MBIVILIANĨ ve maelesyo maingĩ ma kuma ngoonĩ ma ‘andũ o taitũ.’ (Yak. 5:17) Kwa ngelekany’o, nĩtũeleawa Vaulo nesa yĩla twasoma ndeto ila wawetie kuma ngoonĩ syĩ nthĩnĩ wa Alomi 7:21-24. Aisye atĩĩ: “Yĩla ngwenda kwĩka ũla ũseo, ũla ũthũku wĩthĩawa vamwe nakwa. . . . Nyie nĩ mũndũ mũthĩni!” Yĩla twambĩĩa kũthĩnĩka nũndũ wa mavĩtyo maitũ, nĩtwĩkĩawa vinya kũmanya kana mũndũ mũĩkĩĩku ta Vaulo no wathĩnĩkaa.

Ve ũndũ ũngĩ Vaulo wawetie kuma ngoonĩ. Nthĩnĩ wa Akalatia 2:20 nĩwawetie kana aĩ na mũĩkĩĩo vyũ kana Yesũ “[nĩwamwendie] na eenengane we mwene kwondũ [wake]” mwene! We naku nĩwĩw’aa oou? Nũtonya kwĩthĩwa ũtew’aa ũu mavinda onthe.

Ethĩwa nĩtũthĩnĩkaa na tũkew’a twĩ vathei nũndũ wa naĩ tweekie tene, mavinda amwe nĩtũtonya kũemwa nĩ kũĩkĩĩa kana Yeova nĩwatũekeie na nũtwendete. O na nĩtũtonya kwona wĩ ũndũ wĩ vinya mũno kwosa nthembo ya wovosyo ta mũthĩnzĩo twanengiwe ithyĩ ene. We Yesũ endaa twose nthembo ya wovosyo ata? Nĩ kyaũ kĩtonya kũtũtetheesya tũmyose ũndũ vaĩle? Ekai tũneenee makũlyo asu elĩ.

Yesũ endaa ũtale nthembo ĩla waumisye ta mũthĩnzĩo wakũnengie we mwene. Twĩsĩ ũu ata? Kwakũna visa kĩlĩkonĩ wone maũndũ aa maeleetw’e nthĩnĩ wa Luka 23:39-43. Tata wone mũndũ ũathĩĩwe mũtĩnĩ ũtee wa Yesũ. Mũndũ ũsu easya kana we nĩ mwene naĩ. No nginya naĩ ĩla wĩkĩte yĩthĩwe yĩ nthũku mũno nũndũ andũ ala maathĩĩawa mũtĩnĩ maĩ ing’endilĩ ila syaemie. Ĩndĩ mũndũ ũsu nũkũthĩnĩka mũno, na eĩsũva Yesũ aimwĩa atĩĩ: “Wĩndilikana yĩla wĩlika Ũsumbĩnĩ waku.”

Yesũ amũsũngĩie ata? Kwasũanĩa Yesũ aivĩndũa mũtwe wake alĩtw’e mũno nĩ kana asisye mũndũ ũsu. O na kũtw’ĩka ew’ĩte woo mwingĩ, aitata mũno amũsisye na ũthyũ mũtanu na ĩndĩ aimũĩkĩĩthya ũũ: “Nĩ w’o ũmũnthĩ nĩngũkwĩa, ũkeethĩwa vamwe nakwa Ũseonĩ.” Yesũ aĩ atonya kũvanga eĩka kũlilikany’a mũndũ ũsu kana “Mwana wa mũndũ [ookie] kũnengane thayũ wake wĩthĩwe wovosyo kwondũ wa aingĩ.” (Mt. 20:28) Vandũ va ũu, Yesũ amwonisye o nesa kana nthembo ĩsu nĩyamũkonetye we mwene. Atũmĩie ndeto ‘ũkeethĩwa nakwa,’ kwonany’a aneenaa nake ta ũkũneena na mũnyanya. Na nĩwoonisye mũndũ ũsu kana nthembo ĩsu nĩyesaa kũmũtethya we mwene yĩla wamũweteie kana akeethĩwa vamwe nake nthĩ nzaũ.

Vate nzika, Yesũ endaa mũndũ ũsu one nthembo ĩla wakilyĩ kumya ta mũthĩnzĩo ũtonya kũmũtethya we mwene. Ethĩwa Yesũ aĩ na woni ta ũsu ĩũlũ wa kĩng’endilĩ kĩtaĩ kyaakwata mwanya wa kũmũthũkũma Ngai, wĩona ta wonaa ata Mũklĩsto ũmũthũkũmaa Ngai? Ĩndĩ nĩ kyaũ kĩtonya kũtũtetheesya tũĩkĩĩe kana kwa w’o nthembo ya Klĩsto no ĩtũtethye ithyĩ ene, o na kũtw’ĩka ve naĩ tweekie tene?

