Mawathani amwe monanĩtw’e kyatinĩ kĩĩ maeleetye maũndũ mekwĩkĩka ĩvinda yĩmwe na angĩ. Na onthe meonany’a kana twĩkalĩte “ĩvinda ya mũminũkĩlyo.”​—Nda. 12:4.

• Maandĩko Ũvu. 11:7; 12:13, 17; 13:1-8, 12

  Wathani Ĩla “nyamũ ya kĩthekanĩ” ĩsumbĩkĩte andũ ĩũlũ wa nthĩ kwa myaka ngili mbingĩ. Ĩvindanĩ ya mũminũkĩlyo, mũtwe wa mũonza wa nyamũ ĩsu nĩwaũmĩiw’e. Ĩtina, kĩtau kyayo nĩkyavoie na “andũ onthe ma nthĩ” mamĩatĩĩa. Satani atũmĩaa nyamũ ĩsu “kũkita na ala matialĩte.”

  Ũndũ weanĩiw’e Ĩtina wa mbua ya ĩvinda ya Noa, silikalĩ iũmũvĩnga Yeova nĩsyambĩĩie kũsumbĩka andũ. Ĩtina wa myaka ngili mbingĩ, ĩvindanĩ ya Kaũ wa Mbee wa Nthĩ Yonthe Ũsumbĩ wa Britain nĩwathelile vinya. Ũsumbĩ ũsu nĩwakwatie vinya ĩngĩ yĩla wakwatanie na Amelika. Satani ethĩĩtwe aitũmĩa silikalĩ syonthe sya andũ kũthĩny’a andũ ma Ngai, na ekĩte ũu mũno mũno ĩvindanĩ yĩĩ ya mũminũkĩlyo.

• Ĩandĩko Nda. 11:25-45

  Wathani Ĩvinda ya mũminũkĩlyo mũsumbĩ wa ngalĩ ya ĩũlũ na mũsumbĩ wa ngalĩ ya ĩtheo makasindanĩa ũkũmũ.

  Ũndũ weanĩiw’e Germany nĩyokitie na Britain na Amelika. Mwakanĩ wa 1945, Soviet Union vamwe na nthĩ ila ingĩ syaĩ ngwatanĩo nayo nĩyatw’ĩkie mũsumbĩ wa ngalĩ ya ĩũlũ. Mwaka wa 1991, Soviet Union nĩyavalũkile, na ĩtina wa ĩvinda Russia vamwe na nthĩ ila ingĩ syĩ ngwatanĩo nayo yatw’ĩka mũsumbĩ wa ngalĩ ya ĩũlũ.

• Maandĩko Isa. 61:1; Mal. 3:1; Luka 4:18

  Wathani Yeova nĩwatũmie “mũtũmwa” wake ‘aseũvye nzĩa’ Ũsumbĩ wa Masia ũtanambĩĩa. “Mũtũmwa” ũsu nĩwambĩĩie ‘kũtavya ala auu ũvoo mũseo.’

  Ũndũ weanĩiw’e Kwambĩĩa mwaka wa 1870, C. T. Russell na anyanyae nĩmatwie kũmanyĩsya ũw’o ũla wĩ Mbivilianĩ na kĩthito. Mwakanĩ wa 1881, nĩmambĩĩe kũkindĩlĩĩla kana athũkũmi ma Ngai nĩmaĩle kũtavany’a. Matumbĩthisye maũvoo ta, “Atavany’a 1,000 Nĩmekwendeka” na “Mwĩtĩkĩw’e Mauta Nĩ Kana Mũtavany’e.”

• Ĩandĩko Mt. 13:24-30, 36-43

  Wathani Mũmaitha nĩwavandie ĩthaaa mũũndanĩ wa nganũ. Ĩthaaa nĩyeanie yavw’ĩka nganũ. Ĩvinda ya ngetha, ĩthaaa nĩyavathaniw’e na nganũ.

  Ũndũ weanĩiw’e Kwambĩĩa mwaka wa 1870, kĩvathũkany’o katĩ wa Aklĩsto ma w’o na ma ũvũngũ nĩkyambĩĩe kwoneka ũtheinĩ. Ĩvindanĩ ya mũminũkĩlyo, Aklĩsto ma w’o nĩmombanĩtw’e kĩkundinĩ na makavathanw’a na Aklĩsto ma ũvũngũ.

• Ĩandĩko Nda. 2:31-33, 41-43

  Wathani Nyaaĩ sya kĩaa na yũmba sya mũvw’anano ũseũvĩtw’e na syũma syĩ kĩvathũkany’o.

  Ũndũ wĩanĩĩtw’e Yũmba yĩonany’a andũ ala maleaa kũsumbĩkwa nĩ Britain na Amelika. Andũ asu matumaa ũsumbĩ ũsu ũtatũmĩa vinya waw’o nesa, ũla ũelekanĩtw’e na kĩaa.

• Ĩandĩko Mt. 13:30; 24:14, 45; 28:19, 20

  Wathani “Nganũ” nĩyoombaniw’e “ĩkũmbĩnĩ” na “ngombo ndĩkĩĩku na mbũĩ” yanyuvwa ĩũngamĩe “andũ ma nyũmba” ya Vwana. ‘Ũvoo mũseo wa Ũsumbĩ’ nĩwambĩĩie kũtavanw’a “nthĩ yonthe.”

  Ũndũ weanĩiw’e Mwaka wa 1919, ngombo ndĩkĩĩku nĩyanyuviwe ĩũngamĩe andũ ma Ngai. Kuma mwaka ũsu na kũendeea, Amanyĩw’a ma Mbivilia nĩmeekĩie kĩthito wĩanĩ wa kũtavany’a. Ũmũnthĩ Ngũsĩ sya Yeova itavanasya nthĩ mbee wa 200 na ikatumbĩthya mavuku na ithyomo mbee wa 1,000.

