KĨLUNGU KYA KWĨMANYĨSYA KYA 5
WATHI 108 Wendo wa Ngai
Ũndũ Tũtethekaa Nĩ Wendo wa Yeova
“Klĩsto Yesũ ookie ĩũlũ wa nthĩ kũtangĩĩa eki ma naĩ.”—1 TIM. 1:15.
KĨLA KĨNEENEWE
Nĩtũkwĩmanyĩsya ũndũ tũtonya kũtetheka nĩ nthembo ya wovosyo na ũndũ tũtonya kũmwonyʼa Yeova kana nĩtũũmũtũngĩa mũvea.
1. Nĩ kyaũ twaĩle kwĩka nĩ kana tũmũtanĩthye Yeova?
KWASŨANĨA ũnengete mũndũ wendete mũthĩnzĩo mũseo mũno na ũtonya kũmũtethya. Mwa no ũkwʼe ngoo mũno akathi kũwia vandũ na ũyĩthĩa ndekũũngana nawʼo! Kĩvathũkanyʼo na ũu, no ũtane mũno woona aiũtũmĩa nesa na aitũnga mũvea nũndũ wawʼo. Kĩu kĩtũmanyĩsya kyaũ? Yeova nĩwanenganie Mwana wake akwʼe kwondũ witũ. Kwoou no nginya ethĩwe atanaa mũno oona tũitũnga mũvea nũndũ wa mũthĩnzĩo ũsu wa mwanya na wendo ũla watwonisye yĩla wanenganie Mwana wake ethĩwe nthembo ya wovosyo!—Yoa. 3:16; Alo. 5:7, 8.
2. Twĩneenea kyaũ ĩsomonĩ yĩĩ?
2 Ĩndĩ o ũndũ ĩvinda yĩvĩtĩte, no twambĩĩe kũvũthĩĩsya mũthĩnzĩo wa nthembo ya wovosyo. Tũkaeka kwona nthembo ĩsu yĩ ya vata, no ta twĩthĩwa tũyia mũthĩnzĩo ũsu Ngai watũnengie vandũ tũte kũwona na tũte kũũsũanĩa. Ĩndĩ nĩ kana kĩu kĩikekĩke, mavinda onthe nĩtwaĩle kwĩkalaa tũisũanĩa kĩla Ngai na Klĩsto meekie kwondũ witũ. Ĩsomo yĩĩ nĩyĩũtũtetheesya kwĩkaa ũu. Nĩtũkwĩmanyĩsya ũndũ nthembo ya wovosyo ĩtũtethasya ũmũnthĩ na ũndũ ĩkatũtethya ĩvinda yũkĩte. O na ĩngĩ, nĩtũkwona kĩla twaĩlĩte kwĩka nĩ kana twonanyʼe nĩtũtũngĩaa Yeova mũvea nũndũ wa wendo wake, na mũno mũno ĩvindanĩ yĩĩ ya kũlilikana kĩkwʼũ kya Yesũ.
ŨNDŨ TŨTETHEKAA ŨMŨNTHĨ
3. Nĩ ũndũnĩ ũmwe wĩva tũtethekaa nĩ nthembo ya wovosyo ũmũnthĩ?
3 Ũmũnthĩ, nĩtũtethekaa nĩ nthembo ya wovosyo ya Klĩsto. Kwa ngelekanyʼo, nĩtumaa Yeova atũekea naĩ sitũ. O na kũtwʼĩka ti nginya eke ũu, we nĩwendaa kũtũekea. Mũandĩki wa Savulĩ aielesya ũndũ weewʼaa nũndũ wa kũekewa nĩ Yeova aisye atĩĩ: “Wĩ mũseo, Mwĩaĩi, na nĩwĩyũmbanĩtye kũekea.”—Sav. 86:5; 103:3, 10-13.
