Nũsomete nesa makaseti ma Mũsyaĩĩsya ala mela kuma? Ethĩwa nũu, sisya ethĩwa nũtonya kũsũngĩa makũlyo aa maatĩĩe:

Maandĩko monanĩtye ata kana Ngai nũtwĩw’ĩaa tei?

Yĩla ana ma Isilaeli maĩ ngombo Misili, Ngai nĩwoonie maithĩna na nĩwaũmĩaa ngoonĩ oona ũu. (Kuma 3:7; Isa. 63:9) Tũmbĩtwe na kĩtutya kya Ngai, na kwoou no twĩthĩwe na tei o take. Nũtwĩw’ĩaa tei o na kau mavinda angĩ no twĩw’e ataĩle kũtwenda.​—wp18.3, ĩth. 8-9.

Momanyĩsyo ma Yesũ matetheeisye andũ ata maeke kũmena ala angĩ?

Ayuti aingĩ ĩvindanĩ ya Yesũ maĩ na kĩmena. Klĩsto nĩwaneeneie vata wa kwĩthĩwa na wĩnyivyo na aweta ti ũseo mũndũ kwona mbaĩ yake tayo nzeo. Eekĩie vinya aatĩĩi make monae ala angĩ ta ana-a-asa na eĩtu-a-asa moo.​—w18.06, ĩth. 9-10.

Twĩĩmanyĩsya kyaũ twasũanĩa nĩkĩ Ngai ũtaaĩtĩkĩlya Mose kũlika Nthĩ ya Watho?

Mose aĩ na ngwatanĩo nzeo mũno na Yeova. (Kũt. 34:10) Mũthyanĩ wa ĩla myaka 40 Aisilaeli makilyĩ kũmina kyalo kyoo weũnĩ, nĩmambĩĩe ĩngĩ kũnyungunyĩsya nũndũ wa kwaĩwa nĩ kĩw’ũ. Ngai amwĩie Mose aneene na ĩvia. Ĩndĩ eekie kũyĩkũna. Yeova nũtonya kwĩthĩwa athatie nũndũ Mose ndaaĩka kĩla weeĩtwe, kana kũmũtaĩa nũndũ wa kyama kĩu. (Mot. 20:6-12) Kĩu kĩtũmanyĩsya vata wa kũmwĩw’a Yeova na kũmũnenga ndaĩa.​—w18.07, ĩth. 13-14.

Nĩkĩ nĩ laisi kũvĩtya twasilĩla angĩ kwĩanana na kĩla twene?

Ve maũndũ atatũ matonya kũtuma andũ masilĩla angĩ kwĩanana na kĩla mene. Maũndũ asu nĩ: wumo kana mbaĩ, ũthwii kana ũkya, na ũkũũ wa mũndũ. Ve vata mũnene twĩmanyĩsye kwonaa angĩ o ũndũ Ngai ũmonaa. (Meko 10:34, 35)​—w18.08, ĩth. 8-12.

Aklĩsto ala akũũ matonya kũtetheesya maũndũnĩ ta meva?

Ngai nĩwonaa Aklĩsto ala akũũ me ma vata o na ethĩwa nĩmakwatĩte kĩanda kĩ kĩvathũkany’o na kĩla manaĩ nakyo. Nĩmatonya kũvikĩa aũme mate Ngũsĩ ala matwaĩte eĩtu-a-asa, makatetheesya ala mavoie, makamanyĩsya andũ Mbivilia, na makeanĩsya mawĩa angĩ meũ kana maingangĩ ũthũkũminĩ.​—w18.09, ĩth. 8-11.

Nĩ syĩndũ syĩva Aklĩsto matũmĩaa mũno kũmanyĩsya?

Twĩ na kaati sya kwelekelya andũ kĩsesenĩ, na valũa sya kũthokany’a. O na twĩ na tulakiti nyanya nzeo, na makaseti ma Mũsyaĩĩsya na Amkeni! O na syĩndũ ingĩ ila tũtũmĩaa mũno kũmanyĩsya nĩ mbulosua, mavuku elĩ, na vitio inya nzeo, ta Nĩkĩ Waĩle Kwĩmanyĩsya Mbivilia?​—w18.10, ĩth. 16.

Mũklĩsto atonya ‘kũthooa w’o’ ata o tondũ ĩandĩko ya Nthimo 23:23 yonanĩtye?

Ngai ndendaa tũĩve mbesa nĩ kana tũthooe w’o. Ĩndĩ no nginya twĩkĩe kĩthito na tũitũmĩa ĩvinda nĩ kana tũkwate w’o ũla wĩ Ndetonĩ ya Ngai.​—w18.11, ĩth. 4.

Ngewa ya Osea na mũka wake, Ngomeli, ĩtũmanyĩasya kyaũ?

O na kau Ngomeli eekie ũlaalai ĩvinda mbee wa yĩmwe, Osea nĩwamũekeie vandũ va kũmũtia. Mũklĩsto akeka ũlaalai, ũla ũtwaanĩte nake akenda no amũekee. Ũla ũvĩtĩw’e akakoma ĩngĩ na mũũme kana mũka, ndethĩwa na kĩtumi o na kĩmwe kyosanĩte na Maandĩko kya kũthasya mũtwaano.​—w18.12, ĩth. 13.