1-2. (a) Tũkothaa kũlilikana mwendwa witũ wakwie ĩndĩĩ? (b) Nĩ ũndũ wĩva Yesũ wambĩĩisye ũtukũ wa mũthya atanamba kũkw’a?

O NA ethĩwa vavĩtĩte ĩvinda yĩasavĩte ata kuma endwa maitũ makw’a, mayĩsaa kũla. Nĩtũsũanĩaa ĩũlũ woo, na mũno mũno matukũ ala makwie mavika.

² Kĩla mwaka, twĩthĩawa katĩ wa andũ milioni mbingĩ nthĩ yonthe, ala mombanaa nĩ kana malilikane kĩkw’ũ kya mũndũ mendete mũno, nake nĩ Yesũ Klĩsto. (1 Vet. 1:8) Tũmbanaa vamwe tũmũlilikane nũndũ aumisye thayũ wake ta nthembo ya wovosyo nĩ kana tũvonokw’e kuma naĩnĩ na kĩkw’ũnĩ. (Mt. 20:28) Eka ũu, Yesũ nĩweaĩe aatĩĩi make malilikanae kĩkw’ũ kyake. Ũtukũ wa mũthya atanakw’a ambĩĩisye kyaũya kya mwanya kya wĩoo, na eeaĩa amanyĩw’a make ũũ: “Ĩkaai ũu kwondũ wa kũndilikana.”—Luka 22:19.

3. Twĩneenea kyaũ ĩsomonĩ yĩĩ?

³ Amwe maendaa ũmbanonĩ wa kũlilikana kĩkw’ũ kya Klĩsto methĩawa na wĩkwatyo wa kũthi ĩtunĩ. Ĩndĩ andũ milioni mbingĩ ala me na wĩkwatyo wa kwĩkala ĩũlũ wa nthĩ o namo nĩmethĩawa vo. Ĩsomonĩ yĩĩ nĩtũkwona nĩkĩ onthe methĩawa na mea ma kũthi ũmbanonĩ ũsu kĩla mwaka. O na nĩtũkwona ũndũ tũtethekaa twathi ũmbanonĩ ũsu. Ekai twambe kwona maũndũ amwe matumaa etĩkĩw’a mauta methĩwa vo.

4. Nĩkĩ etĩkĩw’a mauta maĩsaa mũkate na kũnyw’a mbinyu ũmbanonĩ wa kũlilikana kĩkw’ũ kya Yesũ?

⁴ Kĩla mwaka, etĩkĩw’a mauta nĩmaĩsaa mũkate na kũnyw’a mbinyu ũmbanonĩ wa kũlilikana kĩkw’ũ kya Yesũ. Nĩkĩ? Nĩ kana tũsũngĩe ĩkũlyo yĩu, kwasũanĩa kĩla kyeekĩkie ũtukũ wa mũthya Yesũ e kũũ nthĩ. Nĩwambĩĩisye Kyaũya kya Wĩoo kya Mwĩaĩi ĩtina wa kũya Vasaka e na atũmwa make. Anengie atũmwa make aĩkĩĩku 11 mũkate na mbinyu na amea nĩmaye na mainyw’a. O na nĩwamatavisye ĩũlũ wa motianĩo, kana mawĩw’ano, elĩ; ũtianĩo mweũ na ũtianĩo kwondũ wa Ũsumbĩ. * (Luka 22:19, 20, 28-30) Motianĩo asu nĩmavingũĩe atũmwa asu na angĩ avũthũ mwanya wa kũtw’ĩka asumbĩ na athembi ĩtunĩ. (Ũvu. 5:10; 14:1) Nũndũ etĩkĩw’a mauta nĩmo me nthĩnĩ wa motianĩo asu elĩ, nĩmo maĩle kũya mũkate na kũnyw’a mbinyu ũmbanonĩ wa kũlilikana kĩkw’ũ kya Yesũ.

