KĨLUNGU KYA KWĨMANYĨSYA 26
“Nzyokeai”
“Nzyokeai, nakwa ngamũsyokea.”—MAL. 3:7.
WATHI 102 ‘Matethye Ala Onzu’
KWA ŨKUVĨ *
1. Yeova ew’aa ata yĩla ũmwe wa malondu make wamũsyokea?
O TONDŨ ĩsomo ĩvĩtu yonanĩtye, Yeova eyĩelekanĩtye na mũĩthi mũseo, ũla ũthĩnĩkĩaa nesa kĩla yĩmwe ya malondu make. O na nũmanthaa ala meelelũka na mamũtia. Yeova atavisye Aisilaeli ala mamũtiĩte atĩĩ: “Nzyokeai, nakwa ngamũsyokea.” Na nĩtwĩsĩ nginya ũmũnthĩ ew’aa ũu nũndũ aĩtye: “Ndialyũkaa.” (Mal. 3:6, 7) Yesũ aisye kana Yeova na alaĩka nĩmatanaa mũno yĩla mũthũkũmi o ũmwe wa Yeova welelũkĩte wamũsyokea.—Luka 15:10, 32.
2. Twĩneenea kyaũ ĩsomonĩ yĩĩ?
2 Ekai tũneenee ngelekany’o itatũ Yesũ watũmĩie itonya kũtũmanyĩsya ũndũ tũtonya kũtetheesya ala melelũkĩte makamũtia Yeova. Nĩtũũneenea nguma imwe twaĩle kwĩthĩwa nasyo nĩ kana tũtetheesye asu mailye ta malondu mau. Na ĩndĩ nĩtũkwona ũseo wa kũtw’ĩĩka ala onzu.
KŨMANTHA MBESA MBAU
3-4. Nĩkĩ mũndũ mũka ũla ũwetetwe ĩandĩkonĩ ya Luka 15:8-10 wamanthie nesa ndulakima yake ĩla yaaĩte?
3 Nĩtwaĩle kwĩkĩa kĩthito kingĩ tũmanthe ala mekwenda kũmũsyokea Yeova. Nthĩnĩ wa ngelekany’o ĩmwe Yesũ wanenganie yĩ Ĩvukunĩ ya Ũvoo Mũseo ya Luka, nĩwaeleisye ĩũlũ wa mũndũ mũka waaisye kĩndũ kya vata mũno. Kĩndũ kĩu kyaĩ mbesa yeetawa ndulakima. Kĩla kĩũtwendeesya mũno ngelekany’onĩ ĩsu nĩ ũndũ mũndũ mũka ũsu wamĩmanthie na kĩthito.—Soma Luka 15:8-10.
4 Yesũ nĩwaeleisye ũndũ mũndũ mũka ũsu weewie oona ndulakima ĩsu yaaĩte. Ĩvindanĩ ya Yesũ, aka amwe Ayuti nĩmatonya kwĩthĩwa manengae eĩtu moo ndulakima ĩkũmi mũthenya ũla meũtwawa. Nĩvatonyeka ndulakima ĩsu ĩkethĩwa yaĩ ĩmwe katĩ wa isu ĩkũmi. Mũndũ mũka ũsu asũanĩie ndulakima ĩsu ĩvalũkĩte o vandũ nyũmba. Kwoou nĩwatwie kwakany’a taa amĩmanthe, ĩndĩ ndaamyona. Taa wake nũtonya kwĩthĩwa ũtaĩ na kyeni kĩtoetye ũndũ kĩmĩmulĩka akamyona. Mũthya, nĩwatwie kũtuta nesa nyũmba yonthe. Amina kũtuta, nĩwoonie ndulakima ĩsu mavutinĩ ala woombanisye ĩitisatisa yamulĩkwa nĩ kyeni kya taa wake. Ndalea kwĩthĩwa atanie mũno! Nũndũ wa ũu, eetie anyanyae na atũi make matane vamwe nake.
5. Nĩkĩ twaĩlĩte kwĩkĩa kĩthito kingĩ tũmanthe ala mavoete?
5 Ngelekany’o ĩsu ya Yesũ yĩtũtetheesya kwona kana twaasya kĩndũ tũyĩsa kũkyona tũtekĩĩte kĩthito. O ta ũu, nĩtwaĩlĩte kwĩkĩa kĩthito kingĩ tũmanthe ala mavoete. Myaka mingĩ nĩtonya kwĩthĩwa ĩvĩtĩte kuma meelelũka. O na nĩmatonya kwĩthĩwa mathamĩĩe kĩsionĩ matesĩkĩe nĩ ana-a-asa ma kũu. Ĩndĩ vate nzika, amwe moo nĩmekwenda mũno kũmũsyokea Yeova. Nĩmekwenda kũmũthũkũma Yeova me vamwe na ana-a-asa na eĩtu-a-asa moo, ĩndĩ mayĩka ũu tũtamatetheesye.
