1. Andũ ma Yeova mavangĩtwe ata ĩvindanĩ ya atũmwa?

 YĨLA Yeova wanenga andũ make wĩa wa kũtethya, endaa maũtethye na mũvango. (1 Ako. 14:33) Kwa ngelekanyʼo, Ngai endaa ũvoo mũseo ũtavanwʼe ĩũlũ wa nthĩ yonthe. (Mt. 24:14) Na nũmũnengete Yesũ kĩanda kya kũũngamĩa wĩa ũsu. Nake Yesũ nũĩkĩĩthĩtye kana nũtethetwʼe na mũvango. Yĩla ikundi syaambĩĩawʼa isionĩ syĩ kĩvathũkanyʼo ĩvindanĩ ya atũmwa, atumĩa nĩmanyuviwe maitongoesye. (Meko 14:23) Nakwʼo Yelusaleme nzama ĩla ĩtongoesye, ĩla yaĩ na atũmwa na atumĩa, nĩyeekaa motwi ala ikundi syonthe syaaĩlĩte kũatĩĩa. (Meko 15:2; 16:4) Na nũndũ ana-a-asa na eĩtu-a-asa nĩmaatĩĩaa myolooto ĩla manengawe, “ikundi [nĩsyaendeeie] kũlũlũmĩĩlwʼa mũĩkĩĩonĩ na kwongeleka.”—Meko 16:5.

2. Yeova ethĩĩtwe aitongoesya na kũnenga andũ make lĩu wa kĩ-veva ata kuma 1919?

² O na ũmũnthĩ, Yeova nũendeee kũvanga andũ make. Kuma 1919, Yesũ nĩwĩthĩĩtwe aitũmĩa kakundi ka aũme etĩkĩwʼa mauta kũvangĩthya wĩa wa kũtavanyʼa na kũnenga aatĩĩi make lĩu wa kĩ-veva. a (Luka 12:42) Vai nzika kana Yeova nũathimĩte wĩa woo.—Isa. 60:22; 65:​13, 14.

3-4. (a) Nengane ngelekanyʼo ĩkwonanyʼa ũseo wa kwĩthĩwa tũvangĩtwe nesa. (b) Twĩneenea kyaũ ĩsomonĩ yĩĩ?

 ³ Keka tuivangĩtwe nesa, tũyĩsa kwĩanĩsya o na vanini wĩa ũla Yesũ ũtũnengete. (Mt. 28:​19, 20) Kwa ngelekanyʼo, keka tũyĩthĩawa tũaĩwe isio sya kũtavanyʼa, kĩla mũndũ ethĩwa aitavanyʼa o vala ũkwenda. Nũndũ wa ũu, isio imwe itavanwʼa ĩngĩ na ĩngĩ nĩ atavanyʼa me kĩvathũkanyʼo, ĩndĩ ingĩ ĩiema kwĩsa kũvikĩwa. Wĩsũanĩa tũtethekaa maũndũnĩ angĩ meva nũndũ wa kwĩthĩwa tũvangĩtwe nesa?

⁴ O ũndũ Yesũ wavangĩte aatĩĩi make yĩla waĩ kũũ nthĩ, ũu nowʼo ũendeee kũvanga andũ ma Ngai ũmũnthĩ. Ĩsomonĩ yĩĩ nĩtũkwona ngelekanyʼo ĩla Yesũ watũtiĩie na ũndũ ũseũvyo wa Yeova ũatĩĩaa ngelekanyʼo ĩsu. O na nĩtũũneenea ũndũ tũtonya kwonanyʼa kana nĩtwĩkĩĩte kĩthito tũĩkĩĩe vyũ ũseũvyo wa Yeova.

