1-3. Nĩ kyaũ kĩtonya kwĩthĩwa kyaendeeie katĩ wa Euotia na Sinitike? Tũtonya kwĩka ata nĩ kana thĩna ta ũsu ndũkaumĩle? (Sisya visa ĩthangũnĩ yĩĩ.)

ATHŨKŨMI ma Yeova nĩmanengete yĩla Ĩvuku yake ĩtheu ndaĩa nene mũno. Na nĩkwĩthĩwa twĩ ene naĩ nĩtwĩkalaa tũinengwa ũtao wa Maandĩko. Twĩkaa ata twatawa? Kwaekai twambe kwona ngewa ya Euotia na Sinitike, ala maĩ Aklĩsto etĩkĩw’a mauta ma ĩvinda ya atũmwa. Ve thĩna mũnene waumĩlile katĩ wa aka asu. Thĩna wĩva? Mbivilia ndĩtũtavĩtye. Ĩndĩ kwaekai twĩke kũsũanĩa kĩla kĩtonya kwĩthĩwa kyeekĩkie.

² Eka twasye Euotia nũtonya kwĩthĩwa athokisye ana-a-asa na eĩtu-a-asa kwake maĩsanĩe na maitana kwĩthwa vamwe. Sinitike ti ũmwe waĩ mũthokye ĩndĩ nĩwesie kwĩw’a andũ maiea ngewa sya ũndũ matanĩie kwĩthwa na Euotia. No kwĩthĩwa Sinitike asũanĩie ũũ kĩlĩkonĩ eew’a ngewa isu: ‘O na ndikũĩkĩĩa Euotia ndaneenthokya! Nasyaa twĩ ndũũ ĩtathela.’ Kyu nĩkyaũmĩisye Sinitike mũno na ambĩĩa kwona Euotia ta ũtamwendete na ta wambĩĩe kũmũvatha. Nũndũ wa ũu, Sinitike nĩwavangĩthisye kyathĩ kyake na athokya ana-a-asa na eĩtu-a-asa o ala mathoketw’e nĩ Euotia, ĩndĩ ndaamũthokya ũ Euotia! Thĩna ũla waĩ katĩ wa Euotia na Sinitike  waĩ ũtonya kwananga vyũ mũuo ũla waĩ kĩkundinĩ. O na kaũ Mbivilia ndĩtũtavĩtye thĩna ũsu watumie kũthi ata, eĩtu-a-asa asu elĩ nĩmatonya kwĩthĩwa meetĩkĩlile ũtao ũla mũtũmwa Vaulo wamanengie.—Avi. 4:2, 3.

³ Ikundinĩ sya andũ ma Yeova ũmũnthĩ no kwĩsaa kumĩla thĩna ta ũsu. Ĩndĩ twaatĩĩa ũtao ũla wĩ Ndetonĩ ya Ngai, Mbivilia, nĩtũtonya kũema kwĩsa kũvika vau, kana ethĩwa ve thĩna waumĩla no tũũmine. Na ethĩwa nĩtũnengae yĩla Ĩvuku ya Yeova ndaĩa nene, tũkeekaa ũndũ yĩũtũtavya.—Sav. 27:11.

4, 5. Ndeto ya Ngai ĩtũnengete ũtao wĩva ĩũlũ wa kũsumbĩka ngoo sitũ?

⁴ Ti laisi kũsumbĩka ngoo sitũ ĩla twavĩtĩw’a kana twakuwa ũndũ vataĩle. Na maũndũ methĩawa me metangu ethĩwa twĩkuwa naĩ nũndũ wa mbaĩ yitũ, kana nũndũ wa kwĩthĩwa twĩ ma langi wĩ kĩvathũkany’o, kana twĩ na wũmbo wĩ kĩvathũkany’o na wa ala angĩ. Na ĩndĩ maũndũ metaa ĩ ya mũno ethĩwa ũla watũkua naĩ nĩ Mũklĩsto ũngĩ! Kwoou vo ve ũtao wĩ Ndetonĩ ya Ngai ũtonya kũtũtethya twesa kwĩkwa ũu?

