ATUMĨA ma kĩkundi nthĩ yonthe nĩmatanĩaa mũno kĩanda kĩla me nakyo katĩ wa andũ ma Ngai. Methĩawa me ũathimo mũnene kwitũ ithyonthe! Ĩndĩ o mĩtũkĩ ve ũalyũku mũna ũneekiwe. Atumĩa ma kĩkundi ala akũũ nĩmanakũlilw’e manenge atumĩa ala mate akũũ ianda imwe ngito ila maneethĩawa nasyo. Kwa nzĩa yĩva?

Nthĩnĩ wa mũvango ũsu mweũ, asyaĩĩsya ma mũthyũlũlũko na amanyĩsya ma sukulu ila itakothaa kwĩkĩwa Mbetheli maĩle kũeka ũthũkũmi ũsu mavikya myaka 70. O na ĩngĩ, atumĩa ma kĩkundi mavikya myaka 80 nĩmaĩle kũtiĩa atumĩa ala mate akũũ mawĩa amwe, ta kwĩthĩwa mũvangĩthya wa Kamitii ya Ovisi wa Ũvonge kana mũvangĩthya wa nzama ya atumĩa kĩkundinĩ. Atumĩa asu akũũ mosete ata ũalyũku ũsu? Nĩmonanĩtye kana nĩ aĩkĩĩku kwa Yeova na kwa ũseũvyo wake!

Mũtumĩa ũmwe wĩtawa Ken, ũla wĩthĩĩtwe e mũvangĩthya wa Kamitii ya Ovisi wa Ũvonge kwa myaka vakuvĩ 49, aĩtye ũũ: “Nĩneetĩkĩlanile na ũtwi ũsu vyũ.” Ongelete kwasya: “Mũthenya ũla namanyie ĩũlũ wa mũvango ũsu, naĩ nĩnamũvoya Yeova kwakya kũu na ngamũtavya vata wa kwĩthĩwa na mwana-a-asa ũte mũkũũ akwatĩĩe kĩanda kya mũvangĩthya.” Atumĩa ala angĩ akũũ nthĩ yonthe maneenete ndeto ivw’anene na isu sya Ken. O na vailye ũu, nũndũ nĩmendete kũthũkũma  ana-a-asa moo nĩmaneewie mamba kũtũlĩka ngoo.

Mwana-a-asa ũngĩ wĩtawa Esperandio, ũla waĩ mũvangĩthya wa nzama ya atumĩa kĩkundinĩ kyoo, aĩtye, “Nĩneewie nakũnĩka o vanini.” Ĩndĩ asyokete akasya, “Neew’aa naĩle kwĩthĩwa na ĩvinda yingangĩ ya kũthĩnĩkĩa mathĩna ma mwĩĩ nũndũ maendeee kwongeleka.” Vate nzika, Esperandio no ũendeee kũmũthũkũma Yeova e mũĩkĩĩku na nĩ ũathimo kĩkundinĩ kyoo.

Nao nata ĩũlũ wa asyaĩĩsya ma kũthyũlũlũka ma ĩvinda yĩasa ala maumie ũthũkũminĩ ũsu na malika ũthũkũminĩ ũngĩ wĩ kĩvathũkany’o? Allan, ũla wathũkũmie ta mũsyaĩĩsya wa kũthyũlũlũka myaka 38, aĩtye ũũ, “Yĩla namanyie ũu, neewie natelema.” O na ũu wĩ o vo, nĩwoonaa ve vata wa kũmanyĩsya ana-a-asa ala mate akũũ wĩa, na no ũendeee kũthũkũma e mũĩkĩĩku.

Mwana-a-asa wĩtawa Russell, ũla kwa ĩvinda ya myaka 40 wĩthĩĩtwe e mũsyaĩĩsya wa kũthyũlũlũka na mũmanyĩsya wa sukulu ila itakothaa kwĩkĩwa Mbetheli, aĩtye kana mbeenĩ we na mũka nĩmaneewie makw’a ngoo. Aĩtye ũũ: “Nĩtwendete mũno kĩanda kĩla twaĩ nakyo na tweew’aa twĩ o na vinya wa kũendeea.” Yu Russell na mũka wake nĩmatũmĩaa maũndũ ala mamanyĩĩtw’e na maũndũ ala meyoneete kũtetheesya kĩkundi kyoo, na ũndũ ũsu nũtanĩthasya atavany’a ma kĩkundi kĩu.

O na ethĩwa we mwene ndũneekomana na maũndũ ta ala mawetwa, ũvoo ũla wĩ ĩvukunĩ ya 2 Samueli no ũkũtetheesye kũelewa ũndũ andũ ala manakomanie na maũndũ ta asu maneewie.

Kwasũanĩa ĩvinda yĩla mwana wa Mũsumbĩ Ndaviti, ũla weetawa Avisalomu, waleanile na ũsumbĩki wa ĩthe. Ndaviti nĩwakĩie auma Yelusaleme athi Maanaimu, ngalĩko ya wumĩlonĩ wa syũa ya Ũsĩ wa Yolotani. Ndaviti na ala waĩ namo maĩ na vata wa syĩndũ imwe sya lasima me kũu. We nũũlilikana kĩla kyeekĩkie?