ŨSEŨVYO WA YEOVA NŨATĨĨAA NGELEKANYʼO YA YESŨ

5. Ũseũvyo wa Yeova ũatĩĩaa ngelekanyʼo ya Yesũ ũndũnĩ wĩva? (Yoana 8:28)

⁵ Yesũ nĩweemanyĩisye kuma kwa Ĩthe wake kĩla waĩle kwĩka na kũneena. Ũseũvyo wa Yeova nũatĩĩaa ngelekanyʼo ya Yesũ kwa kũtũmĩa Ndeto ya Ngai kũtũtetheesya tũmanye kĩla kyaĩle na kĩla kĩtaĩle, na kũtũnenga myolooto thayũnĩ witũ. (Soma Yoana 8:28; 2 Tim. 3:​16, 17) Kaingĩ, nĩtũlilikanawʼa kũsoma Ndeto ya Ngai na kũatĩĩa kĩla twasoma. Tũtethekaa ata twaatĩĩa ũtao ũsu?

6. Kwĩmanyĩsya Mbivilia kũtũtetheeasya ũndũnĩ wĩva wa vata?

⁶ Nĩtũtethekaa mũno yĩla twasoma Mbivilia tũtũmĩĩte mavuku maitũ. Kwa ngelekanyʼo, nĩtwĩthĩawa tũtonya kũsianĩsya momanyĩsyo ma Mbivilia na myolooto ĩla tũnengawe nĩ ũseũvyo. Yĩla twoona kana myolooto ĩla tũnengawe yĩthĩawa yumĩte Maandĩkonĩ, kĩu nĩkĩtumaa tũĩkĩĩa ũseũvyo wa Yeova mũnango.—Alo. 12:2.

7. Yesũ atavanisye ũvoo wĩva, na ũseũvyo wa Yeova ũatĩĩaa ngelekanyʼo yake ata?

⁷ Yesũ nĩwatavanisye “ũvoo mũseo wa Ũsumbĩ wa Ngai.” (Luka 4:​43, 44) O na ĩngĩ, nĩweeaĩe amanyĩwʼa make matavanyʼe ĩũlũ wawʼo. (Luka 9:​1, 2; 10:​8, 9) Ũmũnthĩ, onthe ala me ũseũvyonĩ wa Yeova nĩmatavanasya ĩũlũ wa Ũsumbĩ ũsu, o na methĩwe mekalaa va kana me na ianda singĩvĩte ata.

8. Tũnengetwe kĩanda kĩva?

⁸ Twonaa kĩ kĩanda kya mwanya mũno kũtavya angĩ ĩũlũ wa Ũsumbĩ wa Ngai! Ĩndĩ ti kĩla mũndũ ũnengetwe kĩanda kĩu. Kwa ngelekanyʼo, yĩla Yesũ waĩ ĩũlũ wa nthĩ, ndaaĩtĩkĩlya maveva mavuku maumye ũkũsĩ ĩũlũ wake. (Luka 4:41) O na ũmũnthĩ, nĩ kana mũndũ ambĩĩe kũtavanyʼa na Ngũsĩ sya Yeova, no nginya ethĩwe na mwĩkalĩle ũmwendeeasya Yeova. Twonanasya kana nĩtwonaa kĩanda kĩu kĩ kya vata yĩla twaumĩsya angĩ ũkũsĩ, twĩthĩwe twĩ va na nĩ saa siana. O ta Yesũ, kĩeleelo kitũ kĩthĩawa ne kũvanda na kũnyithya mbeũ sya ũwʼo ngoonĩ sya andũ.—Mt. 13:​3, 23; 1 Ako. 3:6.

9. Ũseũvyo wa Yeova ũtetheesye angĩ ata kũmanya ĩsyĩtwa yake?