⁵ Kuma ĩla Yeova woombie andũ kũvika o na ũmũnthĩ nũsyaasya ũndũ mekalanasya. Nĩwĩthĩawa ene kĩla kĩendeee ngoonĩ sitũ vamwe na meko maitũ. Ĩla twĩw’ĩte woo kana twathata nĩtũtonya kwĩka maũndũ kana tũkaweta ndeto na ĩtina tũyambĩĩa kwĩlila. Na kwoou wĩthĩwa wĩ ũndũ wa ũĩ tũkaatĩĩa ũtao ũla wĩ Mbivilianĩ. Ĩtwĩĩte nĩtũvete ũthilĩku ngoonĩ na tũitata tũikathatae mĩtũkĩ. (Soma Nthimo 16:32; Mũtavan’ya 7:9.) Vai nzika kana kĩla ũmwe witũ e kĩthito kĩla waĩlĩte kwĩkĩa nĩ kana ndakathatae mĩtũkĩ ĩndĩ ethĩawe na mĩtũkĩ ya kũekea. Methonĩ ma Yeova na Yesũ kũekea angĩ mavĩtyo moo ti ũndũ mũnini. (Mt. 6:14, 15) We weesisya nũkwona wĩ na vata wa kwĩkĩa kĩthito kingangĩ kya kũsumbĩka ngoo yaku na kũekea ala angĩ?

6. Nĩkĩ twaĩle kwĩsũvĩa mũno tũikaie ũthatu ngoonĩ?

⁶ Mũndũ aemwa nĩ kũsumbĩka ngoo yake nũtonya kwĩkala athatĩe ũngĩ, kana o na akambĩĩa kũmũmena. Mũndũ ekala ũu angĩ no maemwe nĩ kũtindany’a nake. O na no atume angĩ kĩkundinĩ methĩwa na kĩmena ta kyu. Mũndũ ta ũsu nũtonya kũtata kũvithany’a ũthatu wake kana kĩmena kĩla wĩ nakyo, ĩndĩ ĩtina ũthũku ũsu wĩ ngoonĩ yake “ũkoonanw’a ũtheinĩ mbee wa ũmbano.” (Nth. 26:24-26) Atumĩa no matetheesye andũ ta asu mamanye kana Ngai ndendaa kwona ũseũvyo wake wĩ na andũ maiĩte ũthatu ngoonĩ, me na kĩmena, kana ũthũ. Yĩla Ĩvuku ya Yeova yĩwetete ũndũ ũsu nesa vyũ. (Ali. 19:17, 18; Alo. 3:11-18) We nũatĩĩaa kĩu yĩwetete?

7, 8. (a) Yeova atongoeasya ata kĩlungu kya ũseũvyo wake kya kũũ nthĩ? (b) Nĩ maũndũ ta meva Ndeto ya Ngai ĩtwĩaĩe, na nĩkĩ twaĩle kũmaatĩĩa?

⁷ Nĩ kana Yeova anenge ala me kĩlungunĩ kya ũseũvyo wake kya kũũ nthĩ lĩu wa kĩ-veva, atũmĩaa “ngombo yĩ na kĩthito na mbũĩ” ĩla yĩthĩawa ĩtongoew’e nĩ Klĩsto, nake nĩwe “mũtwe wa ĩkanisa.” (Mt. 24:45-47; Aev. 5:23) Ngombo ĩsu nĩatĩĩaa ndeto ya Ngai mbeveee na nĩmĩnengete ndaĩa nene o tondũ nzama ĩla ĩtongoesye ya ĩvinda ya atũmwa yeekaa. (Soma 1 Athesalonika 2:13.) Kwoou nĩ myolooto ta yĩva yĩ Mbivilianĩ ĩtonya kũtũtethya?

⁸ Mbee, Mbivilia nĩtũnengete mwĩao wa kũmbana na angĩ tũte kũtĩĩa. (Aevl. 10:24, 25) Nĩsyokete ĩkatwĩa nĩtũtate twĩthĩwe na mũĩkĩĩo ũmwe. (1 Ako. 1:10) O na ĩngĩ, Ndeto ya Ngai ĩtwĩaa kana twaĩle kwamba kũmantha Ũsumbĩ. (Mt. 6:33) O na Maandĩko nĩmonanĩtye ĩngĩ na ĩngĩ kana nĩtwaĩle kũtavany’a nyũmba na nyũmba, kũla kwĩ andũ aingĩ, na ĩla twĩ maũndũnĩ maitũ. (Mt.  28:19, 20; Meko 5:42; 17:17; 20:20) Na eka ũu, Ĩvuku yĩu ya Ngai yĩaĩe atumĩa Aklĩsto yĩkamea nĩmekalye ikundi syĩ ntheu. (1 Ako. 5:1-5, 13; 1 Tim. 5:19-21) Na ĩndĩ Yeova ndendaa athũkũmi make mekale na kĩko kana methĩwe na mesilya na mwĩkalĩle ũla ũmenete.—2 Ako. 7:1.