4. Yeova anenganie nthembo ya wovosyo kwondũ wa aaũ? (Luka 5:32; 1 Timotheo 1:15)
4 Andũ amwe no mewʼe ta mataĩlĩte kũekewa nĩ Yeova. Na ũu nĩ wʼo nũndũ vai mũndũ wĩsa kwasya kana no nginya aekewe nĩ Yeova. O na mũtũmwa Vaũlo ndoonaa ‘aĩle kwĩtwa mũtũmwa, nũndũ nĩwathĩnasya kĩkundi kya Ngai.’ O na vailye ũu, ongelile kwasya ũũ: “Nyie nĩilye ũndũ nĩilye ũmũnthĩ nũndũ wa ũseo mwingĩ wa Ngai.” (1 Ako. 15:9, 10) Yĩla tweelila, Yeova nũtũekeaa. Nĩkĩ wĩkaa ũu? Ekaa ũu nũndũ nũtwendete, ĩndĩ ti aĩ nĩkwĩthĩwa nĩtwaĩle kũekewa. Kwoou ethĩwa nĩwĩwʼaa wĩ vathei, lilikanaa kana Yeova ndaanengane nthembo ya wovosyo kwondũ wa andũ mate na naĩ, ĩndĩ amĩnenganie kwondũ wa eki ma naĩ ala meelila.—Soma Luka 5:32; 1 Timotheo 1:15.
5. Ve mũndũ ũtonya kwasya kana no nginya aekewe nĩ Yeova? Elesya.
5 Vai mũndũ o na ũmwe ũtonya kwasya kana Yeova nĩwaĩle kũmũekea o na ethĩwa amũthũkũmĩte ĩvinda yĩasavĩte ata. Nĩ wʼo kana nũlilikanaa maũndũ onthe ala twaaĩka kwondũ wake. (Aevl. 6:10) O na atũnengie Mwana wake ta mũthĩnzĩo wa mana, ĩndĩ ndaaĩka ũu aĩ nĩ kana atũĩve nũndũ wa maũndũ ala twĩkaa kwondũ wake. Kwoou twĩthĩwa tũivĩtya mũno tũkambĩĩa kũsũanĩa kana Yeova nĩwaĩle kũtũekea nũndũ wa maũndũ maingĩ ala twĩkĩte kwondũ wake. Tũkasũanĩa ũu, twĩthĩwa tũyonanyʼa kana Klĩsto akwie mana.—Sianĩsya na Akalatia 2:21.
6. Nĩkĩ Vaũlo weekĩaa kĩthito ũthũkũminĩ wa Yeova?
6 Vaũlo nĩweesĩ kana o na eekĩa kĩthito kingĩvĩte ata amũthũkũme Yeova, we ndaĩ amũekee aĩ no ũndũ wa ũthũkũmi wake. Nĩkĩ ĩndĩ weekĩaa kĩthito kingĩvĩte ũu ũthũkũminĩ wa Yeova? Eekaa ũu nĩ kana amũtũngĩe mũvea nũndũ wa ũseo mwingĩ ũla wamwonetye. (Aev. 3:7) O ta Vaũlo, tũendeeaa kũmũthũkũma Yeova na kĩthito nĩ kana tũmũtũngĩe mũvea nũndũ wa tei wake, ĩndĩ ti aĩ nĩ kana atũekee naĩ sitũ.
7. Nthembo ya wovosyo ĩtũtethasya ũndũnĩ ũngĩ wĩva ũmũnthĩ? (Alomi 5:1; Yakovo 2:23)
7 Ũndũ ũngĩ nthembo ya wovosyo ĩtũtethasya nĩ kana no twĩthĩwe na ngwatanĩo nzeo na Yeova. a O tondũ ĩsomo ĩvĩtu yĩwetete, tũisyaawa twĩ na ngwatanĩo nzeo na Yeova. Ĩndĩ nũndũ wa nthembo ya wovosyo, no tũtanĩe “mũuo vamwe na Ngai” na kĩu kĩituma tũmũthengeea.—Soma Alomi 5:1; Yakovo 2:23.
8. Nĩkĩ twaĩle kũmũtũngĩa Yeova mũvea nũndũ no tũneene nake kwĩsĩla mboya?
8 Nũndũ wa kwĩthĩwa na ngwatanĩo nzeo vamwe na Yeova, nĩtũtanĩaa kũmũvoya. Nĩwĩwʼaa mboya sitũ yĩla tũũmũvoya twĩ mbee wa andũ, o na yĩla tũũmũvoya twĩ ithyoka. Mboya nĩtumaa tũusya, na tũkethĩwa na mũuo wa kĩlĩko. Na ti ũu wʼoka: No ĩlũlũmĩĩlye ngwatanĩo yitũ na Yeova. (Sav. 65:2; Yak. 4:8; 1 Yoa. 5:14) Yĩla Yesũ waĩ vaa ĩũlũ wa nthĩ, nĩwamũvoyaa Ĩthe wake ateũtĩĩa nũndũ nĩweesĩ kana nũkũmwĩwʼa na kwĩka ũu nĩkwatumaa ngwatanĩo yoo ĩlũlũmĩĩla. (Luka 5:16) Mwa tũtanaa ta kĩ kũmanya kana nũndũ wa nthembo ya wovosyo ya Yesũ, no twĩthĩwe anyanya ma Yeova na no tũmũvoye!
