KWASŨANĨA ũmwe wa andũ ala masomeete maũndũ ma nzeve aitata kũsisya ũndũ nzeve ĩkwĩthĩwa ĩilye. Asisya ayona ve kĩuutani kĩnene kĩtonya kwĩsĩla vandũ vana vatwĩe andũ aingĩ. Na nũndũ nũkũthĩnĩkĩa mũno kwona andũ me asũvĩĩku, aitata ũndũ ũtonya amakany’e kwĩ tene.

O ta ũu, ũmũnthĩ Yeova nũendeee kũkany’a andũ ĩũlũ wa kĩuutani kĩthũku mũno kwĩ kĩla matonya kwĩw’a livotinĩ sya nzeve. Aendeee kwĩka ũu ata? Na tũtonya kũmanya ata kana nũnengete andũ ĩvinda yĩanĩtye ya kwosa ĩtambya? Nĩ kana tũkwate mosũngĩo, ekai twambe kũneenea mavinda Ngai waumisye ũkany’o kwĩ tene.

Ĩvindanĩ ya tene, ve mavinda Yeova wakanisye andũ ĩũlũ wa iuutani sya ngelekany’o, kana ũsilĩlo ũla wesaa kũetea andũ ala meũlea kũatĩĩa mĩao yake. (Nth. 10:25; Yel. 30:23) Mavindanĩ asu nĩwakanasya andũ kwĩ tene, na aimatavya ĩtambya yĩla maĩle kwosa nĩ kana monany’e nĩmeũmwĩw’a. (2 Asu. 17:12-15; Nee. 9:29, 30) Na nĩ kana ekĩe andũ vinya meke moalyũku, mavinda maingĩ atũmĩaa athũkũmi make aĩkĩĩku ala me kũũ nthĩ kũtangaasa ũsilĩlo wake, na kũtetheesya andũ mamanye nĩkĩ maĩle kwosa ĩtambya na mĩtũkĩ.—Amo. 3:7.

Ũmwe woo aĩ Noa. Kwa ĩvinda ya myaka mingĩ, nĩweekĩie kĩthito ateũkĩa akany’e andũ ala maĩ na mwĩkalĩle mũthũku na maĩ ang’endu ĩũlũ wa mbua nene ĩla yesaa kua ĩũlũ wa nthĩ. (Mwa 6:9-13, 17) O na nĩwamatavisye kĩla maĩle kwĩka nĩ kana mavonoke. Aĩ na kĩthito kingĩ nginya eetwa “mũtavany’a wa ũlũngalu.”—2 Vet. 2:5.

O na kũtw’ĩka Noa aĩ na kĩthito, andũ ma ĩvinda yĩu mayaaĩthukĩĩsya ũkany’o ũla watũmĩtwe nĩ Ngai amanenge. Moonanisye kana mayaĩ na mũĩkĩĩo o na vanini. Na nũndũ wa ũu, nĩmakwie yĩla mbua ya kĩw’ũ kingĩ “yookie na yamamina onthe.” (Mt. 24:39; Aevl. 11:7) Mũthya woo wavika, mayaĩ mesa kwasya kana Ngai ndaamakany’a.

Mavinda angĩ, Yeova nĩwaumasya ũkany’o vatialĩte kavinda kakuvĩ ũsilĩlo wake wambĩĩe. O na vailye ũu, nĩwaĩkĩĩthasya kana ala maĩ makwate ũsilĩlo me na ĩvinda yĩanĩtye ya kũvĩndũka. Kwa ngelekany’o, nĩwanenganae ũkany’o kwĩ tene atanamba kũete ala Mothĩny’o Ĩkũmi makwatie nthĩ ya Misili. Ta kwa ngelekany’o, Yeova nĩwatũmie Mose na Aluni makakany’e Valao na athũkũmi make ĩũlũ wa ũthĩny’o wa mũonza wa mbua ya mavia, ũla waĩ ũete wanangĩko mũnene. Nũndũ ũthĩny’o ũsu waĩ wũke mũthenya ũla waatĩĩe, we Ngai nĩwanenganie ĩvinda yĩanĩtye ya kũmantha wĩvitho nĩ kenda maikakwatwe nĩ mbua ĩsu? Mbivilia yaĩtye: “Ũla wakĩie ndeto ya Yeova athũkũminĩ ma Valao atuma athũkũmi make na indo syake ikũka ilike nyũmbanĩ: nake ũla ũtaaona ndeto ya Yeova ta kĩndũ atia athũkũmi make na indo syake kĩsesinĩ.” (Kuma 9:18-21) Kwa w’o, Yeova nĩwanenganie ũkany’o ve ĩvinda yĩanĩtye, nũndũ ala moosie ĩtambya na mĩtũkĩ mayaakwata ũthĩny’o ta ala angĩ.

