MŨSYAĨĨSYA (ĨKASETI YA KWĨMANYĨSYA) Mwei wa 5, 2020
Ĩkaseti yĩĩ yĩ na ilungu sya kwĩmanyĩsya sya kwambĩĩa Matukũ 6, Mwei wa 7–Matukũ 2, Mwei wa 8, 2020.
“Mũsumbĩ wa Ngalĩ ya Ĩũlũ” Ĩvindanĩ Yĩĩ ya Mũminũkĩlyo
Kĩlungu kya kwĩmanyĩsya kya 19: Matukũ 6-12, Mwei wa 7, 2020. Nĩtwonete maũndũ mekũĩkĩĩthya kana wathani wa Ndanieli ĩũlũ wa “mũsumbĩ wa ngalĩ ya ĩũlũ” na “mũsumbĩ wa ngalĩ ya ĩtheo” nũendeee kwĩanĩa. Tũtonya kũmanya ũu ata? Na nĩkĩ twaĩle kũelewa wathani ũsu nesa?
Asumbĩ Elĩ Meũsindana Ĩvindanĩ ya Mũminũkĩlyo
Wathani wa “mũsumbĩ wa ngalĩ ya ĩũlũ” na wa “mũsumbĩ wa ngalĩ ya ĩtheo” wĩanĩĩte ĩvinda yĩmwe na mawathani angĩ. Mawathani asu monanĩtye ata kana o mĩtũkĩ nthĩ ĩno nthũku nĩkũthela?
Ũmũnthĩ “Mũsumbĩ wa Ngalĩ ya Ĩũlũ” Nũũ?
Kĩlungu kya kwĩmanyĩsya kya 20: Matukũ 13-19, Mwei wa 7, 2020. Ũmũnthĩ “mũsumbĩ wa ngalĩ ya ĩũlũ” nũũ, na akavika mũminũkĩlyo wake ata? Kũmanya ũsũngĩo wa makũlyo asu no kũlũlũmĩĩlye mũĩkĩĩo witũ, na kũitũtetheesya kwĩyũmbanĩsya matatwa ala makilyĩ kũtũkwata o mĩtũkĩ.
We Nũtũngaa Mũvea Nũndũ wa Mĩthĩnzĩo Ĩla Ngai Ũkũnengete?
Kĩlungu kya kwĩmanyĩsya kya 21: Matukũ 20-26, Mwei wa 7, 2020. Ĩsomo yĩĩ nĩyĩũtũtetheesya tũmũtũngĩae Yeova mũvea mũnango nũndũ wa mĩthĩnzĩo ĩmwe ĩla ũtũnengete. O na nĩyĩũtũtetheesya twĩthĩwe na ũmanyi wa kũneena na ala mataĩkĩĩaa kwĩ Ngai.
Tũngaa Mũvea Nũndũ wa Ũthwii Ũtonekaa Ũla Yeova Ũkũnengete
Kĩlungu kya kwĩmanyĩsya kya 22: Matukũ 27, Mwei wa 7–Matukũ 2, Mwei wa 8, 2020. Ĩsomo ĩvĩtu yĩneeneete mĩthĩnzĩo yĩana ũna Ngai ũtũnengete tũtonya kũmyona. Nayo ĩsomo yĩĩ yĩneenea ũthwii ũtonekaa ũla Yeova ũtũnengete na ũndũ tũtonya kwonany’a kana nĩtũtũngaa mũvea nũndũ waw’o. O na nĩyĩũtũtetheesya tũmũtũngĩe Yeova Ngai mũvea mũnango nũndũ nĩwe Mũnengani wa ũthwii ũsu.
