Ĩndĩ ũu ti kwasya kana kĩla Yeova wĩthĩawa asyaĩtye no ũtalo wa ala me vo. Kĩla ũsiasya mũno nĩ kĩla kĩtumĩte mũndũ oka. Ĩsomonĩ yĩĩ nĩtũũneenea ĩkũlyo yĩĩ ya vata: Yo nĩkĩ tũendaa ũmbanonĩ wa kĩla mwaka wa kũlilikana kĩkw’ũ kya Yesũ, vamwe na maũmbanonĩ ala angĩ ma kĩla kyumwa Yeova wĩthĩawa avangĩĩe ala mamwendete?

3-4. (a) Tũendaa maũmbanonĩ nĩkĩ? (b) Kũthi maũmbanonĩ kwonanasya kyaũ ĩũlũ witũ? (c) Wasũanĩa kĩla kĩwetetwe nthĩnĩ wa 1 Akolintho 11:23-26, wĩona nĩkĩ tũtaĩle kũtĩĩa ũmbano wa kũlilikana kĩkw’ũ kya Yesũ?

³ Kĩtumi kĩla kĩnene kĩtumaa tũthi maũmbano nĩ kũthaitha. O na ĩngĩ nĩtũendaa maũmbano tũkamanyĩw’e nĩ Yeova. Andũ ala me mĩng’athĩlĩlyo mew’aa mate kwenda kũmanyĩw’a  nĩ mũndũ. (3 Yoa. 9) Ithyĩ tũyĩilye tamo. Twĩw’aa twĩ na mea ma kũmanyĩw’a nĩ Yeova na ala ũtũmĩaa ũseũvyonĩ wake.—Isa. 48:17, 18; Yoa. 6:45.

⁴ Yĩla twathi maũmbanonĩ, twĩthĩawa tũyonany’a nĩtwĩnyivĩtye, nĩtũkwenda kũmanyĩw’a, na nĩtũthalĩkĩtye ngoo twose ũmanyi. Tũendaa ũmbanonĩ wa kũlilikana kĩkw’ũ kya Yesũ nũndũ nĩtwĩsĩ kana nĩ wa vata mũno. O na ĩngĩ twĩkaa ũu nũndũ nĩtũkwenda kũatĩĩa kĩĩ Yesũ watwĩaĩe: “Ĩkaai ũu kwondũ wa kũndilikana.” (Soma 1 Akolintho 11:23-26.) Ũmbano ũsu nũlũlũmĩlasya wĩkwatyo witũ na ũitũlilikany’a ũndũ Yeova ũtwendete. Ĩndĩ Yeova nĩwĩsĩ kana nĩtwĩthĩawa na vata wa kwĩkĩwa vinya na kũlũlũmĩlw’a mavinda maingĩ, na ti o ĩmwe kwa mwaka. Nĩkyo kĩtumi ũtũvangĩĩaa maũmbano ma kĩla kyumwa na akatũthuthya tũendae tũteũtĩĩa. Na nũndũ twĩ na wĩnyivyo, nĩtwĩkaa ũu. O na nĩtũtũmĩaa masaa meana ũna kĩla kyumwa kwĩyũmbany’a na kũthi maũmbanonĩ asu.

5. Nĩkĩ andũ ala menyivĩtye metĩkĩlaa kũka kũmanyĩw’a nĩ Yeova?

⁵ Kĩla mwaka, andũ aingĩ menyivĩtye nĩmetĩkĩlaa kũka mamanyĩw’e nĩ Yeova. (Isa. 50:4) Mavinda maingĩ mambaa kũka ũmbanonĩ wa kũlilikana kĩkw’ũ kya Yesũ, na kuma vau mayambĩĩa kũka maũmbanonĩ ala angĩ. (Nzek. 8:20-23) Nĩtũtanĩaa mũno kũmanyĩw’a na kũtongoew’a twĩ vamwe nĩ Yeova, ‘mũtethya waitũ na mũvonokya waitũ.’ (Sav. 40:17) We nũkwona ta ve kĩndũ kĩngĩ kya vata na kĩtũtanĩthya ta kũmanyĩw’a nĩ Yeova na Yesũ, Mwana wake mwendwa?—Mt. 17:5; 18:20; 28:20.

