Mũtũmwa Vaũlo atavisye Aklĩsto ma kĩkundi kya Thesalonika atĩĩ: “Ethĩwa ve mũndũ ũte kũatĩĩa ndeto sitũ ila syĩ valũanĩ ũũ, mwĩkĩei ũvano.” (2 Ath. 3:14) Navu tene, tũnaasya kana mwolooto ũsu ũnengetwe atumĩa. Ethĩwa ve mũndũ wĩthĩĩtwe ate kũatĩĩa myolooto ya Mbivilia o na ĩtina wa kũkanwʼa mavinda kauta, atumĩa nĩmanaĩ matonya kumya ũvoo ũkonetye ũndũ ũsu. Ĩtina wa ũu, atavanyʼa maineethĩawa maĩlĩte kũtindanyʼa na mũndũ ta ũsu, ate o yĩla me maũmbanonĩ kana ũtavanyʼanĩ.

Ĩndĩ yu ve na vata wa kwĩka ũalyũku ũndũnĩ ũsu. Vate nzika, ũtao wa Vaũlo woonanasya ũtwi ũla Mũklĩsto ũmwe ũmwe waĩlĩte kwĩka maũndũnĩ me kĩvathũkanyʼo. Kwoou oyu vai na vata wa atumĩa kumya ũvoo wa ũkanyʼo. Nĩkĩ ũalyũku ũsu wĩkiwe? Kwasũanĩa mĩsoa ĩla ĩthyũlũlũkĩte ũtao ũsu Vaũlo wanenganie.

Vaũlo aisye kana ve andũ amwe kĩkundinĩ kĩu mataĩ na “mwĩkalĩle mũseo.” Nĩmavũthĩĩasya ũtao ũla wamanengete. Mbeenĩ, aĩ amathokeete na akameaĩa ũũ: “Ethĩwa mũndũ o na wĩva ndekwenda kũtethya wĩa, o na kũya ndakaye.” O na vailye ũu, amwe nĩmaleaa kũthũkũma nĩ kana meanĩsye mavata moo, o na kau maĩ na vinya wa kwĩka ũu. O na ĩngĩ, nĩmeelikasya maũndũnĩ matamakonetye. Aklĩsto maaĩlĩte kũkua ata andũ ta asu maĩ na mwĩkalĩle ũte mũseo?—2 Ath. 3:​6, 10-12.

Vaũlo aisye kana mũndũ ũsu aĩlĩte ‘kwĩkĩwa ũvano.’ Ndeto ya Kĩkiliki ĩla ĩtũmĩĩtwe vau yonanasya kũmanya mũndũ ta ũsu na kwĩsũvĩa ndũkethĩwe na mwĩkalĩle ta wake. Vaũlo anengie kĩkundi kyonthe ũtao ũsu, ĩndĩ ti atumĩa me oka. (2 Ath. 1:1; 3:6) Kwoou Mũklĩsto ũmwe ũmwe ũla woona mwana-a-asa kana mwĩĩtu-a-asa ate kũatĩĩa ũtao ũla wĩ Ndetonĩ ya Ngai aaĩlĩte kũtwʼa ‘kũeka kũvulana nake.’

Ĩndĩ yo kĩu kĩonanyʼa kana mũndũ ũsu aaĩlĩte kũkuwa ta ũvetetwe kĩkundinĩ? Aiee. Twĩasya ũu nũndũ Vaũlo ongelile kwasya: “Endeeai kũmũtaa ta mwana-a-asa.” Kwoou Mũklĩsto ũmwe ũmwe aĩ atonya kũvulana nake maũmbanonĩ na ũtavanyʼanĩ, ĩndĩ aitwʼa kana ndetũmĩa ĩvinda nake maũndũnĩ ma kwĩtanĩthya. Nĩkĩ tũkwasya ũu? Vaũlo aisye: “Nĩ kana ewʼe nthoni.” Nũndũ wa kwĩkĩwa ũvano, Mũklĩsto ũsu wĩ na mwĩkalĩle ũte mũseo aĩ atonya kwĩwʼa nthoni na aivĩndũa mwĩkalĩle wake.—2 Ath. 3:​14, 15.

Aklĩsto ũmũnthĩ matonya kũatĩĩa mwolooto ũsu ata? Mbee, nĩtwaĩlĩte kũĩkĩĩthya kana kwa wʼo, mũndũ e na ‘mwĩkalĩle ũte mũseo,’ o tondũ Vaũlo wawetie. We ndawetaa ala matonya kwĩka motwi me kĩvathũkanyʼo na maitũ nũndũ wa wasya woo wa ngoo kana me na mawendi me kĩvathũkanyʼo na maitũ. O na ndawetaa ala matũũmĩĩtye. Vandũ va ũu, aneeneaa ala manengetwe ũtao kuma Ndetonĩ ya Ngai na makaũvũthĩĩsya.

Ũmũnthĩ, ethĩwa nĩtwamanya kana Mũklĩsto ũngĩ nĩwĩthĩĩtwe aivũthĩĩsya ũtao ũla wĩ Ndetonĩ ya Ngai, a twaĩlĩte kũtwʼa ene kana tũikatindanasya nake tũyĩtanĩthya. Na nũndũ ũsu nĩ ũndũ ũkonetye ũtwi wa mũndũ mwene, tũyaĩlĩte kũũneenea na andũ angĩ mate ma mũsyĩ witũ. O na ĩngĩ, tũkaendaa ũtavanyʼa na maũmbanonĩ na mũndũ o ũsu. Na esa kũvĩndũa mwĩkalĩle wake, tũkeethĩwa tũtonya kũtindanyʼa nake ĩngĩ.