5. Nĩ kyaũ etĩkĩw’a mauta mesĩ ĩũlũ wa wĩkwatyo ũla manengetwe?

⁵ Ve ũndũ ũngĩ ũtumaa etĩkĩw’a mauta methĩwa na mea ma kũthi ũmbanonĩ wa kũlilikana kĩkw’ũ kya Yesũ. Kwĩka ũu nĩkũmanengae mwanya wa kũsũanĩa ĩũlũ wa wĩkwatyo woo. Yeova amanengete wĩkwatyo mũseo wa kũtanĩa thayũ ũtesa kũkw’a kana kwanangĩka ĩtunĩ, na kũsumbĩka na Yesũ Klĩsto vamwe na ala angĩ me ũtalonĩ wa 144,000. Na ũndũ ũla mũnene vyũ meteele nĩ kũmwona Yeova mwene! (1 Ako. 15:51-53; 1 Yoa. 3:2) Etĩkĩw’a mauta nĩmethĩawa mesĩ mekĩte kũthokw’a metanĩa maũndũ asu. Kwoou nĩ kana metĩkĩlw’e kũthi ĩtunĩ, no nginya mekale me aĩkĩĩku nginya kĩkw’ũ. (2 Tim. 4:7, 8) Vate nzika, etĩkĩw’a mauta nĩmatanĩaa kũsũanĩa ĩũlũ wa wĩkwatyo woo wa kũthi ĩtunĩ. (Tito 2:13) Nao nata “malondu angĩ”? (Yoa. 10:16) Nĩ maũndũ ta meva matumaa mathi ũmbanonĩ wa kũlilikana kĩkw’ũ kya Yesũ?

6. Nĩkĩ malondu angĩ maendaa ũmbanonĩ wa kũlilikana kĩkw’ũ kya Yesũ?

⁶ Ũmbanonĩ wa kũlilikana kĩkw’ũ kya Yesũ, malondu angĩ maiĩsaa mũkate kana kũnyw’a mbinyu. Mwakanĩ wa 1938 nĩw’o ala me na wĩkwatyo wa kwĩkala ĩũlũ wa nthĩ mathokiw’e ya mbee ũmbanonĩ ũsu. Ĩkaseti ya Mũsyaĩĩsya ya 01/03/1938 yaĩtye: “Wĩthĩwa wĩ ũndũ waĩle vyũ kwa [malondu angĩ] kwĩthĩwa vo ũmbanonĩ ũsu na mayona kĩla kĩendeeaa. . . . O namo nĩmaĩlĩte kũtanĩa ĩvinda yĩu.” O tondũ ala mathokw’a alũsinĩ matanĩaa kwĩthĩwa vo, malondu angĩ nĩmatanĩaa kwĩthĩwa vo ũmbanonĩ ũsu, o na kau maiĩsaa mũkate kana kũnyw’a mbinyu.

7. Nĩkĩ malondu angĩ methĩawa na mea ma kwĩthukĩĩsya ũvoo ũla wumaw’a ũmbanonĩ wa kũlilikana kĩkw’ũ kya Yesũ?

⁷ Malondu angĩ o namo nĩmasũanĩaa ĩũlũ wa wĩkwatyo woo. Methĩawa na mea ma kwĩthukĩĩsya ũvoo ũla wumaw’a ũmbanonĩ ũsu nũndũ kĩlungu kĩnene kyaw’o kĩneeneaa kĩla Klĩsto na ala makasumbĩka nake, 144,000, makeka kwondũ wa andũ aĩkĩĩku ĩvindanĩ ya Ũsumbĩ wa Myaka Ngili. Mũsumbĩ Yesũ Klĩsto akatongoesya asu makasumbĩka nake yĩla makethĩwa maitetheesya kũalyũla nthĩ yĩthĩwe yĩ nzaũ, na maitetheesya andũ ala ewi mavetewe naĩ. Andũ milioni mbingĩ ala mathi ũmbanonĩ ũsu nĩmatanĩaa mũno kũsũanĩa ũndũ mawathani ma Mbivilia makeanĩw’a, ta ala me nthĩnĩ  wa Isaia 35:5, 6; 65:21-23; na Ũvuany’o 21:3, 4. Kũkũna visa me nthĩ nzaũ vamwe na endwa moo nĩkũmatetheeasya kũlũlũmĩĩlya wĩkwatyo woo wa ĩvinda yũkĩte, na kũituma matw’a vyũ kũendeea kũmũthũkũma Yeova.—Mt. 24:13; Aka. 6:9.

8. Nĩ ũndũ ũngĩ wĩva ũtumaa malondu angĩ mathi ũmbanonĩ wa kũlilikana kĩkw’ũ kya Yesũ?

⁸ Kwasũanĩa ũndũ ũngĩ ũtumaa malondu angĩ mathi ũmbanonĩ wa kũlilikana kĩkw’ũ kya Yesũ. Methĩawa mayenda kwonany’a kana nĩmendete etĩkĩw’a mauta na nĩmamakwatĩte mbau. Ndeto ya Ngai nĩyathanie kana etĩkĩw’a mauta makeethĩwa na ngwatanĩo ndũmu na ala me na wĩkwatyo wa kwĩkala ĩũlũ nthĩ. Yeekie ũu ata? Ekai twone ngelekany’o o mbũthũ.

