1-2. Kwosana na ĩandĩko ya Savuli 34:8, tũtonya kũmanya ata kana Yeova nĩ mũseo?

TWASYE mũndũ nĩwaũnenga lĩu ũtaaya. No ũmanye ũndũ mũna ĩũlũ wa lĩu ũsu kwa kũũsisya, kũũnyungĩa, kũmanya ũndũ ũuawa, kana kũkũlya angĩ ũndũ ũsamaa. Ĩndĩ nzĩa ĩla nzeo ya kũmanya kana no ũwende nĩ kwĩsamĩa we mwene.

² O ta ũu, no tũmanye ũseo wa Yeova kwa kũsoma Mbivilia na mavuku maitũ, o vamwe na kwĩthukĩĩsya andũ angĩ maielesya ũndũ Yeova ũmaathimĩte. Ĩndĩ nĩ kana tũelewe nesa vyũ ũndũ Yeova ũseũvĩte, no nginya ‘twĩsamĩe’ ithyĩ ene ũseo wake. (Soma Savuli 34:8.) Ekai tũtũmĩe ngelekany’o ĩmwe yonanĩtye ũndũ tũtonya kwĩka ũu. Twasye nĩtũkwenda kũlika ũthũkũminĩ mũna wa ĩvinda yonthe, ĩndĩ nĩ kana twĩke ũu, ũyĩthĩa no nginya tũolange maũndũ ala twĩ namo. No kwĩthĩwa tũsomaa ĩngĩ na ĩngĩ watho wa Yesũ wa kana twavĩtya maũndũ ma Ũsumbĩ mbee, Yeova akatũnengae syĩndũ ila twĩ na vata nasyo, ĩndĩ ũyĩthĩa ithyĩ ene tũyaaĩyonea watho ũsu ũianĩa kwitũ. (Mt. 6:33) Ĩndĩ nũndũ nĩtũĩkĩĩe watho ũsu wa Yesũ, tũiola ngalama sitũ, tũieka kũthũkũma masaa maingĩ, na tũitũnga kĩlĩko kitũ ũtavany’anĩ. Tweeka ũu, now’o tũtonya kwĩyonea kana kwa w’o Yeova nũthĩnĩkĩaa mavata maitũ. Twĩthĩawa ‘tweesamĩa’ ũseo wa Yeova.

3. Kwosana na Savuli 16:1, 2, naaũ meyoneaa ũseo wa Yeova?

³ Yeova nĩ “mũseo kwa onthe,” o na kwa ala matamwĩsĩ. (Sav. 145:9; Mt. 5:45) Ĩndĩ aathimaa mũno ala mamwendete na mamũthũkũmaa na ngoo yoo yonthe. (Soma Savuli 16:1, 2.) Ekai twone maũndũ amwe maseo Yeova ũtwĩkĩte.

4. Yeova onanasya ata kana nĩ mũseo kwa ala mambĩĩa kũmũthengeea?

 ⁴ Kĩla ĩvinda twatũmĩa maũndũ ala Yeova watũmanyĩsya, nĩtwonaa tũitetheka. Kwa ngelekany’o, yĩla tweemanyĩisye ĩũlũ wake na twamwenda, nĩtwoonie aitũtetheesya tũekane na mosũanĩo na imanyĩo ila syatumaa tũtethĩwa anyanyae. (Ako. 1:21) Na yĩla tweeyumisye tũmũthũkũme na twavatiswa, nĩtweeyoneie ũseo wake mũnango nũndũ nĩwatumie twĩthĩwa na wasya mũseo wa ngoo, na atũkusya tweethĩwa anyanyae.—1 Vet. 3:21.

