Mũsoa ũsu wa kwendeesya waĩtye: “Ethĩwa wĩona kũthĩnw’a kwa ngya, na ũsili wa katĩ na ũlũngalu maivetwa na ũng’endu kĩlungunĩ kĩnene kya nthĩ, ndũkaseng’e ũndũ wa ũndũ ũsu: nũndũ ũmwe ũla wĩ ĩũlũ kwĩ ala me ĩũlũ nũsiasya; na ve ala me ĩũlũ kwĩ asu.”​—⁠Mũta. 5:⁠8.

Kwa kũsisya kwa mũndũ, no twasye mũsoa ũsu ũneeneete atongoi ma silikalĩ me oka. Ĩndĩ twaũsũanĩa mũnango, nĩtũkwona no ũsyokete ũkaweta ũw’o ĩũlũ wa Yeova, na ũw’o ũsu nũtũkiakiasya na ũkatwĩkĩa vinya.

Ĩandĩko ya Mũtavan’ya 5:8 yĩwetete mũtongoi ũthĩnasya ngya na kũitw’ĩĩa sila ũte wa katĩ. Mũtongoi ũsu aĩle kũlilikana kana nĩvatonyeka akethĩwa asyaĩĩw’e nĩ mũndũ ũngĩ wĩ na kĩanda kĩnenange kwĩ we, kana wĩ na ũkũmũ mũnenange silikalĩnĩ. Na nĩvatonyeka vakethĩwa angĩ me na ũkũmũ mũnene kwĩ asu onthe. Nĩ ũndũ wa kũmakya kũmanya kana silikalĩnĩ sya andũ, atongoi asu onthe nĩmatonya kwĩthĩwa me alũsani, na ũu ũituma andũ maũmĩa mũno nũndũ wa ũlũsani woo.

Ĩndĩ o na maũndũ mathũka ata, nĩtũkiakiaw’a nĩ kũmanya kana Yeova ethĩawa ‘asyaĩĩsye ala me ĩũlũ’ silikalĩnĩ sya andũ. No tũmwĩkaĩle Ngai atũtetheesye na tũimwaũĩa mĩio yitũ. (Sav. 55:22; Avi. 4:​6, 7) Nĩtwĩsĩ kana “metho ma Yeova maendaa kũũ na kũũ nthĩ yonthe, eyonan’ye e vinya kwondũ wa ala ngoo syoo imwelekele syĩ mbĩanĩu.”​—⁠2 Mav. 16:⁠9.

Kwoou, ĩandĩko ya Mũtavan’ya 5:8 yĩtũlilikany’a ũndũ nthĩ ĩno twĩkalaa ĩilye; kĩla ĩvinda vethĩawa mũndũ wĩ na ũkũmũ mũnenange. Na ũndũ ũla wa vata ĩandĩko yĩĩ yĩũtũlilikany’a nĩ kana Yeova nĩwe wĩ na ũkũmũ ũla mũnene vyũ; nĩwe Mũnene wa Onthe. Yu nũendeee kũsumbĩka kwĩsĩla Mwana wake, Yesũ Klĩsto, Mũsumbĩ wa Ũsumbĩ wake. Mwene Vinya W’onthe, ũla wĩthĩawa ene kĩla kĩndũ na kĩla mũndũ, nĩ mũlũngalu vyũ, o vamwe na Mwana wake.