1. Nĩ ũtwi wĩva wa vata kĩla mũndũ waĩle kwĩka?

 VE ŨTWI wa vata vyũ andũ maĩlĩte kwĩka ũmũnthĩ. Maĩle kũtw’a ethĩwa memũkwata mbau Yeova Ngai, ta we Mũsumbĩ ũla waĩle vyũ, kana mekwata mbau mũmaitha wake mwai, Satani ũla nĩwe Ndevili. Mũndũ ndesa kũkwata mbau ngalĩ syelĩ. Ũtwi ũla mũndũ ũkwĩka nĩw’o ũkatuma akwata thayũ wa tene na tene kana alea kũũkwata. (Mt. 25:31-33, 46) Ũtwi o ũsu nĩw’o ũkatuma mũndũ anangwa kana avonoka ĩvinda ya ‘ũla thĩna mũnene.’—Ũvu. 7:14; 14:9-11; Esek. 9:4, 6.

2. (a) Ĩandĩko ya Aevelania 10:35-39 yĩtwĩkĩĩte vinya twĩke ata? (b) Ĩvuku ya Ũvuany’o yĩtonya kũtũtethya ata?

² Soma Aevelania 10:35-39. Ethĩwa ũtw’ĩte kũkwata mbau Ũsumbĩ wa Yeova, wĩkĩte ũtwi mũseo mũno. Na yu wĩ na mea maingĩ ma kũtetheesya angĩ meke ũtwi ũla waĩle. Nũndũ wa ũu, no ũtũmĩe ũvoo ũla wĩ ĩvukunĩ ya Ũvuany’o kũmatetheesya. Ĩvuku yĩu ya mwanya nĩyĩvuanĩtye kĩla kĩkakwata ala mamũvĩngaa Yeova, na yĩkasyoka yĩkavuany’a ũndũ ũkaathima ala malũmanasya na Ũsumbĩ wake. Nĩtwaĩlĩte kwĩmanyĩsya ũw’o ũsu wa vata. Kwĩka ũu nĩkũũtũtetheesya tũtw’e vyũ kũendeea kũmũthũkũma Yeova. O na ĩngĩ, no tũtũmĩe maũndũ ala tũkwĩmanyĩsya kũtetheesya angĩ meke ũtwi ũla waĩle na mailũmany’a naw’o.

3. Twĩneenea kyaũ ĩsomonĩ yĩĩ?

³ Ĩsomonĩ yĩĩ twĩneenea makũlyo aa: Ala malũmanasya na Ũsumbĩ wa Ngai makakwata moathimo meva? Na nĩ kyaũ kĩkakwata ala malũmanasya na ĩla nyamũ ya kĩthekanĩ ndune mũno ĩwetetwe ĩvukunĩ ya Ũvuany’o?

4. Nĩ kĩkundi kĩva mũtũmwa Yoana woonie kĩ vamwe na Yesũ ĩtunĩ?

⁴ Mũtũmwa Yoana nĩwooniw’e woninĩ ikundi ilĩ sya andũ ala makwataa mbau Ũsumbĩ wa Yeova, na ala nĩmo makakwata thayũ wa tene na tene. Kĩkundi kya mbee kĩ na ũtalo wa andũ 144,000. (Ũvu. 7:4) Asu manyuvĩtwe kuma kũũ nthĩ maseũvye silikalĩ, kana Ũsumbĩ, na Yesũ ĩtunĩ. Na makasumbĩka nthĩ vamwe nake. (Ũvu. 5:9, 10; 14:3, 4) Woninĩ ũsu, Yoana oonie maũngye vamwe na Yesũ ĩtunĩ, vala vaelekanĩtw’e na Kĩĩma kya Saioni.—Ũvu. 14:1.