5. Twĩyoneaa ũseo wa Yeova ata yĩla twĩ ũtavany’a?

⁵ O na ĩngĩ, yĩla twĩ ũtavany’a nĩtwĩyoneaa ũseo wa Yeova. Kwa ngelekany’o, we nĩwĩthĩwa wĩ nthoni? Athũkũmi aingĩ ma Yeova me nthoni. Nũtonya kwĩthĩwa ũtanamba kũtw’ĩka mũthũkũmi wa Yeova, ũtaasũanĩa kana no ũthi kwa mũndũ ũtesĩ na ũimũtavya ũvoo ũtendetwe nĩ andũ aingĩ. Ĩndĩ ũmũnthĩ, wĩkaa ũu kĩla ĩvinda. Na eka ũu, Yeova nũkũtetheesye ũkenda mũno wĩa ũsu wa kũtavany’a! O na nĩwĩyoneete Yeova aikũtetheesya kwa nzĩa ingĩ syĩ kĩvathũkany’o. Kwa ngelekany’o, yĩla wakomanie na mũndũ ũkũũvĩnga, nĩwaũtetheeisye wekala ũuĩtye. O na yĩla wakomanie na mũndũ ũkwendeew’a, nĩwaũtetheeisye walilikana ĩandĩko yĩla yĩmwaĩle vyũ. Na yĩla wakomanie na andũ mate kwendeew’a nĩ ũvoo mũseo, nĩwaũnengie vinya wa kũendeea kũtavany’a.—Yel. 20:7-9.

6. Maũndũ ala Yeova ũtũmanyĩasya maĩkĩĩthasya ata kana nĩ mũseo?

⁶ Ũndũ ũngĩ Yeova wĩkĩte atwony’e ũseo wake nĩ kũtũmanyĩsya ũndũ tũtonya kũtavany’a. (Yoa. 6:45) Kwa ngelekany’o, yĩla twĩ maũmbanonĩ ma katĩkatĩ wa kyumwa, nĩtwĩthukĩĩasya ilungu iseũvĩtw’e nesa sya “Ũndũ Ũtonya Kwasya,” na nĩtwĩkĩawa vinya tũtũmĩe maũndũ ala tweemanyĩsya ũtavany’anĩ. Mbeenĩ, nĩtũtonya kwĩw’a tũiemwa nĩ kũtũmĩa kaũndũ keũ ũtavany’anĩ, ĩndĩ yĩla twakatũmĩa, no twĩthĩe kana kau nĩko kekwendeesya andũ kĩsionĩ. O na maũmbanonĩ maitũ ma kĩkundi vamwe na maũmbanonĩ manene, nĩtwĩkĩawa vinya tũtũmĩe nzĩa syĩ kĩvathũkany’o sya kũtavany’a tũtonya kwĩthĩwa tũtaaitũmĩa. O nakyo kĩu no kyambe kũtũema, ĩndĩ twatata tũtũmĩe nzĩa isu, nĩtũmũnengae Yeova ũndũ wa kũathima. Yu ekai twone moathimo amwe tũkwataa yĩla twamwĩkwatya Yeova na twatũmĩa nzĩa nzaũ sya kũtavany’a nĩ kana tũmũnenge kĩla kĩseo vyũ, o na ethĩwa tũkwatĩtwe nĩ maũndũ mailye ata. Na ĩndĩ nĩtũkwona ũndũ tũtonya kwongelanga ũthũkũmi witũ.

7. Nĩ moathimo meva tũkwataa tweekĩa kĩthito twongelange ũthũkũmi witũ?

⁷ Nĩtũmũthengeeaa Yeova mũnango. Kwasũanĩa ngelekany’o ya mũtumĩa wa kĩkundi wĩtawa Samuel * na mũka, ala mekalaa Colombia. Mbeenĩ, nĩmatanĩaa kũkũna ũvainia me kĩkundinĩ kyoo, ĩndĩ nĩmendaa kwongelanga ũthũkũmi woo kwa kũthamĩĩa kĩkundinĩ kĩ na vata mũnene wa atavany’a. Nĩ kana meanĩsye kĩu, yaĩ no nginya meyĩime maũndũ amwe. Samuel aĩtye: “Nĩtwatũmĩie ũtao ũla wĩ nthĩnĩ wa Mathayo 6:33 na twaeka kũthooaa syĩndũ tũte na vata nasyo. Ĩndĩ ũndũ ũla tweew’aa wĩ vinya mũno kwĩka, nĩ kũtia nyũmba yitũ. Yaakĩtwe ũndũ twendaa, na nĩtwaminĩte kũmĩĩvĩa.” Ĩtina wa kũthamĩĩa kĩkundinĩ kĩu kyeũ, meethĩie kana maĩ matonya kũtũmĩa mbesa nini vyũ kwĩ ila matũmĩaa me kwoo. Samuel aendeee kwasya: “Nĩtwĩyoneete ũndũ  Yeova ũtũtongoeasya na tũkona aisũngĩa mboya sitũ. Yu nĩtwĩyoneete nesa kana Yeova nũtanĩthaw’a nithyĩ na nũtwendete mũno.” We nũkwona ta ve ũndũ wĩka ũkongelanga ũthũkũmi waku? Weeka ũu, no wĩkale ũte na nzika kana kĩu kĩkatuma ũmũthengeea Yeova, nake akaũthĩnĩkĩaa.—Sav. 18:25.

