Aiee. Kĩla Ndaviti waandĩkie mũsoanĩ ũsu nĩ kya wʼo na nĩ kya kũĩkĩĩka.

Kwasũanĩa kĩla waandĩkie mũsoanĩ ũsu na mĩsoanĩ ĩngĩ ĩla ĩkonanĩtye nawʼo: “Ngaina ngĩkumya syĩtwa yaku kũvika tene na tene, nĩ kana nĩanĩasye mawĩvĩto makwa kĩla mũthenya.” “Ngakũtaĩa, we Mwĩaĩi Ngai wakwa, na ngoo yakwa yonthe; na ngataĩa syĩtwa yaku tene na tene.” “Ngataĩa syĩtwa yaku tene na tene.”—Sav. 61:8; 86:12; 145:1, 2.

Yĩla Ndaviti waandĩkie ndeto isu, ndoongeleelaa mautĩĩo aisũanĩa kana ndakakwʼa. Twĩasya ũu nũndũ nĩweesĩ kana Yeova aĩtye naĩ ya mũndũ ĩkaetae kĩkwʼũ, na we mwene nĩweesĩ kana aĩ na naĩ. (Mwa. 3:3, 17-19; Sav. 51:4, 5) O na nĩweesĩ kana aũme maĩ na mũĩkĩĩo mũlũmu, ta Avalaamu, Isaka, na Yakovo nĩmakwie. Na ndaĩ na nzika kana ĩvinda yĩmwe akakwʼa. (Sav. 37:25; 39:4) Ĩndĩ ndeto ila syĩ Savuli 61:8 syĩonanyʼa wendi na ũtwi wake wa kũmũkumya Ngai tene na tene, kana ĩvinda yonthe yĩla ũkeethĩwa thayũ.—2 Sam. 7:12.

Maũndũ amwe Ndaviti waandĩkie nĩ ala wakomanĩte namo thayũnĩ wake, o tondũ vonanĩtwʼe nthĩnĩ wa maelesyo ala me mwambĩĩonĩ wa Savuli ya 18, 51, na 52. Na nthĩnĩ wa Savuli ya 23, Ndaviti amũelekanĩtye Yeova na mũĩthi ũla ũtongoeasya malondu make, akamanenga ũthyũmũo, na akamasũvĩa. Ndaviti aĩ mũĩthi o ta ũsu. Na endaa kũmũthũkũma Ngai “mĩthenya yonthe ya thayũ [wake].”—Sav. 23:6.

O na ĩngĩ, lilikana kana Yeova nĩwe wamũveveeie kũandĩka maũndũ ala waandĩkie. Maũndũ amwe waandĩkie nĩ mawathani maĩ meanĩe ĩtina wa ĩvinda yĩasa. Kwa ngelekanyʼo, nthĩnĩ wa Savuli ya 110 aandĩkie ĩũlũ wa ĩvinda yĩla Mwĩaĩi wake ‘ũkekala nthĩ ngalĩ ya kwʼoko kwa aũme’ kwa Ngai ĩtunĩ, na ainengwa vinya mwingĩ. Vinya wa kwĩka ata? Wa kũsinda amaitha ma Ngai na ‘kũsilaa katĩ wa i mbaĩ’ ĩũlũ wa nthĩ. Ndaviti nĩwe waĩ ũmae wa Yesũ, ũla nĩwe Masia ũla wathaniwe ũkasumbĩka ĩtunĩ na ayĩthĩwa “mũthembi wa tene na tene.” (Sav. 110:1-6) Yesũ aisye kana wathani ũla wĩ nthĩnĩ wa Savuli ya 110 nĩwamũkonetye na waĩ wĩanĩe ĩvinda yũkĩte.—Mt. 22:41-45.

Kwoou no twasye Ndaviti aveveeiwe kũandĩka ĩũlũ wa maũndũ maĩ mekĩke ĩvindanĩ yĩu na ĩvinda yĩla ũkathayũũkwʼa na aitanĩa kũmũkumya Yeova tene na tene. Kĩu kĩtũtetheesya kũelewa kana ĩandĩko ya Savuli 37:10, 11, 29 yĩeleetye maũndũ ala meekĩkie ĩvinda ya Isilaeli, o vamwe na maũndũ ala makekĩka ĩũlũ wa nthĩ ĩvinda yũkite, yĩla Ngai ũkeanĩsya mawatho make.—Sisya kalungu ka 8 kĩlungunĩ “Ũkeethĩwa Vamwe Nakwa Ũseonĩ” ĩkasetinĩ yĩĩ.

Kwoou Savuli 61:8 na mĩsoa ĩngĩ ĩla ĩkonanĩtye nayo, yĩonanyʼa kana Ndaviti endaa kũmũkumya Yeova ĩvindanĩ yĩu ya mbaĩ ya Isilaeli nginya yĩla ũkakwʼa. O na ĩngĩ, yonanĩtye maũndũ ala Ndaviti ũkeka ĩvinda yũkĩte yĩla Yeova ũkamũthayũũkya.