We Nĩwĩyũmbanĩtye ‘Kũtiĩwa Nthĩ’?
ITHYONTHE nĩtweteele na mea kwĩanĩwʼa kwa watho ũũ wa Yesũ: “Nĩ atanu ala auu, nũndũ makatiĩwa nthĩ.” (Mt. 5:5) Etĩkĩwʼa mauta makatiĩwa nthĩ yĩla metwʼĩka asumbĩ na maisumbĩka vamwe na Yesũ. (Ũvu. 5:10; 20:6) Namo Aklĩsto aingĩ ma wʼo ũmũnthĩ me na mea ma kwĩkala tene na tene ĩũlũ wa nthĩ mate na naĩ, me na mũuo, na ũtanu. Nĩ kana ũu wĩanĩe vyũ, ve wĩa wa vata mũno makeethĩwa maĩle kũtethya. Kwa ngelekanyʼo, makatetheesya wĩanĩ wa kũtwʼĩkĩthya nthĩ nzaũ, kũĩkĩĩthya ala makathayũũkwʼa me na kyonthe kĩla mekwenda, na kũmamanyĩsya. Kwasũanĩa kĩla ũtonya kwĩka yu wonanyʼe kana wĩ na mea ma kwĩka maũndũ asu nthĩnĩ wa nthĩ nzaũ.
WE NĨWĨYŨMBANĨTYE KŨTETHYA WĨA WA KŨTWʼĨKĨTHYA NTHĨ NZAŨ?
Yĩla Yeova weeaĩe andũ ‘maususye nthĩ, na kũmĩkĩlya vinya,’ oonanisye kana ĩtina nthĩ yonthe yaĩ ĩtwʼĩke valatiso. (Mwa. 1:28) Ala makatiĩwa nthĩ makeethĩwa maĩle kwĩanĩsya mwĩao ũsu. Mbeenĩ, nthĩ ndĩkethĩwa yĩ valatiso nĩkwĩthĩwa mũũnda wa Eteni nĩwathelile. Ĩtina wa Alimaketoni oou, kũkeethĩwa na wĩa mwingĩ mũno wa kũtethya nĩ kana tũthesye kũla nthĩ ĩno yanangĩtwe. Mwa ũsu ndũkethĩwa wĩa wĩ laisi!
Kĩu kĩtũlilikanyʼa wĩa ũla Aisilaeli maaĩle kũtethya yĩla masyokie kuma Mbaviloni. Nthĩ yoo ĩyatwĩe andũ kwa myaka 70. Ĩndĩ Isaia nĩwathanie kana Yeova akamatetheesya mamĩtũngĩĩe. Wathani ũsu waĩtye: “Nũtwʼĩkĩthĩtye weũ wayo ta Eteni, na yalata yayo ta mũũnda wa Yeova.” (Isa. 51:3) Aisilaeli nĩmeanĩisye kĩu. O ta ũu, Yeova akatetheesya ala makatiĩwa nthĩ mamĩtwʼĩkĩthye vandũ vaseo va kwĩkala. Ĩndĩ o na yu tũĩ ve maũndũ ũtonya kwĩka wonanyʼe kana wĩ na mea ma kũtethya wĩa ũsu.
Ũndũ ũmwe ũtonya kwĩka nĩ kũtata vyũ wĩkalasye mũsyĩ waku wĩ mũtheu na syĩndũ syĩ mbange nesa. No wĩkae ũu o na ethĩwa atũi maku ti atheu. O na ĩngĩ, no ũtetheeasye kũthesya na kũsũvĩa Nyũmba yenyu ya Ũsumbĩ na ya maũmbano manene. Na ethĩwa maũndũ maku nĩmakwĩtĩkĩlĩtye, no usũsye vomu nĩ kana ũtetheeasye yĩla mũisyo waumĩla kĩsionĩ kyenyu. Kwa nzĩa ĩsu ũkoonanasya kana nĩwĩyũmbanĩtye kũtetheesya ana-a-asa na eĩtu-a-asa maku yĩla vata waumĩla. Ĩkũlye-ĩ, ‘No nĩmanyĩsye ũtũĩka mũna ũla ngethĩwa ndonya kũtũmĩa ethĩwa Yeova akambĩtĩkĩlya kwĩkala ĩũlũ wa nthĩ tene na tene?’
WE NĨWĨYŨMBANĨTYE KWĨANĨSYA MAVATA MA ALA MAKATHAYŨŨKWʼA?
Ĩtina wa Yesũ kũthayũũkya kelĩtu ka Yailu oou, aisye kanengwe kĩndũ kaye. (Mko. 5:42, 43) Noĩthwa ũtaĩ wĩa mwingĩ kũthĩnĩkĩa kelĩtu kau ka myaka 12. Ĩndĩ kwasũanĩa wĩa mwingĩ ũla tũkethĩwa twaĩle kũtethya yĩla Yesũ ũkeanĩsya watho ũũ: “Ala onthe me mbũanĩ [makeewʼa] wasya wake namo makauma.” (Yoa. 5:28, 29) O na kau Mbivilia ndĩwetete maũndũ maingĩ, nĩ ũndũ ũkwosana na kĩlĩko kũsũanĩa kana ala makathayũũkwʼa makeethĩwa na vata wa lĩu, vandũ va kwĩkala, na ngũa. O na yu tũĩ, no wonanyʼe kana wĩ na mea ma kũtetheesya. Ĩkũlye makũlyo aa maatĩĩe.
