Mũndũ mũka wĩtawa Rosie aĩtye atĩĩ: “Nĩnaendeeie kwĩmakĩa ĩũlũ wa maũndũ ala noonaa ta mathũku o na kau kwa w’o maũndũ asu mayaĩ mathũku ũndũ namonaa.” Nĩ mĩsoa yĩva ya Mbivilia yamũtetheeisye? Ĩandĩko yĩmwe yamũtetheeisye nĩ Mathayo 6:34, yĩla yaĩtye atĩĩ: “Mũikemakĩe ĩndĩ ũndũ wa ũnĩ; nũndũ ũnĩ ũkeemakĩa e w’o. Mũthenya nĩwĩanĩwe nĩ ũthũku waw’o.” Rosie aĩtye kana ndeto isu sya Yesũ nĩsyamũtetheeisye aeka kwĩmakĩa ĩũlũ wa kĩla kĩtonya kwĩkĩka ũnĩ. Ongeleele kwasya atĩĩ: “Vandũ va kwĩyongeleela mawĩmakĩo nũndũ wa maũndũ matanamba kwĩthĩwa, kana o na mateĩsa kwĩthĩwa, nĩnamanyie kana kĩla mũthenya naĩ na mathĩna meanĩte.”

Nake Yasmine nĩwamanyie kana mawĩmakĩo maendeee kũmũsumbĩka. Aĩtye atĩĩ: “Mĩthenya mingĩ nĩnaĩaa, o na ve mĩthenya ĩmwe ndakomaa. Nĩnamanyie kana mosũanĩo mataĩle maendeee kũnũmĩsya.” Nĩ ĩandĩko yĩva yamũtetheeisye? Aĩtye kana atetheeiw’e nĩ ĩandĩko ya 1 Vetelo 5:7, yĩla yaĩtye atĩĩ: “Mũkĩmwiĩa kwĩmakĩa kwenyu kw’onthe, nũndũ nĩwe ũmũsũvĩaa.” Yasmine aĩtye atĩĩ: “O ũndũ ĩvinda yaendeee na kũvĩta, now’o naendeeie kũmũvoya Yeova, nake nĩwasũngĩaa mboya syakwa. Neewie ta naũa mũio mũito kuma ituonĩ syakwa. Ve mavinda nĩthĩawa na mosũanĩo mataĩle, ĩndĩ yu nĩnĩsĩ kĩla naĩle kwĩka nĩ kana nĩmasinde.”

Mũndũ mũka wa mũika wĩtawa Isabella aĩtye atĩĩ: “Nĩona kũkũĩĩsya maũndũ nĩ ũndũ tũsyaĩtwe naw’o nũndũ o na ĩthe wakwa ekaa oou. Nĩnĩleaa kwĩka maũndũ ala ma vata nĩ kana nĩkale o mana kana nĩloele televiseni. Kũkũĩĩsya maũndũ nĩ kĩmanyĩo kĩthũku nũndũ kĩtumaa mũndũ ethĩwa na mawĩmakĩo na nĩkũtumaa atethya wĩa naĩ.” Mwolooto ũla wamũtetheeisye wĩ ĩandĩkonĩ ya 2 Timotheo 2:15, yĩla yaĩtye atĩĩ: ‘Thangaaa kwĩnengane mwene wĩtĩkĩlwe nĩ Ngai, mũtethya wa wĩa ũtasonokw’a.’ Isabella aĩtye atĩĩ: “Ndyendaa Yeova alee kũtanĩthw’a nĩ wĩa wakwa aĩ no ũndũ wa kũlea kũũtethya ĩvindanĩ yĩla yaĩle.” Yu nĩwĩkĩte moalyũku manene.

O nake Kelsey aĩtye atĩĩ: “Naĩ ndonya kwĩthĩwa na wĩa ũvangĩĩwe ĩla waĩle kũthela, ĩndĩ neeteelaa nĩse kũũtethya ndatĩkanĩ sya mũthya. Ũu nĩwatumaa nĩĩa, nĩemwa nĩ kũkoma, na nĩthĩwa na mawĩmakĩo. Kũkũĩĩsya maũndũ kũyandethasya o na vanini.” Kelsey nĩwakwatie ũtethyo kuma ĩandĩkonĩ ya Nthimo 13:16, yĩla yaĩtye atĩĩ: “Kĩla mũndũ wĩ kĩlĩko nũtethasya wĩa na ũmanyi; ĩndĩ ndia nĩyonanasya ũtumanu wayo.” Kelsey nĩ ũeleetye kĩla weemanyĩisye ĩtina wa kũsũanĩa ndeto sya ĩandĩko yĩu. Aĩtye atĩĩ: “Wĩthĩawa wĩ ũndũ wa ũĩ kũmanya maũndũ ala waĩle kwĩka na ũyĩvanga tene ũndũ ũũmeka. Yu mesanĩ yakwa nĩnĩthĩawa na kavuku nĩandĩkĩte maũndũ ala nĩvangĩĩe kwĩka, na kwĩka ũu nĩkũndetheeasya kwĩvanga nĩ kana ndikese kwĩka maũndũ ndatĩkanĩ sya mũthya.”