6. Wĩnyivyo watethisye mũndũ ũmwe ata ooka ũmbanonĩ wa kũlilikana kĩkw’ũ kya Yesũ?

⁶ Kĩla mwaka nĩtũtataa tũthokye andũ aingĩ ũndũ vatonyeka moke ũmbanonĩ wa kũlilikana kĩkw’ũ kya Yesũ. Na andũ aingĩ menyivĩtye nĩmeetĩkĩlaa kũka na maitetheka mũno. Ekai twose ngelekany’o ĩmwe. Myaka yĩ navu ĩtina, ve mũndũ ũmwe wanengiwe kavalũa ka kũmũthokya ũmbano wa kũlilikana kĩkw’ũ kya Yesũ, ĩndĩ eea mwana-a-asa ũla wamũnengie kana ndevota kũka. Ĩndĩ mwana-a-asa aseng’ie mũno mũthenya ũsu wavika yĩla woonie mũndũ ũsu atonyeleela Nyũmbanĩ ya Ũsumbĩ. Mũndũ ũsu endeeiw’e mũno nĩ ũndũ wathokiw’e nginya ambĩĩa kũkaa maũmbano kĩla kyumwa. O na mwaka ũmwe ũla waatĩĩe akosie maũmbano o katatũ. Kyo nĩ kyaũ kyatumie ambĩĩa kũka maũmbano onthe? Ũuu nĩw’o watumie avĩndũa kĩlĩko. Mwana-a-asa ũla wamũthokisye esie kwasya, “Mwana ũsu e wĩnyivyo mwingĩ mũno.” Vate nzika, Yeova nĩwe wakusisye mũndũ ũsu oke kũmũthaitha, na yu tũũneena nĩ mwana-a-asa mũvatise.—Sav. 138:6; Yoa. 6:44.

7. Maũndũ ala twĩmanyĩasya maũmbanonĩ maitũ na ala tũsomaa Mbivilianĩ matonya kũtũtetheesya ata twĩthĩwe na wĩnyivyo?

⁷ Maũndũ ala twĩmanyĩasya maũmbanonĩ maitũ na ala tũsomaa Mbivilianĩ no matũtetheesye twĩthĩwe na wĩnyivyo. Maũndũ ala maneeneawa ũmbanonĩ syumwanĩ ila ithengeee ũmbano wa kũlilikana kĩkw’ũ kya Yesũ, methĩawa makonetye mũno mũno ngelekany’o yake. Nĩmaneeneaa ũndũ woonanisye wĩnyivyo wĩana kwa kũnengane thayũ wake wĩthĩwe nthembo ya wovosyo. Na ũmbano ũsu ũtielye o mĩthenya mĩnini nĩtwĩkĩawa vinya tũsome ilungu sya Mbivilia, ila ineeneete maũndũ ala meekĩkie ĩvindanĩ ya kĩkw’ũ kya Yesũ na ũthayũũkyo wake. Maũndũ ala twĩmanyĩasya maũmbanonĩ ĩvindanĩ yĩu na ala tũsomaa ilungunĩ isu, nĩmatũthangaasya tũtũngae mũvea nũndũ wa nthembo ĩsu. O na nĩmatumaa twĩw’a tũyenda kũatĩĩa ngelekany’o yake ya wĩnyivyo, na twenda kwĩka kwenda kwa Yeova o na yĩla maũndũ metu.—Luka 22:41, 42.

