ŨNDŨ ŨTONYA KŨSINDA KĨMENA
4 | Mwĩkwatye Ngai Aũtetheesye
Kĩla Mbivilia Ĩmanyĩasya:
“Ũsyao wa veva nĩ wendo, ũtanu, mũuo, wũmĩĩsyo, kwĩka angĩ nesa, ũseo, mũĩkĩĩo, ũuu, na kwĩsiĩĩa.”—AKALATIA 5:22, 23.
Kĩla Yĩthĩawa Ĩyonany’a:
No tũsinde kĩmena twamwĩkwatya Ngai atũtetheesye. Ve nguma tũtesa kwĩthĩwa nasyo tũtatetheew’e nĩ veva wake mũtheu. Kwoou vandũ va kũtata kũsinda kĩmena tũtũmĩĩte vinya witũ, nũseo tũmwĩkwatye Ngai atũtetheesye. Tweeka ũu, tũkeethĩawa na woni ta ũũ mũtũmwa Vaulo waĩ naw’o: “Nĩndonya maũndũ onthe nũndũ wa vinya wa ũla ũndonyethasya.” (Avilivi 4:13) Na tũkeethĩwa tũtonya kwasya ũũ: “Ũtethyo wakwa nĩwumaa kwa Yeova.”—Savuli 121:2.
Ũndũ Ũtonya Kwĩka:
“Yeova nũtumĩte nĩekana na ũng’endu na ngatw’ĩka mũndũ wendete mũuo.”—WALDO
Mũvoye Yeova kuma ngoonĩ aũnenge veva wake mũtheu. (Luka 11:13) Mũkũlye aũtetheesye wĩthĩwe na nguma nzeo. O na ĩngĩ, ĩmanyĩsye ĩũlũ wa nguma ila Mbivilia ĩwetete itũtetheeasya kũsinda kĩmena, ta wendo, mũuo, wũmĩĩsyo, na kwĩsiĩĩa. Ĩkĩa kĩthito wĩke maũndũ matonya ũkũtetheesya wĩthĩwe na nguma isu. Na ũimantha anyanya ala o namo maendeee kwĩkĩa kĩthito methĩwe nasyo. Anyanya ta asu no ‘maũthuthye wĩthĩwe na wendo na meko maseo.’—Aevelania 10:24.