6. Atavany’a onthe kĩkundinĩ matonya kũtetheesya ata kũmantha ala mavoete?
6 Naaũ maĩle kũmantha ala mavoete? Ithyonthe no tũtetheesye kũmamantha, twĩthĩwe twĩ atumĩa, mavainia, andũ ma mũsyĩ, kana nĩ atavany’a ala angĩ kĩkundinĩ. We nĩwĩthĩwa na mũnyanya kana mũndũ wa mũsyĩ ũvoete? Kana nĩwĩthĩwa ũkomanĩte na mũndũ ũvoete ũitavany’a nyũmba kwa nyũmba kana ũitavany’a kũla kwĩthĩawa andũ aingĩ? Ethĩwa mũndũ ũsu nde na thĩna ũinenga atumĩa ma kĩkundi kyaku namba yake ya simũ kana ũimatavya vala wĩkalaa, no wĩke ũu.
7. Wĩĩmanyĩsya kyaũ wasũanĩa ndeto sya mũtumĩa wĩtawa Thomas?
7 Nĩ matambya meva atumĩa mũno mũno maĩle kwosa nĩ kana mone ala mavoete na mekwenda kũmũsyokea Yeova? No matetheew’e nĩ ndeto sya mũtumĩa wĩtawa Thomas. * Ekalaa Spain na nũtetheetye Ngũsĩ mbee wa 40 ikasyoka kĩkundinĩ. Thomas aĩtye: “Mbee, nambaa kũneena na ana-a-asa na eĩtu-a-asa ala matonya kwĩthĩwa mesĩ vala mũndũ mũna wa kĩkundi kitũ ũvoete wĩkalaa. Kana ngakũlya atavany’a ethĩwa no malilikane mũndũ ũekete kũthi maũmbanonĩ. Aingĩ kĩkundinĩ nĩmatanaa mũno namakũlya nũndũ mew’aa me na kĩanda kya kũtetheesya wĩanĩ ũsu wa kũmamantha. Yĩla nesa kũthi kwona ana-a-asa na eĩtu-a-asa asu mavoete, nĩnĩmakũlasya ĩũlũ wa syana syoo kana andũ angĩ moo ma mũsyĩ. Amwe nĩmatonya kwĩthĩwa maendaa na syana syoo maũmbanonĩ, na syana isu nitonya kwĩthĩwa syatw’ĩkĩte atavany’a. O nasyo no itetheew’e ikamũsyokea Yeova.”
TETHEESYA ANA NA EĨTU MA YEOVA ALA MAĨTE MASYOKE
8. Nthĩnĩ wa ngelekany’o ya ũla mwana waumie mũsyĩ yĩ ĩandĩkonĩ ya Luka 15:17-24, ĩthe wa mwana ũsu amũkuie ata ĩtina wa kwonany’a nĩwĩlilĩte?
8 Nĩ nguma syĩva twaĩle kwĩthĩwa nasyo ethĩwa nĩtũkwenda kũtetheesya ala mekwenda kũmũsyokea Yeova? Ngelekany’o ya Yesũ ya ũla mwana waumie mũsyĩ no ĩtũmanyĩsye maũndũ ma vata. (Soma Luka 15:17-24.) Ngelekany’onĩ ĩsu Yesũ nũeleetye ũndũ mwana ũsu wambĩĩie kwĩsilya nesa na atw’a kwĩnũka. Ĩthe wake amwona nĩwasembie kũla ũĩ na amũkumbatĩa. Kĩu kyamũĩkĩĩthisye kana ĩthe nũmwendete. Mwana ũsu nĩwathĩnĩkaa mũno, na eew’aa o na ataĩle kwĩtanĩw’a na ĩthe. O na nĩwaeleisye ĩthe ũndũ weew’aa. Ĩthe nĩwamwĩw’ĩie tei mwingĩ na eeka maũndũ mamũĩkĩĩthisye kana nĩwathoketw’e ĩngĩ ta mwana wendetwe mũsyĩ, ĩndĩ ti ta mũthũkũmi. Avangĩthisye mboka nene na amũnenga ngũa nzeo nũndũ nĩweelilĩte.