8. Yesũ oonanisye ũkũmbaũ ata?

⁸ Nguma ĩngĩ Yesũ weesĩkĩe nayo tũtataa twĩthĩwe nayo nĩ ũkũmbaũ. Kwasũanĩa ũndũ woonanisye ũkũmbaũ wĩana mĩthenya mĩvũthũ atanamba kũkw’a. Kavindanĩ kau Yesũ nĩweesĩ nesa vyũ kana amaitha make makilyĩ manambĩĩa kũmwĩkĩĩthya nthoni, mamũvũe, na maimũaa. (Mt. 20:17-19) Ĩndĩ nĩwatw’ĩte vyũ kana ndesyoka ĩtina. Yĩla saa wavikie, eeie atũmwa make, ala maĩ vamwe nake mũũndanĩ wa Ngesemanii, atĩĩ: “Ũkĩlai tũthi. Sisyai! Mũvũnyanĩi wakwa nũthengeee.” (Mt. 26:36, 46) Ĩtina wa vau, andũ ala mookĩte kũmũkwata nĩmavikie me na mĩio ya kaũ. Amona nĩwaũngamie mbee woo, amatavya nĩwe ũũ, na eea asikalĩ maekane na atũmwa make mathi. (Yoa. 18:3-8) Yesũ aĩ ngũmbaũ vate ngũĩ! Ũmũnthĩ Aklĩsto etĩkĩw’a mauta vamwe na malondu angĩ nĩmatataa kwĩthĩwa na ũkũmbaũ o ta Yesũ. Ata?

9. (a) Nĩ mavinda ta meva tũtonya kwĩthĩwa na vata wa ũkũmbaũ nĩ kana tũthi maũmbano tũteũtĩĩa? (b) Ngelekany’o yitũ ĩtonya kũtetheesya ata ana-a-asa ala movetwe nũndũ wa mũĩkĩĩo woo?

⁹ Ve maũndũ matonya kũtũkwata ũkethĩa no nginya twĩthĩwe na ũkũmbaũ nĩ kana tũthi maũmbanonĩ tũteũtĩĩa. Ve ana-a-asa na eĩtu-a-asa amwe maitũ matataa maikatĩĩe maũmbano o na kau me na kyeva kingĩ, nĩmatũlĩkĩte ngoo, kana nĩ awau. Ve angĩ namo mekaa ũu o na kau nĩmeũvĩngwa mũno nĩ andũ ma mũsyĩ kana silikalĩ sya kwoo. O na ĩngĩ, kwasũanĩa ũndũ ngelekany’o yitũ ĩtetheeasya ana-a-asa ala movetwe nũndũ wa mũĩkĩĩo woo. (Aevl. 13:3) Meew’a ũndũ tũendeee kũmũthũkũma Yeova twĩ o na maũndũ meũtata mũĩkĩĩo witũ, mew’aa meekĩwa vinya maendeee kũlũmya mũĩkĩĩo woo, maendeee kwĩthĩwa na ũkũmbaũ, na maiendeea kũlũmany’a na Yeova. Mũtũmwa Vaulo nũmwe watethekie kwa nzĩa ĩsu. Yĩla woovetwe Lomi, eew’aa mũyo mũno eew’a ũndũ ana-a-asa make maendeee kũmũthũkũma Ngai me aĩkĩĩku. (Avi. 1:3-5, 12-14) Kavinda kakuvĩ atanamba kũthaw’a kana amina kũthaw’a oou, nĩwaandĩkĩie Aklĩsto Aevelania valũa. Valũanĩ ũsu nĩweekĩie Aklĩsto asu vinya maendeee “kwĩthĩwa na wendo wa ana-a-asa,” mate kũeka kũmbana vamwe.—Aevl. 10:24, 25; 13:1.

10-11. (a) Naaũ twaĩle kũthokya ũmbanonĩ wa kũlilikana kĩkw’ũ kya Yesũ? (b) Kwosana na Aeveso 1:7, twĩkaa ũu nĩkĩ?