8. Ndeto sya Ivan na Viktoria syĩũmanyĩsya kyaũ?

⁸ Nĩtũtanĩaa ũthũkũmi witũ. Kwasũanĩa ndeto sya mwana-a-asa wĩtawa Ivan na mũka, Viktoria, ala nĩ mavainia mekalaa Kyrgyzstan. Matwie kwĩkala mate na syĩndũ mbingĩ nĩ kana methĩwe matonya kwĩyumya matetheesye wĩanĩ w’onthe ũla manengwa, vamwe na wĩa wa maũndũ ma myako. Ivan aĩtye: “Wĩa w’onthe twanengwa twaũthũkũmaa na kĩthito. O na kau mũthenya ũithela tweew’aa tũnoete vyũ, tweew’aa twĩ na mũuo na twĩ eanĩe vyũ nũndũ nĩtweesĩ twatũmĩa vinya witũ wĩanĩ wa Ũsumbĩ. O na nĩtwatanaa mũno nũndũ wa anyanya eũ ala twakwataa na maũndũ maseo mũno ala tweeyoneaa.”—Mko. 10:29, 30.

9. Mwĩĩtu-a-asa ũmwe ũkwatĩtwe nĩ maũndũ momũ ekĩte ata ongelange ũthũkũmi wake, na atethekete ata?

⁹ Nĩtũtanĩaa kũmũthũkũma Yeova o na mavinda ala twakwatwa nĩ maũndũ momũ. Kwasũanĩa ngelekany’o ya mwĩĩtu-a-asa mũkũũ na ndiwa wĩkalaa West Africa wĩtawa Mirreh. Yĩla wathũmũĩe wĩa wa ũtakĩtalĩ, nĩwoosie ũvainia. Mirreh nũthĩnaw’a mũno nĩ mũtambũko, na nũndũ wa ũu, ndatonya kũtavany’a nyũmba kwa nyũmba mbee wa ĩsaa yĩmwe. Ĩndĩ ethĩawa atonya kũtavany’a masaa maingangĩ aitũmĩa kakalĩ ka mavuku. Nũkwatĩte masyokeo maingĩ na amanyĩw’a aingĩ ma Mbivilia, na amwe moo aneenaa namo atũmĩĩte simũ. Nĩ kyaũ kyatumie Mirreh ethĩwa na wendi wa kwongelanga ũthũkũmi wake? Aĩtye: “Nĩnĩmwendete Yeova na Klĩsto Yesũ mũno. Na nĩnĩmũvoyaa Yeova mavinda maingĩ andetheesye nĩke maũndũ maingĩ ũndũ ndonya ũthũkũminĩ wake.”—Mt. 22:36, 37.

10. O tondũ ĩandĩko ya 1 Vetelo 5:10 yonanĩtye, Yeova aathimaa ata ala mongelanga ũthũkũmi woo?

¹⁰ Nĩtũkwataa mwanya wa kũmanyĩw’a maũndũ maingangĩ nĩ Yeova. Vainia wĩtawa Kenny wa Mauritius nĩweeyoneie ũw’o wa ũndũ ũsu. Yĩla weemanyĩisye ũw’o, nĩwaumie yunivasiti, avatiswa, na alika ũthũkũminĩ wa ĩvinda yonthe. Aĩtye, “Nĩtataa vyũ nĩkale kwosana na ndeto sya mwathani Isaia, ũla waisye: ‘Ninyioo; ndũma nyie.’” (Isa. 6:8) Kenny nũtetheetye kwaka myako kauta ĩkonetye maũndũ ma Ũsumbĩ, o na nũtetheetye kũalyũla mavuku maneeneete Mbivilia kwa kĩthyomo kyake. Aĩtye, “Nĩnamanyĩaw’a ũtũĩka ũtonya kũndetheesya kwĩanĩsya ianda ila nanengwa.” Ĩndĩ ve maũndũ angĩ weemanyĩisye eka o ũndũ ũtonya kũthũkũma nesa wĩa ũla wanengwa. Ongelete kwasya, “Nĩnamanyie maũndũ ala ndatonya na namanya nguma ila naĩle kwĩthĩwa nasyo nĩ kana nĩthĩwe ndonya kũmũthũkũma Yeova na ana-a-asa nesanga.” (Soma 1 Vetelo 5:10.) Wĩona ata ũkaosya maũndũ maku wone kana no wĩyumye ũmanyĩw’e maũndũ maingangĩ nĩ Yeova?

