ŨNDŨ WA KWĨMANYĨSYA

Ĩkala Vandũ Vauĩtye Ũyĩmanyĩsya

We no wende kũtetheka vyũ yĩla ũkwĩmanyĩsya we mwene? Maũndũ aa maatĩĩe no maũtetheesye ũkatũnga kĩlĩko vandũ vamwe yĩla ũkwĩmanyĩsya:

• Ĩkala vandũ vaseo. Ethĩwa nĩvatonyeka, tata kũmantha vandũ vatheu na ve na kyeni kĩanĩtye nĩ kana ndũkathĩnĩke ũisoma. No wĩkale mesanĩ ya kwĩmanyĩĩsya kana o vandũ vauĩtye nza wa nyũmba.

• Mantha vandũ wĩ weka. Yesũ anyuvie kũvoya “kwakya tene” e “vandũ vate andũ.” (Mko. 1:35) Ethĩwa ndũtonya kũkwata vandũ wĩ weka, no ũtavye ala angĩ mũsyĩ kana ala wĩkalaa namo masaa maku ma kwĩmanyĩsya na ũimakũlya maikaũkũnĩae kelele masaanĩ asu.

• Tũnga kĩlĩko vandũ vamwe. Ĩvathane na maũndũ meũtuma kĩlĩko kyaku kĩtangatanga. Ethĩwa ũtũmĩaa simũ kana tambuleti kwĩmanyĩsya, myumye wasya kana ũmĩkĩe airplane mode nĩ kana wĩthĩe ndwĩsa kũvĩngĩĩswa. Na ethĩwa ũyĩmanyĩsya nĩwasũanĩa ũndũ mũna waĩlĩte kwĩka, ũandĩke vandũ nĩ kana ũlilikane kũwĩka wamina kwĩmanyĩsya. Ethĩwa kĩlĩko kyaku nĩkyambĩĩa kũtangatanga, osa ndatĩka nini ũtembee kana wĩkoote.