9. No nginya twĩthĩwe na nguma syĩva ethĩwa nĩtũkwenda kũtetheesya ala mavoete mamũsyokee Yeova? (Sisya ĩsandũkũ “ Ũndũ Tũtonya Kũtetheesya Ala Mekwenda Kũmũsyokea Yeova.”)
9 Yeova no ta ĩthe wa mwana ũsu ũwetetwe ngelekany’onĩ ĩsu. Nĩwendete ana-a-asa na eĩtu-a-asa maitũ ala mavoete, na nĩwendaa mamũsyokee. Twaatĩĩa ngelekany’o ya Yeova no tũmatetheesye makamũsyokea. Ĩndĩ nĩ kana twĩanĩsye kĩu, nĩtwaĩlĩte kũmomĩĩsya, kũmaelewa na kũmew’ĩa tei, na kũmenda. Nĩkĩ twaĩlĩte kwĩthĩwa na nguma isu, na tũtonya kũsyonany’a ata?
10. Nĩkĩ twaĩle kwĩthĩwa na wũmĩĩsyo yĩla tũũtetheesya mũndũ ũvoete amũsyokee Yeova?
10 Nĩtwaĩle kwĩthĩwa na wũmĩĩsyo nũndũ mũndũ ũvoete nũkuaa ĩvinda ayĩsa kũtw’ĩka nĩwamũsyokea Yeova vyũ. Andũ aingĩ mavoete tene maasya kana mesie kwambĩĩa kũmũthũkũma Yeova ĩngĩ ĩtina wa kũthokewa nĩ atumĩa na angĩ kĩkundinĩ mavinda maingĩ. Mwĩĩtu-a-asa wĩtawa Nancy wĩkalaa Asia aandĩkie: “Ve mũnyanyawa ũmwe kĩkundinĩ wandethisye mũno. Ambendete ta mũkũũa. Nĩwandilikanasya ũndũ tene twatanĩaa kwĩthĩwa vamwe. Nĩwambĩthukĩĩasya nesa ndielesya ũndũ ngwĩw’a, na ndakĩaa kũnenga ũtao. Aĩ mũnyanya wa w’o, na nĩweethĩawa eyũmbanĩtye kũndethya ĩvinda o na yĩva.”
11. Nĩkĩ twaĩle kũelewa na kwĩw’ĩa tei ala maũmĩiw’e?
11 Ndawa ĩmwe nzeo mũno ya kũiita ala mekwĩw’a maũmĩĩtw’e ngoonĩ nĩ kũelewa ũndũ mekwĩw’a na kũmew’ĩa tei. Ve amwe mavoie ĩtina wa kũũmĩw’a nĩ mũndũ kĩkundinĩ, na methĩĩtwe moveee ũthatu ngoonĩ kwa myaka mingĩ. Nũndũ wa ũu, mayĩw’aa mayenda kũmũsyokea Yeova. Amwe nĩmatonya kwĩthĩwa maisũanĩa kana ve ũndũ ũtaĩle meekiwe. Na kwoou nĩmatonya kwĩthĩwa mayenda mũndũ ũtonya kũmethukĩĩsya na aimaelewa. (Yak. 1:19) Ve ĩvinda María wavoete, na aĩtye, “Kĩla nendaa nĩ mũndũ ũkũmbĩthukĩĩsya, mũndũ ndonya kũĩĩa, na ũtonya kũndethya na aindaa.”
