YESŨ nĩwathanie kana aatĩĩi make makatanĩa ngetha mbingĩ ĩvindanĩ yĩĩ ya mũminũkĩlyo. (Mt. 9:37; 24:14) Ve kĩsio kĩ Transcarpathia, nthĩ ya Ukraine kyonanĩtye kwa nzĩa ya mwanya ũndũ wathani ũsu wĩanĩĩte. Kwa ngelekany’o, kĩsionĩ kĩu ve taoni itatũ ithengeanĩe syĩ na ikundi 50 na atavany’a mbee wa 5,400. * Ũndũ wa kũsengy’a nĩ kana ũkosa ũtalo wa ekali onthe ma taoni isu syĩ itatũ, wĩthĩa kwa kĩla andũ 4, ve Ngũsĩ 1!

Andũ ma kĩsio kĩu mailyĩ ata? Mwana-a-asa ũmwe wa kũu wĩtawa Vasile aĩtye, “Kũũ andũ nĩmanengete Mbivilia ndaĩa, nĩmendete ũsili wa katĩ, mĩsyĩ yoo yĩ ngwatanĩo ndũmu, na nĩmendete kũtethany’a kuma ngoonĩ.” Ongelete atĩĩ: “Ti mavinda onthe metĩkĩlaa kĩla tũĩkĩĩaa. Ĩndĩ wamony’a ũndũ wĩ Mbivilianĩ nĩmakwĩthukĩĩasya nesa.”

Nĩw’o kana atavany’a nĩmonaa mathĩna ma mwanya ĩla meũtavany’a kũla wĩthĩaa no andũ anini mate Ngũsĩ tondũ vailyĩ taoninĩ isu. Kwa ngelekany’o, ve kĩkundi kĩmwe kĩ atavany’a 134 na vailyĩ ũu, mĩsyĩ ya kũtavany’a no 50. Atavany’a asu mekaa ata?

Ana-a-asa na eĩtu-a-asa aingĩ nĩmeyumĩtye mũno nĩ kana matavany’e kũla kwĩ vata mũnene wa atavany’a. Mwana-a-asa wĩtawa Ionash wĩ na myaka 90 aĩtye atĩĩ: “Kĩsio kĩla kĩkundi kitũ kĩaĩĩtwe, kĩla mũtavany’a no ta wĩ na mĩsyĩ o ĩlĩ ya kũtavany’a.” Asyokete akasya: “Yu nĩtavanasya o vaa ũtũinĩ, ĩndĩ nĩnambĩĩe kwĩka ũu o mĩtũkĩ. Yĩla naĩ na vinya naendaa kũtavany’a kĩsionĩ kĩtaaĩwe kĩkundi kĩ ta maili 100 (kĩlomita 160) kuma kwitũ, na kũu natavanasya na kĩthyomo kya Hungarian.” No nginya atavany’a meyĩime mũno nĩ kana matavany’e isionĩ ingĩ. Kwa ngelekany’o, Ionash aĩtye: “Naamũkaa saa kũmi ũtukũ ngose ngalĩ ya mwaki na nditavany’a nginya saa kũmi na ilĩ wĩoo ĩla ngalĩ ĩsu yesaa kũvĩta ĩngĩ ĩsyokete kwitũ. Neekaa ũu kelĩ kana katatũ kwa kyumwa.” We Ionash nĩwonaa kĩthito kĩu kyake ta kyatethisye? Aĩtye: “Ũtavany’a ũsu wandanĩthasya mũno. Nĩnĩw’aa mũyo nũndũ ve mũsyĩ ũmwe ũte vakuvĩ na kĩkundi natetheeisye walika ũw’onĩ.”

Nĩtwĩsĩ kana ti kĩla ũmwe ikundinĩ ila syĩ kũũ ũtonya kũthi kũtavany’a kũasa. Ĩndĩ onthe, o na ala akũũ, no matate ũndũ matonya matavany’e nesa kĩsio kĩla maaĩwe. Nũndũ wa kĩthito kya atavany’a taoninĩ isu, mwakanĩ wa 2017, ũtalo wa onthe ala manaĩ ũmbanonĩ wa kũlilikana kĩkw’ũ kya Yesũ taoninĩ isu syĩ itatũ ũnaĩ vakuvĩ kũndũ kwĩlĩ kwa atavany’a onthe. Ĩsu nĩ nyusu ya ũtalo wa andũ onthe kĩsionĩ kĩu. Vate nzika, o na twĩthĩwe tũtavanasya kĩsionĩ kĩilyĩ ata, no tũendeee “[kũthangaaa] mũno mavinda onthe wĩanĩ wa Mwĩaĩi.”—1 Ako. 15:58.