1. Nĩkĩ twaĩle kũmũthaitha Yeova e weka?

TWAĨLE kũmũthaitha Yeova e weka nũndũ nĩwe watũmbie na atũnenga thayũ. (Ũvu. 4:11) Ĩndĩ ũu ti laisi. O na kau nĩtũmwendete Yeova na nĩtũmũnengete ndaĩa, ve maũndũ mana matonya kũtwelelũkya tũkaeka kũmwenda na kũmũthaitha we e weka. Nũseo tũkamanya ũu ũtonyeka ata. Ĩndĩ, ekai twambe kwona nĩ kyaũ twaĩle kwĩka nĩ kana twonany’e tũmũthaithaa Yeova e weka.

2. Kwosana na ĩandĩko ya Kuma 34:14, tũkeekaa ata ethĩwa kwa w’o tũmũthaithaa Yeova e weka?

² Kwosana na Mbivilia, nĩ kana mũndũ atw’ĩke amũthaithaa Ngai e weka, no nginya ethĩwe amwendete vyũ kuma ngoonĩ. Kwoou tũyĩsa kwĩtĩkĩla kwenda mũndũ kana kĩndũ kĩna kwĩ ũndũ tũmwendete.—Soma Kuma 34:14.

3. Nĩkĩ tũkwasya tũimwendete Yeova tũte na itumi nzeo?

³ Tũimwendete Yeova tũte na itumi nzeo. Nĩkĩ tũkwasya ũu? Nũndũ maũndũ ala twĩmanyĩĩtye ĩũlũ wake nĩmo matumĩte tũmwenda. Kwa ngelekany’o, nĩtwendeeaw’a mũno nĩ nguma syake. Nĩtwĩsĩ kĩla wendete na kĩla ũmenete, na twĩw’aa o take. Nĩtwĩsĩ atũmbie e na kĩeleelo kĩva, na nĩtũmũkwataa mbau yĩla ũendeee kwĩanĩsya kĩeleelo kĩu. Na twĩw’aa yĩ ndaĩa nene kwona atũnengete mwanya wa kũtw’ĩka anyanyae. (Sav. 25:14) Kĩla ĩvinda tweemanyĩsya kĩndũ ĩũlũ wa Mũmbi witũ, twĩw’aa twamũthengeea mũnango.—Yak. 4:8.

4. (a) Ndevili atũmĩaa kyaũ kũtwelelũkya nĩ kana tũeke kũmwenda Yeova na ngoo yonthe? (b) Twĩneenea kyaũ ĩsomonĩ yĩĩ?

⁴ Ndevili nĩwe ũsumbĩkĩte nthĩ ĩno, na amĩtũmĩaa kũtwelelũkya nĩ kana twambĩĩe kwona maũndũ ala twendete tamo ma vata mũno na aituma tũemeewa nĩ mawendi mathũku. (Aev. 2:1-3; 1 Yoa. 5:19) Endaa kũaany’a ngoo sitũ  nĩ kana wĩthĩe tũyendete Yeova e weka. Twĩenda kũneenea maũndũ elĩ ũtũmĩaa mũno nĩ kana eanĩsye kĩu. Mbee, nũtũtataa tũsembany’e na malĩ, na kelĩ, nũtũtataa tũnyuve maũndũ ma kwĩtanĩthya mataĩle.

5. Nĩkĩ no nginya twĩsũvĩe mũno tũikethĩwe na wendi wa mbesa?

⁵ Vai mũndũ ũtendaa kũkwata lĩu wĩanĩtye, ngũa nzeo, na vandũ vaseo va kwĩkala. Ĩndĩ no nginya twĩsũvĩe mũno tũikethĩwe na wendi wa mbesa. Andũ aingĩ ũmũnthĩ ‘mendete mbesa’ na syĩndũ ila mbesa itonya kũmathooea. (2 Tim. 3:2) Yesũ nĩweesĩ kana aatĩĩi make no matatĩke mende mbesa. Nĩkyo kĩtumi waisye: “Vaiĩ mũndũ ũtonya kũthũkũma mavwana elĩ; nũndũ akamũmena ũmwe na aimwenda ũla ũngĩ, kana akalũmany’a na ũmwe na aimũmena ũla ũngĩ. Mũitonya kũmũthũkũma Ngai na Ũthwii.” (Mt. 6:24) Mũndũ ũmũthaithaa Yeova na ĩvindanĩ o yĩu ũyĩthĩa etũmĩa masaa maingĩ mũno na vinya mwingĩ mũno aisembany’a na ũthwii wa nthĩ ĩno, no twasye ethĩawa aithũkũma mavwana elĩ. Ndethĩawa aimũthaitha Yeova e weka.