11. Eĩtu-a-asa amwe ma South Korea meekie ata nĩ kana maendeee kũtavany’a, na matethekete ata? (Sisya visa ĩthangũnĩ ya mbee vyũ.)

¹¹ O na yĩla ana-a-asa na eĩtu-a-asa mamũthũkũmĩte Yeova kwa ĩvinda yĩasa mambĩĩa kũtũmĩa nzĩa nzaũ ya kũtavany’a, nĩmamanyĩaw’a. Ĩvinda ya ũwau wa COVID-19, atumĩa ma kĩkundi kĩmwe kya South Korea maandĩkie: “Atavany’a amwe ala mataĩ matonya kumaala mũno makatavany’e nũndũ wa mathĩna ma mwĩĩ, yu matavanasya matũmĩĩte vulongulamu ya kũneena na andũ mwenene. Kwa ngelekany’o, ve eĩtu-a-asa atatũ me na myaka 80 na kĩndũ meemanyĩisye kũtũmĩa vulongulamu  ĩsu, na ũmũnthĩ matavanasya vakuvĩ kĩla mũthenya.” (Sav. 92:14, 15) We no wende kwongela ũthũkũmi waku na ũyĩsamĩa mũnango ũndũ Yeova ũseũvĩte? Kwoona maũndũ amwe matonya kũũtetheesya wongelange ũthũkũmi waku.

12. Nĩ kyaũ Yeova wathĩte ala mamwĩkwatasya?

¹² Ĩmanyĩsye kũmwĩkwatasya Yeova. Yeova atwathĩte kana akatũtulũĩlaa moathimo twamwĩkwatya na twamũnenga kĩla kĩseo vyũ. (Mal. 3:10) Mwĩĩtu-a-asa wa Colombia wĩtawa Fabiola nĩweeyoneie Yeova aianĩsya watho ũsu. Endaa kũtw’ĩka vainia wa kĩla ĩvinda avatiswa oou. Ĩndĩ mũũme na syana syoo itatũ meekwetye wĩa ũla wathũkũmaa. Kwoou yĩla wavikisye myaka ya litaya, nĩwamũvoyie Yeova na kĩthing’ĩĩsyo amũtetheesye. Aĩtye: “Kaingĩ, mũndũ akuaa ĩvinda yĩasa mũno ayĩsa kwambĩĩa kũkwata mbesa sya litaya, ĩndĩ nyie nambĩĩe kũinengwa ĩtina wa mwei o ũmwe tũ. Mwa noonie kĩu ta kyama!” Ĩtina wa myei ĩlĩ, nĩwoosie ũvainia. Yu e na myaka 70 na kĩndũ, na akũnĩte ũvainia vandũ va myaka mbee wa 20. Kuma oosa ũvainia, nũtetheetye andũ nyanya makavatiswa. Aĩtye, “O na kau ve mavinda nĩw’aa nde na vinya, kĩla mũthenya Yeova nũnengae vinya wa kũendeea na ũvainia.”

13-14. Nĩ ngelekany’o syĩva itonya kũtũtetheesya tũmwĩkwatasye Yeova na kwongelanga ũthũkũmi witũ?

¹³ Tetheka nĩ ngelekany’o sya ala mamwĩkwatisye Yeova. Mbivilia yusĩe ngelekany’o sya andũ mamũthũkũmaa Yeova na kĩthito kingĩ. Na kaingĩ Yeova amaathimaa kwa nzĩa  ya mwanya oona meeka kaũndũ kekwonany’a kana nĩmamwĩkwatĩtye. Kwa ngelekany’o, Mbivilia yonanĩtye kana Yeova aathimie Avalaamu o yĩla watiie mũsyĩ wake, “o na kau ndeesĩ kũla waendete.” (Aevl. 11:8) O nake Yakovo aathimiwe kwa nzĩa ya mwanya ĩtina wa kũkĩlany’a vinya na mũlaĩka. (Mwa. 32:24-30) Namo Aisilaeli me vakuvĩ kũlika Nthĩ ya Watho, mavotie kũinga Ũsĩ wa Yolotani o yĩla athembi makinyisye maaũ moo ũsĩnĩ ũsu, o na kau nĩwavingĩte.—Yos. 3:14-16.