5. Nĩ kyaũ kĩkilyĩ kũkwata ala matiele kũũ nthĩ me ũtalonĩ wa 144,000?

⁵ Kuma ĩvinda ya atũmwa nginya ũmũnthĩ, andũ ngili mbingĩ nĩmethĩĩtwe mainyuvwa malike ũtalonĩ ũsu wa 144,000. (Luka 12:32; Alo. 8:17) Ĩndĩ woninĩ ũsu, Yoana nĩwataviw’e kana mĩthenyanĩ ya mũminũkĩlyo, ũtalo wa ala makethĩwa matialĩte katĩ wa asu kũũ nthĩ ũkeethĩwa wĩ mũnini. “Ala matialĩte” makeekĩwa “ũsiĩlo” wa mũthya ũla thĩna mũnene ũtanamba kwambĩĩa, kwonany’a kana nĩmeetĩkĩlwa nĩ Yeova. (Ũvu. 7:2, 3; 12:17) Na ĩndĩ ĩvindanĩ ya ũla thĩnanĩ mũnene, asu matialĩte makambata ĩtunĩ nĩ kana makethĩwe vamwe na ala angĩ me ũtalonĩ wa 144,000, ala makwie me aĩkĩĩku. Kũu, makasumbĩka vamwe na Yesũ Ũsumbĩnĩ wa Ngai.—Mt. 24:31; Ũvu. 5:9, 10.

6-7. (a) Nĩ kĩkundi kĩngĩ kĩva Yoana wooniw’e, na nĩ kyaũ twĩsĩ ĩũlũ wakyo? (b) Nĩkĩ ala ma “ĩkomano ĩnene” na etĩkĩw’a mauta ala matiele maĩle kũtanĩthw’a nĩ Ũvuany’o kĩlungu kya 7?

⁶ Ĩtina wa Yoana kwonw’a kĩkundi kĩu kya ĩtunĩ, nĩwooniw’e “ĩkomano ĩnene.” Kĩvathũkany’o na ala 144,000, ala me kĩkundinĩ kĩu maitalĩka. (Ũvu. 7:9, 10) Nĩ kyaũ twĩsĩ ĩũlũ woo? Yoana akũlĩĩlya ĩũlũ woo ataviw’e: “Aa nĩ ala maumĩte ũla thĩnanĩ mũnene, na mathambĩtye kanzũ syoo na makaitw’ĩkĩthya nzaũ na nthakame ya kala Kalondu.” (Ũvu. 7:14) Ĩtina wa kũvonoka ũla thĩna mũnene, asu ma “ĩkomano ĩnene” makekala vaa nthĩ na makatanĩa moathimo maingĩ.—Sav. 37:9-11, 27-29; Nth. 2:21, 22; Ũvu. 7:16, 17.

⁷ Twĩthĩwe nĩtũnyuvĩtwe tũthi ĩtunĩ kana twĩ na wĩkwatyo wa kwĩkala kũũ nthĩ, yo nĩtũĩkĩĩaa kana tũkoona maũndũ ala me kĩlungunĩ kya 7 kya Ũvuany’o maianĩa? Nĩtwaĩle kũĩkĩĩa ũu. Mwa yĩu yĩkeethĩwa yĩ ĩvinda ya kũtanĩthya ta kĩ kwa ikundi isu syelĩ sya athũkũmi ma Ngai! Tũkatana mũno vyũ kwĩthĩwa twatwie kũlũmany’a na Ũsumbĩ wa Yeova. Ĩndĩ nĩ ũndũ ũngĩ wĩva ĩvuku ya Ũvuany’o yĩtũtavĩtye ĩũlũ wa ũla thĩna mũnene?—Mt. 24:21.

8. W’o ũla thĩna mũnene ũkambĩĩa ata, na andũ aingĩ makeeka ata?

⁸ O tondũ ĩsomo ĩvĩtu yonanĩtye, silikalĩ sya nthĩ ĩno ikilyĩ kũvithũkĩa Mbaviloni Ĩla Nene, ĩla nĩ ndĩni syonthe sya ũvũngũ. (Ũvu. 17:16, 17) Ũsu nĩw’o ũkethĩwa mwambĩĩo wa ũla thĩna mũnene. Kyo kĩu kĩkatuma andũ aingĩ mambĩĩa kũmũthaitha Yeova? Aiee. Kĩvathũkany’o na ũu, kĩlungu kya 6 kya Ũvuany’o kyonanĩtye kana andũ ala matamũthũkũmaa Yeova makamantha wĩvitho silikalĩnĩ na viasalanĩ sya nthĩ ĩno, ila ielekanĩtw’e na iĩma. Nũndũ maikatw’a kũũngama ngalĩ ya Ũsumbĩ wa Ngai, Yeova akamatala ta avĩnganĩsya make.—Luka 11:23; Ũvu. 6:15-17.