O ta ũu, Valao na athũkũmi make nĩmakaniw’e ũthĩny’o wa ĩkũmi ũte mũviku. O na vailye ũu, nĩmeekie ũndũ wa ũtumanu kwa kũlea ũkany’o ũsu. (Kuma 4:22, 23) Nũndũ wa ũu, makithathi moo nĩmakwie. Ũsu nĩ ũndũ wa kũmakya ta kĩ! (Kuma 11:4-10; 12:29) Ve ũndũ maĩ matonya kwĩka ũthĩny’o ũsu ũte mũviku? Ĩĩ! Twĩsĩ ũu  ata? Mose atekwananga ĩvinda nĩwakanisye Aisilaeli ĩũlũ wa ũthĩny’o wa ĩkũmi ũla wookĩte, na amatavya ũndũ maaĩle kwĩka nĩ kana matangĩĩe mĩsyĩ yoo. (Kuma 12:21-28) Mũthya, andũ milioni itatũ, ala maĩ Aisilaeli vamwe na “nguthu ya elikya” ya andũ mataĩ Aisilaeli na angĩ maĩ Amisili, nĩmamwĩthukĩĩisye Yeova na mauma Misili.—Kuma 12:38.

O tondũ ngelekany’o isu syoonany’a, kĩla ĩvinda Yeova nĩwanengae andũ ĩvinda yĩanĩtye ya kũatĩĩa ũkany’o wake. (Kũt. 32:4) Nĩkĩ Ngai weekaa ũu? Mũtũmwa Vetelo aeleisye kana Yeova ndendaa mũndũ “o na ũmwe . . . anangwe, ĩndĩ endaa onthe mavikĩe kwĩlila.” (2 Vet. 3:9) Vate nzika, Ngai nĩwathĩnĩkĩaa andũ. Endaa andũ melile na mayĩka moalyũku ũsilĩlo ũte mũviku.—Isa. 48:17, 18; Alo. 2:4.

O na ũmũnthĩ, no nginya andũ onthe metĩkĩle ũkany’o wa vata ũla ũendeee kumw’a ĩũlũ wa nthĩ. Yĩla Yesũ waĩ ĩũlũ wa nthĩ, nĩwanenganie ũkany’o asya kana nthĩ ĩno nthũku ĩkaanangwa ĩvinda ya ũla “thĩna mũnene.” (Mt. 24:21) O na nĩwathanie nesa maũndũ ala aatĩĩi make mesaa kwona ĩvinda yĩu yathengeea. Kwoou Yesũ nĩwaeleisye maũndũ manene ala tũendeee kwona mayĩkĩka ũmũnthĩ.—Mt. 24:3-12; Luka 21:10-13.

Nũndũ tũtwĩe ĩvindanĩ yĩla wathani ũsu ũendeee kwĩanĩa, Yeova aendeee kũthangaasya andũ onthe ũmũnthĩ matw’e kũmũthũkũma na kũmwĩw’a. Endaa andũ ala mamwĩw’aa matanĩe kwĩkala thayũ ivindanĩ yĩĩ na maikwata moathimo ĩvinda yũkĩte, yĩla ũkatw’ĩkĩthya maũndũ meũ ĩtunĩ na nthĩ. (2 Vet. 3:13) Nĩ kana atetheesye andũ maĩkĩĩe mawatho asu, nũnenganĩte ũvoo ũtonya kũmatangĩĩa. Ũsu nĩ ‘ũvoo mũseo wa Ũsumbĩ,’ ũla Yesũ waisye “ũkatavanw’a nthĩ yonthe wĩthĩwe ũkũsĩ kwa mbaĩ syonthe.” (Mt. 24:14) Ngai nĩwũmbanĩtye athaithi make ma w’o nĩ kana manengane “ũkũsĩ” ũsu, kana matavany’e ũvoo wake, nthĩnĩ wa nthĩ ta 240. Yeova endaa andũ aingĩ ũndũ vatonyeka methukĩĩsye ũkany’o ũsu, na maivonoka kĩuutani kĩla kyũkĩte kya ũsilĩlo wake mũlũngalu.—Nzev. 1:14, 15; 2:2, 3.

Kwoou o na tũi na vata wa kwĩkũlya ethĩwa Yeova nũnengae andũ mwanya ũtoetye wa kũatĩĩa ũkany’o wake, kana ndamanengae. Na kĩtumi nũndũ twĩ na ũĩkĩĩthyo mwingĩ ũkwonany’a kana kĩla ĩvinda akanasya andũ kwĩ tene. Ĩndĩ yu no twĩkũlye-ĩ, ‘Mo andũ nĩmekwĩthukĩĩsya ũkany’o wa Ngai ĩvinda yĩtanathela?’ Ekai ithyĩ tũendeee kũtetheesya andũ aingĩ ũndũ vatonyeka mavonoke mũminũkĩlyo wa nthĩ ĩno nthũku.