Aũme atatũ ma kĩsio kĩu nĩmamaeteie itanda, malĩu, na mĩio mingĩ. Ũmwe wa aũme asu eetawa Mbalisilai. (2 Sam. 17:27-29) Yĩla ũlei wa Avisalomu waminiwe, Ndaviti nĩwasyokie Yelusaleme, na Mbalisilai nĩwamumaaisye nginya Yolotani. Ndaviti nĩwamwĩsũvie mathi Yelusaleme. Mũsumbĩ Ndaviti nĩweeyumisye kũmũnenga lĩu, o na kau Mbalisilai aĩ “mũndũ wĩ nguma [kana, mũthwii] mũno” na ndaĩ na vata wa kũnengwa lĩu. (2 Sam. 19:31-33) Nĩvatonyeka ũkethĩa Ndaviti nĩwendete nguma nzeo sya Mbalisilai na ũtao ũla waĩ atonya kũmũnenga. Vate nzika, ndwaĩ ũndũ mũnini kwa Mbalisilai kwĩkala na kũthũkũma nyũmbanĩ ya mũsumbĩ!

Nũndũ Mbalisilai nĩwoonaa maũndũ kwa nzĩa ĩla yaĩlĩte na aĩ na wĩnyivyo, nĩwawetie kana we e na myaka 80. Na ongela kwasya: “Nĩndonya kũvathũkan’ya katĩ wa ũseo na ũthũku?” Oonanasya ata? No nginya wĩthĩe Mbalisilai aĩ na ũĩ nũndũ wa myaka mingĩ ĩla wekalĩte. Na aĩ atonya kũnengane ũtao mũseo, o tondũ ĩtina “atumĩa” mataie Mũsumbĩ Leovoamu. (1 Asu. 12:6, 7; Sav. 92:12-14; Nth. 16:31) Kwoou ũneeni wa Mbalisilai  ĩũlũ wa kũvathũkany’a ũseo na ũthũku nũtonya kwĩthĩwa wakonetye mathĩna ma mwĩĩ kana maũndũ ala ũtaĩ atonya kwĩka nũndũ wa ũkũũ. Nĩweetĩkĩlile kana aĩ anambĩĩa kwaa matũ na nĩwaekete kwĩw’a mũsamo wa syĩndũ nũndũ wa ũkũũ. (Mũta. 12:4, 5) Kwoou Mbalisilai nĩwe mwene weesũvie Ndaviti athi na mũndũũme ũtaĩ mũkũũ weetawa Kimiamu, ũla ũtonya kwĩthĩwa aĩ mwana wa ũ Mbalisilai.—2 Sam. 19:35-40.

Ũalyũku ũla ũwetetwe mwambĩĩonĩ ũkonetye ũkũũ wĩonany’a woni ũilye ũla Mbalisilai waĩ naw’o. Ĩndĩ ĩvindanĩ yĩĩ yitũ kĩla kĩnathĩnĩkĩiwe ti maũndũ makonetye mũndũ ũmwe na ũtonyi wake, tondũ vaendie ĩvindanĩ ya Mbalisilai. Vanaĩ vata wa kũsũanĩa nesa kĩla kĩtonya kwĩthĩwa kĩ kĩseo kwa atumĩa aĩkĩĩku nthĩ yonthe.

Atumĩa asu me wĩnyivyo, na kwoou nĩmonete kana ethĩwa nĩmeũnenga ana-a-asa ala mate akũũ mawĩa amwe meethĩĩtwe maitethya kwa ĩvinda yĩasa, ũseũvyo wa Yeova nũũlũlũmĩĩlw’a kwondũ wa wongeleku wa ĩvinda yũkĩte. Mavinda maingĩ wĩthĩaa ana-a-asa asu akũũ nĩmo mamanyĩĩtye ala mate akũũ, o tondũ Mbalisilai ũtonya kwĩthĩwa nowe wamanyĩĩtye mwana wake, na o tondũ mũtũmwa Vaulo wamanyĩisye Timotheo. (1 Ako. 4:17; Avi. 2:20-22) Ana-a-asa asu mate akũũ nĩmonanĩtye kana mo nĩ “mĩthĩnzĩo,” na nĩmatonya kũtetheesya nĩ kana “mwĩĩ wa Klĩsto wakwe.”—Aev. 4:8-12; sianĩsya na Motalo 11:16, 17, 29.

Andũ aingĩ nthĩnĩ wa kĩkundi kya andũ ma Ngai nthĩ yonthe ala matiĩe angĩ ianda syĩ kĩvathũkany’o nĩmatonya kũtanĩa kwĩanĩsya mawĩa angĩ meũ kana maingangĩ ũthũkũminĩ wa Yeova.