¹⁴ O na no tũtetheke twasũanĩa ngelekany’o sya athũkũmi ma Yeova ma ũmũnthĩ, ala mamwĩkwatisye na mongelanga ũthũkũmi woo. Kwa ngelekany’o, mwana-a-asa wĩtawa Payton na kĩveti kyake, Diana, nĩmatanĩaa kũsoma ngewa sya ana-a-asa na eĩtu-a-asa mongelile ũthũkũmi woo kwa Yeova, ta ila ieleetw’e kĩlungunĩ kĩ na kyongo, “Nĩmeeyumisye Mo Ene na Ngenda.” * Payton aĩtye: “Tũendeee kũsoma ngewa isu, tweew’aa ta tũsyaĩĩsye mũndũ ũkũya lĩu wĩ mũyo. O ũndũ twaendeeie kũisoma, now’o twendie ‘kwĩsamĩa tũsisye kana Yeova nĩ mũseo.’” Mũthya, Payton na Diana nĩmathamĩĩie kĩsionĩ kyaĩ na vata mũnene wa atavany’a. We nũsomete ngewa ila syĩ kĩlungunĩ kĩu? Na nĩwĩloelete vitio Kũtavany’a Kĩsionĩ kya Vaasa—Australia, na ĩngĩ Kũtavany’a Kĩsionĩ kya Vaasa—Ireland, ila syĩ nthĩnĩ wa jw.org/kam? Kwĩka ũu no kũũtetheesye ũkamanya ũndũ ũtonya kwongelanga ũthũkũmi waku.

15. Atindany’a aseo matonya kũtũtethya ata?

¹⁵ Nyuva atindany’a aseo. Nĩ laisi mũno tũkenda kũsama lĩu tũtaaya twatindany’a na ala mawendete. O ta ũu, twatindany’a na ala mamũvĩtĩtye Yeova mbee thayũnĩ woo, nĩ laisi mũno tũkenda kwongelanga ũthũkũmi witũ. Mwana-a-asa wĩtawa Kent na mũka, Veronica, nĩmeeyoneie ũw’o wa ũndũ ũsu. Kent aĩtye: “Anyanya maitũ na andũ maitũ ma mũsyĩ nĩmatwĩkĩie vinya tũtate nzĩa syĩ kĩvathũkany’o sya kũmũthũkũma Yeova. Tweethĩie kana kũtindany’a na ala mavĩtasya maũndũ ma Ũsumbĩ mbee, nĩkwatumie twĩthĩwa na ũkũmbaũ wa kũtatĩthya ũndũ mweũ.” Yu Kent na Veronica nĩ mavainia ma mwanya nthĩ ya Serbia.

16. Kwosana na ĩla ngelekany’o ya Yesũ yĩ nthĩnĩ wa Luka 12:16-21, nĩkĩ twaĩle kwĩthĩwa twĩyũmbanĩtye kwĩyĩima maũndũ?

¹⁶ Ĩthĩwa wĩyũmbanĩtye kwĩyĩima maũndũ. Yeova ndendaa twĩyĩime kĩla kĩndũ nĩ kana tũmwendeesye. (Mũta. 5:19, 20) Ĩndĩ o na ũu wĩ o vo, tũkaemwa nĩ kwongela ũthũkũmi witũ tũikĩa kwasya syĩndũ imwe, twĩthĩwa tweeka ĩvĩtyo ta yĩla yeekiwe nĩ ũla mũndũ Yesũ waeleisye ngelekany’onĩ yake. Mũndũ ũsu eekĩie kĩthito emanthĩe syĩndũ nzeo ateũlũngana na Ngai. (Soma Luka 12:16-21.) Mwana-a-asa wa France wĩtawa Christian aĩtye, “Ndyatũmĩaa ĩvinda yingĩ na vinya mwingĩ ndimũthũkũma Yeova na nditetheesya andũ makwa.” Ĩndĩ e na kĩveti kyake nĩmatwie kwosa ũvainia. Na nĩ kana meanĩsye kĩu, maĩ no nginya matie mawĩa moo. Kwoou nĩ kana meanĩsye mavata moo, nĩmambĩĩisye kaviasala ka kũthesya kũndũ, na meemanyĩsya kwĩanĩwa nĩ tũvesa tũla makwataa. Mo nĩmatanaa nũndũ wa maũndũ ala meeyĩimie? Christian aĩtye, “Nĩtũtanĩaa ũtavany’a mũno kwĩ tene, na nĩtũtanĩaa kwona amanyĩw’a maitũ ma Mbivilia na andũ ala tũsyokeaa mayĩmanyĩsya ĩũlũ wa Yeova.”