9. Nũũ ũla ũnyuvĩtwe atũtetheesye kũelewa Ndeto ya Ngai?

⁹ Andũ amwe monaa no mamĩelewe Mbivilia o na mate atetheesye. Ĩndĩ vai ũngĩ Yesũ ũnyuvĩte anenge aatĩĩi make lĩu wa kĩ-veva eka ĩla “ngombo yĩ na kĩthito.” Kuma mwaka wa 1919, Yesũ Klĩsto ethĩĩtwe aitũmĩa ngombo ĩsu kũtetheesya aatĩĩi make maelewe nesa yĩla Ĩvuku ya Ngai na maiatĩĩa motao mayo. Kũatĩĩa kĩla Mbivilia ĩtũtavĩtye kũtumaa ikundi syĩkala syĩ ntheu, syĩ na mũuo, na syĩ na ngwatanĩo. Kwoou nũseo kĩla ũmwe witũ akekũlya atĩĩ: ‘Nyie nĩnĩthĩawa nĩlũmanĩtye na Yesũ kwa kũatĩĩa myolooto ĩla yanenganwe nĩ ĩla ngombo yĩ na kĩthito?’

10. Ĩvuku ya Esekieli yĩeleetye kĩlungu kya ũseũvyo wa Yeova kya ĩtunĩ ata?

¹⁰ Ndeto ya Yeova nĩtũtavĩtye kĩla kĩthĩawa kĩendeee kĩlungunĩ kya ũseũvyo wake kya ĩtunĩ. Kwa ngelekany’o, mwathani Esekieli nĩwooniw’e woninĩ kĩlungu kĩu kya ũseũvyo wa Ngai kya ĩtunĩ. Woninĩ ũsu kĩlungu kĩu kyaelekanilw’e na ĩkasya yĩ ĩtunĩ. (Esek. 1:4-28) Yeova nĩwe ũtwaĩte ĩkasya yĩu, na yĩendaa kĩla vandũ veva wake wayĩsukuma yĩthi. Ĩla kĩlungu kya ũseũvyo wa Ngai kya ĩtunĩ kĩla kĩelekanĩtw’e na ĩkasya kyasonga, o nakyo kĩlungu kya ũseũvyo wa Ngai kya kũũ nthĩ nĩkĩsongaa. Na vate nzika, ĩkasya yĩu nĩyĩsembete mũno! Kwamba kũsũanĩa moalyũku ala meethĩĩtwe ũseũvyonĩ kwa ĩvinda ya myaka ĩkũmi mĩvĩtu, na ndũkatate kũlwa kana Yeova nĩwe ũtumĩte mekwa. Na nĩkwĩthĩwa yu Klĩsto na alaĩka makilyĩ manaananga nthĩ ĩno nthũku, ĩkasya ya Yeova yĩsembete vyũ nĩ kana yĩtume ũsumbĩki mũnene wa Yeova ũtetewa na yĩituma ĩsyĩtwa yake yĩthew’a!

11, 12. Nĩ maũndũ ta meva ũseũvyo wa Yeova wĩthĩĩtwe ũyĩka?

¹¹ Kwaekai twone maũndũ ala kĩlungu kya ũseũvyo wa Ngai kya kũũ nthĩ kĩthĩĩtwe kĩyĩka mĩthenyanĩ ĩno ya mũminũkĩlyo. Myako. Ve ana-a-asa na eĩtu-a-asa maana maingĩ ala methĩĩtwe mayaka ũla ovisi mũnene wa Ngũsĩ sya Yeova ũkwakwa Warwick, New York, Amelika. Eka asu ve angĩ ngili mbingĩ nthĩ yonthe methĩĩtwe maitetheesya maũndũnĩ makonetye myako ya Nyũmba sya Ũsumbĩ na movisi ma ũvonge, na mathũkũmanaa na mũvĩa wĩtawa Idara ya Ulimwenguni Pote ya Usanifu-Majengo na Ujenzi. Tũtanaa mũno ta kĩ nũndũ wa ana-a-asa na eĩtũ-a-asa ta asu meyumĩtye meanĩsye wĩa ũsu mate kũnoa! O na ndũkolwe kana atavany’a ma Ũsumbĩ nthĩ yonthe nĩmaumasya mĩvothi kwosana na ũtonyi woo nĩ kana matetheesye wĩa ũsu. Nake Yeova nũmaathimaa mũno nũndũ nĩmalũmanĩtye nake na mekaa ũu menyivĩtye.—Luka 21:1-4.