Nũndũ Yesũ nĩwamũnengie Vaulo wĩa wa kũtavany’a, Vaulo nĩwaeleiwe kana Yesũ akwie kwondũ wake. Nĩkĩ tũkwasya ũu? Aisye: “Nĩmũtũngĩa mũvea Klĩsto Yesũ Mwĩaĩi waitũ, ũla wambĩkĩie vinya, nũndũ nĩwoonie nĩ mũĩkĩĩku na anenga ũthũkũmi, o na kau mbeenĩ naĩ mũumi wa Ngai na mũthĩny’a wa andũ make na naĩ mũng’endu.” (1 Tim. 1:12-14) Wĩa ũla Yesũ wanengie Vaulo nĩwamũĩkĩĩthisye kana nĩwamwĩw’ĩie tei, nĩwamwendete, na nĩwamũĩkĩĩe vyũ. Yesũ nũnengete kĩla ũmwe witũ wĩa wa kũtavany’a o ũndũ wanengete Vaulo. (Mt. 28:19, 20) W’o wĩa ũsu no ũtũtetheesye, o ũndũ watetheeisye Vaulo, kũelewa kana Yesũ akwie kwondũ witũ?

Albert, ũla ũnamũsyokeie Yeova ĩtina wa kwĩthĩwa e mũtenge kwa vakuvĩ myaka 34, aĩtye: “Naĩ syakwa syĩthĩawa mbee wakwa mavinda onthe. Ĩndĩ yĩla nĩ ũtavany’anĩ nĩw’aa wĩa ũũ wa kũtavany’a ne kĩanda nĩnengetwe nĩ Yesũ, o tondũ mũtũmwa Vaulo weew’aa. Wĩa ũsu nũnengae vinya, ũkatuma nĩkala nĩ mũtanu, na nĩ na wĩkwatyo wa ĩvinda yũkĩte.”—Sav. 51:3.

Allan, ũla waĩ mũng’endu na mũtũli wa mĩao atanamba kwĩmanyĩsya ũw’o, aĩtye: “Nĩnĩkalaa ndisũanĩa ĩũlũ wa andũ onthe ala naũmĩisye. Mavinda amwe kĩu kĩtumaa nĩkw’a ngoo mũno. Ĩndĩ nĩnĩmũtũngĩaa Yeova mũvea nũndũ wa kwĩtĩkĩlya mwĩki wa naĩ takwa atavye angĩ ũvoo mũseo. Yĩla noona andũ mayĩtĩkĩla ũvoo mũseo, ũu ũndilikanasya kana Yeova nĩ mũseo na nũmbendete. Nonaa aindũmĩa kũtetheesya ala mekĩte maũndũ mathũku o takwa.”

Wĩa wa kũtavany’a ũtũtetheeasya kũsũanĩa maũndũ maseo na kwĩka kĩla kyaĩlĩte. O na nũtũĩkĩĩthasya kana Yesũ nũtwĩw’ĩaa tei, nũtwendete, na nũtũĩkĩĩe vyũ.

Nthĩ ĩno nthũku ya Satani ĩyĩsa kũtw’ĩka nĩyaanangwa, ngoo sitũ nitonya kũendeea kũtũandũa nũndũ wa mavĩtyo ala twĩkĩte. Nĩ kyaũ kĩtonya kũtũtetheesya tũmĩĩsye yĩla tũkwĩw’a ũu?

Yĩla Jean waĩ wa mũika eekaa maũndũ mathũku evithĩte, na nũndũ wa ũu mavinda maingĩ ew’aa aiandũĩka. Ĩndĩ easya, “Nĩnĩtanaa kũmanya kana ‘Ngai nĩ mũnene kwĩ ngoo sitũ.’” (1 Yoa. 3:19, 20) O ta Jean, no tũtane twamanya kana Yeova na Yesũ nĩmaeleawa kana twĩ ene naĩ. Lilikana kana nũndũ nĩmatwendete, manenganie nthembo ya wovosyo kwondũ wa eki ma naĩ ala melilaa.—1 Tim. 1:15.

Yĩla wavoya na wavindĩĩsya ũndũ Yesũ woonaa eki ma naĩ, na yĩla weeka kĩla ũtonya nĩ kana wĩanĩsye wĩa ũla ũkũnengete, wĩthĩawa ũyĩĩkĩĩthya ngoo yaku kana nthembo ya wovosyo yaumiw’e kwondũ waku mwene. Weeka ũu, ũkeethĩwa ũtonya kwasya ũũ ta Vaulo: Yesũ “[nĩwambendie] na eenengane we mwene kwondũ wakwa.”