ŨNDŨ TŨKATETHEKA ĨVINDA YŨKĨTE
9. Nthembo ya wovosyo ĩkatethya ata athaithi aĩkĩĩku ma Yeova ĩvinda yũkĩte?
9 Athaithi aĩkĩĩku ma Yeova makatetheka ata nũndũ wa nthembo ya wovosyo? Yeova akamanenga thayũ wa tene na tene. Andũ aingĩ monaa ũsu ne ũndũ ũtatonyeka nũndũ kwa myaka ngili mbingĩ, andũ nĩmethĩĩtwe maikwʼa. Ĩndĩ kuma tene Yeova endaa andũ mekale tene na tene. Keka Atamu ndaavĩtya, vai mũndũ wĩsa kũsũanĩa kana kwĩkala thayũ tene na tene nĩ ũndũ ũtatonyeka. Na twĩasya ũu nũndũ andũ onthe methĩwa mayĩkala tene na tene. Na o na kau ũndũ ũsu no woneke ta ũtatonyeka kwa oyu, no tũĩkĩĩe kana ũkatonyeka, na kĩtumi nũndũ Yeova nĩwaĩvie ndĩvi nene, kana kwa ndeto ingĩ, nĩwaumisye thayũ wa Mwana wake nĩ kana ũu wĩthĩwe.—Alo. 8:32.
10. Nĩ ũndũ wĩva etĩkĩwʼa mauta na malondu angĩ meteele na mea?
10 O na kau thayũ wa tene na tene nĩ mũthĩnzĩo tũkatanĩa ĩvinda yũkĩte, Yeova endaa tũũsũanĩe yu tũĩ. Etĩkĩwʼa mauta me na wĩkwatyo wa kũtanĩa thayũ ĩtunĩ vala makatanĩa kũsumbĩka nthĩ me na Klĩsto. (Ũvu. 20:6) Namo malondu angĩ me na wĩkwatyo wa kwĩkala nthĩ nzaũ vala vatakethĩwa woo na kĩĩo. (Ũvu. 21:3, 4) We wĩ ũmwe wa ala me na wĩkwatyo wa kwĩkala ĩũlũ wa nthĩ tene na tene? Tũyĩsa kwasya kana wĩkwatyo ũsu ti wa vata mũno ta wa ala makathi ĩtunĩ. Twĩasya ũu nũndũ Yeova oombie andũ me na wendi wa kwĩkala ĩũlũ na nthĩ. Kwoou kwĩkala ĩũlũ wa nthĩ tene na tene kũkatũetee ũtanu mwingĩ mũno.
11-12. Nĩ moathimo amwe meva tweteele na mea nthĩnĩ wa nthĩ nzaũ? (O na ĩngĩ, sisya visa.)
11 Kwasũanĩa ũndũ maũndũ makethĩwa mailye nthĩ nzaũ. Ndũkemakĩaa ũyona ta ũtonya kũwaa kana kũkwʼa. (Isa. 25:8; 33:24) O na ĩngĩ, Yeova akeanĩsya vyũ maũndũ onthe ala kĩla ũmwe witũ wendaa. Nĩ maũndũ meva wenda kwĩsa kwĩmanyĩsya? No kwĩthĩwa ũkenda kwĩmanyĩsya maũndũ maingangĩ ĩũlũ wa nyamũ. O na no kwĩthĩwa ũkenda kwĩmanyĩsya mũio mũna wa wathi kana kũsola. Na vate nzika vakethĩwa na vata wa andũ mesĩ kũsola myako, kwaka nyũmba na aĩmi. Eka ũu, vakeethĩwa na vata wa andũ mesĩ mawĩa angĩ ta kũua, kũseũvya mĩio ya wĩa, kũvanda mĩtĩ na malaa na kũmasũvĩa. (Isa. 35:1; 65:21) Na nũndũ tũkekala tene na tene, tũkeethĩwa na ĩvinda ya kwĩka maũndũ asu na angĩ maingĩ.