⁹ Yesũ nĩwamanyĩthisye angĩ ĩsyĩtwa ya Ngai. Amũvoyie Ĩthe wake amwĩa: “Nĩnĩmamanyĩthĩtye ĩsyĩtwa yaku.” (Yoa. 17:26) Ũseũvyo wa Yeova nũatĩĩaa ngelekanyʼo ya Yesũ kwa kwĩka kyonthe kĩla ũtonya ũtetheesye angĩ mamanye ĩsyĩtwa ya Ngai. Nzĩa ĩmwe wĩkĩte ũu nĩ kwĩsĩla Mbivilia ya New World Translation of the Holy Scriptures, ĩla ĩtũngĩĩte ĩsyĩtwa ya Ngai kũla yaĩlĩte kwĩthĩwa  yĩĩ. Na yu tũũneena, Mbivilia ĩsu nĩalyũlĩtwe na ithyomo mbee wa 270 yĩ nĩma kana ĩte nĩma. Wasoma Appendix A4 na A5 Mbivilianĩ ĩsu, nũkwona ũvoo ũeleetye ũndũ ĩsyĩtwa ya Ngai yatũngĩĩiwe na ũndũ ũu weekĩkie. Nayo Appendix C, ĩla yĩ Mbivilianĩ ya New World Translation of the Holy Scriptures (Study Edition) yĩ na ũvoo mwingĩ ũĩkĩĩthĩtye kana ĩsyĩtwa ya Ngai yaĩle kumĩla mavinda 237 Maandĩkonĩ ma Kĩkiliki ma Kĩklĩsto.

10. Ndeto sya mũndũ mũka ũmwe wa nthĩ ya Myanmar syaũmanyĩsya kyaũ?

¹⁰ O ta Yesũ, nĩtwendaa kũtetheesya aingĩ ũndũ vatonyeka mamanye ĩsyĩtwa ya Ngai. Yĩla mũndũ mũka ũmwe waĩ na myaka 67 kuma nthĩ ya Myanmar wamanyie kana Ngai e ĩsyĩtwa, ambĩĩie kũĩa na atavya ũla wamũmanyĩasya Mbivilia ũũ: “Kuma nasyawa, nĩndĩ namanya kana Ngai etawa Yeova. . . . Wamanyĩsya ũndũ ũla wa vata vyũ naĩ ndonya kũmanya.” O tondũ ngelekanyʼo ĩsu yonanĩtye, yĩla andũ me na ngoo nzeo mamanya ĩsyĩtwa ya Ngai, kĩu no kĩalyũle thayũ woo.

ENDEEA KWĨKĨA KĨTHITO ŨĨKĨĨE VYŨ ŨSEŨVYO WA YEOVA

11. Atumĩa matonya kwonanyʼa ata kana nĩmaĩkĩĩe vyũ ũseũvyo wa Yeova? (O na ĩngĩ, sisya visa.)

¹¹ Nĩ ũndũ ũmwe wĩva atumĩa matonya kwĩka monanyʼe kana nĩmaĩkĩĩe vyũ ũseũvyo wa Ngai? Yĩla manengwa myolooto, nĩmaĩle kũmĩsoma nesa na maimĩatĩĩa nesa vyũ. Kwa ngelekanyʼo, nĩmakwataa myolooto ĩkonetye ũndũ ilungu sya maũmbano syaĩle kũtongoewʼa, ũndũ mboya syaĩlĩte kumwʼa kĩkundinĩ, na ũndũ ũla wa vata vyũ, ũndũ matonya kũsũvĩa malondu ma Klĩsto. Na yĩla maatĩĩa myolooto ĩsu, ala me ungu wa ũsũvĩo woo nĩmewʼaa mendetwe na me asũvĩĩku.

12. (a) Nĩkĩ twaĩlĩte kwĩwʼa na kwĩnyivĩsya ala matongoesye? (Aevelania 13:​7, 17) (b) Nĩkĩ twaĩlĩte kũsiasya nguma nzeo sya ala matongoesye?

¹² Yĩla atumĩa matũnenga myolooto, twaĩlĩte kũmĩatĩĩa na ngenda. Yĩla tweeka ũu, vethĩawa ve laisi kwa ala matongoesye kũtethya wĩa woo. Mbivilia nĩtwĩkĩĩte vinya tũmewʼe na tũimenyivĩsya. (Soma Aevelania 13:​7, 17.) Ĩndĩ mavinda amwe kwĩka ũu kũi laisi. Nĩkĩ? Nũndũ aũme asu no andũ me na naĩ. O na vailye ũu, tũkatinda tũsyaĩtye mawonzu moo vandũ va nguma syoo nzeo, twĩthĩwa twovete kĩmwe na amaitha maitũ. Kwa nzĩa yĩva? Amaitha maitũ mendaa twĩthĩwe na nzika kana Ngai atũmĩaa ũseũvyo wake kũtũtongoesya. Kwoou yĩla twambĩĩa kũsũanĩa maũndũ mataĩle ĩũlũ wa atumĩa, kĩu no kĩtume tũema kũĩkĩĩa ũseũvyo wake. Nĩ kyaũ kĩtonya kũtũtetheesya tũmanye na tũileana na movũngũ ala amaitha maitũ matwaĩĩasya?

