“Kĩndũ o na kĩva kĩla mwĩvoya Asa ĩsyĩtwanĩ yakwa, akamũnenga.”​—Yoana 16:⁠23.

Ndeto sya Yesũ syonanĩtye ũtheinĩ kana Yeova ndendaa tũmũvoye kwĩsĩla mĩvw’anano, atheu, alaĩka, kana aa-ũmae maitũ ala makwie. Vandũ va ũu, twaĩle kũmũvoya ĩsyĩtwanĩ ya Yesũ Klĩsto. Yĩla twamũvoya Ngai ĩsyĩtwanĩ ya Yesũ, twĩthĩawa tũyonany’a nĩtũkũelewa kana ethukĩĩasya mboya sitũ nũndũ wa kĩla Yesũ watwĩkie. Nĩkyo kĩtumi Yesũ waisye atĩĩ: “Vaiĩ mũndũ wũkaa kwa Asa atesĩle kwakwa.”​—Yoana 14:⁠6.

‘Mũtulũĩlei ngoo syenyu.’​—Savuli 62:⁠8.

Yĩla tũũmũvoya Yeova, twaĩle kũneena nake o ũndũ tũtonya kũneena na mũsyai ũtwendete. Vandũ va kũsoma mboya ĩvukunĩ kana kwinĩlĩĩla o mboya ila ila, twaĩle kũneenaa nake kuma ngoonĩ na twĩ na ndaĩa.

“Twavoya kĩndũ o na kĩva kwosana na kwenda kwake, nũtwĩthukĩĩasya.”​—1 Yoana 5:​14.

Yeova Ngai nũtũtavĩtye Mbivilianĩ maũndũ ala ũtwĩkaa na ala wendaa twĩke. Kwa ngelekany’o, nĩ kana ethukĩĩsye mboya sitũ, endaa tũmũvoye “kwosana na kwenda kwake.” Kwoou nĩtwaĩle kwĩmanyĩsya Mbivilia nĩ kana tũmũmanye nesa. Tweeka ũu, now’o tũkavoyaa kwa nzĩa ĩtonya kũmwendeesya.

Voya Ĩũlũ wa Mavata Maku. No tũmũvoye Ngai atwĩanĩĩsye mavata maitũ ma kĩla mũthenya, ta lĩu, ngũa, na ũkomo. O na no tũmũvoye atũnenge ũĩ wa kwĩka motwi maseo, na ũkũmbaũ wa kũmĩanĩsya na mathĩna. O na ĩngĩ, no tũmũvoye nĩ kana atũtetheesye twĩthĩwe na mũĩkĩĩo, atũekee, na aitũtw’ĩĩka.​—​Luka 11:​3, 4, 13; Yakovo 1:​5, 17.

Voyeaa Ala Angĩ. Asyai nĩmatanaa mũno yĩla moona syana syoo syendanĩte. O ta ũu, Yeova nĩwendaa syana syake ila syĩ ĩũlũ wa nthĩ ithĩnĩkĩanĩe. Kwoou, nĩtwaĩle kũvoyaa kwondũ wa ũla tũtwaanĩte nake, syana sitũ, andũ ma mũsyĩ, na anyanya maitũ. Mũmanyĩw’a Yakovo atwĩĩte ‘tũvoyeanĩe.’​—Yakovo 5:​16.

Tũngaa Mũvea. Mbivilia yaĩtye atĩĩ ĩũlũ wa Mũmbi witũ: “[Nĩwamwĩkie] maũndũ maseo ta kũmũnenga mbua kuma ĩtunĩ na mavinda ma ngetha mbingĩ, na kũmũnenga lĩu ũmwĩanĩe, na atuma mwĩthĩwa na ũtanu mwingĩ ngoonĩ syenyu.” (Meko ma Atũmwa 14:17) Yĩla twasũanĩa ĩũlũ wa maũndũ onthe ala Ngai ũtwĩkĩte, nĩtwĩw’aa twaĩle kũmũvoya tũmũtũngĩe mũvea. O na ĩngĩ, maũndũ ala twĩkaa nĩmaĩle kwonany’a kana nĩtũmũtũngĩaa mũvea.​—Akolosai 3:​15.

