Kwĩyĩava kũeleawʼa ta “kũweta ndeto ite sya kũvũĩwa ngũĩ kana kwathana kwĩanĩsya ũndũ mũna, na kaingĩ mũndũ nũmũwetaa Ngai . . . ta ngũsĩ.” Ndeto sya kwĩyĩava no iwetwe na kanywʼa kana ikethĩwa syĩ mbandĩke.

Andũ amwe no mone kwĩyĩava ta ũndũ mũthũku nũndũ Yesũ aisye: “Ndũkevĩte [kana, ndũkeyĩave] nongi . . . Ekai ‘Ĩĩ’ yenyu yĩthĩwe ĩĩ, na ‘Aiee,’ aiee, nũndũ kĩla kĩvĩtũkĩte ndeto isu kyumĩte kwa ũla mũthũku.” (Mt. 5:33-37) Vate nzika, Yesũ nĩweesĩ kana Mĩaonĩ ya Mose Aisilaeli nĩmendekaa meyĩave maũndũnĩ mana, na nĩweesĩ athũkũmi amwe ma Ngai meeyĩavie. (Mwa. 14:22, 23; Kuma 22:10, 11) O na ĩngĩ, nĩweesĩ kana ve mavinda Yeova mwene weeyĩavie. (Aevl. 6:13-17) Kwoou Yesũ ndatonya kwĩthĩwa onanasya tũyaĩle kwĩyĩava. Vandũ va ũu, atũkanasya tũikeyĩave maũndũnĩ mate ma vata, na vate na kĩtumi kĩseo. Mavinda onthe twaĩle kwĩanĩasya kĩla twaweta nũndũ ũu nĩwʼo Yeova wendaa twĩke.

Ĩndĩ yu waĩlĩte kwĩka ata wakũlwʼa wĩyĩave? Mbee vyũ, ĩkĩĩthya kana wĩ na ũtonyi wa kwĩanĩsya kĩla ũkwĩyĩava. Ethĩwa ndwĩsĩ nesa kana nũkwĩanĩsya ũndũ ũsu, nũseo ũkalea kwĩyĩava. Ndeto ya Ngai ĩtũkanĩtye ĩkatwĩa atĩĩ: “Nĩ kavaa ũkalea kwĩvĩta, kwĩ kwĩvĩta na ũkĩlea kwĩanĩsya.” (Mũta. 5:5) Kelĩ, vindĩĩsya myolooto ya Mbivilia ĩla ĩkonanĩtye na ũndũ ũla ũkwendeka wĩyĩave, na ĩndĩ ũyĩka ũtwi kwosana na ũndũ ũmanyĩĩtye wasya waku wa ngoo. Nĩ myolooto ta yĩva?

Kwĩyĩava kũmwe kwĩthĩawa kwosanĩte na kwenda kwa Ngai. Kwa ngelekanyʼo, Ngũsĩ sya Yeova nĩsyĩvĩtaa yĩla siũtwaana. Mawĩvĩto asu methĩawa me mũthemba wa kwĩyĩava. Mũtwawa na mũtwaani nĩmathanaa mbee wa Yeova na mbee wa ngũsĩ ila syĩ vo kana makendanaa, makasũvĩanaa, na kũnengane ndaĩa, na makekaa ũu ‘kwa ĩvinda yonthe yĩla elĩ makekala’ thayũ. (Andũ amwe meũtwaana no maeme kũweta ũu ndeto kwa ndeto, ĩndĩ o na ũu wĩ o vo, no mevĩtaa mbee wa Ngai.) Na ĩndĩ nĩmatangaasawa ta mũũme na mũka, na maĩlĩte kwĩkala malũmanĩtye thayũnĩ woo wʼonthe. (Mwa. 2:24; 1 Ako. 7:39) Mũvango ũsu nĩwaĩlĩte, nĩ mũseo, na nĩwosanĩte na kwenda kwa Ngai.

Kwĩyĩava kũmwe kwĩthĩawa kũleanĩte na kwenda kwa Ngai. Kwa ngelekanyʼo, Mũklĩsto wa wʼo ndaĩlĩte kwĩyĩava kana nũkũsũvĩa nthĩ yake atũmĩĩte mĩio ya kaũ, kana akeyĩava kũmũkaĩa Ngai. Kwĩka ũu nĩ kũtũla mĩao ya Ngai. Aklĩsto maĩlĩte kwĩthĩwa ‘mate ma nthĩ,’ na kwoou tũyaĩlĩte kwĩlikya nthĩnĩ wa ithokoo na ngananĩo sya nthĩ ĩno.—Yoa. 15:19; Isa. 2:4; Yak. 1:27.