Mwana-a-asa ũmwe wĩtawa Marco, ũla waĩ mũsyaĩĩsya wa kũthyũlũlũka kwa ĩvinda ya myaka 19, aĩtye, “Yu nĩndonya kũvikĩa aũme mate Ngũsĩ ala matwaĩte eĩtu-a-asa kĩkundinĩ kitũ.”

Nake Geraldo, ũla waĩ mũsyaĩĩsya wa kũthyũlũlũka kwa ĩvinda ya myaka 28, aĩtye ũũ: “Mĩvango ĩla twĩ nayo myeũ nĩ kũtetheesya ala mavoie na kũmanyĩsya andũ aingangĩ Mbivilia.” Ongelete kwasya kana we na mũka wake yu nĩmamanyĩasya andũ 15 Mbivilia, na kana andũ kauta ala matwĩe mavoete yu nĩmokaa maũmbanonĩ.

Nake Allan, ũla ũwetetwe vau ĩũlũ, aĩtye: “Yu twĩ na mwanya wa kwĩyumya mũno kwondũ wa wĩa wa kũtavany’a. Nĩtũtanĩaa kũtavany’a kũla kwĩ andũ aingĩ, isionĩ sya viasala, na kũtavya atũi ũvoo. O na ve atũi elĩ manookie Nyũmbanĩ ya Ũsumbĩ.”

Ethĩwa wĩ mwana-a-asa mũĩkĩĩku na wĩ na ũtonyi na nũkwatĩte kĩanda kyeũ katĩ wa andũ ma Ngai, ve nzĩa ĩngĩ ya mwanya ũtonya kũtetheesya nthĩnĩ wa ũthũkũmi. Nũtonya kũkwata mbau wĩa wa Yeova kwa kũtũmĩa ũmanyi mwingĩ ũla wĩ naw’o kũtetheesya aũme ala mate akũũ nthĩnĩ wa kĩkundi. Russell, ũla ũwetetwe vau ĩũlũ, aĩtye atĩĩ: “Yeova nũendeee kũmanyĩsya na kũtũmĩa amũika ala aseo na me na inengo.” Asyokete akasya: “Ana-a-asa nĩmatethekaa nũndũ wa nzĩa yoo nzeo ya kũmanyĩsya na kwĩkĩa angĩ vinya.”—Sisya ĩsandũkũ “ Tetheesya Aũme ma Mũika Meke Kyonthe Kĩla Matonya.”

Ethĩwa nũnalikile ũthũkũminĩ ũngĩ wĩ kĩvathũkany’o, endeea kwĩthĩwa na woni ũla waĩlĩte. Wĩa ũla ũtethasya kuma ngoonĩ nũkiitĩte ngoo sya andũ aingĩ, na no ũendeee kwĩka ũu. Ala angĩ nĩmakwendete na no maendeee kũkwenda.

Na ũndũ ũla wa vata vyũ nĩ kana nũtanĩthĩtye ngoo ya Yeova. Ndatonya ‘kũlwa nĩ wĩa waku na wendo ũla wonanĩtye kwondũ wa syĩtwa yake, nĩkwĩthĩwa nĩwamathũkũmie ala atheu, o na yu nũmathũkũmaa.’ (Aevl. 6:10) Ndeto isu mbeveee iĩkĩĩthĩtye onthe kana  watho wake ndũkonetye mawĩa ala tũminĩte kũtethya me moka. Yeova akwonaa wĩ wa vata mũno vyũ, na ndesa kũlwa nue nũndũ wa kĩthito kĩla waĩ nakyo na kĩla o na yu wĩ nakyo kya kũmwendeesya!

Nata ethĩwa we mwene ndwĩ ũmwe katĩ wa ala makwatĩte kĩanda kĩ kĩvathũkany’o na kĩla manaĩ nakyo o tondũ vawetetwe vau ĩũlũ? Ũndũ ũsu waneenewa no ũtonya kwĩthĩwa ũkũkonetye mũno. Ata?

Ethĩwa yu nũtonya kwĩthĩwa ũneena na mwana-a-asa mũkũũ na mũĩkĩĩku ũla ũnakwatie kĩanda kyeũ, nũtonya kũtetheka nũndũ we nĩ mũimu kĩ-veva na e na ũmanyi wa myaka mingĩ. Mũkũlye ũtao. Mũkũlye mawoni. O na ĩngĩ no ũsisye ũndũ ũtũmĩaa ũmanyi ũla wĩ naw’o ayĩanĩsya kĩanda kĩla yu ũnengetwe.

Kwoou ethĩwa wĩ mwana-a-asa mũkũũ ũnakwatie kĩanda kyeũ, kana wĩ mwana-a-asa kana mwĩĩtu-a-asa ũtonya kũtetheka kumana na ũmanyi wa ala akũũ, ĩkala wĩsĩ kana ũĩkĩĩku wa ala mamũthũkũmĩte Yeova kwa ĩvinda yĩasa na maendeee kũmũthũkũma nĩ wa vata methonĩ make.