Mũndũ mũka wĩtawa Kirsten aĩtye atĩĩ: “Mũũme wakwa nĩwandiie na syana inya nini.” Nĩ mwolooto wĩva wa Mbivilia wamũtetheeisye? Ĩandĩko ya Nthimo 17:17 yaĩtye ũũ: “Mũnyanya nĩwendanaa ĩndĩ yonthe; na mwana-a-ĩthe asyaiwe kwondũ wa kũthĩnũkasya.” Kirsten nĩwakũlilye ũtethyo kuma kwa athaithi ala angĩ ma Yeova. Atethekie ata? Easya atĩĩ: “Anyanya makwa nĩmandetheeisye kwa nzĩa syĩ kĩvathũkany’o! Neethĩaa amwe maetie matunda, mboka, na malaa na makaia mũomonĩ kwakwa. Na ve mavinda atatũ kĩkundi kĩnini kya andũ kyandetheeisye nĩ na syana syakwa kũthamĩĩa nyũmba ĩngĩ. Ve mũndũ ũngĩ wamanthĩie wĩa. Anyanyawa mayaaũlwa ninyie.”

O nake Delphine, ũla ũwetiwe mwambĩĩonĩ, ve mavinda weew’aa e weka. Ĩtina wa kũkwatwa nĩ maũndũ mathũku ala twonie, aĩtye ũũ: “Noonaa andũ ala angĩ maendeee kwĩkala nesa me vamwe, ĩndĩ nyie nekalaa nĩ weka na nde mũtanu. Neew’aa vate mũndũ ũkũnthĩnĩkĩa.” Ĩandĩko yĩmwe yamũtetheeisye nĩ Savuli 68:6, yĩla yaĩtye: ‘Ngai nũtumaa ala me ĩvou matũa nyũmba.’ Aendeee kwasya atĩĩ: “Nĩneesĩ kana ĩandĩko yĩu yĩineeneaa ĩũlũ wa kwĩthĩwa na nyũmba ya kwĩkala ĩvindanĩ yĩĩ. Ĩndĩ, ĩandĩko yĩu yĩneeneaa ĩũlũ wa ũndũ Ngai ũtũnengae ũsũvĩo kwĩsĩla ana-a-asa ala matũthĩnĩkĩaa na makatũkiakisya. Ĩndĩ nĩnamanyie kana naaĩle kwamba kũmũthengeea Yeova nĩ kana nĩtonye kwĩthĩwa na ngwatanĩo nzeo na ala angĩ. Kwoou, nĩnatetheeiw’e mũno nĩ ĩandĩko ya Savuli 37:4, yĩla yaĩtye atĩĩ: ‘Ĩtan’ye nthĩnĩ wa Yeova; nake akakũnenga kĩla ũvoyete na ngoo yaku.’”

Delphine aminĩĩe na ndeto ii: “Nĩnamanyie kana naĩle kũlũlũmĩĩlya ngwatanĩo yakwa na Yeova. Nĩwe ũtonya kũtũnenga ũtethyo ũla mũseo vyũ. O na nĩnaandĩkie maũndũ ala ndonya kũtanĩa kwĩka nĩ na andũ angĩ nĩ kana nĩthĩwe na anyanya mamwendete Yeova o takwa. Nĩneemanyĩisye kwonaa ndaĩa nzeo sya ana-a-asa na kũtata vyũ ndikasũanĩe o na vanini ĩũlũ wa mawonzu moo.”

Vate nzika, o namo andũ ala mamũthũkũmaa Ngai ti eanĩu, na kwoou nĩmathĩnaa. Ngũsĩ sya Yeova nikwatawa nĩ mathĩna o ta andũ ala angĩ. Ĩndĩ momanyĩsyo ma Mbivilia nĩmatumaa andũ mamanya kũtetheesya ala angĩ ĩla makwatwa nĩ mathĩna. Kwoou, nĩ ũndũ wa ũĩ kwĩthĩwa na anyanya mailyĩ ũu. Ĩndĩ myolooto ya Mbivilia no ĩtetheesye andũ ala me na mathĩna matathela ĩvindanĩ yĩĩ, ta ũwau wa ĩvinda yĩasa kana kyeva?