Nũsomete nesa makaseti ma Mũsyaĩĩsya ma mwaka ũũ? Ethĩwa nũu, sisya ethĩwa nũtonya kũsũngĩa makũlyo aa maatĩĩe:

Tũkatetheka ata twoosa ĩvinda tũneene na Yeova, tũmwĩthukĩĩsye, na tũivindĩĩsya ĩũlũ wake?

Tũkeekaa motwi maseango, tũkeethĩwa alimũ aseango, mũĩkĩĩo witũ ũkalũlũmĩĩla mũnango, na tũkamwenda Yeova mũnango.—w22.01, ĩth. 30-31.

Tũkatetheka ata tweemanyĩsya kũmũĩkĩĩa Yeova vamwe na ala ũnyuvĩte matongoesye ũseũvyonĩ?

Yĩĩ nĩyo ĩvinda ya kwĩmanyĩsya kũĩkĩĩa kana mavinda onthe Ngai ekaa kĩla kyaĩle kwa kũlea kũya nzika na myolooto ĩla tũũnengwa nĩ atumĩa na motwi ala mekwĩka. Yĩla thĩna mũnene ũkambĩĩa, tũkeethĩwa tũtonya kũmewʼa, o na matũnenga myolooto tũkwĩwʼa ĩsaanĩtye kana tũteũmĩelewa.—w22.02, ĩth. 4-6.

Mũlaĩka oonanasya ata yĩla watavisye Nzekalia ĩũlũ wa “kavilũ ke kwʼokonĩ kwa [Ngavana] Nzeluvaveli”? (Nzek. 4:8-10)

Woni ũsu waĩkĩĩthisye andũ ma Ngai kana ĩkalũ yĩkathela na yĩkeethĩwa yĩilye ũndũ Ngai wendaa, o na kau amwe moonaa ta yĩtakethĩwa yĩ yanake ta yĩla ya tene.—w22.03, ĩth. 16-17.

Tũtonya ata kwĩthĩwa ngelekanyʼo nzeo “nthĩnĩ wa ũneeni”? (1 Tim. 4:12)

Nĩ kwa kũneenasya ala angĩ nesa na twĩ na ndaĩa ũtavanyʼanĩ, kwinaa na ngoo yonthe na kumasya maelesyo maũmbanonĩ kĩla ĩvinda, kũneenaa ũla wʼo na kwa nzĩa ĩtonya kwaka ala angĩ, na kwĩvathanaa na numano.—w22.04, ĩth. 6-9.

Nĩkĩ maũndũ ala me nyamũnĩ inya (mosumbĩ) ila iwetetwe kĩlungunĩ kya 7 kya Ndanieli me nyamũnĩ o ĩmwe ĩla ĩwetetwe Ũvuanyʼo 13:1, 2?

Nyamũ ĩla ĩwetetwe Ũvuanyʼo kĩlungu kya 13 ti ũsumbĩ ũmwe, ta Lomi. Ĩndĩ yonanasya silikalĩ syonthe ila syĩthĩĩtwe iisumbĩka andũ.—w22.05, ĩth. 9.

Nĩ ũndũ wĩva wa mwanya tũtonya kwĩka twonanyʼe nĩtũĩkĩĩe kana Ngai akaĩkĩĩthya sila wa katĩ nĩwaatĩĩwa?

Ethĩwa mũndũ nĩwatũumanga, atũũmĩsya, kana atũvĩtĩsya, nĩtũtataa tũikathate kana kwoveea ũthatu ngoonĩ na tũitia maũndũ mokonĩ ma Yeova. Akaveta mothũku onthe ala maetetwe nĩ naĩ.—w22.06, ĩth. 10-11.

Mwana-a-asa ũla ũkumya mboya ũmbanonĩ aĩlĩte kũlilikana kyaũ?

Tũyaĩlĩte kwona mboya ta mwanya wa kũtaa kĩkundi kana kumya imanyĩthya. Na mũno mũno mboyanĩ ya mwambĩĩo, vai vata wa “kũneena ndeto mbingĩ.” (Mt. 6:7)—w22.07, ĩth. 24-25.

Nĩ kwa nzĩa yĩva “ala meekie maũndũ mathũku” makakwata “ũthayũũkyo wa ũsilĩlo”? (Yoana 5:29)

Maikatwʼĩĩwa kwanangwa kwosana na maũndũ ala meekie matanakwʼa. Ĩndĩ makeekĩwa kĩthiminĩ ĩtina wa kũthayũũkwʼa nĩ kana mawoni moo na mwĩkalĩle woo ũsyaĩĩwʼe.—w22.09, ĩth. 18.

Nĩ ũndũ wĩva J. F. Rutherford wawetie ũmbanonĩ mũnene wa Mwei wa 9, 1922, wathangaaisye andũ mũno?

Ũmbanonĩ mũnene waĩ Cedar Point, Ohio, Amelika, aisye: “Mũsumbĩ nũsumbĩkĩte! Ninywʼĩ mũnyuvĩtwe mũnyaĩĩkye ũvoo ĩũlũ wake. Kwoou tavanyʼai, tavanyʼai, tavanyʼai, ĩũlũ wa Mũsumbĩ na Ũsumbĩ wake!”—w22.10, ĩth. 3-5.

Ĩandĩko ya Isaia kĩlungu kya 30 yĩwetete maũndũ meva atatũ Ngai wĩkaa atũtetheesye kũmĩĩsya?

Kĩlungu kĩu kyonanĩtye kana (1) nĩwĩthukĩĩasya mboya sitũ nesa na kũisũngĩa, (2) nũtũtongoeasya, na (3) nũtũathimaa yu na kũtwatha moathimo ma ĩvinda yũkĩte.—w22.11, ĩth. 9.

Nĩkĩ tũtonya kwasya kana ndeto ila syĩ Savuli 37:10, 11, 29 nĩsyeanĩie tene, na no ikeanĩa ĩngĩ ĩvinda yũkĩte?

Ndeto sya Ndaviti ieleetye nesa ũndũ maũndũ maseũvĩte mbaĩnĩ ya Isilaeli, ta ĩvinda ya ũsumbĩ wa Solomoni. Yesũ aneeneaa nthĩ nzaũ ĩla tweteele na awetie ndeto syĩ mũsoanĩ wa 11. (Mt. 5:5; Luka 23:43)—w22.12, ĩth. 8-10, 14.