Nĩ kyaũ ũtonya kwĩka ũmũnthĩ wonanyʼe kana nĩwĩyũmbanĩtye kũtiĩwa nthĩ?
Yĩla vaumwʼa kĩmanyĩthya kana mũsyaĩĩsya wa mũthyũlũlũko nũkũthokea kĩkundi kyenyu, we nĩwĩyumasya kũmũthokya mũĩsanĩe? Yĩla athũkũmi ma ĩvinda yonthe maumwʼa Mbetheli na makwata kĩanda kyeũ na mooka kĩkundinĩ kyenyu, kana yĩla mũsyaĩĩsya wa mũthyũlũlũko wamina ũthũkũmi wake wĩanĩ wa kũthyũlũlũka, no ũmatetheesye kũkwata vandũ va kwĩkala? Ethĩwa ũmbano mũnene wa mĩthenya ĩtatũ kana wa mwanya wĩĩkwa kĩsionĩ kyenyu, no wĩyumye kũthũkũma mbee kana ĩtina wa ũmbano ũsu, kana ũkathokya na kũthĩnĩkĩa ala mekũka ũmbanonĩ ũsu?
NĨWĨYŨMBANĨTYE KŨMANYĨSYA ALA MAKATHAYŨŨKWʼA?
Nũndũ wa kĩla tũsomaa nthĩnĩ wa Meko ma Atũmwa 24:15, nĩtwĩsĩ kana andũ mbilioni mbingĩ makathayũũkwʼa. Aingĩ moo makeethĩwa ala tene mataakwata mwanya wa kũmũmanya Yeova. Ĩndĩ ĩtina wa kũthayũũkwʼa makakwata mwanya ũsu. a Athũkũmi ma Ngai aĩkĩĩku, na me na ũtũĩka, makatetheesya wĩanĩ ũsu wa kũmamanyĩsya. (Isa. 11:9) Mwĩĩtu-a-asa wĩtawa Charlotte, ũla ũtavanĩtye Europe, South America, na Africa, nĩweteele na mea kwĩka ũu. Aĩtye ũũ e mũtanu: “Nĩneteele na mea kũmanyĩsya ala makathayũũkwʼa. Yĩla nasoma ĩũlũ wa mũndũ wekalaa ĩvindanĩ ya tene, kaingĩ nĩsũanĩaa ũũ, ‘Mwa ta kethĩwa no wamwĩsĩ Yeova, thayũ wake wĩthĩwa waĩ kĩvathũkanyʼo vyũ.’ Nĩ na mea maingĩ mũno ma kũtavya ala makathayũũkwʼa kĩla makosie.”
O na athũkũmi aĩkĩĩku ma Yeova ala maĩ thayũ Yesũ atanamba kũka ĩũlũ wa nthĩ, makeethĩwa na maũndũ maingĩ ma kwĩmanyĩsya. Kwasũanĩa ũndũ tũkatanĩa kĩanda kya mwanya kya kũmũelesya Ndanieli ũndũ mawathani ala waandĩkie meanĩie, o na kau ĩvindanĩ yĩu ndamaeleawa. (Nda. 12:8) Na kwasũanĩa ũndũ tũkatana mũno wĩana tũielesya Luthi na Naomi ũndũ mũvĩa wa mũsyĩ woo wesie kumĩlya Masia. Ũkeethĩwa ũtanu mwingĩ ta kĩ kũmanyĩsya andũ ĩũlũ wa nthĩ yonthe, kũte mathĩna ma nthĩ ĩno nthũku na maũndũ angĩ ala matwelelũkasya!
Nĩ kyaũ ũtonya kwĩka yu wĩyũmbanĩsye kũtetheesya kũmanyĩsya ala makathayũũkwʼa? Ũndũ ũmwe ũtonya kwĩka nĩ kũtata vyũ waĩlangye ũtũĩka waku wa kũmanyĩsya na kũtavanasya ũteũtĩĩa. (Mt. 24:14) O na ethĩwa ĩvindanĩ yĩĩ ndũtonya kwĩka maũndũ maingĩ nũndũ wa ũkũũ kana o maũndũ angĩ, kĩthito kyaku no kyonanyʼe kana nĩwĩyũmbanĩtye kũmanyĩsya ala makathayũũkwʼa.
Nũseo ũkavindĩĩasya makũlyo aa ma vata. Kwa wʼo nĩweteele na mea kũtiĩwa nthĩ? Wĩ na mea ma kũtetheesya wĩanĩ wa kũtwʼĩkĩthya nthĩ nzaũ, o vamwe na kũthĩnĩkĩa mavata ma ala makathayũũkwʼa na kũmamanyĩsya? No wonanyʼe kana nĩwĩyũmbanĩtye kwa kũtũmĩa nesa myanya ĩla yĩ vo ũmũnthĩ ya kũtethya mawĩa mavwʼanene na ala makweteele yĩla ũkatiĩwa nthĩ!
a Sisya kĩlungu kĩ na kyongo, ‘Kũalyũla Aingĩ Methĩwe na Ũlũngalu’ ĩkasetinĩ ya Mũsyaĩĩsya ya Mwei wa 9, 2022.