9. Kwosana na wathani ũla wĩ nthĩnĩ wa Nzekalia 8:23, malondu angĩ monaa ata etĩkĩw’a mauta?

⁹ Soma Nzekalia 8:23. Wathani ũsu nũtũtetheeasya kũkũna visa mũseo wa ũndũ malondu angĩ monaa ana-a-asa na eĩtu-a-asa moo etĩkĩw’a mauta. Ndeto “Mũyuti” na ndeto “nenyu” ineeneete etĩkĩw’a mauta. (Alo. 2:28, 29) Namo “andũ ĩkũmi, kuma ithyomonĩ syonthe sya i mbaĩ” nĩ malondu angĩ. Mathaniwe kana “makakwata” etĩkĩw’a mauta, kana kwa ndeto ingĩ, makalũmany’a namo ũthaithinĩ wa w’o. Kwoou malondu angĩ monanasya kana nĩmalũmanĩtye na etĩkĩw’a mauta kwa kwĩthĩwa namo ũmbanonĩ ũsu.

10. Yeova ekĩte ata nĩ kana wathani ũla wĩ Esekieli 37:15-19, 24, 25 wĩanĩe?

¹⁰ Soma Esekieli 37:15-19, 24, 25. Yeova nĩwĩanĩĩtye wathani ũsu kwa kũtuma etĩkĩw’a mauta na malondu angĩ mathũkũma me ngwatanĩo vyũ. Wathani ũsu ũwetete mĩtĩ ĩlĩ. Ala me na wĩkwatyo wa kũthi ĩtunĩ maelekanĩtw’e na mũtĩ ũla ũandĩkĩtwe “Kwa Yuta,” na asumbĩ ma Isilaeli maumaa mbaĩnĩ ĩsu. Namo ala me na wĩkwatyo wa kwĩkala kũũ nthĩ maelekanĩtw’e na mũtĩ “wa Evalaimu.” * Yeova athanie kana akakwatany’a ikundi isu syelĩ itw’ĩke “mũtĩ ũmwe.” Ũu nĩ kwonany’a kana onthe mathũkũmaa me ngwatanĩo matongoew’e nĩ Mũsumbĩ ũmwe, Klĩsto Yesũ. Kĩla mwaka, etĩkĩw’a mauta na malondu angĩ maendaa ũmbanonĩ wa kũlilikana kĩkw’ũ kya Yesũ me “ĩĩthya yĩmwe yĩ na mũĩthi ũmwe,” ĩndĩ ti ta ikundi ilĩ syĩ kĩvathũkany’o.—Yoa. 10:16.

11. “Malondu” ala mawetetwe nthĩnĩ wa Mathayo 25:31-36, 40 mekaa ũndũ wĩva mũnene wonanasya nĩmakwete mbau ana-a-asa ma Klĩsto?

¹¹ Soma Mathayo 25:31-36, 40. “Malondu” ala Yesũ wawetie ngelekany’onĩ ĩsu nĩ andũ ala alũngalu ĩvindanĩ yĩĩ ya mũminũkĩlyo me na wĩkwatyo wa kwĩkala kũũ nthĩ, namo nĩmo metĩtwe malondu angĩ. Methĩawa makwete mbau vyũ ana-a-asa ma Klĩsto etĩkĩw’a mauta. Ũndũ ũla mũnene mekaa nĩ kũmatetheesya kwĩanĩsya kĩanda kĩnene kĩla manengetwe kya kũtavany’a na kũtw’ĩkĩthya andũ amanyĩw’a nthĩ yonthe.—Mt. 24:14; 28:19, 20.

12-13. Nĩ maũndũ angĩ meva malondu angĩ mekaa monany’e nĩmakwete mbau ana-a-asa ma Klĩsto?