12 Mwa tũkatanĩa ta kĩ kũthokya ĩngĩ andũ ala makathayũũkwʼa. (Meko 24:15) O na ĩngĩ, kwasũanĩa ũndũ ũkatanĩa kwĩmanyĩsya maũndũ maingangĩ ĩũlũ wa Yeova weeloela syĩndũ syĩ kĩvathũkanyʼo ila woombie. (Sav. 104:24; Isa. 11:9) Na ũndũ ũla wa vata nĩ kana ũkatanĩa kũmũthaitha Yeova ũte kwĩyĩandũa o na vanini! We no ũkũanyʼe moathimo asu maingĩvĩte ũu aĩ nĩ kana ‘ũtanĩe naĩ kwa kavinda kanini’? (Aevl. 11:25) Vate nzika, ndwĩsa! Moathimo asu nĩ maseo vyũ kwĩ kĩndũ kĩngĩ o na kĩva tũtonya kwĩyĩima oyu. Lilikana kana ve ĩvinda yĩkavika wĩthĩe nthĩ nzaũ ti o kĩndũ tweteele. Ĩvindanĩ yĩu, tũkeethĩwa tũimĩtanĩa. Maũndũ asu onthe maitonya kwĩanĩa ta keka Yeova ndaatwenda mũno nginya akaumya Mwana wake akwʼe kwondũ witũ!
Nĩ moathimo meva weteele na mea vyũ nthĩnĩ wa nthĩ nzaũ? (Sisya kalungu ka 11-12)
ONANYʼA KANA NŨTŨNGAA MŨVEA NŨNDŨ WA WENDO WA YEOVA
13. Tũtonya kwonanyʼa ata kana nĩtũtũngaa mũvea nũndũ wa wendo wa Yeova? (2 Akolintho 6:1)
13 Tũtonya kwonanyʼa ata kana nĩtũmũtũngĩaa Yeova mũvea nũndũ wa nthembo ya wovosyo? Nĩ kwa kũvĩtya mbee ũthũkũmi wake thayũnĩ witũ. (Mt. 6:33) Na kĩtumi nũndũ Yesũ akwie “kwondũ wa onthe nĩ kana ala me thayũ maikethĩwe thayũ kwondũ woo ene, ĩndĩ kwondũ wa ũla wamakwʼĩĩe na athayũũkwʼa.” (2 Ako. 5:15) Mwa tũyenda kwĩsa kwasya kĩeleelo kya ũseo mwingĩ wa Yeova.—Soma 2 Akolintho 6:1.
14. Tũtonya kwonanyʼa ata kana nĩtũĩkĩĩe myolooto ya Yeova?
14 O na ĩngĩ, no twonanyʼe kana nĩtũmũtũngĩaa Yeova mũvea nũndũ wa wendo wake kwa kũmũĩkĩĩa na kũatĩĩa myolooto yake. Tũtonya kwĩka ũu ata? Yĩla tũkwĩka motwi makonetye maũndũ ta twĩsoma nginya va na nĩ wĩa wĩva twaĩlĩte kwĩtĩkĩla, no nginya tũsũanĩae kĩla Yeova wendaa twĩke. (1 Ako. 10:31; 2 Ako. 5:7) Yĩla tweeka motwi mekwonanyʼa kana nĩtũmũĩkĩĩe Yeova, mũĩkĩĩo witũ na ũnyanya witũ vamwe nake nũlũlũmĩĩlaa. Eka ũu, o nawʼo wĩkwatyo witũ nũlũlũmĩĩlaa.—Alo. 5:3-5; Yak. 2:21, 22.