6. Ndeto ila Yesũ watavisye kĩkundi kĩla kyaĩ Laotisia syĩtũmanyĩsya kyaũ?

⁶ Ĩvinda ya atũmwa yangĩe kũthela, Aklĩsto ma kĩkundi kĩla kyaĩ ndũanĩ ya Laotisia meekathĩĩaa makyasya: “Nĩ mũthwii na ndi na vata wa kĩndũ o na kĩmwe.” Ĩndĩ Yeova na Yesũ masisya kĩkundi kĩu makyonaa kĩilye ta mũndũ “mũthĩni na wa kwĩw’ĩwa tei na ngya na kĩlalinda na . . . mũthei.” Yesũ ndaamakany’a nĩkwĩthĩwa maĩ athwii. Amakanisye nũndũ maekete wendi wa malĩ wanange ngwatanĩo yoo na Yeova. (Ũvu. 3:14-17) Twesa kũsũanĩa nĩ ta twambĩĩie kwenda  mbesa, no nginya twose ĩtambya na mĩtũkĩ tũvete wendi ũsu. (1 Tim. 6:7, 8) Tũkaema kwĩka ũu, ngoo yitũ ndĩlea kũaanĩka, na yaanĩka, Yeova ndesa kwĩtĩkĩla ũthaithi witũ. Nĩkĩ? Nũndũ we nĩ “Ngai wĩ kĩwĩu.” (Kũt. 4:24) Ĩndĩ nĩ kyaũ kĩtonya kũtuma twambĩĩa kwenda mbesa mũno?

7-9. Ngewa ya mũtumĩa wĩtawa David yĩũmanyĩsya kyaũ?

⁷ Ekai twone ngewa ya mũtumĩa ũmwe wa kĩkundi wĩ kĩthito wĩtawa David. Mwana-a-asa ũsu ekalaa Amelika, na aasya kana aĩ mũthũkũmi wĩ kĩthito mũno. Nũndũ wa kĩthito kyake, kambunĩ ĩla wathũkũmaa nĩyamwambatisye kĩvĩla, na ambĩĩa kũtalwa ta ũmwe wa andũ ala mesĩ wĩa ũsu nesa vyũ nthĩ yoo. David easya, “Nyie neesĩ kana maũndũ asu mendĩkĩĩthya kana Yeova nũngathimĩte.” Ĩndĩ ũu nĩ w’o?

⁸ Kavola kwa kavola, David nĩwasalukilye oona kana wĩa ũsu wakwetye kwananga ndũũ yake na Yeova. Easya atĩĩ: “Nesie kwĩthĩa nĩ maũmbanonĩ na nĩ ũtavany’a, nĩnasũanĩaa mũno ĩũlũ wa maũndũ ala me wĩanĩ. O na kau naĩvawa mbesa mbingĩ, naĩ na maũndũ maingĩ manthokoaa kĩlĩko, na mũtwaano wakwa nĩwambĩĩe kũlika mathĩna.”

