Ekai twone ũndũ Mbivilia ĩsũngĩĩte makũlyo asu.

Ĩandĩko ya Meko ma Atũmwa 24:15 yĩtwĩĩte kana kũkeethĩwa na “ũthayũũkyo wa ala alũngalu na ala mate alũngalu.” Ala alũngalu nĩ ala mamwĩw’aa Ngai yĩla maĩ thayũ, na kwoou masyĩtwa moo nĩmaandĩkĩtwe ĩvukunĩ ya thayũ. (Mal. 3:16) Amwe ma ala mate alũngalu nĩ ala makwie matakwatĩte mwanya mũseo wa kũmũmanya Yeova, na kwoou masyĩtwa moo mayaandĩkwa ĩvukunĩ ya thayũ.

Ĩandĩko ya Yoana 5:28, 29 yĩneenee ikundi o isu ilĩ iwetetwe nthĩnĩ wa Meko ma Atũmwa 24:15. Yesũ aisye kana “ala meekie maũndũ maseo” makauma na kũkwata “ũthayũũkyo wa thayũ,” na “ala meekie maũndũ mathũku” maikwata “ũthayũũkyo wa ũsilĩlo.” Ala alũngalu nĩ ala meekaa maũndũ maseo matanakw’a. Na kwoou makakwata ũthayũũkyo wa thayũ nũndũ masyĩtwa moo makeethĩwa maandĩkĩtwe ĩvukunĩ ya thayũ. Kĩvathũkany’o na asu, ala mate alũngalu meekaa maũndũ mathũku matanakw’a. Mo makakwata ũthayũũkyo wa ũsilĩlo. Masyĩtwa moo mayaandĩkwa ĩvukunĩ ya thayũ, na kwoou mathayũũkw’a vakeethĩwa ve ĩvinda ya ũsilĩlo, kana ya kũsyaĩĩw’a na kwĩkĩwa kĩthiminĩ. Ĩvindanĩ yĩu makeethĩwa na mwanya wa kũmũmanya Yeova na kũĩkĩĩthya kana masyĩtwa moo nĩmaandĩkwa ĩvukunĩ ya thayũ.

Ĩandĩko ya Ũvuany’o 20:12, 13 yĩeleetye kana onthe ala makathayũũkw’a makeethĩwa maĩlĩte kũatĩĩa ‘maũndũ ala maandĩkĩtwe mavukunĩ ma kũkũnzwa,’ kana kwa ndeto ingĩ, mĩao myeũ ĩla tũkanengwa ĩvindanĩ yĩu. Ala makethĩwa mate ewi makaanangwa.—Isa. 65:20.

Ĩandĩko ya Ndanieli 12:2 yathanie kana amwe makwie nĩmakaamũka, amwe “kũvika thayũ ũtathela, na amwe kũvika kũsonoka na kũvũthw’a kũtakathela.” Mũsoa ũsu ũwetete mũthya wa onthe ala makathayũũkw’a, naw’o ũkeethĩwa ‘thayũ ũtathela’ kana ‘kũvũthw’a kũtakathela.’ Kwoou myaka 1,000 yathela, amwe makakwata thayũ wa tene na tene, namo angĩ makaanangwa tene na tene.—Ũvu. 20:15; 21:3, 4.

Kwasũanĩa ngelekany’o ĩno. Ikundi isu ilĩ sya ala makathayũũkw’a no ielekanw’e na andũ mekwenda kũthi nthĩ ĩngĩ kwĩkala kw’o. Ala alũngalu no maelekanw’e na ala manengetwe mavalũa ma kũthũkũma nthĩ ĩsu (work visa) kana mavalũa ma kwĩkala ku ĩvinda yĩasa (resident visa). Na kwoou silikalĩ ya nthĩ ĩsu nĩyĩthĩawa ĩmesĩ na nĩmanengae ũthasyo wĩana ũndũ mũna. Kĩvathũkany’o namo, ala mate alũngalu no ta andũ manengwa mavalũa ma kwĩkala nthĩ ĩsu kwa kavinda kanini (temporary visa) kana o ma kũtembea ku kwa ĩvinda ĩna (visitor’s visa). Andũ ta asu maĩlĩte kwamba kwĩanĩsya maũndũ mana matanetĩkĩlw’a kũendeea kwĩkala nthĩ ĩsu. O ta ũu, ala mate alũngalu mathayũũkw’a makendeka maatĩĩe mĩao ya Yeova na mayĩĩkĩĩthya kana mo nĩ alũngalu nĩ kana metĩkĩlw’e kũendeea kwĩkala Nthĩ Nzaũ. O na ethĩwa mũndũ akwatĩte mavalũa meva mbeenĩ ma kũmwĩtĩkĩlya kũlika nthĩ ya ũeninĩ, ĩtina no ese kũtw’ĩka laiaa wa nthĩ ĩsu kana akeka kũlũngw’a. Ũtwi wa mũthya wĩkawa kwosana na woni wake na mwĩkalĩle wake e nthĩ ĩsu. Kwoou ũtwi wa mũthya wa onthe ala makathayũũkw’a ũkeekwa kwosana na ũĩkĩĩku woo na mwĩkalĩle woo yĩla maũndũ makatw’ĩkĩthw’a meũ.

Yeova nĩ Ngai mũlũngalu na ũsilaa katĩ. Na ti ũu w’oka. Nĩ Ngai wĩ ĩnee. (Kũt. 32:4; Sav. 33:5) Akoonany’a nũtwendete kwa kũthayũũkya ala alũngalu na ala mate alũngalu. Ĩndĩ onthe makeethĩwa maĩlĩte kũatĩĩa myolooto yake ya ũseo na ũthũku. Ala maketĩkĩlw’a kwĩkala thayũ tene tene yĩla maũndũ makatw’ĩkĩthw’a meũ, no ala makonany’a kana nĩmamwendete na nĩmekũatĩĩa myolooto yake.