12. Nĩ kwa nzĩa yĩva wendo wa Yeova ũilye ta ĩkanda?
12 Mbivilia ĩelekanĩtye wendo wa Yeova na ndii, kana ĩkanda. Nĩ kwa nzĩa yĩva wendo wa Ngai ũilye ta ĩkanda? Kwasũanĩa ngelekany’o ĩno: Twasye nĩwavota ũkanganĩ wĩ na itulumo nene na ũyambĩĩa kũthelekelya, ĩndĩ mũndũ aikwĩkĩsya kĩndũ ũtonya kũtũmĩa ũthambalale. Vate nzika, ndũlea kũtana nũndũ nĩwaũthũmũsya waeka kũthĩnĩka mũno ũitata kwĩkala ũthambalele. Ĩndĩ kĩndũ kĩu kĩitoetye kũkwĩkalya thayũ. Nĩkĩ? Nũndũ kĩw’ũ kĩu nĩ kĩthithu, na ndwĩsa kũvĩta waema kũkwata ĩsiwa yĩtonya ũkumya vau ũkanganĩ. Kwoou no nginya mũndũ akwĩkĩsye ĩkanda na aikũkusya nginya ũvike ĩsiwanĩ yĩu. Yeova aisye ũũ ĩũlũ wa Aisilaeli ala meelelũkĩte makamũtia: “Nĩnamakusisye . . . na ndii sya wendo.” (Osea 11:4, The Holy Bible in Current Kikamba Language) Ũu now’o Ngai wĩw’aa ĩũlũ wa ala maekete kũmũthũkũma na makaitavĩwa nĩ mathĩna na mawĩmakĩo, ta ũla mũndũ ũkũthelekelya ũkanganĩ. Nĩwendaa mamanye kana nũmendete, na nĩwendaa kũmatetheesya mamũsyokee. Na Yeova no aũtũmĩe ũmatetheesye kwona ũndũ ũmendete.
13. Weta ũndũ weekĩkie ũkwonany’a ũndũ wendo wa ana-a-asa ũtonya kũtetheesya mũndũ amũsyokee Yeova.
13 Nĩ ũndũ wa vata tũĩkĩĩthye ala mavoete kana Yeova nũmendete, naitũ nĩtũmendete. Pablo, ũla ũwetetwe ĩsomonĩ ĩvĩtu, avoie kwa ĩvinda ya myaka mbee wa 30. Aĩtye: “Kwakya kũmwe numaalĩte mũsyĩ nĩnakomanie na mwĩĩtu-a-asa mũkũũ na aneena nakwa nesa na e na tei. Nambĩĩe kũĩa ta kana. Namwĩie Yeova nĩ ta eĩmũtũmĩte aneene nakwa. Kuma vau nĩw’o natwie kũmũsyokea Yeova.”
TW’ĨĨKA ALA ONZU NA ŨIMAĨKĨĨTHYA NŨMENDETE
14. Kwosana na ngelekany’o ĩla yĩ ĩandĩkonĩ ya Luka 15:4, 5, mũithi ũsu eekie ata ĩtina wa kwona ĩlondu yĩla yaĩ yau?
14 Nĩtwaĩlĩte kũendeea kũtw’ĩĩka ala mavoete. O ta ũla mwana Yesũ wawetie ngelekany’onĩ, nĩmatonya kwĩthĩwa maũmĩĩte mũno ngoonĩ. Na no kwĩthĩwa monzetw’e kĩ-veva nĩ maũndũ ala mamakwatĩte me nthĩ ĩno ya Satani. Nĩtwaĩlĩte kũmatetheesya mambĩĩe kũmũĩkĩĩa Yeova ĩngĩ. Ngelekany’onĩ ĩla Yesũ wanenganie ya ĩlondu yau, nĩwaeleisye ũndũ mũĩthi wakuie ĩlondu yĩu kĩtuonĩ kyake na ayĩtũnga ĩĩthyanĩ. Mũĩthi ũsu nĩwatũmĩĩte ĩvinda na vinya mwingĩ ayĩsa kũtw’ĩka nĩwayona. Ĩndĩ o na ĩtina wa kũyona, nĩweesĩ kana no nginya ayĩtũnge ĩĩthyanĩ ayĩkuĩte nũndũ yĩi na vinya wa kwĩtũnga.—Soma Luka 15:4, 5.
15. Tũtonya kũtw’ĩĩka ata ala onzu na mekwenda kũmũsyokea Yeova? (Sisya ĩsandũkũ “ Kĩndũ kya Vata Mũno.”)
15 No kwĩthĩwa twaĩlĩte kũtũmĩa ĩvinda na vinya mwingĩ tũitetheesya ala mavoete masinde maũndũ ala meũtuma maemwa nĩ kũmũthũkũma Yeova ĩngĩ. Ĩndĩ nũndũ twĩ na veva wa Yeova, Ndeto yake, na mavuku ala tũkwataa kĩkundinĩ, no tũmatetheesye makalũlũmĩlya ngwatanĩo yoo na Yeova. (Alo. 15:1) Tũtonya kwĩka ũu ata? Mũtumĩa ũmwe wa kĩkundi wĩ na ũtũĩka aĩtye, “Andũ aingĩ mavoete nĩmethĩawa maĩle kũmanyĩw’a Mbivilia ĩtina wa kũtw’a kana kwa w’o nĩmekwenda kũmũsyokea Yeova.” * Kwoou wakũlw’a ũmanyĩsye ũmwe wavoie, wĩona ata ũketĩkĩla kĩanda kĩu wĩ mũtanu? Mũtumĩa ũsu aendeee kwasya, “Mũtavany’a ũla wakũlw’a amanyĩsye mũndũ ũvoete aĩle kwĩthĩwa e mũnyanya mũseo ũsu ũvoete ũtonya kũmũĩkĩĩa, na kũneena nake ateũmũvitha kĩndũ.”