⁹ David nĩwamanyie kana nĩwaĩlĩte kwosa ĩtambya asisye nĩ kyaũ woonaa kĩ kya vata mũno. Easya, “Nĩnatwie vyũ kana yu nĩenda kũlũnga maũndũ.” David nĩwavangie kũvĩndũa mũvango ũla waatĩĩaa wĩanĩ, na aithi ony’e mũnene wake kĩla ũvangĩte. Kwaendie ata? Eekie kũvutwa! Nake oosie ĩtambya yĩva? Aisye, “Mũthenya ũla waatĩĩe, nĩnoosie vomu ya vainia mũtetheesya na nausũsya nĩendeee nginya yĩla ngesa kũeka.” Nĩ kana David na mũka makwate mbesa  sya kũmatethya, mambĩĩie kũthũkũmaa mawĩa ma kũthesya kũndũ. Ĩtina wa kavinda, David nĩwatw’ĩkie vainia wa kĩla ĩvinda, na mũka o nake nĩwesie kwosa ũvainia. O na kau matwie kũthũkũma wĩa ũvũthĩtw’e nĩ andũ aingĩ, maikũlasya nũndũ wĩa ũla meũthũkũma ti w’o wa vata kwoo. Na o na kau ũkwati woo nĩwatheeie weethĩa nĩ ta meũkwata kĩlungu kya ĩkũmi kya mũsaala ũla makwataa, vai mwei makosaa mavata moo ma lasima. Wendi woo nĩ kũmwia Yeova mbee, na kwĩka ũu nĩkũtumĩte meyonea nesa kana nũsũvĩaa ala mamanthaa Ũsumbĩ mbee.—Mt. 6:31-33.

10. Tũtonya kũsũvĩa ngoo sitũ ata?

¹⁰ Twĩthĩwe twĩ mbesa kana tũi mbesa, nĩtwaĩle kũsũvĩa ngoo sitũ. Tũtonya kũisũvĩa ata? Ndũkethĩwe na wendi wa malĩ. Na ndũketĩkĩlye wĩa waku wĩthĩwe wĩ wa vata kwĩ kũmũthũkũma Yeova. Ũtonya kũmanya ata kana nĩwambĩĩe kwona wĩa wĩ wa vata mũno? Ĩkũlye-ĩ: ‘Nĩnĩsũanĩaa mũno wĩa wakwa yĩla nĩ maũmbanonĩ kana ũtavany’a? Nĩnĩtindĩaa kũmaka ndyĩkũlya kana ngeethĩwa na mbesa ianĩtye ĩvinda yũkĩte? Nĩnĩthokoanaa na ũla ndwaanĩte nake nũndũ wa mbesa na malĩ? No nĩtĩkĩle kũthũkũma wĩa mũna ũvũthĩtw’e nĩ andũ ethĩwa nũũmbĩtĩkĩlya kũmũthũkũma Yeova nesa?’ (1 Tim. 6:9-12) Yĩla tũũsũanĩa makũlyo asu nũseo tũkalilikana kana Yeova nũtwendete, na kana athĩte ũla ũmwendete atĩĩ: “Ndikakũtia nongi, na ndikakũeka nongi.” Kĩu nĩkyo kĩtumi mũtũmwa Vaulo watũtaie atĩĩ: “Ĩthĩwai mũte na wendi wa mbesa thayũnĩ wenyu.”—Aevl. 13:5, 6.

11. Maũndũ ma kwĩtanĩthya matonya kwĩkana na mũndũ ata?

¹¹ Yeova endaa tũtanĩe kwĩkala thayũ, na kĩndũ kĩmwe kĩtũtetheeasya tũtanĩe thayũ nĩ maũndũ ma kwĩtanĩthya. Nĩkyo kĩtumi Ndeto ya Ngai yaĩtye kana “kũti ũndũ ũseo kwa mũndũ kũvĩtũka kũya na kũnyw’a, na kũtuma thayũ wake kũtanĩa ũseo wĩanĩ wake.” (Mũta. 2:24) Ĩndĩ maũndũ maingĩ ala me nthĩ ĩno ma kwĩtanĩthya no matwanange. Matumaa andũ aingĩ metĩkĩlana na maũndũ ala Ndeto ya Ngai ĩvatanĩte, o na nĩmatumaa menda maũndũ asu.

12. Ĩandĩko ya 1 Akolintho 10:21, 22 yonanĩtye nĩkĩ twaĩle kũnyuva nesa maũndũ ma kwĩtanĩthya?

 ¹² Nũndũ twĩenda kũmũthaithaa Yeova e weka, tũyĩsa kũya “mesanĩ ya Yeova” na tũisyoka tũye “mesanĩ ya ndaimoni.” (Soma 1 Akolintho 10:21, 22.) Kũĩsanĩa na mũndũ kwonanasya mwĩ ndũũ. Kwĩtanĩthya na maũndũ me na andũ ang’endu, meũneenany’a na maveva, meũlaalaa, kana me na mawĩa angĩ ma mwĩĩ, kwĩthĩawa ne ũndũ ũmwe na kũya lĩu ũuĩtwe nĩ amaitha ma Ngai. Kũya lĩu ũsu nĩkũtwanangaa na kũkananga ũnyanya witũ na Yeova.