17. Nĩ kyaũ kĩtonya kũtuma tũemwa nĩ kũtata nzĩa nzaũ sya kũtavany’a?

¹⁷ Ĩthĩwa wĩyũmbanĩtye kũtata nzĩa nzaũ sya kũtavany’a. (Meko 17:16, 17; 20:20, 21) Yĩla  ũwau wa COVID-19 wambĩĩe, mwĩĩtu-a-asa vainia wa Amelika wĩtawa Shirley aĩ no nginya avĩndũe nzĩa syake sya kũtavany’a. Mbeenĩ, eew’aa aiemwa nĩ kũtavany’a na simũ. Ĩndĩ yĩla mũsyaĩĩsya wa mũthyũlũlũko wathokeie kĩkundi kyoo, nĩwamamanyĩisye ũndũ matonya kwĩka ũu, na kĩu kyatuma ambĩĩa kũtavanasya na simũ. Aĩtye: “Mbeenĩ, neew’aa ndikĩa mũno, ĩndĩ oyu nĩnĩtanĩaa mũno kũtũmĩa nzĩa ĩsu. Yu tũkwatasya andũ aingangĩ kwĩ yĩla twatavanasya nyũmba kwa nyũmba!”

18. Tũtonya kũsinda ata mathĩna ala matonya kũtũsiĩĩa kwongelanga ũthũkũmi witũ?

¹⁸ Ĩthĩwa na mũvango na ũitata ũwĩanĩsye. Yĩla twakwatwa nĩ mathĩna, nĩtũvoyaa na tũisũanĩa mũno kĩla tũtonya kwĩka nĩ kana tũmamine. (Nth. 3:21) Kwa ngelekany’o, mwĩĩtu-a-asa wĩtawa Sonia nĩ vainia wa kĩla ĩvinda Europe, na ethĩawa kakundinĩ ka kĩthyomo kya Romany. Aĩtye: “Nĩnendete kũandĩka mĩvango yakwa vandũ ĩthangũnĩ na ndiyĩia vandũ ndonya kũyonaa na mĩtũkĩ. Mesanĩ yakwa vethĩawa na visa wa nzĩa ilĩ iendete kũndũ kwĩ kĩvathũkany’o. Yĩla ngwenda kwĩka ũtwi, nĩsiasya nzĩa isu, na ndyĩkũlya, ‘W’o ũtwi ũla ngwenda kwĩka wĩndwaa ngalĩko yĩva?’” Na yĩla Sonia wakwatwa nĩ mathĩna, nũtataa mũno ethĩwe na woni ũla waĩle ĩũlũ wamo. Aendeee kwasya, “Woni wakwa no ũtume nona thĩna ũla nakomana naw’o ta ũkũta ũũnziĩĩa kwĩanĩsya mĩvango yakwa, kana ta kĩao kĩũndetheesya kũmĩanĩsya.”

19. Twaĩle kũtw’a kwĩka ata?

¹⁹ Yeova nũtũathimaa maũndũnĩ maingĩ me kĩvathũkany’o. No twonany’e ũndũ tũtũngaa mũvea nũndũ wa moathimo asu kwa kwĩka kyonthe kĩla tũtonya tũmũtaĩe. (Aevl. 13:15) Ũndũ ũmwe tũtonya kwĩka nĩ kũmantha nzĩa nzaũ sya kwongelanga ũthũkũmi witũ, na kĩu no kĩtume Yeova atũathima mũnango. Kwoou ekai kĩla mũthenya tũmanthe nzĩa sya ‘kũsama tũsisye kana Yeova nĩ mũseo.’ Tweeka ũu, tũkeethĩwa tũatĩĩe ngelekany’o ya Yesũ, ũla waisye: “Lĩu wakwa nĩ kwĩka kwenda kwa ũla wandũmie, na kũmina wĩa wake.”—Yoa. 4:34.