9. Andũ ma Yeova makeethĩwa me kĩvathũkany’o ata ĩvindanĩ ya ũla thĩna mũnene, na kĩu kĩkatuma vathi ata?

 ⁹ Kwa w’o, athũkũmi ma Yeova aĩkĩĩku makeethĩwa me kĩvathũkany’o vyũ ĩvindanĩ yĩu yũmũ ya ũla thĩna mũnene. Nĩmo makethĩwa me kĩkundi kyoka kĩtiele ĩũlũ wa nthĩ kĩimũthaitha Yeova Ngai, na kĩleete vyũ kũkwata mbau “ĩla nyamũ ya kĩthekanĩ.” (Ũvu. 13:14-17) Na nũndũ makaendeea kwĩkala malũmanĩtye vyũ na Yeova, kĩu kĩkathatya mũno ala mamũvĩngaa. Nũndũ wa ũu, mbaĩ ikethĩwa syĩ ngwatanĩo ikamavithũkĩa kĩla vandũ ĩũlũ wa nthĩ. Kũvithũkĩwa kũu nĩkw’o Mbivilia yĩthĩawa ĩiweta yĩla ĩkwasya kana andũ ma Ngai makavithũkĩwa nĩ Ngoki wa Makoki.—Esek. 38:14-16.

10. O tondũ vaeleetw’e nthĩnĩ wa Ũvuany’o 19:19-21, Yeova akeeka ata andũ make mavithũkĩwa?

¹⁰ We Yeova akeeka ata andũ make mavithũkĩwa? Atwĩĩte atĩĩ: “Ũthilĩku wakwa ũkambata manyiũũnĩ makwa.” (Esek. 38:18, 21-23) Kĩlungu kya 19 kya Ũvuany’o nĩkĩeleetye kĩla kĩkekĩka ĩtina wa ũu. Kyaĩtye kana Yeova akamũtũma Mwana wake okitĩe andũ make na aisinda amaitha make. Yesũ akatetheew’a kũkita amaitha asu nĩ “ita sya ĩtunĩ,” ila nĩ alaĩka aĩkĩĩku vamwe na ala 144,000. (Ũvu. 17:14; 19:11-15) Vakeethĩwa vailye ata ĩtina wa kaũ ũsu? Onthe ala mamũvĩngaa Yeova makeethĩwa manaanangwa vyũ!—Soma Ũvuany’o 19:19-21.

11. Ũndũ ũla wa mwanya vyũ ũwetetwe ĩvukunĩ ya Ũvuany’o nĩ wĩva?

¹¹ Kwasũanĩa ũndũ athũkũmi aĩkĩĩku ma Ngai makew’a mũyo wĩana moona amaitha make mayanangwa vyũ! Mwa yĩkeethĩwa yĩ ĩvinda ya kũtanĩthya ta kĩ! O na kũtw’ĩka ĩtunĩ kũkeethĩwa na wasya mũnene wa kũsĩlĩla yĩla Mbaviloni Ĩla Nene ĩkanangwa vyũ, ve ũndũ ũngĩ ũkaete ũtanu mwingĩ. (Ũvu. 19:1-3) Ũsu nĩw’o ũndũ ũla wa mwanya vyũ ũwetetwe ĩvukunĩ ya Ũvuany’o, naw’o nĩ “mũtwaano wa kala Kalondu.”—Ũvu. 19:6-9.

12. Kwosana na Ũvuany’o 21:1, 2, mũtwaano wa kala Kalondu ũkeekwa ĩndĩĩ?

¹² W’o mũtwaano ũsu ũkeekĩka ĩndĩĩ? Ĩvinda ĩkuvĩ kaũ wa Alimaketoni ũtanambĩĩa, ala 144,000 makeethĩwa ĩtunĩ onthe. Ĩndĩ yĩu ti yo yĩkeethĩwa ĩvinda ya mũtwaano wa kala Kalondu. (Soma Ũvuany’o 21:1, 2.) Mũtwaano ũsu ũkeekwa ĩtina wa kaũ wa Alimaketoni kũkitwa, na amaitha ma Ngai kũvetangwa vyũ.—Sav. 45:3, 4, 13-17.

13. Nĩ kyaũ kĩkaendeea mũtwaanonĩ wa kala Kalondu?

¹³ Nĩ kyaũ kĩkaendeea mũtwaanonĩ wa kala Kalondu? O tondũ mũtwaano ũkwatanasya mũndũũme na mũndũ mũka, mũtwaano ũũ wa ngelekany’o ũkakwatany’a Mũsumbĩ, Yesũ Klĩsto, na “mũtwawa” wake, ũla nĩ ala 144,000. Ũndũ ũsu wa mwanya nĩw’o ũkatuma ĩla silikalĩ ya myaka 1,000 yambĩĩa kũsumbĩka ĩũlũ wa nthĩ.—Ũvu. 20:6.