NDŨKAEKE ANGĨ MATUME ŨEKA KŨĨKĨĨA ŨSEŨVYO WA YEOVA

13. Amaitha ma Ngai matataa ata kũtuma ũseũvyo wake woneka ta mũthũku?

¹³ Amaitha ma Ngai mendaa kũtuma ũseũvyo wake woneka ta mũthũku. Kwa ngelekanyʼo, nĩtwĩmanyĩĩtye Maandĩkonĩ kana Yeova endaa twĩkale twĩ atheu kĩ-mwĩĩ, kĩ-veva, na mwĩkalĩlenĩ. O na aĩtye kana mũndũ o na wĩva ũla weeka naĩ ngito na aiema kwĩlila aĩlĩte kũvetangwa kĩkundinĩ. (1 Ako. 5:​11-13; 6:​9, 10) Nĩtũatĩĩaa mwĩao ũsu. Ĩndĩ amaitha maitũ matataa kũtũmĩa kĩu maivanga kana tũilikanaa na ala me kĩvathũkanyʼo naitũ, nĩtũsilĩlaa angĩ, na tũimendete.

14. Nũũ ũnyaĩĩkasya maũvoo ma ũvũngũ ĩũlũ wa ũseũvyo wa Yeova?

¹⁴ Manya nũũ ũtumaa andũ masũanĩa maũndũ mathũku ĩũlũ wa ũseũvyo wa Yeova. Satani,  ũla nĩwe Ndevili, nĩwe ũnyaĩĩkasya maũvoo ma ũvũngũ. Mbivilia ĩmwĩtĩte “ĩthe wa ũvũngũ.” (Yoa. 8:44; Mwa. 3:​1-5) Kwoou tũyaĩle kũsengʼa twoona aitũmĩa aatĩĩi make kũnyaĩĩkya ngewa sya ũvũngũ ĩũlũ wa ũseũvyo wa Yeova. Kĩu nĩkyoonekie ũtheinĩ ĩvindanĩ ya atũmwa.

15. Atongoi ma ndĩni mamwĩkie Yesũ ata vamwe na aatĩĩi make?

¹⁵ O na kũtwʼĩka Mwana wa Ngai, Yesũ, ndaĩ na naĩ na nĩweekaa syama, Satani nĩwatũmĩie andũ amwe kũnyaĩĩkya movũngũ ĩũlũ wake. Kwa ngelekanyʼo, atongoi ma ndĩni matavasya andũ kana Yesũ aumasya ndaimoni atũmĩĩte vinya ũla wanengetwe nĩ “mũnene wa ndaimoni.” (Mko. 3:22) Na yĩla Yesũ wasilĩlawa, atongoi asu mamwilĩĩile mavĩtyo ma kwĩthĩwa e mũumi wa Ngai na mathingʼĩĩsya ĩkomano yasye nĩoawe. (Mt. 27:20) Ĩtina, yĩla aatĩĩi ma Klĩsto matavanasya ũvoo mũseo, ala mamavĩngaa “[nĩmathokoanisye] ilĩko sya andũ ma mbaĩ ingĩ, na ũu watuma methĩwa na woni ũtaĩlĩte” ĩũlũ woo, na nũndũ wa ũu, mambĩĩa kũmathĩnyʼa. (Meko 14:​2, 19) Ĩkaseti ya Mũsyaĩĩsya ya Ĩtukũ 1, Mwei wa 12, 1998 yaisye ũũ yĩineenea ĩandĩko ya Meko ma Atũmwa 14:2: “Ayuti amwe nĩmaleile ũvoo ũla Aklĩsto asu matavanasya na mambĩĩa kũnyaĩĩkya maũndũ ma ũvũngũ ĩũlũ woo nĩ kana matume Andũ-ma-mbaĩ-ingĩ mamamena.”