¹² Kũmanyĩw’a. Kwasũanĩa sukulu ila ivangĩtwe  nĩ kana itũmanyĩsye kwenda kwa Ngai. (Isa. 2:2, 3) Nĩtũvangĩwe Sukulu ya Mavainia, Sukulu ya Atavany’a ma Ũsumbĩ, Sukulu ya Ngileati, Sukulu ya Athũkũmi Eũ ma Mbetheli, Sukulu ya Asyaĩĩsya ma Mũthyũlũlũko na Iveti Syoo, Sukulu ya Atumĩa ma Kĩkundi, Sukulu ya Ũthũkũmi wa Ũsumbĩ, na Sukulu ya Ala me Kamitiinĩ ya Ovisi wa Ũvonge na Iveti Syoo. Kĩu kĩtwony’a nesa vyũ kana Yeova nĩwendete kũmanyĩsya andũ make! O na kĩsesenĩ kitũ kya jw.org, no ũkwate mavuku ma ithyomo mbingĩ syĩ kĩvathũkany’o ma kwĩmanyĩsya Mbivilia. Kĩsese kyu kĩ na ilungu iseũvĩtw’e kwondũ wa syana, ala me na mĩsyĩ, vamwe na kĩlungu kya maũvoo ma maũndũ ala maumĩla. We nũtũmĩaa kĩsese kĩu ũtavany’anĩ na ũthaithinĩ wenyu wa mũsyĩ?

13. Nĩ ũndũ wĩva athaithi ala aĩkĩĩku ma Yeova maĩlĩte kwĩka?

¹³ Nĩ ndaĩa nene vyũ kwona twĩ ũseũvyonĩ wa Yeova, kana ti w’o? Na kwoou nũndũ nĩtwĩsĩ mĩao ya Ngai na myolooto yake, nĩtwaĩlĩte kwĩka ũla waĩle na tũilũmany’a na ũsumbĩki wake mũnene. Nĩkwĩthĩwa andũ ma nthĩ ĩno maendeee kũlolomelya ũthũkunĩ, no nginya ‘tũmene ũthũku’ o tondũ Yeova ũũmenete. (Sav. 97:10) Tũyĩsa kwĩtĩkĩla kwĩkwatany’a na andũ matamwĩsĩ Ngai na tũyĩsa kwasya “ũthũku [nĩ] ũseo, na ũseo [nĩ] ũthũku.” (Isa. 5:20) Nũndũ wendi witũ nĩ kũmwendeesya Ngai, twĩkĩaa kĩthito kingĩ mũno twĩkalye mĩĩ yitũ na mĩkalĩle yitũ yĩ mĩtheu, na twĩvathane na ũthaithi wa ũvũngũ. (1 Ako. 6:9-11) Nĩtũmwendete Yeova na nĩtũmwĩkwatĩtye. Kĩu nĩkyo kĩtumi tũtw’ĩte kũlũmany’a nake kwa kũatĩĩa ĩla myolooto ĩwetetwe nesa Ĩvukunĩ yake. Na tũtataa ũndũ tũtonya tũmĩatĩĩe kĩla vandũ, twĩthwe twĩ mũsyĩ, kĩkundinĩ, wĩanĩ, kana twĩ sukulu. (Nth. 15:3) Ĩndĩ kwaekai twone maũndũ angĩ tũtonya kwĩka tũkonany’a kana nĩtũlũmanĩtye na Ngai.