¹² Syumwa mbũthũ ũmbano wa kũlilikana kĩkw’ũ kya Yesũ ũtanavika, malondu angĩ nĩmonanasya kana nĩmakwete mbau vyũ ana-a-asa ma Klĩsto kwa kwĩyumya na ngoo yonthe kambeininĩ ya kũthokya ala mekwendeew’a ũmbanonĩ ũsu. (Sisya ĩsandũkũ “ We Nĩwĩyũmbanĩsye Ĩvinda ya Kũlilikana Kĩkw’ũ kya Yesũ?”) O na ĩngĩ, nĩmekaa mĩvango yonthe ĩla ĩkwendeka nĩ kana ikundi syonthe ĩũlũ wa nthĩ syĩke ũmbano ũsu, o na kau ikundi mbingĩ  iyĩthĩawa na andũ meũya mũkate kana kũnyw’a mbinyu. Malondu angĩ nĩmatanĩaa mũno kũkwata mbau ana-a-asa ma Klĩsto maũndũnĩ asu. Nĩmesĩ kana Yesũ onaa maũndũ ala mekwĩka ana-a-asa make tawe meũmwĩka.—Mt. 25:37-40.

¹³ Nĩ maũndũ angĩ meva matumaa ithyonthe, o na twĩthĩwe twĩ na wĩkwatyo wĩva, tũthi ũmbanonĩ wa kũlilikana kĩkw’ũ kya Yesũ?

14. Yeova na Yesũ monanĩtye ata kana nĩmatwendete mũno?

¹⁴Nĩtũtũngaa mũvea nũndũ Yeova na Yesũ nĩmonanĩtye kana nĩmatwendete mũno. Ve maũndũ maingĩ Yeova wĩkĩte akonany’a kana nũtwendete mũno, ĩndĩ ve ũndũ ũmwe mũnene vyũ kwĩ onthe. Ngai witũ oonanisye nũtwendete mũno vyũ kwa kũtũma Mwana wake mwendwa athĩne na aikw’a kwondũ witũ. (Yoa. 3:16) Na nĩtwĩsĩ kana o nake Yesũ nũtwendete mũno nũndũ aumisye thayũ wake na ngenda kwondũ witũ. (Yoa. 15:13) Vai kĩndũ twĩka tũkaĩva Yeova na Yesũ nũndũ wa wendo ũsu mwingĩ matwonisye. Ĩndĩ no twonany’e nĩtũtũngaa mũvea kwĩsĩla mwĩkalĩle witũ kĩla mũthenya. (Ako. 3:15) O na ĩngĩ, tũendaa ũmbanonĩ wa kũlilikana kĩw’ũ kya Yesũ nĩ kana tũlilikane wendo ũsu matwonisye, na tũyonany’a kana o naitũ nĩtũmendete.

15. Nĩkĩ etĩkĩw’a mauta na malondu angĩ monaa nthembo ya wovosyo yĩ mũthĩnzĩo wa vata vyũ?

¹⁵Twonaa nthembo ya wovosyo yĩ mũthĩnzĩo wa vata vyũ. (Mt. 20:28) Etĩkĩw’a mauta monaa nthembo ya wovosyo yĩ ya vata vyũ nũndũ nĩyo ĩtumaa wĩkwatyo woo wĩanĩa. Nũndũ nĩmaĩkĩĩe nthembo ya Klĩsto, Yeova nũmatalĩle kwĩthĩwa me alũngalu na akamatw’a ana make. (Alo. 5:1; 8:15-17, 23) O namo malondu angĩ nĩmatũngaa mũvea nũndũ wa nthembo ya wovosyo. Nũndũ nĩmaĩkĩĩe nthembo ya Klĩsto, me na wasya mũtheu wa ngoo mbee wa Ngai, nĩmamũthũkũmaa ũthũkũmi mũtheu, na me na wĩkwatyo wa kuma “ũla thĩnanĩ mũnene.” (Ũvu. 7:13-15) Ũndũ ũmwe etĩkĩw’a mauta na malondu angĩ mekaa monany’e nĩmeũtũnga mũvea nũndũ wa nthembo ya wovosyo nĩ kwĩthĩwa vo ũmbanonĩ wa kũlilikana kĩkw’ũ kya Yesũ kĩla mwaka.

16. Nĩ ũndũ ũngĩ wĩva ũtumaa tũthi ũmbanonĩ wa kũlilikana kĩkw’ũ kya Yesũ?

¹⁶ O na ĩngĩ, tũendaa ũmbanonĩ wa kũlilikana kĩkw’ũ kya Yesũ nũndũ twĩthĩawa tũyenda kũmwĩw’a. O na twĩthĩwe twĩ na wĩkwatyo wĩva, kĩla ũmwe witũ nĩwendaa kũatĩĩa mwĩao ũũ Yesũ wanenganie ũtukũ ũla wambĩĩisye mũvango wa kũlilikana kĩkw’ũ kyake: “Ĩkaai ũu kwondũ wa kũndilikana.”—1 Ako. 11:23, 24.