• Maandĩko Nda. 12:11; Ũvu. 13:11, 14, 15

  Wathani Nyamũ ya kĩthekanĩ yĩ na mbya ilĩ nĩtavasya andũ ĩũlũ wa nthĩ maseũvye “mũvw’anano wa ĩla nyamũ ya kĩthekanĩ,” na nĩnengae mũvw’anano ũsu “mĩthũmũ ya thayũ.”

  Ũndũ weanĩiw’e Ũsumbĩ Mũnene wa Nthĩ wa Britain na Amelika nĩwambĩĩisye Wovano wa Mbaĩ. Wovano ũsu nĩwakwatiwe mbau nĩ nthĩ ingĩ. Nake mũsumbĩ wa ngalĩ ya ĩũlũ nĩwaũkwatie mbau kuma mwaka wa 1926 nginya 1933. Ĩtina wa ĩvinda, Ngwatanĩo ya Nthĩ (UN) nĩyambĩĩiw’e. Na o ta Wovano wa Mbaĩ, ĩnengawe ndaĩa ĩla yaĩlĩte kũnengwa Ũsumbĩ wa Ngai wĩ w’oka.

• Ĩandĩko Nda. 8:23, 24

  Wathani Mũsumbĩ wĩ ũthyũ mwai “nũkananga kũvika kũseng’ya.”

  Ũndũ weanĩiw’e Ũsumbĩ Mũnene wa Nthĩ wa Britain na Amelika nĩwatumie andũ aingĩ makw’a na waete wanangĩko mũnene. Kwa ngelekany’o, ĩvindanĩ ya Kaũ wa Kelĩ wa Nthĩ Yonthe, Amelika nĩyalekilye mbomu ilĩ sya atomu nthĩ ya amaitha ma Britain na Amelika, na syaete wanangĩko mũnene ũtaĩ waaoneka ĩngĩ.

• Maandĩko Nda. 11:31; Ũvu. 17:3, 7-11

  Wathani Nyamũ ya kĩthekanĩ “ndune mũno” yĩ na mbya ĩkũmi nĩyaumie yĩla ĩimanĩ yĩte kĩtulu na nĩyo mũsumbĩ wa nyanya. Ĩvuku ya Ndanieli yĩtĩte mũsumbĩ ũsu “ũthatyo ũla wanangaa.”

  Ũndũ weanĩiw’e Wovano wa Mbaĩ nĩwathelile vinya Kaũnĩ wa Kelĩ wa Nthĩ Yonthe. Ĩtina wa kaũ ũsu, UN ‘nĩyaũngamiw’e.’ O ta Wovano wa Mbaĩ, UN ĩnengawe ndaĩa ĩla yaĩlĩte kũnengwa Ũsumbĩ wa Ngai wĩ w’oka. UN nĩyo ĩkavithũkĩa ndĩni.

• Maandĩko 1 Ath. 5:3; Ũvu. 17:16

  Wathani Mbaĩ ikatangaasa kana “kwĩ mũuo na kũi mũisyo,” na ĩndĩ ila “mbya ĩkũmi” na “ĩla nyamũ ya kĩthekanĩ” iivithũkĩa “yĩla ĩlwaya” na iiyananga. Ĩtina wa vau, mbaĩ ikaanangwa.

  Ũndũ ũkeanĩw’a Mbaĩ ikasya kana nivotete kũete mũuo na kũveta mũisyo. Na ĩndĩ mbaĩ ila ikwete mbau UN ikaananga ndĩni syonthe sya ũvũngũ. Ũsu nĩw’o ũkethĩwa mwambĩĩo wa ũla thĩna mũnene. Thĩna ũsu ũkathela yĩla Yesũ ũkananga kĩlungu kĩla kĩkethĩwa kĩtiele kya nthĩ ĩno ya Satani kaũnĩ wa Alimaketoni.

• Maandĩko Esek. 38:11, 14-17; Mt. 24:31

  Wathani Ngoki akavithũkĩa nthĩ ya andũ ma Ngai. Na ĩndĩ alaĩka makamombany’a “ala anyuve.”

  Ũndũ ũkeanĩw’a Mũsumbĩ wa ngalĩ ya ĩũlũ e na silikalĩ ila ingĩ makavithũkĩa andũ ma Ngai. Kavinda kakuvĩ ĩtina wa ũu, etĩkĩw’a mauta ala matiele makoombanw’a mathi ĩtunĩ.

• Maandĩko Esek. 38:18-23; Nda. 2:34, 35, 44, 45; Ũvu. 6:2; 16:14, 16; 17:14; 19:20

  Wathani “Ũla wekalĩte” ĩũlũ wa “mbalasi nzaũ” nĩwaminũkĩlilye “ũsindi wake” kwa kwananga Ngoki na ita syake. Nayo “ĩla nyamũ ya kĩthekanĩ” nĩyekiw’e “ĩianĩ ya mwaki,” na ũla mũvw’anano mũnene waanangwa.

  Ũndũ ũkeanĩw’a Yesũ, ũla nĩwe Mũsumbĩ wa Ũsumbĩ wa Ngai, akooka kũvonokya andũ ma Ngai. We vamwe na ala 144,000 makasumbĩka nake na ita syake sya alaĩka, makaananga mbaĩ syonthe ila ikavithũkĩa andũ ma Ngai. Ũsu nĩw’o ũkethĩwa mũthya wa nthĩ ya Satani.