TWĨ Wakatatũ, Matukũ 18, Mwei wa 01, 2023, ve ĩtangaso ya mwanya yaumĩlile nthĩnĩ wa jw.org yaĩtye kana Mwana-a-asa Gage Fleegle na Jeffrey Winder nĩmanyuviwe methĩwe Nzamanĩ Ĩla Ĩtongoesye ya Ngũsĩ sya Yeova. Elĩ methĩĩtwe maimũthũkũma Yeova me aĩkĩĩku kwa myaka mingĩ.

Mwana-a-asa Fleegle eanĩie ngalĩko ya ũthũĩlonĩ wa syũa ya Pennsylvania, Amelika, na aeiwe nĩ asyai Ngũsĩ. E wa mũika, e na mũsyĩ woo nĩmathamĩĩie kasionĩ kaĩ vaasa na taoni, vala vaĩ na vata mũnene wa atavanyʼa. Kavinda kakuvĩ ĩtina wa ũu, nĩwavatisiwe twĩ Matukũ 20, Mwei wa 11, 1988.

Asyai make nĩmamwĩkĩaa vinya alike ũthũkũminĩ wa ĩvinda yonthe. Nĩmakothaa kũthokya asyaĩĩsya ma mũthyũlũlũko na athũkũmi ma Mbetheli mũsyĩ kwoo, na Mwana-a-asa Fleegle nĩweeyoneaa ũndũ ana-a-asa na eĩtu-a-asa asu meethĩawa me atanu. Nũndũ wa ũu, atekalĩte mũno kuma avatiswa twĩ Ĩtukũ 1, Mwei wa 9, 1989, nĩwatwʼĩkie vainia wa kĩla ĩvinda. Myaka ĩlĩ ĩtina wa ũu, nĩweetiwe Mbetheli, na ũsu nĩ mũvango weeyĩĩkĩĩe e o na myaka 12. Ambĩĩie kũthũkũma Mbetheli ya Brooklyn Mwei wa 10, 1991.

Mwana-a-asa Fleegle e Mbetheli, athũkũmie wĩanĩ wa kũkwatanyʼa mavuku kwa myaka nyanya, na ĩtina wa ũu athi Mũvĩanĩ wa Ũthũkũmi. Ĩvindanĩ yĩu, aĩ kĩkundinĩ kya kĩthyomo kya Russia kwa myaka yĩana ũna. Twĩ 2006, nĩwatwaie Nadia na me elĩ maendeea kũthũkũma Mbetheli. Meethĩĩtwe kĩsionĩ kĩneenawa kĩthyomo kya Portuguese, na maĩ kĩsionĩ kĩneenawa kĩthyomo kya Spanish mbee wa myaka ĩkũmi. Ĩtina wa Mwana-a-asa Fleegle kũthũkũma Mũvĩanĩ wa Ũthũkũmi kwa myaka mingĩ, nĩwathamĩĩiwʼe Ovisinĩ wa Kamitii ya Ũmanyĩsya, na ĩtina athamĩĩwʼa Ovisinĩ wa Kamitii ya Ũthũkũmi. Na twĩ Mwei wa 3, 2022, nĩwanyuviwe ethĩwe Mũtetheesya  wa Kamitii ya Ũthũkũmi ya Nzama Ĩla Ĩtongoesye.

Nake Mwana-a-asa Winder eanĩie Murrieta, California, Amelika. Amanyĩiwʼe ũwʼo nĩ asyai make, kwoou eanĩie ũwʼonĩ na avatisiwe Matukũ 29, Mwei wa 3, 1986. Atwʼĩkie vainia mũtetheesya o mwei ũla watĩĩe. Atanĩaa ũvainia mũno ũkethĩa eĩwʼa atesa kũeka. Ĩtina wa myei kauta, twĩ Ĩtukũ 1, Mwei wa 10, 1986 nĩwatwʼĩkie vainia wa kĩla ĩvinda.

E wa mũika, nĩwathokeie akũũe elĩ ala mathũkũmaa Mbetheli ĩvinda yĩu. Kĩu kyatumie ethĩwa na mea ma kwenda kusũsya vomũ ya kũthi Mbetheli eana. Na twĩ Mwei wa 5, 1990, nĩweetiwe Mbetheli ya Wallkill.

E kũu, nĩwathũkũmie mĩveanĩ yĩ kĩvathũkanyʼo, ta Mũveanĩ wa Ũtheu, mũveanĩ wa kũseũvya matunda na mboka, na Ovisinĩ wa Mbetheli. Mwaka wa 1997, nĩwatwaie Angela na maendeea kũthũkũma Mbetheli. Na mwaka wa 2014, nĩmathamĩĩie Mbetheli ya Warwick, vala Mwana-a-asa Winder watetheeasya kwaka ovisi witũ ũla mũnene. Twĩ 2016, nĩmathamĩĩie Watchtower Educational Center ĩla yĩ Patterson, vala Mwana-a-asa Winder wathũkũmaa Mũvĩanĩ wa Kũlekoti Vitio na Syĩndũ sya Kwĩthukĩĩsya. Ĩtina wa myaka ĩna, nĩmasyokie ĩngĩ Warwick, vala Mwana-a-asa Winder wathũkũmaa Kamitiinĩ ya Kũũngamĩa Athũkũmi ma Mbetheli. Na ĩndĩ Mwei wa 3, 2022, nĩwanyuviwe atetheesye Kamitiinĩ ya Kũũngamĩa Athũkũmi ma Mbetheli ya Nzama Ĩla Ĩtongoesye.

Twĩvoya Yeova aathime aũme asu ũtũnengete ta “mĩthĩnzĩo,” o maendeee kũthũkũma na kĩthito kwondũ wa Ũsumbĩ.—Aev. 4:8.