Kwĩyĩava kũmwe kũkonanĩtye na wasya wa ngoo. Mavinda amwe tũtanamba kũtwʼa nĩtũkwĩyĩava  kana tũyĩyĩava, nĩtwaĩle kũsũanĩa ũtao wa Yesũ wa “[kũnenga] Kaisali syĩndũ sya Kaisali, na Ngai syĩndũ sya Ngai.”—Luka 20:25.

Twasye Mũklĩsto eenda kusũĩwʼa mavalũa atwʼĩke laiaa wa nthĩ ĩngĩ kana eenda kusũĩwʼa kavuku ka passport ka kũthi nthĩ ĩngĩ, na ayĩthĩa nũkwendeka eyĩave kũlũmanyʼa na nthĩ ĩsu. Ethĩwa yĩla ũkwĩyĩava eĩthĩwa ayathana kwĩka ũndũ ũleanĩte na mĩao ya Ngai, wasya wake wa ngoo ũmanyĩĩtwʼe nĩ Mbivilia ndwĩsa kũmwĩtĩkĩlya kwĩyĩava. Ĩndĩ o na vailye ũu, noĩthwa silikalĩ ĩtonya kũmwĩtĩkĩlya kũvĩndũa ndeto isu nĩ kana wasya wake wa ngoo ũmwĩtĩkĩlye kwĩyĩava.

Kwĩyĩava ũtũmĩĩte ndeto ivĩndũĩtwe no kwosane na mwolooto ũla wĩ nthĩnĩ wa Alomi 13:1, ũla waasya: “Ekai kĩla mũndũ enyivĩsye ala me na ũkũmũ.” Kwoou Mũklĩsto no atwʼe kana vai ũthũku wa kwĩyĩava eke kĩndũ Ngai wĩaĩe Aklĩsto meke.

Wasya wa ngoo nũtũmĩkaa ĩngĩ yĩla mũndũ wakũlwʼa atũmĩe kĩndũ kana eke ũndũ mũna yĩla ũkwĩyĩava. Alomi na Asithiani ma tene meevĩtaa na mbyũ syoo, na ũu nĩ kwasya kana matũmĩaa kĩndũ kĩkonanĩtye na ngai yoo ya kaũ kũĩkĩĩthya angĩ kana nĩmekwĩka kĩla meeyĩava. Namo Akiliki mookĩlasya kwʼoko kwoo ĩtunĩ mayĩyĩava. Ũu woonanasya kana mo nĩmeesĩ kana ve kyũmbe kĩ vinya kĩla kĩsiasya kĩla kyawetwa na kĩla kyeekwa, na kĩla andũ maumasya ũtalo kwakyo.

Kwa wʼo, mũthũkũmi wa Yeova ndaĩle kwĩyĩava na kĩvendela kana kĩndũ kĩngĩ kĩkonanĩtye na ũthaithi wa ũvũngũ. Ĩndĩ nata ũkakũlwʼa kotinĩ wilĩĩle kwʼoko kwaku Mbivilianĩ na ũyĩyĩava kana wĩumya ũkũsĩ wa wʼo? Vekala ũu, no ũamũe kwĩka ũu nũndũ Maandĩko nĩmatũtavĩtye ĩũlũ wa athũkũmi aĩkĩĩku ma Ngai ala meekie ũndũ mũna yĩla meeyĩavaa. (Mwa. 24:2, 3, 9; 47:29-31) Nĩ ũndũ wa vata kũlilikanaa kana yĩla weyĩava kwa nzĩa ĩsu, wĩthĩawa weevĩta mbee wa Ngai kana wĩneena ũla wʼo. Kwoou waĩlĩte kwĩthĩwa wĩyũmbanĩtye kũneena ũla wʼo yĩla wakũlwʼa ĩkũlyo o na yĩva.

Nũndũ nĩtwonaa ngwatanĩo yitũ na Yeova yĩ ya vata, yĩla twakũlwʼa twĩyĩave ĩũlũ wa ũndũ o na wĩva, twaĩlĩte kwamba kũvoya na tũisũanĩa ĩũlũ wa ũndũ ũsu nĩ kana tũikanange wasya witũ wa ngoo kana tũtũle myolooto ya Mbivilia. Na yĩla watwʼa kwĩyĩava, no nginya wĩanĩsye kĩla waweta.—1 Vet. 2:12.