17. Ũmbano wa kũlilikana kĩkw’ũ kya Yesũ ũtũtetheeasya ata kũmũthengeea Yeova?

¹⁷Nĩtũmũthengeeaa Yeova. (Yak. 4:8) O tondũ tweemanyĩsya, ũmbano wa kũlilikana kĩkw’ũ kya Yesũ nũtũnengae mwanya wa kũsũanĩa ĩũlũ wa wĩkwatyo ũla Yeova ũtũnengete na wa kũvindĩĩsya wendo mwingĩ ũla watwonisye. (Yel. 29:11; 1 Yoa. 4:8-10) Yĩla twavindĩĩsya maũndũ asu, nĩtũmwendaa mũno na tũkalũlũmĩĩlya ngwatanĩo yitũ nake.—Alo. 8:38, 39.

18. Kũvindĩĩsya ngelekany’o ya Yesũ kũtũthangaasya twĩke ata?

¹⁸Nĩtũthangaaw’a tũatĩĩe ngelekany’o ya Yesũ. (1 Vet. 2:21) Vatiele mĩthenya mĩnini ũmbano wa kũlilikana kĩkw’ũ kya Yesũ  ũvike, nĩtũsomaa Mbivilianĩ maũndũ ala meekĩkie kyumwanĩ kyake kya mũthya kũũ nthĩ, na tũkasoma ĩũlũ wa kĩkw’ũ kyake na kũthaayũkw’a kwake. Na ĩndĩ wĩoonĩ wa mũthenya ũsu, nĩtwĩthukĩĩasya ũvoo wa Mbivilia ũtũlilikanasya ũndũ Yesũ ũtwendete. (Aev. 5:2; 1 Yoa. 3:16) Yĩla twasoma na twavindĩĩsya ũndũ weeyumisye na ngenda, nĩtũthangaaw’a ‘tũendae o ũndũ [we] waendaa.’—1 Yoa. 2:6.

19. Tũtonya kwĩyĩkalya wendonĩ wa Ngai ata?

¹⁹Nĩtũthangaaw’a tũendeee kwĩyĩkalya wendonĩ wa Ngai. (Yuta 20, 21) Twĩyĩkalasya wendonĩ wa Ngai kwa kwĩka kyonthe kĩla tũtonya tũkwate mĩao yake, tũtaĩe ĩsyĩtwa yake, na tũitanĩthya ngoo yake. (Nth. 27:11; Mt. 6:9; 1 Yoa. 5:3) Kũthi ũmbanonĩ wa kũlilikana kĩkw’ũ kya Yesũ kũtũthuthasya tũendeee kwĩkala kĩla mũthenya ta tũũmwĩa Yeova ũũ: ‘Nyie nĩngwenda kwĩkala wendonĩ waku tene na tene!’

20. Twĩ na itumi syĩva nzeo sya kũthi ũmbanonĩ wa kũlilikana kĩkw’ũ kya Yesũ?

²⁰ Twĩthĩwe twĩ na wĩkwatyo wa kwĩkala tene na tene ĩtunĩ kana nĩ kũũ nthĩ, twĩ na itumi nzeo sya kũthi ũmbanonĩ wa kũlilikana kĩkw’ũ kya Yesũ. Yĩla twoombana mũthenya ũsu kĩla mwaka, nĩtũlilikanaa kĩkw’ũ kya mũndũ twendete, nake nĩ Yesũ Klĩsto. Na ũndũ ũla wa vata vyũ nĩ kana, nĩtũlilikanaa ũndũ ũla mũnene vyũ Yeova weekie oonany’a nũtwendete, naw’o nĩ kũnengane Mwana wake ethĩwe nthembo ya wovosyo. Mwaka ũũ, ũmbano ũsu ũkeekwa wĩoo wa Wakatano, Matukũ 15, Mwei wa 4, 2022. Nĩtũmwendete Yeova na Mwanae. Kwoou matukũ ma mũthenya ũla Yesũ wakwie mavika, vai kĩndũ kĩngĩ twonaa kĩ kya vata ta kwĩthĩwa vo ũmbanonĩ ũsu.