¹⁰ Twonanasya twĩ na ũkũmbaũ yĩla twathokya andũ ma mũsyĩ, ala tũthũkũmaa ĩmwe, na atũi maitũ moke kũlilikana kĩkw’ũ kya Yesũ. Ĩndĩ tũmathokasya nĩkĩ? Tũtũngaa mũvea mũno nũndũ wa kĩla Yeova na Yesũ matwĩkĩte nginya ũkethĩa twĩĩw’a tũtaema kũthokya angĩ moke ũmbanonĩ wa kũlilikana kĩkw’ũ kya Yesũ. Twendaa o namo memanyĩsye ũndũ matonya kũtetheka nĩ ‘ũseo mwingĩ’ wa Yeova, ũla watwonisye yĩla watũnengie nthembo ya wovosyo.—Soma Aeveso 1:7; Ũvu. 22:17.

¹¹ Ve nguma ĩngĩ ya vata twĩthĩawa tũyonany’a yĩla tweethĩwa na ũkũmbaũ wa kũendeea kũmbana vamwe. O na Yeova vamwe  na Mwana wake nĩmonanĩtye nesa vyũ nguma ĩsu maũndũnĩ me kĩvathũkany’o.

12. (a) Maũmbano matũtetheeasya ata tũkenda Yeova na Yesũ mũnango? (b) Ĩandĩko ya 2 Akolintho 5:14, 15 yĩtwĩkĩaa vinya twĩke ata nĩ kana twĩyĩelekany’e na Yesũ?

¹² Twĩw’aa tũtaĩle kũtĩa maũmbano nũndũ nĩtũmwendete Yeova na Yesũ. Na twathi maũmbanonĩ, nĩtwĩmanyĩasya maũndũ matumaa tũmwenda Yeova na Mwana wake mũnango. Twĩ maũmbanonĩ nĩtũlilikanaw’a kĩla matwĩkĩte. (Alo. 5:8) Na mũno mũno ũmbano wa kũlilikana kĩkw’ũ kya Yesũ nũtũlilikanasya ũndũ matwendete mũno wĩana, o na ũndũ mendete ala mataeleawa vata wa nthembo ya wovosyo. Nũndũ nĩtũtũngaa mũvea, nĩtũtataa kũatĩĩa ngelekany’o ya Yesũ kĩla mũthenya. (Soma 2 Akolintho 5:14, 15.) O vamwe na ũu, kĩu nĩkĩtumaa ngoo sitũ syenda kũmũtaĩa Yeova nũndũ wa nthembo ĩsu. Ũndũ ũmwe tũtonya kwĩka tũkamũtaĩa, nĩ kumya maelesyo kuma ngoonĩ yĩla twĩ maũmbanonĩ.

13. Tũtonya kwonany’a ata ũndũ tũmwendete Yeova na Mwana wake mũno wĩana? Elesya.

¹³ Yĩla tweyĩima maũndũ mana nĩ kana twendeesye Yeova na Mwana wake, twĩthĩawa tũimony’a ũndũ tũmendete mũno wĩana. Mavinda maingĩ wĩthĩaa no nginya twĩvate maũndũ mana nĩ kana tũthi maũmbanonĩ. Kwa ngelekany’o, ikundi mbingĩ syĩkaa ũmbano ũmwe mũthenya wa wĩa, katĩ katĩ wa kyumwa, na nĩvatonyeka ũkethĩa twĩthĩawa tũnoete. Naw’o ũmbano ũla ũngĩ wĩkawa wikendi, ĩvinda yĩla andũ aingĩ mathyũmũĩte. We Yeova nĩwonaa kĩthito kĩu twĩkĩaa, o na kau twĩthĩawa twĩ anou? Vate nzika, nũkyonaa! O ũndũ tweekĩa kĩthito kĩana, now’o tũmũtanĩthasya Yeova.—Mko. 12:41-44.