14-15. Kĩlungu kya 21 kya Ũvuany’o kĩelekanĩtye ala 144,000 na kyaũ? (Sisya visa ĩthangũnĩ ya mbee vyũ.)

¹⁴ Kĩlungu kya 21 kya Ũvuany’o kĩsyokete kĩkaelekany’a ala 144,000 na ndũa mbanakavye mũno, ĩla yĩtĩtwe “Yelusaleme Nzaũ.” (Ũvu. 21:2, 9) Yoana oonie ndũa ĩsu yĩ na mavia 12 ma mũsingi, na ĩũlũ wamo vaandĩkĩtwe “masyĩtwa 12 ma ala atũmwa 12 ma kala Kalondu.” Nĩkĩ ũndũ ũsu wamwendeeisye? Nũndũ ĩsyĩtwa yake nĩ yĩmwe yaandĩkĩtwe ĩũlũ wa ĩvia yĩmwe. Ĩsu yaĩ ndaĩa nene ta kĩ!—Ũvu. 21:10-14; Aev. 2:20.

 ¹⁵ Ndũa ĩsu ya ngelekany’o ndyailye ta ndũa ĩngĩ o na yĩva. Nzĩa nene ya ndũa ĩsu yaseũvĩtw’e na thaavu mũtheu, mĩvĩa yayo 12 yaseũvĩtw’e na lũlũ, na ngũta na mĩsingi yayo yaanakavĩtw’e na mavia ma thooa mũnene. Eka ũu, ndũa ĩsu nĩyeanene ngalĩko syonthe. (Ũvu. 21:15-21) Ĩndĩ ve kĩndũ Yoana ũtaaona ndũanĩ ĩsu! Kwoona kĩĩ wawetie: “Ndyaaona ĩkalũ nthĩnĩ wayo nũndũ Yeova Mwene Vinya W’onthe nĩwe ĩkalũ ya ndũa ĩsu, vamwe na kala Kalondu. Na ndũa ĩsu ndyaĩ na vata wa kyeni kya syũa kana mwei, nũndũ ũtheu mũtisu wa Ngai nĩw’o wamĩmulĩkaa, na taa wayo waĩ kala Kalondu.” (Ũvu. 21:22, 23) Ala me nthĩnĩ wa Yelusaleme ĩsu Nzaũ makeethĩawa matonya kũmũvikĩa Yeova ĩmwe kwa ĩmwe. (Aevl. 7:27; Ũvu. 22:3, 4) Kwoou Yeova na Yesũ nĩmo ĩkalũ ya ndũa ĩsu.

16. Andũ makatanĩa kyaũ ĩvindanĩ ya ũla Ũsumbĩ wa Myaka Ngili?

¹⁶ Nĩ ũndũ wa kũtanĩthya mũno kwa etĩkĩw’a mauta kũsũanĩa ĩũlũ wa ndũa ĩsu. Ĩndĩ ala me na wĩkwatyo wa kwĩkala vaa ĩũlũ wa nthĩ o namo me na kĩtumi kya kwendeew’a nĩ ndũa ĩsu. Ĩvinda ya Ũsumbĩ wa Myaka Ngili, Yelusaleme ĩsu Nzaũ ĩkaetee andũ moathimo maingĩ. Yoana oonie moathimo asu matheete ta “ũsĩ wa kĩw’ũ kya thayũ.” Na ndee syelĩ sya ũsĩ ũsu syaĩ na “mĩtĩ ya thayũ,” ĩla “matũ mayo maĩ ma kũvosya mbaĩ.” (Ũvu. 22:1, 2) Andũ onthe ala makekala ĩũlũ wa nthĩ makeethĩwa na mwanya wa kũtanĩa moathimo asu onthe. Kavola kwa kavola, andũ ala ewi makavetewa naĩ. Eka ũu, kũikethĩwa ĩngĩ mowau, kana woo, o na kĩĩo kĩikethĩwa vo ĩngĩ.—Ũvu. 21:3-5.