14. Nĩ ũndũ wĩva asyai Aklĩsto matonya kwĩka makonany’a nĩmalũmanĩtye na Ngai?

¹⁴ Kũea. Ũndũ ũmwe asyai Aklĩsto matonya kwĩka makonany’a nĩmalũmanĩtye na Yeova nĩ kũea syana syoo kwosana na Ndeto yake. Ĩla asyai mendete Ngai mekũea syana syoo, maiatĩĩaa ũndũ vataĩle syĩthĩo sya kũla mekalaa. Na kĩtumi nũndũ veva wa nthĩ ĩno ndwaĩlĩte kwĩsa kwĩtĩkĩlw’a ũlike mũsyĩnĩ wa Ngũsĩ. (Aev. 2:2) Ta kwa ngelekany’o, yĩĩ nĩ yĩsilya yĩtaĩle kwĩsa kũlika kĩlĩkonĩ kya mwana-a-asa, ‘Kũũ kwitũ aka nĩmo mamanyĩasya syana.’ Mbivilia nĩwetete nesa ĩkasya: “Inyw’ĩ aaĩthe, . . . ieei [syana syenyu] na mosilĩlo na motao ma Mwĩaĩi.” (Aev. 6:4) Iveti na aũme ala me kĩkĩo kya Ngai nĩmendaa mũno syana syoo itutye Samueli, nũndũ Yeova aĩ vamwe nake akĩana.—1 Sam. 3:19.

15. Ethĩwa twĩ na ũtwi mũnene tũkwenda kwĩka, tũtonya kwonany’a ata kana nĩtũlũmanĩtye na Yeova?

¹⁵ Kwĩka motwi. Nzĩa ĩmwe tũtonya kwonany’a nĩtũlũmanĩtye na Ngai ĩla tũkwĩka motwi manene nĩ kũmantha ũtao Ndetonĩ yake na ũseũvyonĩ wake. Nĩ kana ũmanye vata wa kwĩka ũu, kwasũanĩa ngelekany’o ĩno ya kaũndũ katonya kũkiita andũ aingĩ. Kaũndũ kau kakonetye asyai. Ĩla asyai amwe mathamĩĩa kũngĩ na makwata mwana me kũu, nĩmethĩawa na kĩthĩo kya kwĩnũkya mwana ũsu akasũvĩwe nĩ andũ angĩ ma mũsyĩ nĩ kana mo makwate mwanya wa kũendeea kũthũkũma na kũseũvya mbesa me ku maĩ. Tũikũlea kana ũsu nĩ ũtwi mũndũ ũtekĩwa nĩ ũngĩ, ĩndĩ nũseo tũkalilikana kana tũkaumya ũtalo kwa Ngai nũndũ wa motwi onthe ala twĩkĩte. (Soma Alomi 14:12.) Kwoou, we nũkwona ta ũndũ wa ũĩ kwĩka ũtwi mũnene ũkonetye mũsyĩ waku kana wĩa  waku ũtambĩte kũsisya woni wa Mbivilia? Aiee, ti ũndũ wa ũĩ! Ithyĩ ene tũitonya kũtongoesya matambya maitũ, na kwoou twĩ na vata wa kũtongoew’a nĩ Asa witũ wa ĩtunĩ.—Yel. 10:23.

16. Ĩla mũndũ mũka ũmwe wakwatie mwana aaĩlĩte kwĩka ũtwi wĩva, na nĩ kyaũ kyamũtetheeisye kwĩka ũtwi mũseo?

¹⁶ Ve mũndũ mũka ũmwe wasyaie kavĩsĩ e nthĩ ya nza na atw’a nũkũkenũkya vala ve asyai ma mũũme makakaee. Ĩndĩ akasyaa oou, nĩwambĩĩe kũmanyĩw’a Mbivilia nĩ Ngũsĩ. Nĩweekie maendeeo na amanya kana Ngai amũnengete we mwene, na ti mũndũ ũngĩ, wĩa wa kũea mwana wake atw’ĩke mũthaithi wa Yeova. (Sav. 127:3; Nth. 22:6) Mũndũ mũka ũsu nĩwoosie ĩvinda amũtulũĩla Yeova ngoo yake, o tondũ Maandĩko matwĩkĩĩte vinya twĩke. (Sav. 62:7, 8) Nĩwatavisye ũla wamũmanyĩasya Mbivilia thĩna ũla wamũthokoaa ateũmũvitha kĩndũ, o na nĩwaneenie na angĩ kĩkundinĩ. Andũ ala angĩ ma mũsyĩ na anyanyae nĩmamwingĩĩisye mũno enũkye mwana, ĩndĩ we nĩweetw’ĩĩe ngoonĩ kana ũu ndwaĩle. Mũũme nĩwatanie mũno kwona ũndũ kĩkundi kyatetheeisye mũka na mwana woo nginya atw’a kwĩmanyĩsya Mbivilia na kũendany’a namo maũmbanonĩ. We mũndũ mũka ũsu no asye Yeova nĩwasũngĩie mboya ĩla wamũvoyie kuma ngoonĩ? Vai nzika kana no asũngĩe akasya, “Ĩĩ.”