Mavinda amwe no tũtũlĩke ngoo yĩla twoona mboya sitũ iteũsũngĩwa na mĩtũkĩ, o na kau twavoya kuma ngoonĩ. Ũu nĩ kwonany’a kana Ngai ndatũthĩnĩkĩaa? Aiee. Kwasũanĩa ngelekany’o ii iatĩĩe ikwonany’a kana kĩla twaĩlĩte kwĩka no kũendeea kũvoya.

Steve, ũla tũwetie mwambĩĩonĩ, aĩtye, “Keka ti mboya, nĩthĩwa neeyĩtũkie myaka mingĩ mĩvĩtu.” Nĩ kyaũ kyamũtetheeisye? Nĩwambĩĩe kwĩmanyĩsya Mbivilia na oona vata wa kũendeea kũvoya na kĩthing’ĩĩsyo. Aĩtye atĩĩ: “Nĩnĩmũvoyaa Ngai ngamũtũngĩa mũvea nũndũ wa ũtethyo mũnene ũla nĩkwatĩte kuma kwa anyanyawa. Yu nĩw’aa nĩ mũtanu kwĩ ĩvinda yĩngĩ o na yĩva.”

Nao nata Jenny, ũla weew’aa ataĩlĩte kwĩthukĩĩw’a nĩ Ngai? Aĩtye, “Yĩla naemeeiwe vyũ, namũvoyie Ngai andetheesye nĩelewe nĩkĩ neew’aa nde wa vata.” Kwĩka ũu kwamũtethisye ata? Aendeee kwasya: “Kũneena na Ngai nĩkũndethetye kwĩyonaa ũndũ we ũmbonaa, na kũmanya kana o na ethĩwa nĩngwĩsilĩla nũndũ wa maũndũ mathũku ala neekie, we ndanzilĩlaa. O na ĩngĩ, kũvoya nĩkũndethetye ndikakw’e ngoo.” Yu maũndũ mailye ata? Easya, “Mboya nĩndetheetye kũĩkĩĩa kana Yeova e kw’o, nũmbendete, nũnthĩnĩkĩaa, na ĩtumĩte nĩmwona ta Ĩthe wakwa na Mũnyanyawa, ũla ũndetheeasya mavinda onthe neeka kwenda kwake.”

O na ĩngĩ, kwasũanĩa ngelekany’o ya Isabel. Yĩla waitavie, ndakĩtalĩ syamwĩie akasyaa mwana wĩ na wonzu mũnene wa mwĩĩ. Ũndũ ũsu wamũtũlile ngoo mũno. O na andũ amwe mamwĩaa aumye ĩvu yĩu. Isabel aĩtye, “Neew’aa ta ngũkw’a nũndũ wa woo ũla waĩ ngoonĩ yakwa.” Nĩ kyaũ kyamũtetheeisye? Aĩtye, “Namũvoyie Ngai mũno nĩ kana andetheesye.” Ĩtina wa ĩvinda nĩwesie kũsyaa kamwana na aketa Gerard. Kana kau kaĩ na thĩna wa mwĩĩ o tondũ ndakĩtalĩ syamũtavĩtye. Ĩndĩ we Isabel nĩwĩw’aa Ngai ta wasũngĩie mboya syake? Ĩĩ, nĩwĩw’aa ũu! Nĩkĩ tũkwasya ũu? Aĩtye, “Nĩmanyaa mboya syakwa nĩsyasũngĩiwe yĩla noona kĩmwana kyakwa, kĩla yu kĩ na myaka 14, kĩitanĩa thayũ o na kau kĩ na mathĩna, na ũsu nĩw’o ũathimo ũla mũnene vyũ Yeova Ngai ũnengete.”

Kwĩw’a angĩ maielesya maũndũ ta asu kuma ngoonĩ, kũtumaa tũsũanĩa ndeto sya mũandĩki wa Savuli, ũla waisye: “Yeova, nĩwĩw’ĩte kwenda kwa ala auu: ũkamaseũvya ngoo syoo, ũkatuma kũtũ kwaku kwĩw’a.” (Savuli 10:17) Isu nĩ itumi nzeo mũno sya kũendeea kũvoya na kĩthing’ĩĩsyo!

Mbivilianĩ nĩtũkwataa mboya mbingĩ sya Yesũ. Mboya ĩmwe yĩsĩkĩe mũno nĩ ĩla wamanyĩisye amanyĩw’a make. Tũtonya kwĩmanyĩsya kyaũ mboyanĩ ĩsu?