16. Twaĩlĩte kũlilikana kyaũ yĩla tweewʼa ngewa sya ũvũngũ?

¹⁶ O na ũmũnthĩ, Satani nũendeee kũnyaĩĩkya ũvũngũ. Mbivilia yaĩtye kana nĩwe “ũla ũkengaa nthĩ yonthe.” (Ũvu. 12:9) Weewʼa ngewa nthũku ĩũlũ wa ũseũvyo wa Yeova kana ĩũlũ wa ana-a-asa ala matongoesye,  lilikanaa ũndũ amaitha ma Ngai mamwĩkie Yesũ na amanyĩwʼa make. O na ũmũnthĩ, andũ ma Yeova nĩmaendeee kũthĩnwʼa na kũneenewa ũvũngũ, na kĩu nokyo Mbivilia yathanĩte. (Mt. 5:​11, 12) Tũikesa kwawʼa nĩ ngewa sya ũvũngũ ethĩwa tũkamanyaa nũũ ũinyaĩĩkasya na tũyosa ĩtambya na mĩtũkĩ twĩsũvĩane nasyo. Nĩ ĩtambya yĩva twaĩle kwosa?

17. Nĩ kyaũ kĩtonya kũtũtetheesya tũikawʼe nĩ ngewa sya ũvũngũ? (2 Timotheo 1:13) (O na ĩngĩ, sisya ĩsandũkũ “ Kĩla Twaĩlĩte Kwĩka Yĩla Tweewʼa Ngewa sya Ũvũngũ.”)

¹⁷ Leana na ngewa sya ũvũngũ. Mũtũmwa Vaulo nĩwanenganie myolooto yĩ ũtheinĩ ĩũlũ wa ũndũ twaĩle kwĩka yĩla tweewʼa ngewa sya ũvũngũ. Atavisye Timotheo “[ameaĩe] andũ amwe . . . maeke kwĩthukĩĩsya ngewa sya ũvũngũ” na “[maileana na] ngewa itamũeteae Ngai ndaĩa.” (1 Tim. 1:​3, 4; 4:7) Kwasũanĩa ũndũ ũũ: Kana kanini no kose kĩndũ kĩ na kĩko nthĩ na kaikyakĩla, ĩndĩ mũndũ mũima ndesa kwĩka ũndũ ta ũsu nũndũ nĩwĩsĩ ũthũku wa kwĩka ũu. O ta ũu, nĩtũleanaa na ngewa sya ũvũngũ nũndũ nĩtwĩsĩ ũla ũinyaĩĩkasya. Vandũ va ũu, twĩthukĩĩasya “ndeto nzeo” sya ũwʼo.—Soma 2 Timotheo 1:13.

18. Tũtonya kwonanyʼa ata kana nĩtũĩkĩĩe ũseũvyo wa Yeova?

¹⁸ Twaneenea o maũndũ atatũ katĩ wa angĩ maingĩ mekwonanyʼa ũndũ ũseũvyo wa Ngai ũatĩaa ngelekanyʼo ya Yesũ. Yĩla ũkwĩmanyĩsya Mbivilia, tataa kũmantha nĩ maũndũnĩ angĩ meva ũseũvyo ũatĩĩaa ngelekanyʼo ya Yesũ. Tetheesya angĩ kĩkundinĩ maendeee kũĩkĩĩa vyũ ũseũvyo wa Ngai. Na ũiendeea kwonanyʼa kana nũmũĩkĩĩe Yeova kwa kũlũmanyʼa nake na kũendeea kwĩkala vakuvĩ na ũseũvyo ũla ũũtũmĩaa kwĩanĩsya kwenda kwake. (Sav. 37:28) Ekai tũendeee kwona kĩ kĩanda kya mwanya kwĩthĩwa ũseũvyonĩ wa Yeova, ũla wĩthĩawa na andũ mendanĩte na malũmanĩtye.