17. Nĩ maũndũ meva twĩthĩĩtwe tũyĩwa nĩtwĩke ĩla tũũmanyĩsya amanyĩw’a maitũ ma Mbivilia?

¹⁷ Kwĩka ũndũ twatavw’a. Ũndũ ũmwe wa vata vyũ tũtonya kwĩka tũkonany’a nĩtũlũmanĩtye na Ngai nĩ kwĩka kĩla twatavw’a nĩ ũseũvyo wake. Kwasũanĩa maũndũ ala twĩthĩĩtwe tũyĩwa nĩtwĩke ĩla tũũmanyĩsya amanyĩw’a maitũ ma Mbivilia. Kwa ngelekany’o, nĩtũtavĩtw’e kana twambĩĩa kũmanyĩsya mũndũ ĩvuku Mbivilia Yo Ĩmanyĩasya Ata?, nũseo kĩla ĩvinda twamina kũsoma tũlungu tũla tũũsoma tũkosa ndatĩka nini nĩ kana tũtetheesye mũmanyĩw’a ũsu aelewe ũseũvyo wa Yeova nesanga. No tũtũmĩe vitio ĩĩ, Nĩ Kyaũ Kĩendeeaa Nyũmbanĩ ya Ũsumbĩ?, na mbulosua Naaũ Mekaa Kwenda kwa Yeova Ũmũnthĩ? Na ĩndĩ twamina kũsoma ĩvuku Mbivilia Ĩmanyĩasya na mũmanyĩw’a wĩkĩte maendeeo, twĩĩtwe kana twaĩle kũsoma nake ĩvuku “Ĩyĩkalyei Ene Wendonĩ wa Ngai” o na ethĩwa kũvika vau nĩ mũvatise. Kĩtumi kya ũseũvyo kũnengane mwolooto ũsu nĩ kana wĩenda ala meũmanyĩw’a ‘malũlũmĩlw’e mũĩkĩĩonĩ woo.’ (Ako. 2:7) We nĩwĩkaa maũndũ asu tũtavĩtw’e nĩ ũseũvyo wa Yeova?

18, 19. Nĩ maũndũ ta meva maĩle kũtuma tũmũtũngĩa Yeova mũvea?

¹⁸ Nĩ maũndũ maingĩ Yeova ũtwĩkĩte ala maĩle kũtuma tũmũtũngĩa mũvea! Mbee, nĩwe ũtũnengete thayũ ũũ twĩ naw’o, na kethĩwa ti vake tũyĩthĩwa vo, o na tũyĩthĩwa tũithi. (Meko 17:27, 28) Nũtũnengete mũthĩnzĩo wa vata vyũ, naw’o nĩ yĩla ĩvuku yake, Mbivilia. O tondũ ala Aklĩsto ma Thesalonika moosie ndeto ya Ngai na mamĩtĩkĩla, o naitũ nĩtũtanaa kwĩtĩkĩla Mbivilia ta ũtũmane Ngai ũtũandĩkĩe.—1 Ath. 2:13.

¹⁹ Kwa ũtethyo wa Ndeto ya Ngai, Mbivilia, nĩtũkwatĩte mwanya wa kũmũthengeea Yeova, nake nĩwosete ĩtambya ya kũtũthengeea. (Yak. 4:8) Nĩ ndaĩa nene mũno kwona Asa witũ atwĩtĩkĩlĩtye twĩthĩwe ũseũvyonĩ wake. Asu nĩ moathimo matumaa tũtana ta kĩ! Ũtanu ta ũsu nĩw’o mũandĩki ũmwe wa Savuli waĩ naw’o ĩla wainie Savuli ĩno: “Mũtũngĩei Yeova mũvea; nũndũ nĩ mũseo; nũndũ ũseo wake wĩ wendo nĩwĩkalaa tene na tene.” (Sav. 136:1) Kĩsyokeo kĩĩ, “ũseo wake wĩ wendo nĩwĩkalaa tene na tene,” kyonekaa mavinda 26 nthĩnĩ wa Savuli ĩsu ya 136. Twekala tũlũmanĩtye na Yeova na ũseũvyo wake, ndeto isu iseũvĩte ũu ikeanĩa ngalĩkonĩ ĩ yitũ nĩkwĩthĩwa tũkekala tene na tene!