14. Yesũ oonanisye ata kana we nĩwendete ala angĩ vyũ na ngoo yonthe?

¹⁴ Yesũ aĩ mũndũ wendete ala angĩ vyũ na ngoo yonthe na nĩwatũtiĩe ngelekany’o nzeo. Ndaaĩw’a wĩ ũndũ wĩ vinya kũkw’a kwondũ wa amanyĩw’a make, na kũthĩnĩkĩaa mavata moo mbee wa ala make. Kwa ngelekany’o, ndaalea kũũngana na aatĩĩi make aĩ nũndũ eĩw’a anoete kana eĩw’a e na ũndũ ũũmũthĩny’a. (Luka 22:39-46) O na ĩngĩ, Yesũ asiasya mũno ũndũ ũtonya kũuna ala angĩ, ĩndĩ ti ũndũ mo matonya kũmũuna. (Mt. 20:28) Ethĩwa nĩtũmwendete Yeova na ana-a-asa maitũ vyũ,  tũkeekaa kyonthe kĩla tũtonya tũthi ũmbanonĩ wa Kyaũya kya Wĩoo kya Mwĩaĩi na maũmbano ala angĩ ma kĩkundi.

15. Naaũ twaĩle kũthĩnĩkĩa mũno?

¹⁵ Ithyĩ twĩ kĩkundinĩ kya Aklĩsto ala ma w’o, na nĩtũtũmĩaa ĩvinda yingĩ ũndũ vatonyeka tũithokya angĩ moke mamũthaithe Yeova vamwe naitũ. Ĩndĩ o na ũu wĩ o vo, nĩtũtetheeasya mũno mũno Aklĩsto ala mavoie nũndũ o namo nĩ “ana-a-asa maitũ nthĩnĩ wa mũĩkĩĩo.” (Aka. 6:10) Yĩla twamekĩa vinya moke ũmbanonĩ, na mũno mũno ũla wa kũlilikana kĩkw’ũ kya Yesũ, twĩthĩawa tũyonany’a kwa w’o nĩtũmendete. Nũndũ Yeova nĩ Ĩthe witũ na Mũĩthi witũ ũtwendete, ew’aa mũyo mũno e na Yesũ yĩla mũndũ wavoie wamũsyokea, na now’o twĩw’aa twoona ũu.—Mt. 18:14.

16. (a) Tũtonya kwĩkĩana vinya ata, na maũmbano maitũ matũtetheeasya ata? (b) Nĩkĩ yĩĩ nĩ ĩvinda ĩseo ya kũlilikana ndeto sya Yesũ ila syĩ nthĩnĩ wa Yoana 3:16?

¹⁶ Nthĩnĩ wa syumwa ila itiele tũtanombana kwondũ wa kũlilikana kĩkw’ũ kya Yesũ Wakatano, Matukũ 19, Mwei wa 4, 2019, mwa tata ũndũ ũtonya ũthokye aingĩ ũndũ vatonyeka meĩthĩwa vamwe naitũ. (Sisya ĩsandũkũ “ We Nũũmathokya?”) Na nthĩnĩ wa mwaka ũũ tũkwete, ekai tũkae maũmbano onthe tũteũtĩĩa, na tũitũmĩa nesa mwanya ũsu Yeova ũtũnengete twĩkĩane vinya. O ũndũ tũthengeee mũminũkĩlyo wa nthĩ ĩno, now’o maũmbano mekũendeea kwĩthĩwa me ma vata nĩ kana matũtetheesye tũendeee kwĩthĩwa na wĩnyivyo, ũkũmbaũ, na wendo. (1 Ath. 5:8-11) Kwoou ekai tũtw’e vyũ na ngoo yonthe kwony’a Yeova na Mwana wake kana nĩtũũmatũngĩa mũvea mũno nũndũ wa wendo ũla matwonisye!—Soma Yoana 3:16.