13-14. Kwosana na Yakovo 1:14, 15, nĩkĩ no nginya tũnyuve nesa kĩla tũkwĩtanĩthya nakyo? Nengane ngelekany’o.

¹³ Kwĩtanĩthya no ũndũ ũmwe na lĩu. Nĩkĩ? Yĩla tũũya, nithyĩ tũnyuvaa kĩla tũkwenda kwĩkĩa kanyw’a. Ĩndĩ twamina kũmelya lĩu ũsu, vai ũndũ ũngĩ twĩthĩawa tũtonya kwĩkana naw’o nũndũ nĩwambĩĩaa kũthiwa na ũilikw’a mwĩĩnĩ o na tũteũmanya. Lĩu mũseo no ũtume tũendeea nesa, ĩndĩ lĩu mũthũku ũtũeteae mathĩna. Mathĩna asu no tũeme kũmona kũikya, ĩndĩ ĩtina wa ĩvinda nĩtũmonaa.

¹⁴ O ta ũu, yĩla tũkwenda kwĩtanĩthya nithyĩ tũnyuvaa kĩla tũkwĩkĩa kĩlĩkonĩ. Ĩndĩ ĩtina wa kwĩtanĩthya, kĩla tũnyuvie kyanangaa ilĩko sitũ na ngoo sitũ o na tũteũmanya kana ve kĩndũ kĩendeee. Maũndũ maseo ma kwĩtanĩthya no matũtethye, ĩndĩ maũndũ mathũku nĩmatũeteae mathĩna. (Soma Yakovo 1:14, 15.) Mathĩna asu no tũeme kũmona vau kwa vau, ĩndĩ ĩtina wa ĩvinda tũikalea kũmona. Nũndũ wa ũu, Mbivilia ĩtũkanĩtye atĩĩ: “Mũikakengeke: Ngai ti wa kũvũĩwa ngũĩ. Nũndũ o kĩla mũndũ ũvandaa, nokyo ũkaketha; nũndũ ũla ũvandaa kwosana na mwĩĩ wake akaketha wanangĩko kumana na mwĩĩ wake.” (Aka. 6:7, 8) Kwoou, nĩ ũndũ wa vata ta kĩ twĩvathane vyũ na maũndũ ma kwĩtanĩthya ala methĩawa na maũndũ ala Yeova ũmenete!—Sav. 97:10.

15. Nĩ mũthĩnzĩo wĩva Yeova ũtũnengete tũtanĩe?

¹⁵ Twĩ na kĩsese kĩseo mũno kya televiseni kĩtawa JW Broadcasting^®, na athũkũmi aingĩ ma Yeova nĩmatanĩaa kũkĩloela. Mwĩĩtu-a-asa wĩtawa Marilyn aisye: “JW Broadcasting ĩtumĩte nĩthĩwa na mawoni maseo, na no nĩloele kyonthe kĩla kĩ vo nũndũ nĩ kĩseo. Yĩla nĩkw’ĩte ngoo, kana ngwona ta vate mũndũ ũkũlũngana nakwa, ndileaa kũvethĩa ũvoo mũseo kana kĩlungu kya Ũthaithi wa Kwakya ndonya kwĩloela. Kĩu kĩtumaa nenda Yeova na ũseũvyo wake mũno. JW Broadcasting ĩtumĩte nĩalyũka vyũ.” We nĩwonete mũthĩnzĩo ũsu Yeova ũtũnengete ũikũtethya? Mbee, nĩtwĩthĩawa na vulongulamu sya kĩla mwei sya JW Broadcasting. Na eka ũu, kĩsese kĩu nĩkĩthĩawa na syĩndũ na mbathi sya kwĩkĩa vinya ũtonya kwĩthukĩĩsya na kwĩloela yĩla wenda.

16-17. Nĩkĩ no nginya twĩthĩwe twĩ metho tũikatũmĩe ĩvinda yingĩ tũyĩtanĩthya, na tũtonya kwĩka ũu ata?

