Nũsomete nesa makaseti ma Mũsyaĩĩsya ma mwaka ũũ? Ethĩwa nũu, sisya ethĩwa nũtonya kũsũngĩa makũlyo aa maatĩĩe:

Yeova atwiĩe ngelekanyʼo yĩva ĩũlũ wa ũndũ twaĩle kũkua aka?

We ndamavathũlaa na ndendeeawʼa mũno nĩ aũme kwĩ aka. Nũmethukĩĩasya na nĩwendaa kũmanya ũndũ mekwĩwʼa na mawĩmakĩo ala me namo. Na nũĩkĩĩe aka nũndũ nũmanengete wĩa wa kũtethya.—w24.01, ĩth. 15-16.

Tũtonya ata kũatĩĩa ũtao ũla wĩ Aeveso 5:​7, ũla waĩtye: “Mũikethĩwe na ngwatanĩo vamwe namo”?

Mũtũmwa Vaũlo atũkanasya tũikatindanyʼe na andũ meũtuma vethĩwa ve vinya kũlũmanyʼa na myolooto ya Yeova. Itindo ta isu ti nginya syĩthĩwe syĩ sya o andũ ala tũũtũmĩa ĩvinda namo twenene, ĩndĩ no syĩthĩwe syĩ sya andũ ala tũkũea ngewa namo isesenĩ sya kũea ngewa.—w24.03, ĩth. 22-23.

Nĩ ngewa ta syĩva sya ũvũngũ twaĩle kwĩvathana nasyo?

Nĩtwaĩlĩte kwĩvathana na maũvoo mate maĩkĩĩthye ala tũtonya kũtavwʼa nĩ ana-a-asa na eĩtu-a-asa maitũ maitwĩkĩa vinya, ũvoo tũtũmĩwe nĩ andũ tũtamesĩ kwĩsĩla email, na akaĩi ma mũĩkĩĩo ala metũngaa nĩmekwendeewʼa nĩ ũvoo ũla wĩ Mbivilianĩ.—w24.04, ĩth. 12.

Nĩ kyaũ twĩsĩ na nĩ kyaũ tũtesĩ ĩũlũ wa ũndũ Yeova ũkasilĩla Mũsumbĩ Solomoni, andũ ala makwie ndũanĩ sya Sotomo na Ngomola, na ma ĩvinda ya ĩla Mbua ya Kĩwʼũ Kingĩ?

Tũyĩsa kwasya tũte na nzika kana Yeova amatwʼĩĩe wanangĩko wa tene na tene. Ĩndĩ nĩtwĩsĩ kana ethĩawa esĩ maũndũ onthe na e tei mwingĩ mũno.—w24.05, ĩth. 3-4.

Kwona Ngai aelekanĩtwʼe na “Ĩvia” kwĩtũĩkĩĩthya ũndũ wĩva? (Kũt. 32:4)

No tũmũtwʼe wĩvitho witũ. We nĩ wa kwĩkwatwʼa na mavinda onthe nĩwĩanĩasya mawatho make. Eka ũu, ndaalyũkaa na kĩeleelo kyake kĩyĩsaa kũvĩndũka.—w24.06, ĩth. 26-28.

Nĩ kyaũ kĩtonya kũũtetheesya ũmanyĩe kĩkundi kyeũ?

Mwĩkwatye Yeova na akaũtetheeasya o ũndũ watetheeisye athũkũmi make ĩvindanĩ ĩvĩtu. Ndũkaelekanyʼe kĩkundi kyaku kya tene na kĩla kyeũ. Ĩthĩwa na maũndũ maingĩ ma kwĩka kĩkundinĩ kĩu kyeũ na ũitata kũmantha anyanya eũ.—w24.07, ĩth. 26-28.

Twĩĩmanyĩsya kyaũ ngelekanyʼonĩ itatũ ila syĩ ĩandĩkonĩ ya Mathayo kĩlungu kya 25?

Ngelekanyʼo ya malondu na mbũi ĩkindĩlĩĩle vata wa kwĩthĩwa twĩ aĩkĩĩku na tũlũmanĩtye na Yeova. Ngelekanyʼo ya ala eĩtu oĩ na angĩ atumanu yonanĩtye vata wa kwĩthĩwa twĩyũmbanĩtye na twĩ metho. Nayo ngelekanyʼo ya talendi yonanĩtye vata wa kwĩthĩwa na kĩthito kingĩ.—w24.09, ĩth. 20-24.

Valasya wa ĩkalũ yĩla Solomoni waakie waĩ na ũtũlu wĩana ata?

Mavukunĩ amwe ma tene, ĩandĩko ya 2 Mavinda 3:4 yĩwetete kana valasya ũsu waĩ na ũtũlu wa mĩkono 120, na ũu nĩ kwasya, mita 53 (vuti 175). Ĩndĩ mavuku angĩ ma kũĩkĩĩka maĩtye kana waĩ na ũtũlu wa “mĩkono 20,” na isu nĩ mita kenda (vuti 30). Mĩkono ĩsu 20 nĩyo yosanĩte na ũthanthau wa ngũta sya ĩkalũ yĩu.—w24.10, ĩth. 31.

Yĩla Mbivilia ĩkwasya kana mũtetheesya wa kĩkundi aĩle kwĩthĩwa “mũũme wa kĩveti kĩmwe” yĩthĩawa ĩyonanyʼa ata? (1 Tim. 3:12)

Yonanasya kana aĩle kwĩthĩwa na kĩveti kĩmwe na ndaĩle kwĩka ũlaalai. Kwongela ũu, ndaĩle o na vanini kwonyʼa aka angĩ kana nũkwendeewʼa nĩmo.—w24.11, ĩth. 19.

Nĩkĩ tũtonya kwasya kana nthĩnĩ wa Yoana 6:53 Yesũ ndaeleasya kĩla andũ maĩle kwĩkaa ĩvindanĩ ya Kyaũya kya Wĩoo kya Mwĩai?

Ĩandĩko ya Yoana 6:53 yĩneeneete vata wa kũya mwĩĩ wa Yesũ na kũnywʼa nthakame yake. Yesũ aneenie ndeto isu e Kalilii mwakanĩ wa 32 ĩtina wa Klĩsto, na aitavisye Ayuti matambĩte kũmũĩkĩĩa. Kĩvathũkanyʼo na ũu, ambĩĩisye Kyaũya kya Wĩoo kya Mwĩai mwaka ũmwe ĩtina wa ũu e Yelusaleme. Na vau, aneenaa na ala makasumbĩka nake ĩtunĩ.—w24.12, ĩth. 10-11.