17. Kwosana na Ũvuany’o 20:11-13, naaũ makatetheka nĩ Ũsumbĩ wa Myaka Ngili?

¹⁷ Naaũ makatetheka nĩ moathimo asu maseũvĩte ũu? Ala makethĩwa me ma mbee kũtetheka nĩ ĩkomano ĩnene ya ala makavonoka Alimaketoni, vamwe na syana ila itonya kwĩthĩwa ikasyaĩwa nthĩ nzaũ. Ĩndĩ kĩlungu kya 20 kya Ũvuany’o nĩkĩsyokete kĩkatwatha kana akw’ũ makathayũũkw’a. (Soma Ũvuany’o 20:11-13.) Ala makathayũũkw’a mekale kũũ nthĩ nĩ andũ “alũngalu” ala makwie tene me aĩkĩĩku, vamwe na “ala mate alũngalu,” kana kwa ndeto  ingĩ, ala mataakwata mwanya wa kwĩmanyĩsya ĩũlũ wa Yeova. (Meko 24:15; Yoa. 5:28, 29) Ĩndĩ ũu nĩ kwonany’a kana kĩla mũndũ akathayũũkw’a ĩvindanĩ ya Ũsumbĩ wa Myaka Ngili? Aiee. Ala maleile na ngũlũ mwanya wa kũmũthũkũma Yeova matanamba kũkw’a maikathayũũkw’a. Maĩ na mwanya ũsu, ĩndĩ moonany’a kana mai na vata wa kwĩkala nthĩ nzaũ.—Mt. 25:46; 2 Ath. 1:9; Ũvu. 17:8; 20:15.

18. Maũndũ makeethĩwa mailye ata kũũ nthĩ mũthyanĩ wa ĩla myaka 1,000?

¹⁸ Mũthyanĩ wa ĩla myaka 1,000, onthe ala me ĩũlũ wa nthĩ makeethĩwa mavetewe naĩ vyũ. Vai mũndũ wĩ thayũ ĩvinda yĩu ũkathĩnaw’a nĩ naĩ ĩla twatiĩwe nĩ Atamu. (Alo. 5:12) Kĩumo kya naĩ ya Atamu kĩkeethĩwa kĩvetangĩtwe vyũ. Ũu wĩonany’a kana ala me ĩũlũ wa nthĩ ‘makeethĩwa thayũ’ nũndũ makeethĩwa mavetewe naĩ vyũ mũthyanĩ wa ĩla myaka 1,000.—Ũvu. 20:5.

19. Nĩkĩ ve na vata wa yĩla ĩtatwa ya mũthya?

¹⁹ Nĩtwĩsĩ kana Yesũ aendeeie kwĩkala e mũĩkĩĩku kwa Yeova, o na yĩla Satani wamũtatie. Nĩwalũmanilye na wĩanĩu wake vyũ. Ĩndĩ yo yĩla andũ onthe makavetewa naĩ makaendeea kwĩthĩwa me aĩkĩĩku kwa Yeova o na Satani amatata? Kĩla ũmwe akeethĩwa atonya kwĩsũngĩĩa ĩkũlyo yĩu yĩla Satani ũkathaw’a kuma yĩla ĩimanĩ yĩte kĩtulu, mũthyanĩ wa ĩla myaka 1,000. (Ũvu. 20:7) Ala makalũmany’a na Yeova ĩvindanĩ ya ĩtatwa yĩu makakwata thayũ wa tene na tene na maitanĩa ũthasyo wa w’o. (Alo. 8:21) Namo ala makaleana na Ngai makaanangwa tene na tene, vamwe na Ndevili na ndaimoni syake.—Ũvu. 20:8-10.

20. Mawathani ma kwendeesya ala me ĩvukunĩ ya Ũvuany’o matuma wĩw’a ata?

²⁰ We wĩĩw’a ata ĩtina wa kũsoma maũndũ aa ma kwendeesya me ĩvukunĩ ya Ũvuany’o? Tyo watana kũmanya kana wĩkalĩte ĩvinda yĩla mawathani asu ma mwanya maendeee kwĩanĩw’a? Kyo kĩu nĩkyatuma wenda kũthokya angĩ mamũthaithe Ngai ũthaithi mũtheu me vamwe naitũ? (Ũvu. 22:17) Vai nzika kana kũneenea maũndũ asu ma kwendeesya makekĩka ĩvinda yũkĩte nĩkwatwĩkĩa vinya na kwatuma twenda kwasya ũũ mũtũmwa Yoana waisye: “Ameni! Ũka, Mwĩaĩi Yesũ.”—Ũvu. 22:20.