¹⁶ O na kau no nginya tũnyuve nesa kĩla tũkwĩtanĩthya nakyo, no nginya tũsisye twĩtũmĩa ĩvinda yĩana ata tũyĩtanĩthya. Tũkaema kwĩsũvĩa, tũtũmĩa ĩvinda yingĩ tũyĩtanĩthya kũte yĩla tũtũmĩaa tũimũthũkũma Yeova. Andũ aingĩ nĩmaemawa nĩ kwĩsiĩĩa maikatũmĩe ĩvinda yingĩ mayĩtanĩthya. Mwĩĩtu-a-asa wĩ na myaka 18 wĩtawa Abigail easya: “Ĩtina wa kũtethya maũndũ maingĩ mũthenya mũima, kwĩloela televiseni nĩkũnthũmũasya. Ĩndĩ naema kwĩsisya, nĩminaa masaa ngwetye  ũu.” Nake mwana-a-asa wa mũika wĩtawa Samuel easya: “Nĩnĩsaa kwĩyĩthĩa Indanetinĩ ndyĩloela tũvitio twingĩ kĩatĩanĩsyo. Nambĩĩaa na kamwe, na ndivindũka ndyĩthĩa masaa atatũ kana ana nĩmathelile.”

¹⁷ Ũtonya kwĩka ata ndũkatũmĩe ĩvinda yingĩ ũyĩtanĩthya? Ĩtambya ya mbee nĩ kwĩka masavu ũmanye ũtũmĩaa ĩvinda yĩana ata ũyĩtanĩthya. Wĩona ata ũkesyaĩĩsya kwa kyumwa kĩmwe? Kyumwanĩ kĩu andĩka kalendanĩ nĩ masaa meana ũminaa ũyĩloela televiseni, ũilika Indanetinĩ, na ũithaũka mathaũ ala me simũnĩ. Weethĩa wĩtũmĩa masaa maingĩ mũno, tata kũvanga ũndũ ũtonya kũtũmĩa ĩvinda yaku. Vanga kwĩka maũndũ ala ma vata vyũ mbee, na ĩndĩ ũivangĩĩa saa sya kwĩtanĩthya. Ĩtina wa ũu, mũvoye Yeova aũtetheesye kũatĩĩa mũvango waku. Mũvango ta ũsu ũkatumaa wĩthĩwa na ĩvinda na vinya wĩanĩĩe kwĩmanyĩsya Mbivilia wĩ weka, kwĩthĩwa na ũthaithi wa mũsyĩ, kũthi maũmbanonĩ ma kĩkundi, na kũmũthũkũma Yeova wĩanĩ wa kũtavany’a na kũmanyĩsya. Kwĩka maũndũ asu mbee no kũũtetheesye ũkaeka kũandũĩka mũno nũndũ wa ĩvinda yĩla ũtũmĩaa ũyĩtanĩthya.

18-19. Tũtonya kwonany’a ata kana tũmũthaithaa Yeova e weka?

¹⁸ Mũtũmwa Vetelo amina kũweta ĩũlũ wa mũthya wa nthĩ ĩno ya Satani na ĩũlũ wa ĩvinda yĩla Ngai ũkatw’ĩkĩthya maũndũ meũ ĩtunĩ na nthĩ, aandĩkie ũũ: “Endwa, nĩkwĩthĩwa mweteele maũndũ asu, tatai ũndũ mũtonya nĩ kana mũminũkĩlyonĩ emwĩthĩa mũte na ĩlanga na mũte na ĩsola na mwĩ na mũuo.” (2 Vet. 3:14) Yĩla twaatĩĩa ũtao ũsu na twatata ũndũ tũtonya twĩkale na tũithaitha Yeova ũndũ we wendete, twĩthĩawa tũyonany’a kana nĩwe tũmũthaithaa e weka.

¹⁹ Satani na nthĩ yake meendeea kũtũtata twende syĩndũ ingĩ kũte Yeova. (Luka 4:13) Ĩndĩ o na twakomana na matatwa mailye ata, tũikaaĩtĩkĩla kwenda mũndũ kana kĩndũ o na kĩva kwĩ Yeova. Nĩtũtw’ĩte vyũ kũmũthaithaa Yeova e weka nũndũ no we waĩlĩte ũthaithi ũsu!