Nũsomete nesa makaseti ma Mũsyaĩĩsya ma mwaka ũũ? Ethĩwa nũu, sisya ethĩwa nũtonya kũsũngĩa makũlyo aa maatĩĩe:

“Kwĩthĩwa na kĩlĩko kyeũ” kwonanasya ata? (Alo. 12:2)

Kũyonanasya kwĩka o tũmaũndũ tũseo tu. Nĩtwaĩlĩte kũthiana ũla mũndũ wa nthĩnĩ, na tũyĩka moalyũku ala maĩlĩte nĩ kana tũatĩĩe myolooto ya Ngai nesa ũndũ tũtonya.—w23.01, ĩth. 8-9.

Tũtonya kũsũvĩa ilĩko sitũ ata yĩla tũũsyaĩĩsya maũndũ ala maendeee ĩũlũ wa nthĩ?

Nĩtwendeeawʼa nĩ kwona ũndũ maũndũ ala maendeee ĩũlũ wa nthĩ mekwĩanĩsya mawathani. Ĩndĩ vandũ va kwĩyusũĩĩsya maũndũ, nũndũ kĩu no kĩete mũaanĩko, nũseo tũneenee maũndũ mosanĩte na kĩla kĩtumbĩthĩtwʼe nĩ ũseũvyo wa Yeova. (1 Ako. 1:10)—w23.02, ĩth. 16.

Ũvatiso wa Yesũ ũvathũkene ata na wa aatĩĩi make?

Nũndũ Yesũ asyaĩwe mbaĩnĩ yavathĩtwe ĩmũthũkũmae Ngai, ndaĩ na lasima ya kwĩyumya kwa Yeova taitũ. Aĩ mũndũ ũte na naĩ. Ndaĩ na vata wa kumbũla naĩ.—w23.03, ĩth. 5.

Tũtonya kwĩka ata nĩ kana tũnenge angĩ mwanya wa kumya maelesyo maũmbanonĩ?

No tumye maelesyo makuvĩ nĩ kana tũnenge angĩ mwanya wa kumya maelesyo. O na no twĩsũvĩe tũikaneenee maũndũ maingĩ mũno. Tweeka ũu, ala angĩ makakwataa kĩndũ kya kũweta.—w23.04, ĩth. 23.

Ĩla “Nzĩa ya ũtheu” ĩwetetwe nthĩnĩ wa Isaia 35:8 yonanasya kyaũ?

Mbeenĩ, nzĩa ĩsu ya ngelekanyʼo yoonanasya vala Ayuti mesĩlile kuma Mbaviloni nginya kwoo. Nata ĩvindanĩ yĩĩ? Kwa ĩvinda ya myaka maana maingĩ mwaka wa 1919 ũte mũviku, wĩa wa kũthesya nzĩa ĩsu nĩwatethiwʼe, nawʼo waĩ kũalyũla na kũtumbĩthya Mbivilia, o vamwe na mawĩa angĩ. Andũ ma Ngai maendeee kũkinyĩla ‘Nzĩanĩ ya ũtheu,’ nũndũ nĩyo ĩtũtetheeasya kũendeea kũmũthaitha Yeova nginya yĩla Ũsumbĩ ũkaĩlya maũndũ.—w23.05, ĩth. 15-19.

Nthimo kĩlungu kya 9 ĩtũnengete ũtao wĩva ĩũlũ wa aka elĩ ma ngelekanyʼo?

Ĩwetete “mũndũ mũka mũtumanu,” ũla aũthokya ũendaa “Seoli.” Nĩsyokete ĩkaweta “ũĩ” wa wʼo, ũla ũelekanĩtwʼe na mũndũ mũka, na aũthokya ũendeeaa “kũkinya nzĩanĩ ya ũmanyi” na ya thayũ. (Nth. 9:​1, 6, 13, 18)—w23.06, ĩth. 22-24.

Ĩvindanĩ ya Loto, Ngai oonanisye ata kana e wĩnyivyo na ndakwatĩĩaa mũno woni wake?

Yeova amwĩie Loto aume Sotomo akĩĩe iĩmanĩ. Yĩla Loto wamwĩsũvie akĩĩe ndũanĩ ya Nzoali, nĩweetĩkĩlile.—w23.07, ĩth. 21.

Kĩveti kĩtonya kwĩka ata ethĩwa mũũme nĩwĩloelaa mavisa ma ũlaalai?

Nĩkyaĩlĩte kũlilikana kana tikyo kyaĩle kũtũlwa mũtĩ. Ũndũ ũla wa vata kyaĩle kwĩka nĩ kũsũvĩa ngwatanĩo yakyo na Ngai na kĩivindĩĩsya ngewa syĩ Mbivilianĩ sya aka mathĩnĩkaa mũno ĩndĩ Yeova amakiakisya. No kĩtetheesye mũũme akevathana na maũndũ matonya kũmũamũkĩsya wendi ũsu mũthũku.—w23.08, ĩth. 14-17.

Kwĩthĩwa na kĩlĩko kũtonya kũtũtetheesya ata tũsũngĩe makũlyo ala makonetye mũĩkĩĩo witũ tũuĩtye?

No twone ĩkũlyo kana ngananĩo ta nzĩa ya kũmanya kĩla mũndũ ũla ũngĩ ũkũsũanĩa kana wonaa kĩ kya vata. Twamanya, nowʼo tũtonya kũmũsũngĩa tũuĩtye.—w23.09, ĩth. 17.

Ngelekanyʼo ya Meli yĩtũmanyĩsya kyaũ ĩũlũ wa kwĩthĩwa na vinya?

Yĩla Meli wamanyie kana nũkũtwʼĩka inyia wa Masia, nĩweetĩkĩlile andũ ala angĩ mamwĩkĩe vinya. Kavilieli na Elisavethi nĩmamwĩkĩie vinya. O naitũ no twĩkĩwe vinya nĩ athaithi ala angĩ.—w23.10, ĩth. 15.

Yeova atonya kũsũngĩa mboya sitũ ata?

Nũtwathĩte kwĩthukĩĩsya mboya sitũ na nũsũanĩaa ũndũ kĩla twavoya kĩkonanĩtye na kĩeleelo kyake. (Yel. 29:12) No asũngĩe mboya ivwʼanene kwa nzĩa syĩ kĩvathũkanyʼo, ĩndĩ mavinda onthe akatũtwʼĩĩkaa.—w23.11, ĩth. 21-22.

Ĩandĩko ya Alomi 5:2 nĩyĩneeneete “wĩkwatyo,” kwoou nĩkĩ ũneenewe ĩngĩ mũsoanĩ wa 4?

Ĩtina wa mũndũ kwĩwʼa ũvoo mũseo, no ethĩwe na wĩkwatyo wa kwĩsa kũtanĩa thayũ nthĩnĩ wa nthĩ nzaũ. Ĩndĩ akwatwa nĩ mathĩna, amomĩĩsya, na eeyonea kana Ngai nĩwendeeawʼa nĩwe, wĩkwatyo wake no ũlũlũmĩĩle na ayĩthĩwa ate na nzika o na vanini kana ũkeanĩa.—w23.12, ĩth. 12-13