NĨVETHĨAWA ŨTANU ĨTUNĨ NA KŨŨ NTHĨ
16. Twĩsĩ ata kana alaĩka mailea kũtũtetheesya kũmantha ala mavoete?
16 Ve maũndũ maingĩ mekĩkĩte mekwonany’a kana alaĩka nĩmatũtetheeasya kũmantha ala mavoete na me na mea ma kũmũsyokea Yeova. (Ũvu. 14:6) Kwa ngelekany’o, mwana-a-asa wavoete wĩtawa Silvio wĩkalaa Ecuador nĩwavoyie Yeova na kĩthing’ĩĩsyo amũtũmĩe mũndũ wa kũmũtetheesya asyoke kĩkundinĩ. Aendeee kũvoya, nĩweewie ngengele ya mũomonĩ yakũnwa. Avingũa eethĩie atumĩa elĩ maũngye mũomonĩ. Nĩmatanie mũno kwambĩĩa kũmũtetheesya vala wendaa ũtethyo.
17. Nĩ ũathimo wĩva tũkwataa twatetheesya ala mavoete?
17 Twatetheesya ala onzu mamũsyokee Yeova, tũkakwata ũtanu mwingĩ mũno. Salvador nĩ vainia wĩkĩaa kĩthito kingĩ atetheesye ala mavoete, na aĩtye: “Mavinda amwe nĩthĩaa nĩkelemisye methoi nĩ mũyo. Nĩtanaa mũno kwona Yeova aivonokya ũmwe wa malondu make ma vata kuma nthĩ ĩno ya Satani, na nĩnĩtanaa kũmanya kana nũnengie kĩanda kya kũthũkũma vamwe nake wĩanĩ ũsu.”—Meko 20:35.
18. Ethĩwa nũvoete, nĩ ũndũ wĩva waĩle kwĩkala wĩsĩ?
18 Ethĩwa nũvoete, mwa manya kana Yeova ndaaeka kũkwenda. Nĩwendaa ũmũsyokee. Ĩndĩ no nginya wĩkĩe kĩthito nĩ kana wĩke ũu. Na o ta ĩthe wa ũla mwana ũwetetwe ngelekany’onĩ ya Yesũ, Yeova ekalaa ekwatĩtye kana nũkumĩla, na yĩla ũkakwona, ndakalea ũkũthokya kwake ĩngĩ.
WATHI 103 Atumĩa Nĩ Mĩthĩnzĩo Kĩkundinĩ
^ kal. 5 Yeova endaa ala maekete kũtavany’a na kũthi maũmbanonĩ mamũsyokee. Ve maũndũ maingĩ tũtonya kwĩka tũkekĩa vinya ala mavoete mew’e ũũ Yeova ũmatavĩtye: “Nzyokeai.” Ĩsomonĩ yĩĩ nĩtũũneenea ũndũ tũtonya kũmatetheesya mamũsyokee.
^ kal. 7 Masyĩtwa amwe nĩ mavĩndũe.
^ kal. 15 Amwe mavoete nĩmatonya kũtetheka mũno mamanyĩw’a ilungu imwe syĩ ĩvukunĩ Ũndũ Ũtonya Kwĩyĩkalya Wendonĩ wa Ngai, namo angĩ no matetheke mamanyĩw’a ilungu syĩ nthĩnĩ wa ĩvuku Mkaribie Yehova. Kamitii ya Ũthũkũmi ya Kĩkundi nĩyo ĩtusaa nũũ ũkũmanyĩsya mũndũ ũvoete.
^ kal. 68 MAELESYO MA VISA: Ana-a-asa atatũ me kĩvathũkany’o metetheesya mwana-a-asa ũmwe ũkwenda kũmũsyokea Yeova. Ũmwe eĩka ũu kwa kũneena nake simũnĩ, ũngĩ eeka ũndũ ũũmũĩkĩĩthya kana nũmwendete, na ũla ũngĩ nũmwĩthukĩĩsye nesa na nũkũmũelewa.