15. Tũtonya kwonanyʼa ata kana nĩtũtũngaa mũvea nũndũ wa wendo wa Yeova ĩvindanĩ yĩĩ ya kũlilikana kĩkwʼũ kya Yesũ?
15 Ve ũndũ ũngĩ tũtonya kwĩka tũkonanyʼa kana nĩtũtũngaa mũvea nũndũ wa wendo wa Yeova. Ũndũ ũsu nĩ kũtũmĩa ĩvinda yĩĩ ya kũlilikana kĩkwʼũ kya Yesũ kwonyʼa Yeova kana nĩtũtũngaa mũvea nũndũ wa nthembo ya wovosyo. Eka o kwĩthĩwa vo kwondũ wa ũmbano wa kũlilikana kĩkwʼũ kya Yesũ, no tũthokye angĩ moke. (1 Tim. 2:4) Elesya ala ũũthokya kĩla kĩkaendeea ũmbanonĩ ũsu. No wĩthĩwe wĩ ũndũ mũseo kũmonyʼa vitio syĩ na kyongo, Yesũ Akwie Nĩkĩ? na Kũlilikana Kĩkwʼũ kya Yesũ nthĩnĩ wa jw.org/kam. Atumĩa namo nĩmaĩle kũthokya ala mavoie. Kwasũanĩa ũtanu ũla ũtonya kwĩthĩwa vo ĩtunĩ na kũũ nthĩ yĩla malondu amwe ma Yeova ala mau masyoka ĩĩthyanĩ. (Luka 15:4-7) Twĩ ũmbanonĩ ũsu, tũikakethye o ala twĩsĩ tu, ĩndĩ tũĩkĩĩthye kana nĩtwakethya ala eũ na ala methĩĩtwe mate kũka maũmbanonĩ kwa ĩvinda yĩasa. Twĩenda mewʼe me eanĩe.—Alo. 12:13.
16. Nĩkĩ twaĩlĩte kwongelanga ũthũkũmi witũ ĩvindanĩ yĩĩ ya kũlilikana kĩkwʼũ kya Yesũ?
16 We no wongelange ũthũkũmi waku ĩvindanĩ yĩĩ ya kũlilikana kĩkwʼũ kya Yesũ? Weeka ũu, ũkeethĩawa ũyonanyʼa nesa kana nũũtũnga mũvea nũndũ wa kyonthe kĩla Ngai na Klĩsto mekĩte kwondũ witũ. O ũndũ twongelanga ũthũkũmi witũ kwa Yeova, nowʼo tũkeeyoneaa ũndũ ũkũtũtetheesya na kĩu kĩkatumaa tũmũĩkĩĩa mũnango. (1 Ako. 3:9) O na ĩngĩ, ĩkĩĩthya nĩwasoma ilungu sya Kũsoma Mbivilia Ĩvinda ya Kũlilikana Kĩkwʼũ kya Yesũ ila syĩthĩawa syonanĩtwʼe kavukunĩ ka Kũneenea Maandĩko Kĩla Mũthenya kana kyatinĩ kĩla kĩ kavukunĩ ka kwĩmanyĩsya ka ũmbano wa katĩkatĩ wa kyumwa. O na no ũtwʼe kũtũmĩa mĩsoa ĩsu yĩla ũkwĩmanyĩsya we mwene.
17. Nĩ kyaũ kĩmũtanĩthasya Yeova? (O na ĩngĩ, sisya ĩsandũkũ “Ũndũ Tũtonya Kwonanyʼa Kana Nĩtũũtũnga Mũvea Nũndũ wa Wendo wa Yeova.”)
17 Nĩ wʼo kana ve maũndũ matonya kũtuma ũteka kyonthe kĩla kĩwetetwe ĩsomonĩ yĩĩ. Ĩndĩ lilikana kana Yeova ndaelekanasya kĩla ũkwĩka kwondũ wake na kĩla ala angĩ mekwĩka. We onaa kĩla kĩ ngoonĩ yaku. Na nũtanaa mũno oona ũndũ ũũtũnga mũvea kuma ngoonĩ nũndũ wa mũthĩnzĩo wa mwanya wa nthembo ya wovosyo.—1 Sam. 16:7; Mko. 12:41-44.
18. Nĩkĩ tũtũngĩaa Yeova Ngai na Yesũ Klĩsto mũvea?
18 No nthembo ya wovosyo yĩ yoka ĩtonya kũtuma tũekewa naĩ sitũ, tũtwʼĩka anyanya ma Yeova, na twĩthĩwa na wĩkwatyo wa kwĩkala thayũ tene na tene. Ekai mavinda onthe twonanasye kana nĩtũtũngaa mũvea nũndũ wa wendo wa Yeova, nũndũ nĩwʼo ũtumĩte twĩthĩwa tũtonya kũtanĩa moathimo asu onthe. (1 Yoa. 4:19) O na ĩngĩ, ekai twonanyʼe kana nĩtũtũngĩaa Yesũ mũvea nũndũ atwendie mũno nginya anengane thayũ wake kwondũ witũ.—Yoa. 15:13.
WATHI 154 Wendo wa Wʼo
